ეკა ჩხეიძე სილამაზეზე, ასაკსა და თავის მოვლაზე

სილამაზის სტანდარტები ყველა ეპოქაში იცვლებოდა, თუმცა, ტენდენციების შესაბამისად, თავის მოვლაზე ყოველთვის ზრუნავდნენ.

დღეს უამრავი საშუალება არსებობს, რომ მოვლილად და ლამაზად გამოვიყურებოდეთ, მსოფლიოს წამყვანი ექიმები, კოსმეტოლოგები თუ დერმატოლოგები აქტიურად მუშაობენ იმაზე, რომ შექმნან ისეთი საშუალებები, რაც ბუნებრივი სილამაზის შენარჩუნებაში დაგვეხმარება, რადგან ბოლო დროის მთავარი ტრენდი ბუნებრიობაა. ბუნებრივი სილამაზის მოყვარულთა რიცხვს ეკუთვნის მსახიობი ეკა ჩხეიძე, რომელიც ყოველთვის გამოირჩევა თავისი სილამაზითა და არისტოკრატული გარეგნობით. თუ რა არის მისი სილამაზის საიდუმლო, ეკა თავად გაგვიმხელს.


ფოტო - ლევან შავდია

-როგორ ახერხებთ მუდამ ფორმაში ყოფნას?

-თავს
განსაკუთრებულად არ ვუვლი. უპირატესობას ბუნებრიობას ვანიჭებ. აჯობებს, მეტად რომ ვიცლიდე საკუთარი თავისთვის. ჩემი მაქსიმუმი არის ბოტოქსი და ბიორევიტალიზაცია. ბოტოქსს წელიწადში ორჯერ ვიკეთებ, ხოლო ბიორევიტალიზაციას უფრო იშვიათად, რადგან ყველა ნემსი კაპილარებში მხვდება და მისკდება, მილურჯდება, სპექტაკლებს კი დალურჯებული ვერ ვითამაშებ. ამიტომ ზაფხულში ვიკეთებ. დეკორატიული კოსმეტიკიდან მიყვარს ტუში და კანის ფერთან მიახლოებული ტუჩსაცხი. წარბებიც ბუნებრივი მაქვს, მოკლედ, ჩემი მოდა მოვიდა.

-რა ასაკიდან დაიწყეთ თავის მოვლა?

-ზუსტად არ მახსოვს, მაგრამ დაახლოებით ათი წელია, რაც თავს ვუვლი, სადღაც ორმოცი წლიდან. ბიორევიტალიზაციებისა და სხვა საშუალებისთვის მანამდე არ მიმიმართავს.

-როგორია თქვენი ყოველდღიური თავის მოვლის რუტინა?

-სახლში არანაირ პროცედურას არ ვიტარებ, ერთადერთი მაკიაჟს ვიშორებ მიცერალური წყლით. დეკორატიული კოსმეტიკიდან მხოლოდ "კიკოს" პროდუქციას ვხმარობ. წყლით და სველი ხელსახოცით არ ვიცილებ მაკიაჟს, აშრობს კანს. მშრალი კანი მაქვს და ვცდილობ, სახის გამწმენდი რძეები და მიცერალურები ვიხმარო. სახის კრემებს ვიყენებ.

-როგორ არჩევთ სახის კრემს?

-მყავს კოსმეტოლოგი, რომელიც ბალახეულითა და თაფლით მიმზადებს ჩემი კანის შესაბამის კრემებს და უკვე წლებია, მათ ვიყენებ. ზამთარში და ზაფხულში ვცვლი კრემებს. ზაფხულში ან საერთოდ არ ვხმარობ კრემს, ან ნაკლებცხიმიანს ვიყენებ. სახეზე ვისვამ ხილს, ბოსტნეულს -სამზარეულოში რაც აღმომაჩნდება. წლების განმავლობაში ვიყენებდი ზეთოვან ვიტამინებს, რომლებიც აფთიაქებში უხვად იყიდება, მაგრამ ახლა არც ზეთებს ვხმარობ და არც გამწმენდ რძეს. ვსვამ რკინის შემცველ ვიტამინებს -მაგნიუმს, კალცს.

-ყველაზე აუცილებელი პროცედურა…

-ბიორევიტალიზაცია. ჩემი აზრით, ეს პროცედურა ყველამ უნდა გაიკეთოს, რადგან მასში შედის უამრავი ვიტამინი, ჟანგბადი. ჩემს შვილსაც ვურჩევ ხოლმე, მიუხედავად იმისა, რომ 29 წლის არის. გამონაბოლქვი, გარემო, სიცხე აშრობს სახის კანს.

-რას არ გამოიყენებდით თავის მოვლის საშუალებებიდან?

-ალბათ, წითელ პომადას. წამისვამს, მაგრამ არ მიყვარს, მე უფრო ბუნებრიობა მომწონს. არ მიყვარს "რუმიანა". მიყვარს, როდესაც კანი ერთი ფერისაა და თვალია გამოკვეთილი. თუ თვალია გამოკვეთილი, ტუჩსაცხს არ ვისვამ, ხოლო თუ ტუჩი მაქვს გამოკვეთილი, მაშინ თვალს აღარ ვიხატავ.

-აქცევთ ყურადღებას სწორ კვებას, თუ თქვენი ფორმაში ყოფნა გენეტიკის დამსახურებაა?

-ვცდილობ, ვიკვებო ჯანმრთელად და რაც მთავარია, კომფორტულად ვიცხოვრო. რა თქმა უნდა, ყოველთვის არ გამოდის, მაგრამ რასაც ჩემი სხეული მკარნახობს, იმას ვაკეთებ. გასუქების პრობლემა არასოდეს მქონია და ცხოვრებაში არ ვყოფილვარ დიეტაზე. როცა მომშივდება, ვჭამ, არ აქვს მნიშვნელობა, ღამის ორი საათი იქნება თუ ოთხი. არ გეახლებით ისეთ საკვებს, რაც მავნებელია. მენიუდან ამოღებული მაქვს შემწვარი კარტოფილი, ცომეული, ვერიდები ღორის ხორცს, ცხვრის ხორცს საერთოდ არ ვჭამ. ვიცი, რომ თევზი საჭიროა, ამიტომ არ ვაწვალებ ჩემს ორგანიზმს, წინააღმდეგობაში არ მოვდივარ საკუთარ ორგანიზმთან. ახლახან ვიყავი სვანეთში და უგემრიელესი კუბდარი და ხაჭაპური ვჭამე. არც მაგაზე ვუთხარი უარი საკუთარ თავს, რადგან ორგანიზმმა მითხრა, მინდაო. მერე ცოტა განტვირთვა კი დამჭირდა. რომ ამბობენ წყალი უნდა სვა ორი ლიტრიო, არ მესმის, ბევრ წყალს ვსვამ მხოლოდ ზაფხულში, იმიტომ, რომ მწყურია. ორგანიზმმა უკეთ იცის, რა გინდა, როდის გინდა დასვენება, ძილი, წამოწოლა, სიცივე, სიცხე. ზოგადად, ადამიანი როდის არის ბედნიერი? როდესაც აკეთებს იმას, რაც სიამოვნებს. ურთიერთობს მათთან, ვისთანაც სიამოვნებს, აკეთებს იმ საქმეს, რომელიც უყვარს და ბედნიერებას ანიჭებს. ორგანიზმიც ასეა. ამიტომ ვუსმენ ორგანიზმს და ვაკეთებ იმას, რასაც მკარნახობს.

-ძილი მნიშვნელოვანია თქვენი გარეგნობისთვის?

-ძილი ძალიან მნიშვნელოვანია. უძილობა უცებ აისახება ჩემზე. თუ არ დავიღალე, არ მეძინება, ადრე ადგომა არ მიყვარს, ვგულისხმობ ცხრა საათს, თორემ 10-ზე, 11-ზე ვიღვიძებ. ძილი აუცილებელია ორგანიზმის ყველა უჯრედის აღდგენისთვის.

-თუ აისახება სტრესი თქვენი სახის კანზე?

-სტრესი გარკვევით აისახება ჩემი სახის კანზე. უმთავრესი განწყობაა. რაც უნდა პროცედურებზე იარო, მაკიაჟი იკეთო, ივ სენ ლორანი და ვალენტინო გეცვას, ცუდად გამოიყურები, თუკი თვალი არ გიბრწყინავს. საკუთარი გამოცდილებით გეუბნებით, ყოფილა შემთხვევა, კედებითა და მაისურით წავსულვარ სადმე, მაგრამ სხვაზე მეტი კომპლიმენტი და ყურადღება მიმიღია, რადგან იმ დროს ლაღი, ბედნიერი და თავისუფალი ვიყავი. საერთოდ, ვცდილობ, მოვერიდო ისეთ ადამიანებს, ვისგანაც უარყოფითი ენერგია მოდის. არაფერს გულში არ ვიტოვებ, ყველაფერს პირდაპირ ვამბობ. გულღია ვარ. როცა რამე მწყინს და მიხარია, ეს განწყობაზე მოქმედებს, განწყობა კი გარეგნობაზე აისახება.

-როგორ ამზადებთ სხეულს გასარუჯად?

-სოლარიუმში კატეგორიულად არ შევდივარ, მაგრამ მზეზე გარუჯვა მიყვარს. გასარუჯად არაფერს ვიყენებ, მხოლოდ სახეზე ვისვამ დამცავ კრემს. ვგიჟდები ტანის კრემებზე. მშვენიერია ქოქოსისა და ალოეს ზეთი, ოღონდ გარუჯვის შემდეგ.

-თუ ვარჯიშობთ?

-ვარჯიში არ მიყვარს, მეზარება, რამდენჯერაც დავიწყე, იმდენჯერ დავანებე თავი. ტრენაჟორები და სიმძიმეები არ შემიძლია, მღლის. ოთხი თვეა დავდივარ აკვააერობიკაზე. ძალიან მომწონს -წყალში ხარ, უფრო მსუბუქად ვარჯიშობ, არც გცხელა, მუსიკაა ჩართული. წყალში ვერთობი, ვლაპარაკობ. თუმცა ესეც მომბეზრდა და ვფიქრობ, ერთი თვე დავისვენო. ჩამიტარებია წყლის, თაფლის მასაჟების პროცედურები, მაგრამ დიდად მოყვარული არ ვარ.

-თმას როგორ უვლით?

-ჩემს შვილს ჩამოაქვს მილანიდან სპეციალური თმის საპნები, რომლებიც ბუნებრივ ინგრედიენტებზეა დამზადებული, ზოგი თმის ცვენას აჩერებს, ზოგი თმის ზრდის პროცესს აჩქარებს. მეც ვიყავი მილანში იმ მაღაზიაში, უზარმაზარი მაღაზიაა და უამრავი რამ წამოვიღეთ. ძალიან ნელა მეზრდებოდა თმა, იქ ნაყიდ საპონს ვხმარობდი და დადებითად იმოქმედა. ჩვენთან შამპუნებს არ ვენდობი. საპნებს, ბუნებრივ საშუალებებს საზღვარგარეთ ვყიდულობ, მიუხედავად იმისა, რომ ძვირია.

-ამბობენ, ქალს უნდა ჰქონდეს ერთი მისთვის დამახასიათებელი სუნამო. რომელია თქვენი საყვარელი სუნამო, თუ გაქვთ ერთი რჩეული სურნელი?

-საყვარელი სუნამო არ მაქვს, რადგან ისე მბეზრდება ყველაფერი, მანქანიდან დაწყებული, რომ სუნამო ბოლომდე არასდროს ჩამიყვანია. ახლა ვხმარობ "ამუაჟს" და უკვე ვგრძნობ, რომ აღარ მინდა.

-ბებია გასწავლიდათ თავის მოვლის ხრიკებს?

-ჩემს ბავშვობაში რომ "დეტსკი კრემი" იყო, იმას ისვამდა ბებიაჩემი სახეზე. ამბობდა, ყველაზე მაგარიაო.

-რასთან ასოცირდება წლების მატება თქვენთვის -შიშთან, სიბერესთან, სიბრძნესთან თუ…

-დაბერება არავის უხარია, მაგრამ თუ ყოველ მხრივ კარგად ხარ, არ გაწუხებს წლების მატება. ერთადერთი მენანება ის, რომ რაღაცას ვერ ვასწრებ, ჩემი პროფესიიდან გამომდინარე, რადგან რაღაც ასაკში რაღაც როლებს ვერ ვითამაშებ. ისე, ყველა ასაკს თავის ხიბლი აქვს და უნდა შეგვეძლოს გემო ჩავატანოთ. სიმართლე გითხრათ, რომ შემომთავაზოთ, ახლავე დაგაბრუნებ ადრეულ წლებშიო, არ მინდა. ახლა ვცხოვრობ საკუთარი თავისთვის -შვილები გაიზარდნენ, საკუთარ გზას დაადგნენ, აღარ სჭირდებათ დედის მოვლა, როცა მინდა, მაშინ ვწვები და ვდგები, არ ვფიქრობ, ბავშვთან ვინ დავტოვო, სკოლაში არ დაგვაგვიანდეს. ამ ასაკში ჰარმონიაში ვარ საკუთარ თავთან.


ხათუნა კორთხონჯია
like
4

კომენტარები

ლელა 2019-08-09 16:26
რაში დაემსგავსა ია ფარულავას? :)
ანა 2019-08-09 16:06
ია ფარულავას დამსგავსებია )))

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.