ესპანელი მომღერალი ხულიო იგლესიასი ცოტა ხნის წინ 80 წლის გახდა. მან მსოფლიოს არაერთი ჰიტი აჩუქა და მსმენელს თავი განსაკუთრებით შეაყვარა. თუმცა, მისი პირადი ცხოვრება უამრავი თავგადასავლით იყო სავსე.

ხულიო იგლესიასი 1943 წელს, მადრიდში, ახალგაზრდა გინეკოლოგის ოჯახში დაიბადა. ბიჭი ბავშვობაში სცენაზე საერთოდ არ ოცნებობდა და ფეხბურთელობა უნდოდა. ის მადრიდის "რეალის" ახალგაზრდული ნაკრების მეკარე იყო. პარალელურად, იურისტობაც უნდოდა და უნივერსიტეტში იურიდიულზე სწავლობდა. საინტერესოა ისიც, რომ ბავშვობაში ხულიოს სასიმღერო ნიჭის შესახებ არავინ არაფერი იცოდა. მეტიც, კათოლიკური გუნდის მასწავლებელმა უთხრა: "ხულიო, აკეთე ის, რაც გინდა, უბრალოდ არ იმღერო!"

სპორტის მიმართულებას ავტოკატასტროფის გამო დაემშვიდობა. ბიჭს ავარიის შედეგად ხერხემალი დაუზიანდა და გარკვეული პერიოდის განმავლობაში, სიარულიც კი არ შეეძლო. როდესაც 20 წლის იგლესიასი საავადმყოფოში რეაბილიტაციის ხანგრძლივ კურსს გადიოდა, ექთანმა გიტარა მიუტანა. სწორედ მაშინ აღმოაჩინა, რომ სიმღერა კარგად გამოსდიოდა. რამდენიმე წელში კი მან პრესტიჟულ კონკურსში, სიმღერით La vida sigue igual გაიმარჯვა. მალევე ხმის ჩამწერ სტუდიასთან კონტრაქტი გააფორმა, პირველი სოლო ალბომიც გამოუშვა და ევროვიზიის სასიმღერო კონკურსზე გავიდა. იქ ხულიომ მე-4 ადგილი დაიკავა.

1971 წელს იგი ჟურნალისტ იზაბელ პრეისლერზე დაქორწინდა, მათ 3 შვილი შეეძინათ, მათ შორის, ცნობილი მომღერალი ენრიკე იგლესიასი. 1978 წელს წყვილი განქორწინდა. როგორც მოგვიანებით ქალმა განაცხადა, ხულიო ერთგულებით არასოდეს გამოირჩეოდა, ამიტომაც დაშორების მიზეზი ღალატი იყო.

ცნობილია ისიც, რომ ჯიჯი და ბელა ჰადიდების დედას, იოლანდას, 22 წლის ასაკში იგლესიასთან ჰქონდა რომანი და მასთან ოჯახის შექმნასაც აპირებდა, თუმცა მათი ეს გეგმა არ განხორციელებულა.

1990 წელს ხულიომ ჰოლანდიელი მოდელი მირანდა რეინსბურგერი გაიცნო, რომელიც მასზე 22 წლით უმცროსი იყო. ახალგაზრდა ქალმა აღიარა: "მისი მექალთანის რეპუტაცია მაშინებდა, მაგრამ სიგიჟემდე შემიყვარდა." მირანდამ მისგან 5 შვილი გააჩინა. აღსანიშნავია, რომ ხულიოს წლების განმავლობაში შვილთან, ენრიკესთან ძალიან ცუდი ურთიერთობა ჰქონდა და არ ელაპარაკებოდა. მიზეზი, ენრიკეს თქმით, იყო ის, რომ მას არ სურდა, ბიჭს მომღერლის კარიერა აერჩია.

ხმაურიან პირად ცხოვრებას ხულიოსთვის ხელი არ შეუშლია, რომ კარიერაში წარმატებისთვის მიეღწია. მან 80-მდე ალბომი გამოუშვა და გინესის რეკორდების წიგნშიც კი მოხვდა, როგორც ყველაზე შემოსავლიანი ხელოვანი.

მომღერალი ამჟამად ცხოვრობს დომინიკის რესპუბლიკაში და, მისი ვაჟის, ხულიო უმცროსის თქმით, აფასებს სიმშვიდეს და მარტოობას და ასევე დიდ დროს უთმობს შემოქმედებას. თავის მეუღლეს მუდმივად უძღვნის თბილ სიტყვებს და საჯაროდ გამოხატავს სიყვარულს.

ხშირად ამბობენ, რომ ხულიოს ცხოვრება სერიალს ჰგავს. მას 9 ოფიციალური შვილი ჰყავს. თუმცა, წლების განმავლობაში ითვლებოდა, რომ იგი 8 შვილის მამა იყო. როგორც მოგვიანებით გაირკვა, მას კიდევ ერთი შვილი, ხავიერ სანჩესი 1975 წელს, პორტუგალიელი ბალერინასაგან შეეძინა. იგლესიასი ხავიერის აღიარებაზე უარს ამბობდა. ბიჭმა ერთხელ მამას ბოთლიც კი მოჰპარა, რომ დნმ-ის ტესტი გაეკეთებინა და დაემტკიცებინა, რომ მისი შვილი იყო. სასამართლომ აღიარა, რომ ხავიერი ნამდვილად ხულიოს შვილია.

ხულიო იგლესიასი 80 წლის ასაკშიც კი შესანიშნავად გამოიყურება. როგორც ცნობილია, მომღერალი ყოველდღიურად ცივი წყლით ბანაობს, ხშირად მიირთმევს ზღვის პროდუქტებს და ზეითუნის ზეთს.