„მეოცნებენი“, „მოპარული სილამაზე“, „უკანასკნელი იმპერატორი“ - ბერნარდო ბერტოლუჩის ვიზუალურად სრულყოფილი 5 ფილმი

26 ნოემბრეს, ხანგრძლივი ავადმყოფობის შემდეგ ბერნარდო ბერტოლუჩი გარდაიცვალა - იტალიელი რეჟისორი 77 წლის იყო. მისი ფილმები სავსეა იმ დროისთვის ტაბუირებული თემებითა და თავისუფლების განსაკუთრებული ატმოსფეროთი - ბერტოლუჩიმ სიშიშვლე, სექსუალური კავშირები, საზოგადოებრივი აკრძალვები და „მავნე ჩვევები“ ხელოვნების რანგში აიყვანა. პირველი ნამუშევარი სახელად „გაძვალტყავებული სიკვდილი“ ბერტოლუჩიმ 22 წლის ასაკში წარადგინა, ფართო აღიარება კი ათეულობით წლის შემდეგ მოიპოვა „კონფორმისტისა“ და „უკანასკნელი ტანგო პარიზში“ წყალობით. 1988 წელს რეჟისორმა „უკანასკნელი იმპერატორისთვის“ „ოსკარი“ აიღო.

ბერნარდო ბერტოლუჩის სახსოვრად, რომლის ფილმები მოდის დიზაინერებისა და ფოტოგრაფებისთვის შთაგონების წყაროა, ვიხსენებთ
იტალიელი კინორეჟისორის ყველაზე ლამაზ ფილმებს.

„მეოცნებენი“



60 წლების ბოლო პარიზში - დემონსტრაციები, ბარიკადები, საშიშროება გარშემო და რევოლუციური განწყობა. თუმცა ქვეყანაში არასტაბილური პოლიტიკური მდგომარეობა სამ სტუდენტს ხელს არ უშლის იცხოვრონ საყვრელი ფილმებით, ხელოვნებით, საუბრებითა და სექსუალური ურთიერთობებით სავსე საკუთარი ცხოვრებით.




„მოპარული სილამაზე“



სიუჟეტის მიხედვით ახალგაზრდა და ლამაზი ამერიკელი გოგონა, რომლის როლიც ახალგაზრდა ლივ ტაილერმა შეასრულა, ოჯახური ტრაგედიის, დედის თვითმკვლელობის შემდეგ საცხოვრებლად იტალიაში გადადის. ევროპაში გოგონა უცნაური ჩანაწერის ამოცნობას ცდილობს, რომელიც მას დედამ დღიურში დაუტოვა, ასევე სიმშვიდეს პოულობს ფერად იტალიურ პეიზაჟებსა და ოჯახის მეგობრების კომფორტულ ვილაში.




„უკანასკნელი ტანგო პარიზში“



ბერნარდო ბერტოლუჩის ერთ-ერთი ყველაზე ამაღელვებელი სურათი: პარიზი 60 წლების ბოლოს, ღრმა დეპრესიაში მყოფი მოწიფული ასაკის ამერიკელი და ახალგაზრდა, ექსცენტრული პარიზელი ქალი. ვნებიანი სცენების გარდა, სურათი პარიზული ატმოსფეროთი და იმ დროინდელი მოდური კომბინაციებით იქცევს ყურადღებას.




„უკანასკნელი იმპერატორი“



მოქმედება ჩინეთში XX საუკუნის დასაწყისში მიმდინარეობს - „ზეციური იმპერია“ 3 წლის იმპერატორის, პუს ხელში ჩავარდა, ის მმართველი ოჯახის უკანასკნელი მემკვიდრე გახლათ. სურათი დატვირთულია მოსახლეობის მღელვარებითა და განცდებით. შეგიძლიათ ისიამოვნოთ მდიდრული სამეფოსა და რთული ეროვნული სამოსის დათვალიერებით.




„მეოცე საუკუნე“



ფილმი გვიჩვენებს ევროპული ცხოვრების წესსა და მეოცე საუკუნის დასაწყისს, ასევე ღარიბი ბიჭისა და მდიდარი ოჯახის შვილის მეგობრობას. ფილმში ყველაფრის დანახვაა შესაძლებელი - უდარდელი ბავშვობიდან და „მშვიდი“ ევროპიდან დაწყებული პირველი მსოფლიო ომის დაწყების წინ საზოგადოებრივი მღელვარებით დამთავრებული.
ანა ვერძაძე
like
0