76 წლის მეი მასკი დღემდე უამრავი ქალისთვის შთაგონებაა. აქვს საკუთარი საქმე, მონაწილეობს ფოტოგადაღებებში, აცვია ის, რაც მოსწონს და სტერეოტიპებს ეწინააღმდეგება. თუმცა, იქამდე, ვიდრე მსოფლიოს ერთ-ერთი ყველაზე წარმატებული ქალი გახდებოდა, საკმაოდ რთული ეტაპები გაიარა.

მეი ქმარს მაშინ დაშორდა, როდესაც ილონ მასკი 9 წლის იყო. მან სამი შვილი სახლიდან წაიყვანა და იმ დროიდან მეის ცხოვრებაში კიდევ უფრო რთული დრო დადგა. იქამდე კი მეი მასკი ქმარს ფიზიკურ და ფსიქოლოგიურ ძალადობაში ადანაშაულებდა. ძალიან უჭირდათ. არ ჰქონდათ ფული კინოსთვის, გასართობი ღონისძიებებსა და კაფეებში წასასვლელად. მეის, როგორც მოდელისა და დიეტოლოგის შემოსავალი, შვილების საჭიროებებს არ ჰყოფნიდა. თან თავად, სამსახურიდან გამომდინარე, მუდმივად უწევდა კარგ ფორმაში ყოფნა. ამიტომაც, როგორც თავად ამბობს, რამდენიმე სამსახურში მუშაობდა.

მეი მასკმა საკუთარი განვლილი გზა წიგნში "ქალი ისახავს მიზანს - რჩევები თავგადასავლებით, სილამაზითა და წარმატებით აღსავსე ცხოვრებისათვის" აღწერა და უამრავ ადამიანს კიდევ ერთხელ მისცა მოტივაცია. (ასევე დაგაინტერესებთ: გაჭირვებიდან მილიარდერობამდე - ილონ მასკის დედამ ისაუბრა, თუ როგორ აღზარდა ჩვენი დროის ერთ-ერთი ყველაზე წარმატებული ადამიანი)

წიგნში მეი მასკი აღწერს იმ პერიოდს, როდესაც ქმარი მასზე ძალადობდა, სიღარიბესაც იხსენებს, რომელსაც მარტო გაუმკლავდა და წარმატებული შვილების აღზრდის პრინციპებზეც ამახვილებს ყურადღებას.

დღეს მის რამდენიმე შთამაგონებელ ფრაზას გავიხსენებთ, რომლებიც შესაძლოა, ინსპირაციისათვის გამოგადგეთ:

"იყავით თავდაჯერებული, მაგრამ, ამავდროულად, იყავით მომთმენი და მონდომებით სავსე. გახსოვდეთ, წარმატებას დრო სჭირდება."

"წარმატების გასაღებია სწავლა, გამბედაობა და უარის თქმა იმაზე, რაც გაბრკოლებს."

"ნუ დაუშვებთ, რომ სხვების აზრებმა თქვენი პოტენციალი შეზღუდოს. იმაზე გაცილებით მეტი შეგიძლიათ, ვიდრე გგონიათ."

"ყოველი გამოწვევა არის შესაძლებლობა, გაიზარდოთ და გახდეთ უკეთესი."

"როცა თავდაჯერებული ხარ, თავს ბევრად ახალგაზრდად გრძნობ.

"განათლება და თავდაჯერებულობა არის ყველაზე მნიშვნელოვანი რამ, რაც შეიძლება შვილებს მივცეთ."

"ჩემი შვილები მასწავლიან იმაზე მეტს, ვიდრე მე მათთვის ოდესმე მისწავლებია."

"წარმატება იწყება იმ რწმენიდან, რომ შენ შეგიძლია."

"ოცნებები არ არის მხოლოდ სურვილები. ისინი გეგმებია, რომლებიც უნდა განახორციელო."

"წარუმატებლობა არის მხოლოდ საშუალება იმისა, რომ სხვა გზით სცადოთ."

"იყავით თქვენი ცხოვრების გმირი და არა მაყურებელი. ნუ შეზღუდავთ საკუთარ თავს სხვების მოლოდინებით. იყავით ის, ვინც გსურთ, იყოთ."

"ყოველი დღე არის საშუალება, გახდეთ იმაზე უკეთესი, ვიდრე გუშინ იყავით."

"თქვენი პოტენციალი შეუზღუდავია, თუ საკუთარი თავის გჯერათ."

"ვფიქრობ, ქალებისთვის შთაგონება იქნება იმის დანახვა, რომ 69 წლის ასაკში ისინი კვლავ გახდებიან სილამაზის სარეკლამო კამპანიის ვარსკვლავი. ჩემთვის ასაკი პრობლემა კი არა, მშვენიერია. რაც უფრო თავდაჯერებული გახდებით, უფრო ადვილად გაუმკლავდებით პრობლემებს. მე ჩემი ასაკის მოდელი ვარ. დამალვას არ ვცდილობ, მალე 70 წლის გავხდები და ვამაყობ ამით. ყველაფერი მხოლოდ დასაწყისია."

"ვიმუშავებ იქამდე, სანამ ჩემი ხილვა ჟურნალებსა და პოდიუმებზე არ მოჰბეზრდებათ. შემდეგ კი ჩემს საყვარელ საქმიანობას, დიეტოლოგიას დავუბრუნდები."

"ბედნიერება სილამაზის მთავარი საიდუმლოა."

"ჩემი რჩევაა, რომ იყოთ კეთილგანწყობილი სხვების მიმართ და მოუსმინოთ მათ. ნუ დაიწყებთ საუბარს, რამდენად უბედური და წარუმატებელი ცხოვრება გაქვთ. გამოიჩინეთ ინტერესი, ნდობა, პატივისცემა სხვებისადმი, გაიღიმეთ და ეს თავს თავადაც უკეთესად გაგრძნობინებთ."