როგორც წესი, ცნობილი ადამიანები სხვადასხვა მნიშვნელოვანი ღონისძიებისა და დაჯილდოებისათვის წინასწარ ემზადებიან, სასურველ სამოსს, ვარცხნილობას, მაკიაჟს საგულდაგულოდ არჩევენ და სურთ, გამორჩეულად გამოიყურებოდნენ. თუმცა, ზოგჯერ მათი მოლოდინი არ მართლდება და არჩევანით უკმაყოფილოები რჩებიან. დღეს რამდენიმე ასეთ შემთხვევაზე მოგიყვებით:

ევა მენდესი

ზოგჯერ არაკომფორტული სამოსი სულაც არაა მიზეზი, რომ ადამიანს ცუდი განწყობა შეექმნას. შესაძლოა, რაღაც ეტაპზე აღმოვაჩინოთ, რომ კაბა, რომელიც გვაცვია, ჩვენი სტილი არ არის. ევა მენდესმაც სწორედ ასეთ შემთხვევაზე ისაუბრა:

"ეს ლამაზი კაბა იყო, მაგრამ არა ჩემი სტილი. პრინცესა ჟასმინის სტილის წარუმატებელი ვერსია აღმოჩნდა." - თქვა მსახიობმა.

ჯილიან ანდერსონი

ცნობილი ბრიტანელი მსახიობი, ჯილიან ანდერსონი, ნანობს კაბას, რომელიც 1995 წელს "ოქროს გლობუსის" დაჯილდოების ცერემონიაზე ეცვა.

"ახლაც არ ვიცი, ეს კაბა რატომ ავირჩიე. ყველგან ყველაზე ცუდად ჩაცმული ვარსკვლავების სიაში აღმოვჩნდი. მას შემდეგ, ამაზე ცუდი კაბა აღარ ჩამიცვამს." - განუცხადა მან ჟურნალ Elle-ს.

ქეით ჰადსონი

2001 წელს ქეით ჰადსონი "ოსკარის" დაჯილდოებას, როგორც თავად ამბობს, ოცნების კაბით დაესწრო.

"21 წლის ვიყავი. სტელა მაკარტნის კაბა მეცვა და სამყაროში ყველაზე მაგარ გოგოდ ვგრძნობდი თავს." - გაიხსენა ჰადსონმა.

თუმცა, როდესაც მსახიობმა მეორე დღეს ტელევიზორი ჩართო და ყველაზე ცუდად ჩაცმული ვარსკვლავების სიაში აღმოჩნდა...

"სტელას დავურეკე და ჩვენ ამაზე უბრალოდ ვიცინეთ. მან მითხრა: "მისმინე, პატარავ, თმები დაიშალე?" - იხსენებს ჰადსონი.

ბელა ჰადიდი

2016 წლის კანის კინოფესტივალზე Alexandre Vauthier-ის წითელმა კაბამ ძალიან დიდი გამოხმაურება გამოიწვია. თუმცა, როგორც აღმოჩნდა, თავად ბელა ჰადიდი საკუთარი ჩაცმულობით კმაყოფილი არ იყო.

"კაბა თავისთავად განსაცვიფრებელი იყო. მაგრამ, ძალიან ჩახსნილი. კამერების წინ თავს არაკომფორტულად ვგრძნობდი." - გაიხსენა ბელა ჰადიდმა.

მართლაც, გავრცელებულ კადრებში ჩანდა, რომ ბელა კაბას ხელით იჭერდა, რომ ზედმეტად არ გახსნილიყო.

დაიან კრუგერი

მსახიობი 2005 წელს "ოქროს გლობუსის" პირველ ცერემონიალზე თავის ჩაცმულობას კარიერაში ერთ-ერთ ცუდ არჩევანს უწოდებს. მას Marchesa-ს კაბა ეცვა.

მოგვიანებით, მსახიობმა თქვა, რომ ახლაც არ ესმის, რატომ შეარჩია მსგავსი სტილის კაბა.

ზენდეია

ახალგაზრდა ვარსკვლავს, ზენდეიას, ხშირად სტილის სიმბოლოს უწოდებენ და მისი გამორჩეული გამოსვლები მედიისა და თაყვანისმცემლების ყურადღებას ყოველთვის იპყრობს.

მსახიობს ერთ-ერთ ინტერვიუში ყველაზე წარუმატებელი კოსტიუმის შესახებ ჰკითხეს და თქვა, რომ ყვავილებიანი კაბისა და ბათინკების კომბინაცია არ მოსწონს.

"არ გამოიყურებოდა კარგად. მაგრამ, იმ დროს ჩემი სტილი გააზრებული არ მქონდა. 13 წლის ვიყავი." - ამბობს მსახიობი.