ანჯელინა ჯოლი, გარდა იმისა, რომ შესანიშნავი მსახიობია, მსოფლიოს ერთ-ერთი ყველაზე დიდი ქველმოქმედიცაა და უამრავი ადამიანი გულშემატკივრობს. მრავალშვილიანი დედა არაერთ სოციალურ პროექტშია ჩართული. თუმცა, ამავდროულად, მისი კოლეგები მსახიობის რთული ხასიათის შესახებაც საუბრობენ და ამბობენ, რომ ანჯელინა ძალიან მომთხოვნი ადამიანია.

ინსაიდერები ამბობენ იმასაც, რომ ბევრ კოლეგას მასთან ფარული შუღლი აქვს და ისინი ამის შესახებ პირდაპირ არ საუბრობენ, მაგრამ ანჯელინა ჯოლისთან კომუნიკაციას გაურბიან.

როგორც ცნობილია, უკვე დიდი ხანია, ანჯელინა ჯოლისა და სანდრა ბალოკს ერთმანეთთან კომუნიკაცია არ აქვთ. თაყვანისმცემლები ვარაუდობდნენ, რომ კონფლიქტის მიზეზი შესაძლოა ისიც იყოს, რომ სანდრა ჯენიფერ ენისტონის ერთ-ერთი საუკეთესო მეგობარია. მას შემდეგ, რაც ბრედ პიტი ჯენიფერ ენისტონს დაშორდა და ანჯელინა მოიყვანა ცოლად, ენისტონი დეპრესიას ებრძოდა და მენტალურ პრობლემებზე ხშირად საუბრობდა. ამიტომაც, ჯოლის გულშემატკივრები სოციალურ ქსელებში სწორედ ამ ვარიანტის შესახებ ხშირად წერდნენ.

თუმცა, ახლახან ინსაიდერმა In Touch Weekly-ს განუცხადა, რომ ორ მსახიობს შორის მტრობა არა ბრედ პიტის ფაქტორის, არამედ პროფესიული საქმიანობის გამო დაიწყო. ცნობილია, რომ ფილმში "გრავიტაცია" მთავარი როლი თავდაპირველად სანდრა ბალოკის ნაცვლად, ანჯელინა ჯოლის უნდა შეესრულებინა. ფილმმა უამრავი ჯილდო და აღიარება მოიპოვა და ითვლება, რომ სანდრას ფილმოგრაფიაში ერთ-ერთი ყველაზე გამორჩეულია. (ასევე დაგაინტერესებთ: "იმ მომენტში, როცა მშობელი ხდები, შენი ცხოვრება შვილს ეძღვნება და ეს ყველაზე კარგი გრძნობაა" - ანჯელინა ჯოლი ახალ ინტერვიუში 6 შვილის დედობისა და ფილმის "Maria" გადაღებების შესახებ საუბრობს)

"ანჯელინა ამ როლით განსაკუთრებით იყო დაინტერესებული, მაგრამ სანდრამ ყველაფერი გააკეთა, რომ ის მიეღო. მან ანჯელინას უნიკალური შანსი წაართვა." - უთხრა ინსაიდერმა გამოცემას.

მისი თქმით, სწორედ ეს გახდა მიზეზი, რის გამოც ორ მსახიობს შორის ფარული მტრობა დაიწყო. თუმცა, თავად ანჯელინა ჯოლისა და სანდრა ბალოკს ამის შესახებ საჯაროდ არასდროს არაფერი უთქვამთ.