ცნობილმა კინომსახიობმა, ოდრი ტოტუმ ფილმის, "ამელის" გამოსვლის შემდეგ მილიონობით ადამიანის გული მოიგო. შავგვრემანი გოგონა დიდი თვალებითა და საოცარი გამოხედვით მაყურებელს მაშინვე შეუყვარდა და "ელფს" შეადარეს. კინოში ოდრი გულწრფელი და საკმაოდ ნიჭიერია, თუმცა მისი პირადი ცხოვრება ბევრი სირთულითა და გამოწვევით იყო სავსე.

ვარსკვლავი დაიბადა 1976 წელს სტომატოლოგისა და მასწავლებლის ოჯახში. ოდრის და მის და-ძმას მშობლები განსაკუთრებით თბილად ექცეოდნენ და სიყვარულით ზრდიდნენ. მსახიობს ბავშვობიდან უამრავი ზედმეტსახელი ჰქონდა - სულ ძალიან გამხდარი იყო და ახლაც მისი წონა 47 კილოგრამია.

ბავშვობაში გოგონას ოცნება ზოოლოგობა იყო. სკოლის წლებში კარგად უკრავდა ფორტეპიანოზე, თამაშობდა სასკოლო სპექტაკლებში. ოდრი სორბონის უნივერსიტეტში ფილოლოგადაც კი მუშაობდა. თუმცა, მალევე პარიზის დაპყრობა გადაწყვიტა და სხვადასხვა კასტინგზე წავიდა. 1990-იანი წლებიდან იგი რამდენიმე ცნობილ ფილმში გამოჩნდა, ხოლო ფილმში "ვენერას სილამაზის სალონი" მონაწილეობისთვის მან "სეზარის" პირველი ჯილდო მიიღო.

მაგრამ მისი კარიერის მთავარ ფილმად მაინც "ამელი" ითვლება, რამაც ოდრის მსოფლიო პოპულარობა და მაყურებლის ძალიან დიდი სიყვარული მოუტანა. ამ ფილმმა ოსკარის 9 ნომინაცია მიიღო, ხოლო ტოტუმ საუკეთესო მსახიობი ქალის ნომინაციაში - კიდევ ერთი "სეზარი". კიდევ ერთი დასამახსოვრებელი როლი მან ფილმში, "და ვინჩის კოდი", შექმნა, რომელიც კრიტიკოსებმა არც ისე კარგად შეაფასეს, მაგრამ ოდრის კარიერაში ესეც ძალიან მნიშვნელოვანი ნამუშევარი იყო. მსახიობისთვის ჯილდო არასოდეს ყოფილა მთავარი, ამიტომაც ფილმებზე შინაარსისა და პერსონაჟების აღწერის მიხედვით თანხმდებოდა. მის კარიერაში კი საეტაპო როლი და კიდევ ერთი "სეზარი" კოკო შანელის განსახიერებამ მოიტანა. ამ ბიოგრაფიულმა ფილმმა ოსკარიც მიიღო.

ოდრის საფრანგეთში ძალიან დიდ პატივს სცემენ. მას საპატიო ლეგიონის რაინდული ორდენიც კი გადასცეს, რაც საფრანგეთის უმაღლეს ჯილდოდ ითვლება. კინოსა და თეატრის გარდა, ოდრი მუსიკით, ხელოვნებითა და ფოტოგრაფიითაა გატაცებული. ხატავს ავტოპორტრეტებს, ქმნის მუსიკას და ინდოეთში პრიმატების შესასწავლადაც კი ჩავიდა.

ოდრი ტოტუ დღემდე ფრანგული სტილის სიმბოლოა. საკმაოდ მოკრძალებულად იცვამს, თუმცა მისმა მოკლე ვარცხნილობამ და დახვეწილმა სამოსმა ადამიანების გემოვნებაზე ძალიან დიდი გავლენა მოახდინა. მას ოდრი ჰეპბერნსაც ადარებდნენ და ცნობილია ისიც, რომ სახელი მშობლებმა სწორედ ჰეპბერნის სიყვარულის გამო დაარქვეს. თუმცა, ტოტუ დამოუკიდებლად გახდა ძალიან გამორჩეული და ინდივიდუალური მსახიობი.

ოდრი არასოდეს დაქორწინებულა და არც შვილები ჰყავს. პირად ცხოვრებას განსაკუთრებულად მალავს. დღესაც საკმაოდ აქტიური ქალია, საოცრად გამოიყურება და დროს ხელოვნებას უთმობს.

მას, როგორც ძალიან კეთილ და გულისხმიერ ადამიანად ახასიათებენ. "ყველაზე სასიამოვნოა, როცა ადამიანებს ნივთებს კი არა, ბედნიერ მოგონებებს ვჩუქნით." - ამბობს მსახიობი.