ფრანგი მსახიობი და სტილის სიმბოლოდ აღიარებული ბრიჯიტ ბარდო 88 წლისაა. მან წარმატებისკენ მიმავალ გზაზე საკმაოდ რთული ეტაპები გაიარა. 15 წლის ასაკში საფრანგეთის პოპულარული და გავლენიანი ჟურნალები დაამშვენა და ძალიან წარმატებული მოდელი გახდა. სამოდელო კარიერის პარალელურად, მას გზა კინოშიც გაეხსნა. 18 წლის ასაკში უკვე პირველი როლი შეასრულა და ნელ-ნელა საფრანგეთის მასშტაბით ამ მიმართულებითაც გახდა ცნობილი.

მის ფილმოგრაფიაში 50-ზე მეტი ფილმი და მრავალი დასამახსოვრებელი როლი შედის. წარმატებული კარიერის პარალელურად კი, ცხოვრებაში არაერთი იმედგაცრუება და ტკივილი შეხვდა. ამის შემდეგ მან განაცხადა, რომ კინოში საკუთარი თავი ამოწურა, კარიერა მიატოვა და ერთგულ მეგობრებზე, ძაღლებზე ზრუნვა დაიწყო. დღეს გამორჩეული მსახიობის რამდენიმე შეხედულებას გაგიზიარებთ, თუ რას ფიქრობს ის ცხოვრების სტილისა და ადამიანებთან ურთიერთობების შესახებ:

ცხოვრებაში არაფერს ვნანობ. საერთოდაც, სინანული სრულიად უსარგებლოა.

ბევრი ქალისაგან განსხვავებით, არასოდეს ვყოფილვარ საკუთარ თავში დარწმუნებული. ალბათ, ამის საპასუხოდ, ან კიდევ ეჭვების გასაფანტად, ამპარტავანი გავხდი.

მშობლებმა მკაცრად აღმზარდეს, რაც ხანდახან მაწუხებდა, მაგრამ ახლა ამისთვის მათი მადლობელი ვარ. ვფიქრობ, ისინი აღფრთოვანებულები იყვნენ ჩემი კარიერით, მაგრამ, ამავდროულად არაერთგვაროვნების განცდა ჰქონდათ. იყო რაღაცები, რასაც უბრალოდ ვერ იგებდნენ.

ცხოველები ბავშვობიდანვე მიყვარდა. მაგრამ, მაშინ არ მყავდა. ომი იყო და პარიზში ცხოვრება გვიჭირდა. იმ დრომ ჩემს ცხოვრებაზე დიდი კვალი დატოვა. ფეიერვერკისა და ჭექა-ქუხილის ხმას დღემდე ვერ ვიტან, დაბომბვას მახსენებს.

რთული გზა გავიარე. კინო ჩემთვის თავისუფლება გახდა, მაგრამ როგორც კი ეს კარიერა ავირჩიე, საკუთარი თავი დამავიწყდა. ჩემი ცხოვრების პრინციპი ასეთია, რომ როცა რაღაცას ვაკეთებ, ვცდილობ, მაქსიმუმი გავცე.

არ უნდა გეშინოდეს იმის წარმოჩენის, ვინც რეალურად ხარ. ყოველთვის იმას ვაკეთებდი, რაც მინდოდა. უამრავ მამაკაცზე ძლიერი ვიყავი და საკუთარ სიტყვებსა და ქმედებებზე პასუხისმგებლობას ყოველთვის ვიღებდი.

ბედნიერება ბარომეტრში ვერცხლისწყალივითაა. მისი დონე ან უფრო მაღალია ან დაბალი. რაც შეეხება აბსოლუტურს, სრულყოფილებას, იდეალს... ხომ იცი, რომ ეს ყველაფერი არ არსებობს!

სიყვარულით ვსუნთქავ. ბევრი რამ მომენატრა ცხოვრებაში და ბევრი გავაკეთე უბრალოდ იმიტომ, რომ არ მინდოდა, საყვარელ ადამიანებს დავშორებოდი. იმის გამო, რომ სიყვარულში იმედგაცრუებას ვგრძნობდი, სიკვდილზე არაერთხელ მიფიქრია, მაგრამ შემდეგ მივხვდი, რომ არავის გამო ღირდა ასე ყოფნა.

არასოდეს მიფიქრია პლასტიკურ ქირურგთან მისვლაზე. არაფრის შეცვლა არ მინდოდა. ვიღებ ყველაფერს, რასაც ბუნება მაძლევს.

ცხოველთა კეთილდღეობა და მათზე ზრუნვა ახლა ჩემი მთავარი მიზანია. ცხოველთა უფლებების დამცველი ვარ. მათ არანაირი პოლიტიკა არ ეხებათ. არც მემარჯვენეები არიან და არც მემარცხენეები.

მე მამაკაცებს ჩემი ახალგაზრდობა და სილამაზე ვაჩუქე. ახლა რაც საუკეთესო მაქვს, სიბრძნე და გამოცდილება, ცხოველებს ვაძლევ.

მირჩევნია, დრო ცხოველებთან გავატარო, ვიდრე ადამიანებთან. ცხოველები გულწრფელები არიან. თუ მათ არ მოსწონხართ, უბრალოდ არ მიგიღებენ.

შინაურ ცხოველებს ტკივილი მხოლოდ მაშინ მოაქვთ, როცა კვდებიან.