კინოს საოცარი უნარი აქვს, სიყვარულისა და რომანტიკის სამყაროში გადაგვიყვანოს. თუმცა, როდესაც ეკრანული წყვილების ამაღელვებელ ისტორიებს ვეცნობით, ხშირად გამოგვრჩება, რომ შესაძლოა, მათი ურთიერთობა ტოქსიკურია და სულაც არ არის ისეთი რომანტიკული, როგორიც ერთი შეხედვით ჩანს. ამ სტატიაში 5 ყველაზე დასამახსოვრებელ წყვილს განვიხილავთ. ისინი, როგორც წესი, მაყურებელში დიდი პოპულარობით სარგებლობენ, თუმცა, მათი ურთიერთობა იდეალურისაგან შორსაა:

"თვითმკვლელთა რაზმი“, ჯოკერი და ჰარლი ქუინი

ცნობილი ფილმის ამ წყვილს შესაძლოა, არაჯანსაღი და ტოქსიკური ურთიერთობის სიმბოლო ვუწოდოთ. ფსიქიატრს, ჰარლი ქუინსა და მის ყოფილ პაციენტს, ჯოკერს, ერთმანეთი შეუყვარდებათ. პროფესიული საზღვრების ეს მიუღებელი დარღვევა მათი არაჯანსაღი ურთიერთობის დასაწყისია. ჯოკერი ჰარლის ხასიათითა და ბუნებით მანიპულირებს, მის გრძნობებს იყენებს და ცხოვრებას მთლიანად უცვლის.

"ბინდი“, ბელა და ედვარდი

"ბინდის“ საგის მთავარი გმირები მაყურებელს განსაკუთრებით უყვარს. თუმცა, მათი სიყვარულის ისტორია ნამდვილად არაჯანსაღი და ტოქსიკურია. ედვარდი ბელას ცხოვრებას ხშირად აკონტროლებს და გადაწყვეტილებებსაც მისი თანხმობის გარეშე იღებს. ის ადგენს, ვისთან შეუძლია გოგონას კომუნიკაცია და ვის არ უნდა შეხვდეს. შესაბამისად, ერთი შეხედვით რომანტიკულ წყვილს, სიყვარულის განსხვავებული ისტორიით, სულაც არ აქვს მისაბაძი ურთიერთობა.

"ჭორიკანა“, ბლერი და ჩაკი

ბლერ ვალდორფისა და ჩაკ ბასის ურთიერთობა ბევრისთვის საოცნებოა. თუმცა, მანიპულაცია და ემოციური არასტაბილურობა ერთი შეხედვით, სიყვარულის საოცარ ისტორიას თან სდევს. ეკრანულ წყვილს ერთმანეთის დაკარგვის ძალიან ეშინია, ამიტომ მუდმივი კონტროლი უნდობლობას კიდევ უფრო მეტად იწვევს.

"მეგობრები“, რეიჩელი და როსი

ლეგენდარული სიტკომის "მეგობრების" ამ პერსონაჟებს ასევე საკმაოდ არაჯანსაღი ურთიერთობა აქვთ და მთელი სერიალის განმავლობაში მაყურებელს სულ აწუხებს შეკითხვა, ნამდვილად ერთად იქნებიან თუ არა. ეს პერსონაჟები ერთმანეთის მიმართ გრძნობების გამოხატვას ვერ ახერხებენ. კომუნიკაციის სირთულის გამო კი გაუგებრობები იმ დონე მიდის, რომ ჩხუბით მთავრდება. (ასევე დაგაინტერესებთ: "მესმის, რომ ადამიანებს ძალიან უნდათ, თავიანთი ფანტაზიები და ოცნებები ახდეს, მაგრამ ჩვენ შემთხვევაში ასე არ მოხდება. დევიდი ჩემი მეგობარია" - ჯენიფერ ენისტონისა და დევიდ შვიმერის სიყვარულისა და მეგობრობის ისტორია ეკრანს მიღმა)

კერი ბრედშოუ და მისტერ ბიგი

საკულტო სერიალის "სექსი დიდ ქალაქში“ გმირები მაყურებელში აღფრთოვანებასაც და აღშფოთებასაც ერთდროულად იწვევენ. მიუხედავად იმისა, რომ მათ შორის ნამდვილადაა ქიმია, ურთიერთობა მუდმივი იმედგაცრუებებით, ცრემლებითა და ტკივილითაა სავსე. კერი ბრედშოუ საყვარელი მამაკაცის გამო, საკუთარ ინტერესებზე უარს ხშირად ამბობს და უწევს, ბევრი რამ დათმოს.