ჩვენ ირგვლივ უამრავი სტერეოტიპია, რომელთა გათვალისწინებით საკუთარ თავს ბევრ რამეს ვუკრძალავთ. როცა საქმე წონის დაკლებას ეხება, ყველას ჰგონია, რომ იცის გახდომის ჯადოსნური ხერხი, მაგრამ ხშირად ისინი წონაში ვერ იკლებენ.

განსაკუთრებით რთულია, როცა აკრძალვა რაიმე სასიამოვნოს ეხება. სინამდვილეში, უამრავი რამ, რაც აქამდე მავნე პროდუქტად ითვლებოდა, თურმე სულაც არ ყოფილა ასეთი, ზოგიერთი კი, პირიქით, თურმე სასარგებლოც კია და წონის დაკლებაში გვეხმარება.

მაშ ასე, დავამსხვრიოთ დღემდე გავრცელებული მითები სწორი კვების შესახებ და ვნახოთ, თუ რატომ ვერ ვიკლებთ წონაში.

1. მიირთვით უშაქრო გაზიანი სასმელები

არა! თუკი ჯანსაღი კვება გაქვთ გადაწყვეტილი, მხოლოდ სიტყვა “უშაქრო” ნუ მოგხიბლავთ ამ შემთხვევაში, რადგან ნებისმიერი გაზიანი სასმელი უამრავ ქიმიკატს შეიცავს და ვერ ჩაითვლება ჯანსაღ საკვებად.

2. მიიღეთ ხილის წვენები

ესეც მითია. გამოწურვისას ხილი სასარგებლო თვისებების დიდ ნაწილს კარგავს, ამიტომ თუ შეგიძლიათ, ხილი ცოცხალი სახით მიირთვათ, არ თქვათ მასზე უარი.

3. საუზმე დღის ყველაზე მნიშვნელოვანი კვებაა

„საუზმეში განსაკუთრებული არაფერია“- სწორედ ამას გვეუბნებიან ენდოკრინოლოგები. თუ დილით არ გშიათ, შეგიძლიათ გამოტოვოთ ეს კვება და პირდაპირ ლანჩზე გადახვიდეთ.

4. ცხიმიანი საკვები წონაში მოგმატებთ

ბევრი ადამიანი დღემდე თვლის, რომ ყველანაირი ცხიმი მავნებელია და სიმსუქნეს იწვევს, მაგრამ გვავიწყდება ის, რომ მათ გარეშე სწორი მეტაბოლიზმი შეუძლებელია. ცხიმების გარეშე ორგანიზმი ვერ ითვისებს ვიტამინებს, რომლებიც ასე აუცილებელია ჩვენთვის. ამ დროს უფერულდება და თხელდება თმა, სწრაფად ბერდება კანი და ზეწოლას განიცდის ღვიძლი. სასარგებლო ცხიმებს შეიცავს ნიგოზი, თხილი, ზეთისხილი, ზეითუნის და მზესუმზირის ზეთი, ავოკადო, წითელი თევზი და კიდევ ბევრი სხვა პროდუქტი. ისინი ძალიან კარგად მოქმედებენ ორგანიზმზე და ამასთანავე, თრგუნავენ დიეტის დროს განცდილ გამუდმებულ შიმშილის გრძნობას. სწორედ ამიტომ არ ღირს სასარგებლო ცხიმებზე უარის თქმა.

5. საღამოს 6 საათის მერე არ ჭამოთ

შეიძლება ითქვას, ერთ-ერთი ყველაზე გავრცელებული და დამკვიდრებული მითია, რომლისაც ბევრს სჯერა. სინამდვილეში, დაძინებამდე სასურველია მინიმუმ 3 საათით ადრე მაინც ვივახშმოთ და ვახშამი იყოს მსუბუქი, მთელი დღის რაციონთან შესაბამისობაში მოსული. ის, რომ 6 საათის შემდეგ საკვების მიღება „მომაკვდინებელია“, ნამდვილად არ შეესაბამება სიმართლეს.