ესთეტიკ-ბლოგი: გრავიტაციული ფტოზი

დღევანდელი ჩვენი ბლოგის თემა ეხება პრობლემას, რომელიც წლებთან ერთად იჩენს თავს და გარდაუვალ პროცესს უკავშირდება.Air Max 90 Hypfuse

ეკატერინე შალიკიანი - ესთეტიკის ცენტრ Collagen-ის დამფუძნებელი.


ჩვენ კარგად ვიცით, რომ გრავიტაციული ფტოზი დედამიწის მიზიდულობის ძალას უკავშირდება. შედეგად, ადამიანის სახის ყველა ნაკვთი და სხეულის ყველა ნაწილი ქვემოთ იწევს.

გრავიტაციული ფტოზი სიბერის პირველი ნიშანია და ადამიანის გარეგნობაზე 35 წლის ასაკიდან აისახება. რა არის გრავიტაციული ფტოზი? სახე და სხეული ფორმას კარგავს. ეს პროცესი ეხება სახის თითქმის ყველა
ნაკვთს: ყვრიმალებს, თვალებს, ლოყებს, ნიკაბს, ღაბაბს... მათ შორის მკლავებს, დუნდულებს და სხეულის თითქმის ყველა ნაწილს. გრავიტაციული ფტოზი მეტად გამოხატულია მკერდზე, დუნდულებზე, ქუთუთოზე, ხელებსა და ღაბაბზე.

პაციენტები, რატომღაც, ყოველთვის ერთი პრობლემის გადასაჭრელად მომმართავენ. გრავიტაციული ფტოზი გახლავთ პრობლემათა ჯაჭვი, რომელსაც მხოლოდ ერთი ზონის მოგვარებით ვერ გადაჭრი. ხშირად ქალბატონები უჩივიან ღაბაბის ჩამოწევას და ნიკაპთან ე.წ. "მარიონეტული ნაოჭის" გაჩენას. ეს სახელწოდება თეატრალური, სევდიანი ნიღბის ქვემოთ დაწეული ტუჩის ფორმის გამო შეურჩიეს. მოგეხსენებათ, ესთეტიკური მედიცინა იმდენად განვითარდა, ამ პრობლემის მოგვარება შეუძლია, მაგრამ გასათვალიწინებელია სხვა ფაქტორებიც. პრობლემას ვერ გადაჭრი, თუ კომპლექსურად არ მიუდგები. როცა საქმე გრავიტაციულ ფტოზს შეეხება, არც ისე მარტივ გადაწყვეტილებასთან გვაქვს საქმე. მთლიანი სახის საერთო მდგომარეობა უნდა გავაუმჯობესოთ და რატომ...



დიახ, "მარიონეტული ნაოჭი" ინიექციის მეთოდით სწორდება, მაგრამ იქვე უნდა გვახსოვდეს, რომ ტუჩის კუთხეებთან ერთად აუცილებლად დაშვებულია ყვრიმალის ზონა, რომელიც ტუჩის კუთხეებს აწვება. დაწეული იქნება ასევე ღაბაბის ზონაც. განსაკუთრებით, თუ პაციენტს წონის პრობლემა აქვს. წლებთან ერთად, თუ დააკვირდებით, ნიკაპის ზონაც განიცდის ცვლილებას. ნიკაბი ქვემოთ ეშვება და მასში ცხიმის ლიპიდა მომატებულია. ამით იმის თქმა მსურს, რომ წლებთან ერთად სახის კონტური,ოვალი იშლება. სახეს კონტური რომ დავუბრუნოთ, პრობლემას კომპლექსურად უნდა მივუდგეთ.

გრავიტაციული ფტოზი, - თავად ეს ტერმინიც კი იწვევს ჩემში შიშს, იმდენად გარდაუვალ და არასაიმედო პროცესებს უკავშირდება იმ ფაქტორების გათვალისწინებით, რომ სახისა და სხეულის ყველა ნაწილი განსაკუთრებულ ყურადღებას მოითხოვს.

მაგალითად, "მარიონეტულ ნაოჭს" აწვება ცხვირ-ტუჩის დაწეული ზონა, ცხვირ-ტუჩის ზონას - დაწეული ყვრიმალი... ამიტომ პრობლემის მოგვარება წესით ყვრიმალის აწევით უნდა დავიწყოთ, შემდეგ ცხვირ-ტუჩის ნაოჭი გავასწოროთ შემავსებელი გელით და ბოლოს შეიძლება ნიკაპის ზონის დამუშავებაც. ამ პრობლემის მოგვარება შედარებით შეამსუბუქებს ღაბაბის ზონის მდგომარეობას. ეს ზონა შედარებით აიწევს. გარდა ამისა, ღაბაბის ზონის მოსაწესრიგებლად არაჩვეულებრივი ინიექციური საშუალებაა - ლიპოლიტიკი. ეს გახლავთ ინიექციური საშუალება, რომელიც ღაბაბის ზონის მიმდებარე ტერიტორიაზე ცხიმებს შლის.



მას შემდეგ შეიძლება კიდეც ამ ზონებზე მეზოძაფების ჩადგმა. აქვე მინდა შეგახსენოთ, რომ გრავიტაციული ფტოზი ეხება თვალების ზონას, კერძოდ - ქუთუთოს. ხშირად დაწეული ქუთუთო გენეტიკური ხასიათისაა და ბლეფელოპლასტიკასაც მიმართავენ. თუ გრავიტაციული ფტოზი მკვეთრად აისახება ქუთუთოზე, ასეთ დროს ქირურგიულ ჩარევას მეც ვურჩევ ხოლმე პაციენტს. მარტივი ოპერაციაა და გვერდითი მოვლენები არ ახასიათებს. თუკი მკვეთრად გამოხატული ფტოზი არ არის და თვალის ქუთუთოზე პატარა "კაპიშონკებია" (როგორც კორეელები ეძახიან), მაშინ მეზოძაფების ჩადგმაც საკმარისია. სახის კანის ტონუსისთვის და ახალგაზრდული იერისთვის კი შეგიძლიათ პერიოდულად ჩაიტაროთ მეზოთერაპიისა და ბიორევიტალიზაციის კურსი.

ვფიქრობ, რომ გრავიტაციული ფტოზის შესახებ თქვენთვის საინტერესო ინფორმაცია მოგაწოდეთ, ამავდროულად ამ პრობლემის მოგვარების გზებზეც ვისაუბრე.
რაც შეეხება გრავიტაციულ ფტოზს სხეულზე...  არაჩვეულებრივი საშუალებაა ვარჯიში და ცურვა. ეს პროცედურები კუნთებს ამაგრებს და ნამდვილად გირჩევთ. მე არ მივეკუთვნები ექიმებს იმ ჯგუფს, რომლებიც სუბიექტურად, მხოლოდ თავისი პროფილით უდგებიან პრობლემის გადაჭრის გზებს. თუკი არსებობს გზები, რომელიც ინიექციისა და ესთეტიკური მედიცინის გარეშე შეიძლება მოგვარდეს, პაციენტს აუცილებლად ვთავაზობ. სიბერის ნიშნებთან საბრძოლველად მათთვის ყველა ხერხს ვიყენებ. მათ, ასევე, ვურჩევ კვების რაციონისთვის და ძილის რეჟიმისთვის ყურადღების მიქცევას. 

პრობლემა არა კონკრეტული, არამედ კომპლექსური მიდგომით უნდა გადაჭრან. სამწუხაროდ, სახეზე გამოხატულ გრავიტაციულ ფტოზს მხოლოდ ესთეტიკური მედიცინის გზები აგვარებს. რაც შეეხება პლასტიკურ ქირურგიას... ქირურგიული ჩარევის მომხრე არ ვარ, თუკი არსებობს სხვა საშუალებები. როცა დროულად აგვარებ გამოხატულ პრობლემებს, ასაკი ნაკლებად აისახება ჩვენს გარეგნობაზე. ამ მხრივ, ჩემთვის იდეალურები არიან ევროპელი ქალბატონები. ძალიან ლამაზად ბერდებიან. ამასთან, ზომიერად მიმართავენ ესთეტიკური მედიცინის მიღწევებს.

ქირურგია პრობლემის მოგვარების უკიდურესი ფორმაა, როგორც მე ვეძახი, - ზარმაცი ქალბატონებისთვის მოგონილი...
like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.