როგორ მოვუაროთ დაგრძელებულ წამწამებს სახლის პირობებში - სპეციალისტების რჩევები

წამწამების დაგრძელება წარმოუდგენლად ამარტივებს ყოველდღიური მაკიაჟის რიტუალს, მას რამდენიმე ეტაპით ამცირებს.
გამოხედვა მაშინვე იკვეთება და არც დამატებით შეღებვას საჭიროებს. თუმცა ეს სწორედ ის შემთხვევაა, როცა სილამაზე მსხვერპლს მოითხოვს. იმისათვის, რომ წამწამები, რაც შეიძლება დიდხანს შეგინარჩუნდეთ, რამდენიმე რეკომენდაცია უნდა გაითვალისწინოთ.

დაგრძელებული წამწამების მოვლა პროცედურის ჩატარების წუთიდან იწყება. ამ დღეს მოგიწევთ ემოციების კონტროლი, რადგან სიხარულის ცრემლებიც კი უარყოფითად მოქმედებს. პროცედურიდან პირველი ორი საათის განმავლობაში, წამწამს არ უნდა შეეხოს წყალი, მომდევნო დღეებში კი ბანაობა დასაშვებია, თუმცა საჭიროა სიფრთხილე.

დაგრძელებული წამწამების სახლის პირობებში მოვლა
სრულიად შესაძლებელია. ხელოვნური წამწამები უფრო დიდხანს შრება, ვიდრე ბუნებრივი. ბანაობის შემდეგ დაუშვებელია მათი პირსახოცით გამშრალება. სპეციალისტები გვირჩევენ, თვალებზე ფრთხილად დავიფინოთ ბამბის დისკები, რათა ზედმეტი სისველე შეიწოვონ.
სიფრთხილე გამოიჩინეთ თვალის გარშემო კანის მოვლის დროსაც. კრემებსა და მსგავს საშუალებებს ასევე შეუძლიათ წებოვანი თვისებების ჩამოშლა, რის შედეგადაც წამწამები იშვიათი გახდება და ვადაზე ადრე დაგცვივდებათ. დაგრძელებული წამწამების დროს კანის წმენდისთვის ყველაზე უსაფრთხო მიცერალური წყალი გახლავთ. მიცერალურ წყალში დასველებული ბამბის ტამპონები რამდენიმე წუთს სახეზე დაიფინეთ, შემდეგ კი ფრთხილად მოიშორეთ მაკიაჟი ისე, რომ წამწამებს არ შეეხოთ.

დაგრძელებულ წამწამებზე რეკომენდებული არ არის ტუშის გამოყენება. მათ მოსავლელად შეგიძლიათ გამოიყენოთ სუფთა ფუნჯი - ყოველდღე მაკიაჟის გაკეთების დროს ფრთხილად დაივარცხნეთ დაგრძელებული წამწამები.

წამწამების დაგრძელების დროს სპეციალისტი იმასაც გაგაფრთხილებთ, რომ ხელოვნური წამწამების ტარების დროს ბალიშში თავჩარგული ძილი აკრძალულია. ამგვარმა ტკბილმაძილმა, შესაძლოა, წამწამების რაოდენობა შეგიმციროთ. რეკომენდებულია ზურგზე ან გვერდზე ძილი.
დაგრძელებული წამწამების ბუნებრიობისა და ესთეტიკური სილამაზის გარანტი დროული კორექციაა. საჭიროებისამებრ ეს თვეში ერთხელ კეთდება. თუ ხელოვნური წამწამები აღარ გსურთ, მათ მოსაშორებლად ასევე უმჯობესია სპეციალისტს მიმართოთ. სახლის პირობებში დაგრძელებული წამწამების მოსაშორებლად გამოიყენეთ ცხიმიანი კრემი. წაისვით სქელი ფენა თვალებზე, გაიჩერეთ 15 წუთს, შემდეგ ბამბის დისკით მოიშორეთ კრემი და ხელის ფრთხილი მოძრაობებით მოიხსენით წამწამები. მათ მოსაშორებლად არავითარ შემთხვევაში არ გამოიყენოთ პინცეტი. მას შეუძლია, როგორც თვალების, ისე ბუნებრივი წამწამის თმის ფოლეკულის დაზიანება.

დაგრძელების დროს ალერგიული რეაქცია იჩენს თავს, თუ კონტაქტურ ლინზებს ატარებთ. ლინზა, როგორც უცხო სხეული თვალში დაგრძელებულ წამწამებთნ ერთად, შესაძლოა, კონიუქტივიტის განვითარების მიზეზი გახდეს.
მუდმივად ხელოვნური წამწამების ტარების შემთხვევაში რეკომენდებულია ყოველ 6 თვეში ერთხელ, ერთი თვით შეისვენოთ, რათა თქვენს თვალებს დასვენების, წამწამებს კი ძალების აღდგენის საშუალება მისცეთ.

ანა ვერძაძე
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.