მრავალი წელია, "მკვდარი პოეტების საზოგადოება" უამრავი ადამიანის საყვარელი ფილმია. ფილმი განათლების თემას არატრადიციული ელფერით უდგება და პოეზიასა და ლიტერატურას განსაკუთრებულ მნიშვნელობას ანიჭებს. ეხება სტერეოტიპებს, რომლებიც ხელოვნების მიმართაა ჩამოყალიბებული, აჩვენებს ადამიანების ფსიქოლოგიას, მოზარდების ცხოვრებაში მშობლების როლსა და მასწავლებლების დამოკიდებულების მნიშვნელობას.

ეს ამაღელვებელი და ემოციური ფილმი 1989 წელს გადაიღეს, თუმცა დღემდე არ კარგავს აქტუალურობას. ის თემები, რომლებსაც "მკვდარი პოეტების საზოგადოება" ეხება, კვლავ ცოცხალი და პრობლემურია და ალბათ, ამიტომაცაა, რომ მაყურებელი მას კვლავ ფავორიტ ნამუშევართა შორის ასახელებს.

დღეს ფილმის შესახებ რამდენიმე ნაკლებად ცნობილ ფაქტს განვიხილავთ:

ინსპირაცია რეალური ადამიანებიდან

ფილმის მთავარი პერსონაჟი – ჯონ კიტინგი, რომელიც რობინ უილიამსმა განასახიერა, სცენარისტ ტომ შულმანის ინგლისურის მასწავლებლის ინსპირაციით შეიქმნა. შულმანის თქმით, მისი მასწავლებელი, სამუელ პიკერინგი, ცნობილი იყო იმით, რომ სწავლის პროცესს არატრადიციული მეთოდებით მართავდა, იდგა მერხებზე, ბავშვებთან უშუალო დამოკიდებულება ჰქონდა და ცდილობდა, ლიტერატურა მოსწავლეებისთვის სახალისო და საინტერესო გაეხადა. (ასევე დაგაინტერესებთ: 5 შთამაგონებელი ფილმი მასწავლებლების შესახებ, რომლებიც ცხოვრებაში ერთხელ ყველამ უნდა ნახოს)

კიტინგის როლზე სხვა ცნობილი მსახიობებიც განიხილებოდნენ

ვიდრე კიტინგის როლს რობინ უილიამსი მიიღებდა, სხვა ცნობილი მსახიობებიც განიხილებოდნენ. მათ შორის: ლიამ ნისონი, დასტინ ჰოფმანი, მელ გიბსონი, ტომ ჰენკსი და მიკი რურკი. თავდაპირველი რეჟისორი ჯეფ კანიუ იყო და მას ლიამ ნისონი სურდა კიტინგად. თუმცა, გადაღებების პირველივე დღეს ის შეცვალეს და რეჟისორად პიტერ უირი მიიწვიეს. მან მთავარ როლზე რობინ უილიამსი დაამტკიცა.

ფილმის ცნობილი გამოქვაბული რეალური არ იყო

გამოქვაბული, სადაც ახალგაზრდა პოეტები იკრიბებოდნენ და პოეზიის საღამოებს აწყობდნენ, რეალურად არ არსებობდა. როგორც ცნობილია, გამოქვაბული ლატექსისგან დამზადებული ნაგებობის ნაწილი იყო.

პიტერ უირმა ყველა ახალგაზრდა მსახიობი ერთად აცხოვრა, რომ ეკრანზე ქიმია შეექმნათ

სტუდენტები, რომლებიც საერთო საცხოვრებელში ერთად ცხოვრობდნენ, დროთა განმავლობაში ერთმანეთს განსაკუთრებით უახლოვდებოდნენ. ბიჭებს შორის ამ ქიმიის აღსაბეჭდად, რეჟისორმა პიტერ უირმა გადაღებების პერიოდში ბიჭები ერთად აცხოვრა. ახალგაზრდა მსახიობები ამბობდნენ, რომ გადაღებების დაწყების პროცესში რეალურად ეგონათ, რომ სკოლაში ერთად იყვნენ.

რობინ უილიამსს გადაღებების დროს პირადი პრობლემები ჰქონდა

რობინ უილიამსს იმ პერიოდში პირად ცხოვრებაში დაძაბულობა ჰქონდა . თუმცა, მას ეკრანზე პირადი პრობლემების კვალი არ ეტყობოდა და საკუთარ როლს შესანიშნავად ასრულებდა.

"მკვდარი პოეტების საზოგადოება" უილიამსის ერთ-ერთი საყვარელი ფილმი გახდა

როგორც რობინ უილიამსი ამბობს, ჯონ კიტინგი მისი კარიერის ერთ-ერთი ყველაზე საყვარელი და გამორჩეული პერსონაჟია.

ორიგინალურ სცენარში კიტინგი ლიმფომით იღუპებოდა

თავდაპირველად, სცენარში წარმოდგენილი იყო სცენა, სადაც კიტინგი საავადმყოფოში ლიმფომით კვდება. თუმცა, რეჟისორმა ეს ხაზი გააუქმა და ყურადღება სტუდენტებზე გაამახვილა.

მსოფლიო აღიარება

ფილმმა 16.4 მილიონიანი ბიუჯეტით მსოფლიოს მასშტაბით 235.9 მილიონი გამოიმუშავა. მან "ოსკარი" საუკეთესო ორიგინალური სცენარისთვის მოიპოვა. გარდა ამისა, ის საუკეთესო ფილმის, რეჟისორისა და მსახიობის (რობინ უილიამსი) კატეგორიებში იყო ნომინირებული.