როგორ ვატაროთ ბერეტი – როგორ ატაროთ ეს აქსესუარი სწორად და რას მიაქციოთ ყურადღება მისი შეძენისას

ბოლო რამდენიმე წელია ინსტაგრამ და streetstyle–ქრონიკები სავსეა ბერეტის აქტუალობით. აქსესუარის ტრიუმფალური დაბრუნება Gucci –თვის ალესანდრო მიკელეს სადეიბიუტო ჩვენებაზე, 2015 წლის თებერვალში მოხდა. შემოდგომა–ზამთარი 2017 წლის სეზონზე მარია გრაცია კიურიმ Dior–ის კოლექციას დაუმატა ბერეტების კოლექცია ცნობილი მექუდის, სტივენ ჯონსის ავტორობით. არც Chanel cruise 2019–ის უნდა დავივიწყოთ, სადაც ბერეტი ერთ–ერთი მთავარი სტილისტური აქცენტი გახლდათ. გაზაფხული–ზაფხული 2019 მთავარი თავსაბურავი ასევე გამოჩნდა John Galliano, Dior, Etro–სა და სხვა ბრენდების კოლექციებში.

ამ აქსესუარის პროტოტიპი – ბრტყელი ქუდი – დასავლეთ ევროპაში ჯერ კიდევ ბრინჯაოს ხანაში იყო
პოპულარული: მათ შენიშნავდით იმ ეპოქის ქანდაკებებსა და სურათებზე. XV- XVI ასწლეულებში ბასკურ ბერეტს მუშათა კლასის წარმომადგენლები ატარებდნენ – ის კარგად იცავდა უამინდობისას და იყო დაბალხარისხიანი. გარკვეული პერიოდის მანძილზე მსგავსი ქუდი მხატვრების ერთ–ერთი მთავარი თავსაბურავი გახდა – მაგ: ჰოლანდიელი მხატვარი რემბრანდტი, საკუთარი ავტოპორტრეტებისთვის ხშირად პოზირებდა მასში გამოწყობილი.

1880–იან წლებში ბერეტი მსოფლიო მასშტაბით ჯარის ფორმის ნაწილი გახდა. გამოკვეთილი და ამასთან უმნიშვნელო დეტალი, რომელიც მეორე მსოფლიო ომის დროს პარტიზანებს ეხმარებოდა მათი მომხრეების უცხოებს შორის ამოცნობაში ისე, რომ მოწინააღმდეგის ყურადღებას არ იქცევდნენ.
თანდათანობით ასე იქცა ბერეტი თავისუფლებისთვის ბრძოლის სიმბოლოდ და ეს სტატუსი კიდევ დიდხანს შეინარჩუნა. შესაძლოა, სწორედ ამ ყველაფერმა განაპირობა ის, რომ ბერეტები კვლავ აქტუალურია. ბოლო რამდენიმე სეზონის მანძილზე დიზაინერები სულ უფრო ხშირად აფიქსირებენ მნიშვნელოვან პოლიტიკურ თემებს საკუთარ კოლექციებში და ბერეტიც მისი მრავალმნიშვნელოვანი ისტორიით შესაფერის დროს დაბრუნდა.

როგორ და რასთან ატაროთ ბერეტი წლევანდელ სეზონზე

აირჩიეთ დიდი ზომის მოდელები

„რაც უფრო დიდია, მით უკეთესია და გირჩევთ ატაროთ არა პირდაპირ, არამედ მცირედ გადმოწეული კუთხით“ – ირწმუნება მოდელი და ბრენდის Itchy Scratchy Patchy დამფუძნებელი, ედი კემპბელი.
ნუ შეუშინდებით კლიშეებს

ზოლიან მაისურთან და წითელ პომადასთან ბერეტის ტარება „ფრანგული სტილის“ ატრიბუტად იქცა – ეს ყოველთვის ცუდი არ არის. „შესაძლოა, ყველა ამ ელემენტის შეხამება ერთ გამოსახულებაში არ ღირს, მაგრამ, გულწრფელად რომ ვთქვა, მსგავსი კლიშეების წინააღმდეგი არ ვარ. როგორც წესი, მე ბერეტს წითელ პომადასთან და დიდი ზომის პიჯაკთან ერთად ვატარებ“ – გამოტყდა ბრიტანელ–ფრანგი ბლოგერი, კამილ შარიე.
გადახედეთ ტყავის ვერსიებს

Dior–ის ტყავის ბერეტები და მათი ანალოგები, ბოლო სეზონების ერთ–ერთი ყველაზე შესამჩნევი ტრენდი გახდა. მაგალითი რიანასა და ბელა ჰადიდისგან აიღეთ.
ნუ დაივიწყებთ ვარცხნილობას

როცა საქმე ბერეტს ეხება – ვარცხნილობა მთავარი ელემენტია: ზედმეტად დახვეწილ ვარცხნილობასთან ბერეტმა, შესაძლოა, ფრანგ სკოლის მოსწავლეს დაგამსგავსოთ. ბუნებრივი ვარცხნილობა, ფეი დანაუეის სტილში ფილმიდან „ბონი და კლაიდი“ ბევრად უკეთ გამოიყურება.
გაიხსენეთ 1990–იანი წლები

„გარდერობის ზოგიერთი ელემენტი მოდიდან არ გადადის და მრავალი წლის შემდეგაც ისეთივე აქტუალურია“ – ამბობს შარიე. თუ რეტროსტილი თქვენთვის მისაღები არ არის, მაგალითი საკულტო ფილმის „სულელი“ (1995) გმირისგან, შერ ჰოროვიტცისგან აიღეთ.
შეარჩიეთ სწორი კუთხე

პირველ რიგში უნდა გაერკვეთ, თუ როგორ დაიხუროთ ბერეტი სწორად, რაც არც თუ ისე მარტივია. მაგ: 1930–იან წლებში ამ აქსესუარს თითქმის თავის წვერზე იხურავდნენ (გაიხსენეთ მარლენ დიტრიხი), 1960–იან წლებში კი უფრო მსუბუქად, მცირედ ჩამოწეული კუთხით (როგორც მაგ: ბრიჯიტ ბარდო იკეთებდა). იპოვეთ ვარიანტი, რომელიც კონკრეტულად თქვენ შეგეფერებათ.


ანა ვერძაძე
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.