ეკოსახლი - მომავლის პროექტი

ბოლო წლებია ეკოლოგიურად სუფთა გარემოში ცხოვრებაზე გაიზარდა მოთხოვნა. განსაკუთრებით მას შემდეგ, რაც მშენებლობების ბუმმა და ბეტონის კონსტრუქციებმა კიდევ უფრო დააზიანა ქალაქის იერსახე, - ჩაახშო სივრცე და გამწვანება.

ასეთ პირობებში განსაკუთრებულ ადგილს იკავებს სწორი და გონივრული გადაწყვეტილებები. მაგალითად, როგორიცაა ეკოლოგიურად სუფთა სახლების მშენებლობა და მოწყობა. ასეთი არჩევანი საზოგადოების განვითარებაზე მეტყველებს. განსაკუთრებით ქალაქგარეთ, სადაც სიმწვანეში, ქალაქისგან გარიდებულებმა ისევ ბეტონის კედლებში არ ამოვყოთ თავი.


არქიტექტორი, რომელსაც ჩვენს რუბრიკაში წარმოგიდგენთ, სწორედ ეკოსახლების მშენებლობითაა დაინტერესებული. კარგად აქვს გააზრებული ასეთი მშენებლობის აუცილებლობა და საფუძვლიანად აქვს შესწავლილი
მათი სტრუქტურა. დავით ხურცილავა სიამოვნებით გვიზიარებს მსოფლიო მასშტაბით მიღწეულ ტექნოლოგიურ სიახლეებსა და მიღწევებს.



-ბატონო დავით, რას ნიშნავს ეკოსახლი და როგორ გადაწყვეტილებებს უკავშირდება?

-ე.წ. "მწვანე სახლის" მცნება ბოლო 20-30 წელია, რაც მთელ მსოფლიოში დამკვიდრდა. გნებავთ სამშენებლო რევოლუცია დაარქვით, რომელიც ჯერ გარემოზე მავნე ზემოქმედების წინააღმდეგ მიმართულ ღონისძიებად იყო მიჩნეული, ხოლო შემდეგ ენერგორესურსების მნიშვნელოვანი ეკონომია დაემატა. ის, რომ სახლი ეკოლოგიურად სუფთად ჩაითვალოს, რამდენიმე კომპონენტს უნდა აკმაყოფილებდეს. ეკოსახლის (მწვანე სახლის) მშენებლობისას არ უნდა იყოს გამოყენებული ჯანმრთელობისათვის მავნე მასალა. ანუ ჯანსაღ საცხოვრებელ გარემოზე უნდა იყოს პასუხისმგებელი. ეკოსახლი თავისთავად გულისხმობს, რომ ენერგოეფექტურია. აუცილებელია ჰქონდეს ხის კარკასი, რომელიც დამუშავებული იქნება დამცავი მასალით. შესაფუთი მასალაც ეკოლოგიურად სუფთა უნდა იყოს.




ენერგოეფექტურ სახლებზე მოთხოვნა კიდევ უფრო იზრდება. ასეთი სახლი შეიძლება სხვადასხვა კარკასითაც აიგოს, თუმცა, აუცილებელია, რომ შეიფუთოს თბოგამტარიანობის კუთხით, მდგრადი კოეფიციენტით, რაც თავისთავად მოიხმარს ბევრად ნაკლებ ენერგიას, ვიდრე ტრადიციული შენობა. ასეთი სახლის მშენებლობა შეიძლება ძვირი ჯდება, მაგრამ გაწეულ ხარჯებს შემდგომი ექსპლუატაციის სიიაფე ფარავს. შედეგად კი ეკოლოგიურად სუფთა გარემოში უწევთ მობინადრეებს ცხოვრება.

-კიდევ რა უპირატესობა აქვსეკო სახლს?

-გარდა იმისა, რომ აგებულია ეკოლოგიურად სუფთა მასალით, ახასიათებს სეისმოლოგიური მდგრადობა. გაცილებით უსაფრთხოა მინიმუმ ერთი ბალით ვიდრე რკინა-ბეტონის კარკასი. არქიტექტურულ-ესთეტიკური თვალსაზრისითაც ბევრი უპირატესობა გააჩნია. ასეთი სახლების ინტერიერში კოლონებს ვერ წააწყდებით, ხოლო გარე კედლის სიგანე არა უმეტეს 25 სმ-ისაა ვენტილირებადი ფასადის ჩათვლით.
არქიტექტურული გადაწყვეტილებების გარდა, ენერგოეფექტურობის შენარჩუნებას სჭირდება კარგად დაგეგმილი საინჟინრო პროექტი (გათბობა, ვენტილაცია, კონდიცირება). აქ შესაძლებელია ფართო სპექტრის გამოყენება. ეს იქნება ბუნებრივი რესურსების მაქსიმალური გამოყენება (მიწა, მზე, ქარი). დღეს დასავლეთში შენდება ავტონომიური, გარე ენერგიის ნულოვანი მოხმარების სახლებიც კი. გამოვყოფ რამდენიმე ტექნოლოგიურ მიმართულებას: გათბობა, იატაკის გათბობა, სადაც იხარჯება დაბალტემპერატურული სითბო და ტექნოლოგიურად ეფექტურად შეესატყვისება მზის თბური ენერგიის გამოყენება. აქვე, აღსანიშნავია ჰელიოსისტემის ძირითადი დატვირთვა ცხელი წყლის გამომუშავებისთვის. კონდიცირება; გრუნტის დაბალპოტენციური სითბოს წლიურციკლოვანი გამოყენება (ზამთარში გათბობისათვის -ზაფხულში გაგრილებისათვის), ელსანათები, LED სანათები. ელექტრომომარაგება, ჰელიოპანელები და სხვა.

-საგურამოში თქვენ მიერ აშენებულ ეკოსახლში ცხოვრობთ. როგორ იმუშავეთ ამ პროექტზე?

-საგურამოში თავს იმდენად კომფორტულად ვგრძნობ, რომ იქიდან წამოსვლაზე არც ვფიქრობ. სანამ სახლის მშენებლობას დავიწყებდი საფუძვლიანად შევისწავლე ასეთი სახლების სტრუქტურა და ღირსებები. ჩემთვის გაუგებარია, ქალაქგარეთ, ეკოლოგიურად სუფთა გარემოში ისევ ბეტონის სახლების მშენებლობა. ხის მასალა და მინიმალისტური მიდგომა ინტერიერშიც შეჭრილია. მოსაპირკეთებლად კანადური წარმოების, დიდი ხის ნაფოტებისგან დამზადებული სტრუქტურული მასალა გამოვიყენე. საკმაოდ დიდი სივრცეა, სადაც ყველა აუცილებელი კუთხე მოეწყო თავისი სათავსოებით. აღსანიშნავია, რომ ამ ტექნოლოგიით აშენებულ სახლებში 2-3-ჯერ უფრო დიდი ათვისებული სივრცეებია ვიდრე ტრადიციულ მშენებლობაში, რაც გამოწვეულია კედლების სისქიდან და ინტერიერში მზიდი ელემენტების არარსებობის გამო. ფართობი სხვადასხვა ზონებადაა დაყოფილი. აქვს ვერანდა სადაც აუზია განლაგებული. რაც შეეხება ინტერიერის ხასიათს და განათების სისტემებს, ლოფტის სტილშია გადაწყვეტილი. დარწმუნებული ვარ, რომ მომავალი ასეთი სახლებისაა, განსაკუთრებით იმ პირობებში, როგორშიც ჩვენ გვიწევს ცხოვრება.


-ეკოსახლების მშენებლობის გარდა სხვა დაკვეთებზეც მუშაობთ. ხომ არ გაიხსენებდით თქვენთვის საინტერესო პროექტს?

- სიამოვნებით გავიხსენებ ერთ-ერთ პროექტს. სახლის არქიტექტურულ ნაწილშიც ინტერიერსა და ლანდშაფტის დიზაინშიც მე ვიმუშავე.
ეს იყო კერძო სახლი. როგორც დაპროექტებაში, ისე აშენებაში აქტიური მონაწილეობა მივიღე. დამკვეთი ბოლომდე მენდო. ამ პროექტში განვახორციელე სიახლე, რომელიც კიბის ელემენტების სახით შევიტანე ინტერიერში. სტანდარტული ჩამოსხმული ბეტონის ნაცვლად კიბე მეტალით ავაწყვე, რომელიც ტროსებზე იყო დაჭიმული. გამოვიყენე ასევე ტექნოლოგიურად ახალდანერგილი გათბობის სისტემა.



სახლს უზარმაზარი გარე ვიტრაჟები ჰქონდა, რასაც მის გათბობაში შეიძლება ხელი შეეშალა. ამან კონკრეტული საინჟინრო გადაწყვეტილება მოითხოვა. სტანდარტულად ვერ მივუდგებოდი საკითხს და საინტერესო გადაწყვეტა მოვუძებნე. ვიტრაჟებთან იატაკში ჩაფლული გათბობის სისტემა გამოვიყვანე. ამ სისტემის წყალობით, ვიტრაჟებთან ამოვიდოდა მთელი სითბო, რაც მაშინ ნოუ-ჰაუ იყო. ინტერიერში კედლის ახალი ფაქტურები, ე.წ. არტელაზურები ჩავსვი. ეს დეკორი დღის სხვადასხვა მონაკვეთში სხვადასხვა სილუეტს ქმნის და განათების სისტემის შესაბამისად იცვლება. შედეგად მრავალფეროვან ინტერიერს ვიღებთ. მიუხედავად ამისა, ინტერიერში მინიმალიზმისა და სისადავის მომხრე ვარ.სახლის ინტერიერიც სადა გამოვიდა. ამასობაში ჩამოყალიბდა ჩემი გემოვნება და ვიცი, რომ მინიმალიზმი მიზიდავს. შეიძლება ინტერიერში ეკლექტიკასაც მივმართო, მაგრამ საბოლოო სახე მაინც სადა ექნება.



არქიტექტურისგან განსხვავებით, ინტერიერის სამუშაოები გაცილებით რთული შესასრულებელია, რადგან წვრილმან დეტალებს სიღრმისეულად უნდა მიუდგე. ინტერიერი აბსოლუტურად გააზრებული უნდა იყოს. რადგან სახლი მოდერნის სტილში იყო აგებული, სადა მოლი და რამდენიმე მცენარე ავირჩიე. სახლს საინტერესო მდებარეობა ჰქონდა, რომლის გათვალისწინებით ვაპირებდი აუზის დაგეგმარებას. კარგი იდეა დამებადა, რომელიც შესასრულებლად რთული აღმოჩნდა. უფრო სწორად კი მასალის ჩამოტანა აძვირებდა ამ პროექტს. სახლის წინაეზო, სადაც დიდი დრო უნდა გაეტარებინათ მის ბინადრებს, ხეობას გადაჰყურებდა. ხეობის დაფარვა არ შეიძლებოდა. რელიეფი მიწით გავასწორეთ. რომელზეც მოაჯირი უნდა გაგვეკეთებინა. გავაკეთე მინის მოაჯირი, რომ ეზოდან ლანდშაფტი არ დაფარულიყო. მინის მოაჯირი შევუერთე აუზის კიდეს. დამებადა ასეთი იდეა -აუზის ის კედელი, რომელიც ხეობას გადაჰყურებდა, მინის გამეკეთებინა. მაგრამ იდეა ძვირად ღირებული აღმოჩნდა და ვერ განვახორციელეთ. ამ პროექტს ყოველთვის სიამოვნებით ვიხსენებ, რადგან დღემდე საინტერესოდ მიმაჩნია. ამ პროექტმა არქიტექტურული პრემიაც დაიმსახურა.



-როგორი მიდგომა გაქვთ, როცა ინტერიერის დიზაინზე მუშაობთ?

-ინტერიერის კონცეფცია არ გულისხმობს ლამაზ შპალერს და ამა თუ იმ კედლის დეკორს. ინტერიერის გადაწყვეტაში ყველაზე მნიშვნელოვანი ფაქტორი ბინის დაგეგმარებაა. წესით, დაგეგმარების ფაზაშივე უნდა გადაწყდეს ინტერიერის ხასიათი. თუ ბინის დაგეგმარება არაკომფორტულია, სასურველ შედეგს ვერ მიიღებ. ინტერიერის ძირითადი შეცდომები დაგეგმარებაშია საძიებელი. მქონია შემთხვევა, როცა სამზარეულო დაგეგმარებული იყო ეზოს მხარეს, ხოლო საძინებლები -ქუჩის. არადა, პირიქით უნდა ყოფილიყო. ასეთ პროექტში ყველაფერი ამოვატრიალე და გარკვეული შედეგი მივიღე.



სიმყუდროვეს ერთ დიდ სივრცეში პატარა კომფორტული სივრცეების შექმნა განაპირობებს. არსებობს რამდენიმე სახის განათება - ცივი, თბილი, ყვითელი. სულ სამი პოზიციაა და კედლის ფერებთან მიმართებაში შეგიძლია ათამაშო. მაგალითად, თეთრი განათებით, პრაქტიკულად, შავ-თეთრი ფოტოგრაფია შეიძლება მიიღო. თეთრი განათება ირეკლავს სივრცეს და დანარჩენ ფერებს აქრობს, ნეგატივისკენ მიჰყავს ინტერიერი. ამდენად, განათების სისტემა სხვადასხვა პოზიციაზე უნდა ააგო, რაც ეფექტური იქნება. რაც შეეხება ჭაღს, თუ სანათების დიზაინს გავითვალისწინებთ, უზღვავი არჩევანია. პატარა ჭაღის გამოყენება აბაზანაშიც შეიძლება. რასაკვირველია, აბაზანის დიზაინს აქვს მნიშვნელობა ისევე, როგორც ინტერიერის გადაწყვეტა მოითხოვს მისთვის შესაფერის სანათის დიზაინს.



-რა დატვირთვას ანიჭებთ და როგორ ირჩევთ დეკორს?

-მინიმალისტურად. შესაბამისად, ვირჩევ ისეთ დეკორს, რომელსაც ეს მიმართულება მოითხოვს. ინტერიერში ნებისმიერი მასალის გამოყენება შეიძლება, მაგრამ გონივრულად. სითბოს შესატანად მომწონს ხის ელემენტები. მინიმალიზმი ინტერიერში გულისხმობს რამდენიმე ფერის თამაშს. დეკორი არ უნდა იყოს გამაღიზიანებელი. თუკი ინტერიერის ხასიათი ჩემში გაღიზიანებას არ გამოიწვევს, ნიშნავს, რომ სწორად არის გააზრებული.




-საკუთარი კომპანიის შექმნამდე სხვადასხვა მიმართულებით საქმიანობდით, სადაც დიდი გამოცდილება მიიღეთ... მოგვიყევით ამ გამოცდილებების შესახებ.

-პირველი დაკვეთები ჯერ კიდევ სტუდენტობის წლებში მივიღე. საზოგადოებაში ინტერიერის დიზაინის მიმართ გაჩნდა ინტერესი. ამან მიბიძგა საკუთარი კომპანიის შექმნისკენ. რაც შეეხება გამოცდილებებს, მათ შორის გავიხსენებ ერთ-ერთ კომპანიას, რომელიც ავეჯს ამზადებდა. ამ კომპანიასთან თანამშრომლობამ მასწავლა ავეჯის დიზაინზე მუშაობა.



ახლა შემიძლია თავად დავხაზო და ავეჯი ავაწყობინო ხელოსანს. მიმუშავია სარეკლამო სფეროშიც. ძირითადად გარე რეკლამაზე, რომელიც სპეციფიკურია და განსხვავებულ მიდგომებს მოითხოვს. სწორედ მიღებული გამოცდილებების საფუძველზე ჩამოვაყალიბე კომპანია, რომლის ძირითადი მიმართულება არქიტექტურა, ინტერიერისა და ლანდშაფტის დიზაინია, რომელსაც ეკო და ენერგოეფექტური სახლების მშენებლობაც დაემატა.

ქეთი დარჩია
































like
0

კომენტარები

პითე 2018-03-15 11:06
კარგია, როდესაც ასეთი მეგობრები გყავს ადამიანს ;)

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.