ბავშვობიდან გვასწავლიან, რომ უფროსებს უნდა დავეხმაროთ, ადამიანებს პატივი ვცეთ და საზოგადოების წინაშე სასარგებლო საქმეები გავაკეთოთ. თუმცა, ხშირად ზღვარი გვეშლება, სხვებისთვის ცხოვრებას ვიწყებთ და საკუთარ თავსა და სურვილებს ვივიწყებთ. ქვემოთ გაგიზიარებთ 5 მთავარ ნიშანს, რომლის მიხედვითაც ამოიცნობთ, რომ საკუთარ ცხოვრებას სხვა ადამიანებისათვის მსხვერპლად სწირავთ:

მოტივაცია გაკლიათ

ცხოვრება ძალიან ხანმოკლეა იმისათვის, რომ იგი არასწორ, ეგოისტ ადამიანებს მსხვერპლად შევწიროთ და მათი სურვილების შემსრულებლებად ვიქცეთ. პირველი ნიშანი იმისა, რომ რაღაცას თქვენი თავისთვის არ აკეთებთ, მუდმივი დაღლილობა და მოტივაციის ნაკლებობაა. დრო ძალიან ძვირფასია, რომელიც აღარ ბრუნდება, ამიტომაც შეეცადეთ, ტოქსიკურ ადამიანებს, რომლებიც თქვენგან გამუდმებით ყურადღებასა და პატივისცემას ითხოვენ, ჩამოშორდეთ და თქვენი თავისთვის იცხოვროთ.

თქვენ "ძალიან კარგ" ადამიანად გახასიათებენ

უკონფლიქტო, მშვიდი, პასუხისმგებლიანი - მსგავს ზედსართავებს ყველაზე ხშირად იმ ადამიანებისათვის იყენებენ, რომლებიც სხვების გულისთვის ცხოვრობენ. ისინი ცდილობენ, არ იჩხუბონ, საქმეები არ უგულებელყონ, თუნდაც ეს მათ სურვილებს ეწინააღმდეგებოდეს. ასეთი ადამიანები მზად არიან, ტოქსიკურ ადამიანებსა და მათ საუბარს დიდი ხნის განმავლობაში უსმინონ და მოითმინონ, რადგან არ სურთ, ვინმე გაანაწყენონ. ამას კი საკუთარი ნერვების ფასად აკეთებენ. შეწყვიტეთ სხვებისთვის იდეალურად ყოფნის სურვილი და თქვენს რეალურ საჭიროებებზე იფიქრეთ.

წყენას ითმენთ

მნიშვნელოვანია, ნებისმიერმა ადამიანმა საკუთარი თავის ფასი იცოდეს. ხშირად იმის გამო, რომ სხვებს არ ვაწყენინოთ, მათგან წყენას, უსამართლო დამოკიდებულებას უხმოდ ვითმენთ, რაც ძალიან ცუდი პოზიციაა. თუ თქვენ ასე ცხოვრებას განაგრძობთ, გამუდმებით დამცირებულ მდგომარეობაში მოგიწევთ ყოფნა და სხვებიც შეეჩვევიან იმ ფაქტს, რომ მათ უფლებას აძლევთ, გული გატკინონ და უსამართლოდ მოგექცნენ.

გამუდმებით ცდილობთ რაღაცის დამტკიცებას

ეს კიდევ ერთი ნიშანია იმისა, რომ სხვების გამო ცხოვრობთ. როცა ცდილობთ, რომ მშობელს, საყვარელ ადამიანს დაუმტკიცოთ, რომ საუკეთესო ხართ და ბევრი რამის გაკეთება შეგიძლიათ, რეალურად, თქვენს სურვილებს უგულებელყოფთ. არავისთვის არაფრის დამტკიცება არ გჭირდებათ. ადამიანებს უნდა უყვარდეთ ისეთი, როგორიც ხართ.

გიჭირთ "არას" თქმა

გეშინიათ ადამიანების განაწყენების და ამიტომ, უარს ვერაფერზე ამბობთ? ეს კიდევ ერთი ნიშანია, რომ ახლობლების, მეგობრების, სხვა ადამიანების გამო თქვენს რეალურ სურვილებზე უარს ამბობთ და მათ გამო ძალით აკეთებთ იმას, რაც არ გინდათ.

თუ თქვენს ეს ნიშნები გახასიათებთ, მაშინ დროა, საკუთარ ღირებულებებსა და პრინციპებს კიდევ ერთხელ გადახედოთ. გახსოვდეთ, ცხოვრება ძალიან ხანმოკლეა, რომ სხვებს მსხვერპლად შესწიროთ და გამუდმებით უარი თქვათ იმაზე, რაც ნამდვილად გსურთ.