ფილმის "მარია" დიდ ეკრანებზე გამოჩენას არაერთი ადამიანი ელოდება. ოპერის მომღერლის, მარია კალასის, შესახებ გადაღებულ ნამუშევარში მთავარ როლს ანჯელინა ჯოლი ასრულებს. ფილმის პრემიერა ვენეციის 81-ე საერთაშორისო კინოფესტივალზე შედგა და დიდი გამოხმაურება გამოიწვია. საინტერესოა ის ფაქტი, რომ ანჯელინას რეჟისორები ხშირად რეალური ადამიანების შესახებ გადაღებულ ბიოგრაფიულ ფილმებში იწვევენ და მთავარ როლებს სთავაზობენ. მათ შორისაა:

"ჯია" (1998)

ბიოგრაფიული ფილმი 1970-იანი წლების საკულტო მოდელისა შესახებაა. ჯია კარანჯის როლს სწორედ ანჯელინა ჯოლი ასრულებს და მის ფილმოგრაფიაში ერთ-ერთი ყველაზე გამორჩეული ნამუშევარია. ფილმი სუპერმოდელის დღიურების მიხედვითაა გადაღებული და მისი ცხოვრების ყველზე მნიშვნელოვან და ამაღელვებელ ეტაპებს ასახავს. გოგონა 17 წლის ასაკში მამის სასადილოში მუშაობდა, 26 წლის ასაკში კი შიდსით გარდაიცვალა... მიუხედავად იმისა, რომ ჯია კარანჯი ძალიან ახალგაზრდა გარდაიცვალა, მან მაინც დიდი წარმატების მიღწევა შეძლო და ის ერთ-ერთ პირველ სუპერმოდელად ითვლება.

გოგონა არაერთ ცნობილ ბრენდთან თანამშრომლობდა. მათ შორის იყო Armani, Dior, Versace და Yves Saint Laurent. გამოჩნდა პრიალა ჟურნალების გარეკანებზე და არაერთი ადამიანის ყურადღება მიიპყრო. თუმცა, პირად ცხოვრებაში ძალიან მარტოსული და სევდიანი იყო. დროთა განმავლობაში, ნარკოტიკული საშუალებებისა და სხვა არალეგალური ნივთიერებების გამოყენება დაიწყო და ბოლოს შიდსით გარდაიცვალა.. როგორც ანჯელინა ჯოლიმ თქვა, ამ როლის მიღებაზე დიდი ხნის განმავლობაში ფიქრობდა და ამავდროულად, ეშინოდა, როგორ გაართმევდა თავს. თუმცა, ანჯელინამ ჯიას როლი შესანიშნავად მოირგო, ძალიან დიდ წარმატებას მიაღწია, "ოქროს გლობუსიც" მიიღო და როგორც აღვნიშნეთ, დღემდე ეს როლი მის ფილმოგრაფიაში ერთ-ერთი ყველაზე გამორჩეულია.

"ჩანაცვლებული" (2008)

კლინტ ისტვუდის თრილერში ჯოლი კრისტინ კოლინზის როლს ასრულებს, რომლის 9 წლის შვილიც მოულოდნელად უჩინარდება... ფილმი რეალურ ისტორიაზე დაყრდნობითაა გადაღებული. ამბავი ნიუ-იორკში, 1920-იან წლებში მოხდა. კოლინზის შვილის გაუჩინარებამ მთელი ამერიკა შოკში ჩააგდო, პოლიცია კი არაეფექტური მუშაობისთვის გააკრიტიკეს. 5 თვის შემდეგ ილიონისში იპოვეს ბიჭი, რომელიც უოლტერ კოლინზად ასაღებდა თავს. პოლიციასაც სურდა, საქმე მალე დაეხურა, ამიტომაც დედას უთხრეს, რომ ის მისი შვილი იყო. კრისტინ კოლინზი კი ხვდებოდა, რომ ძალიან დიდ ტყუილს შეეჯახა. მაშინ ქალმა სისტემის წინააღმდეგ ბრძოლა დაიწყო...

მთავარ როლს ანჯელინა ჯოლი ასრულებს და მან გაწამებული, უსამართლობასთან მებრძოლი დედა შესანიშნავად განასახიერა. იმ პერიოდისათვის მსახიობი 4 შვილის დედა იყო. ხოლო, ფილმის გამოსვლის წელს ტყუპი - ნოქსი და ვივიენი გააჩინა.

"მარია" (2024)

პაბლო ლარაინის მიერ გადაღებული ბიოგრაფიული ფილმი დიდი საოპერო მომღერლის, მარია კალასის ცხოვრებისა და მოღვაწეობის შესახებაა. ჯერჯერობით, როგორც აღვნიშნეთ, ფილმი დიდ ეკრანებზე არ გასულა, მაგრამ ვენეციის საერთაშორისო კინოფესტივალზე ანჯელინას გამოჩენას 8-წუთიანი ოვაციებით შეხვდნენ და მსახიობმა ცრემლები ვერ შეიკავა. (ასევე დაგაინტერესებთ: უწყვეტი ტაში და ატირებული ანჯელინა ჯოლი - მსახიობს ვენეციის კინოფესტივალზე განსაკუთრებული ოვაციებით შეხვდნენ)

ცნობილია, რომ ანჯელინა ჯოლი ამ როლისათვის განსაკუთრებით ემზადებოდა. მსახიობი 7 თვის განმავლობაში საოპერო კომპოზიციის შესრულებას სწავლობდა და საქმეს მთელი პასუხისმგებლობით უდგებოდა.