HBO Max -ის ადრეული 2000-იანების საკულტო სერიალის ‘Sex and the City-ის ახალი ნაწილის გამოსვლა იგეგმება. რომელბსაც მაყურებლები სულმოთქმელად ელოდებიან. ინფორმაცია თავდაპირველად ჭორის დონეზე გავრცელდა, თუმცა,ეს ყოველივე HBO Max-ის და სარა ჯესიკა პარკერის მიერ, ოფიციალურად მალევე დადასტურდა.

ისტორია ჩვენთვის კარგად ნაცნობი მსახიობებით გაგრძელდება, თუმცა სამანტას როლის შემსრულებელმა, კიმ კეტროლმა უარი განაცხადა სერიალში მონაწილეობაზე და სერიალის მაყურებლებს ძალიან დაგვწყვიტა გული.

ასევე ახლახანს გახდა ცნობილი, რომ კიდევ ერთი მნიშვნელოვანი ფიგურა, ლეგენდალური პატრიცია ფილდი გამოაკლდება შოუს, ეს გახლავთ დიზაინერი, რომელმაც უდიდესი როლი ითამაშა „Sex and the City“-ის, როგორც მოდის საკულტო სერიალად ქცევაში. ქერი ბრედშოუ, გამოგონილი პერსონაჟი, რომლის როლსაც სარა ჯესიკა პარკერი ასრულებს, სერიალების ისტორიაში, ერთ-ერთი ყველაზე ცნობილი "ფეშენისტაა". ქალს, რომელსაც საკუთარი სახლი არ აქვს 40 000 $ ფეხსაცმელებში ხარჯავს.

„საკუთარი საცხოვრებელი სახლი არ მაქვს და 40.000 დოლარი ფეხსაცმელებში დავხარჯე? სიბერეში ვიქნები ქალი, რომელიც თავის ფეხსაცმელებთან ერთად იცხოვრებს,“ ქერი ბრედშოუ“. როგორც ცნობილი გახდა, პატრიცია ფილდს კონტრაქტი აქვს Netflix -თან და ამჯერად, პოპულარული შოუს, ‘Emily In Paris’ -ის მეორე სეზონის კოსტიუმებზე მუშაობს. ამერიკელი რეჟისორის და პროდიუსერის დარენ სტარისა და კოსტიუმების დიზაინერის პატრისია ფილდის კოლაბორაციით სერიალში უამრავი განსხვავებული ჩაცმულობა შეიქმნა. იქიდან გამომდინარე, რომ პატრიცია და დარენი ერთად მუშაობდნენ სერიალზე „სექსი დიდ ქალაქში“ მაყურებლისთვის ბუნებრივია ის ფაქტი, რომ ემილი კუპერის ჩაცმულობა ძალიან ჰგავს ქერი ბრედშოუს სტილს. ხშირად ადარებენ ისეთ პოპულარულ პროექტებს, როგორებიცაა: „სექსი დიდ ქალაქში“, „ჭორიკანა“ და „ეშმაკს აცვია პრადა“. თუ მოდისა და კინოს სიახლეებით დაინტერესებული ხართ და ხშირად ადევნებთ თვალს მსგავსი სტილის სერიალებს, უთუოდ შეამჩნევდით მათ შორის მსგავსებას.

ამ საკითხთან დაკავშირებით ლილი კოლინსმა ერთ-ერთი ინტერვიუს დროს ისაუბრა და განმარტა, თუ რატომ არის მისი როლის მიმართ, მსგავსი კითხვები და შედარებები. „ვფიქრობ, ისევე როგორც მე, ემილისაც ძალიან მოსწონს „სექსი დიდ ქალაქში“, რადგან ქერი ბრედშოუს სტილი ორიგინალურია და ყველასგან განსხვავებული. არ არის გამორიცხული, რომ ემილი იყენებდეს ქერის მოდურ მომენტებს სტილის ინსპირაციისთვის.

ეს ბუნებრივია, მათ ხომ ძალიან ბევრი საერთო აქვთ. მიუხედავად დიდი მსგავსებისა, ჩვენ არ გვინდოდა შეგვექმნა ახალი ქერი, იმიტომ რომ ის ერთადერთია და განუმეორებელი. ჩვენ გვსურდა შეგვექმნა ახალი პერსონაჟი, ორიგინალური სტილით, რომელიც სხვა ყველასგან რადიკალურად იქნებოდა განსხვავებული. მესმის, როდესაც ემილის პერსონაჟს ქერი ბრედშოუს ადარებენ, რადგან ორივეს უყვარს მოდა. ვფიქრობ ამ შედარების მოსმენა თავად ემილისაც ძალიან ესიამოვნებოდა, თუმცა მას არ ენდომებოდა მისთვის მიებაძა.“ აცხადებს „ემილი პარიზშის“ მთავარი როლის შემსრულებელი და ამავდროულად სერიალის პროდიუსერი ლილი კოლინსი.

2021 წლის ოქროს გლობუსის დაჯილდოებაზე "ემილი პარიზში“ საუკეთესო სატელევიზიო სერიალის ნომინაციაში იყო წარდგენილი, ხოლო ლილი კოლინსი სატელევიზიო შოუს საუკეთესო ქალი მსახიობის კატეგორიაში.

მაყურებლები სერიალს „Emily In Paris“-ის ნახვას სავარაუდოდ 2021 წლის დეკემბერში შეძლებენ.

თათა ჩიკვილაძე