7 Days Looks: დიზაინერი ნინი ზარქუა საინტერესო რაკურსით

მიუხედავად იმისა, რომ ნინი ზარქუა ახალგაზრდაა, წარმატებას მალე მიაღწია, ბევრი მომხმარებელი ჰყავს როგორც საქართველოში, ისე მის ფარგლებს გარეთ.

 

ამ მარკის, Nini Zarqua, შემქმნელისთვის პროდუქციის მთავარი კომპონენტი მოდურობა, სილამაზე და ხარისხია. ნინი ხშირად ატარებს საკუთარი ნამუშევრების ჩვენებას, შესაბამისად, მაქსიმალურად ახერხებს მისი კომფორტულობის კონტროლს. რამდენიმე ნამუშევარი "ბომონდის" ფოტოსესიისთვისაც შეარჩია. მშვენიერ, მოდურსა და გემოვნებიან ნინის საინტერესო რაკურსით წარმოგიდგენთ.


ერთი დღე სამსახურში


- ჩემი საქმიანი დილა ადრიანად იწყება. თავს ვიწესრიგებ და სამსახურში მივეშურები. მაღაზიას თერთმეტის ნახევარზე ვხსნით. შემიძლია, დავიგვიანო, რადგან ამ საათებში ნაკლები მომხმარებელი გვყავს.

საკმაოდ დატვირთული სამუშაო გრაფიკი გვაქვს: ვმუშაობთ ესკიზებზე, ვიღებთ ფოტოებს. დრო ისე სწრაფად გარბის, რომ ვერ ვიგებთ. ვცდილობ, მომხმარებელთან ინტენსიური ურთიერთობა მქონდეს, უყურადღებოდ არასდროს ვტოვებ, ვურჩევ ფეხსაცმელს. თავადაც ინტერესდებიან ჩემი არჩევანით, აინტერესებთ, ამა თუ იმ კოსტიუმს როგორი ფეხსაცმელი მოუხდება. საქმიან შეხვედრებსაც სამსახურში ვაწყობ. დროს მხოლოდ ლანჩისთვის ვიტოვებ, რომელიც, ძირითადად, შუადღისთვის მაქვს.


მარკის Nini Zarqua გახსნა


-  როგორც დიზაინერმა, საქმიანობა 2016 წელს დავიწყე. კარგად მახსოვს ის დღე, როცა როგორც კომპანია ოფიციალურად დავრეგისტრირდი – 6 მაისი იყო. ჩემი ახალი საქმიანობის პროცესი უცბად განვითარდა. ძნელი დასაჯერებელი იყო, რომ ჩემმა ნამუშევრებმა ასე მალე მოიპოვა მოწონება. არა მარტო საქართველოში, არამედ მის ფარგლებს გარეთაც. ჩემი პროდუქცია უცხოეთში კარგად იყიდება. განსაკუთრებით მიმზიდველი აღმოჩნდა რუსული ბაზრისთვის. თითქმის ათ ქალაქს რეგულარულად ვაწვდით ნაწარმს. რაც მთავარია, მომხმარებელი კმაყოფილია.


წარმატება


- ვცდილობ, თითოეული ნამუშევარი იყოს განუმეორებელი და კომფორტული. ამავდროულად არ უნდა დავივიწყო "ფასთა პოლიტიკა". ალბათ ამ სამმა კომპონენტმა განაპირობა შედეგი, რაც მივიღე. დაინტერესდნენ ჩემი ნამუშევრებით და სიამოვნებით ყიდულობენ. ვფიქრობ, პროდუქციის ფასი გადამწყვეტია, მით უფრო საქართველოში, სადაც საზოგადოების ნაწილი ან უმუშევარია, ან დაბალი ხელფასი აქვს. ჩემი პროდუქციის ხარისხი გაცილებით მაღალია, ვიდრე ფასი. ამიტომ, მაქსიმალურად ვცდილობ, მოვერგო აქაურობას. ჩემთვის მნიშვნელოვანია, რომ ქართველებმაც ატარონ ჩემი ფეხსაცმელი. გვყავს ისეთი მომხმარებლებიც, ვინც 5-6 წყვილი შეიძინა. დამეთანხმებით, დამწყები დიზაინერისთვის დიდი წარმატებაა. მალე მოვახდინე ადაპტირება ჩვენს ბაზარზე, რაც ჩემთვის მნიშვნელოვანია.


განწყობა, რომელიც აუცილებელია


- ინსპირაცია ჩვენი ყოველდღიური ცხოვრებაა. ფეხით ბევრს დავდივარ. შეიძლება ლამაზ შენობას ჩავუარო და ახალი იდეა გამიჩნდეს. შთაგონებას ბევრი სიტუაციიდან ვიღებ. კარგმა და ცუდმა ამინდმაც შეიძლება იმოქმედოს, მომაწოდოს იდეა. ამ მხრივ საინტერესოა ადამიანებთან ურთიერთობაც. ხშირად ინსპირაცია მოგზაურობიდან იბადება. ნამუშევრებზე მუშაობის პროცესი რთულია. ეს გარედან ჩანს მარტივი, როცა ლამაზ ნივთს შენიშნავ. ხშირად ფიქრობენ, ალბათ, ამის გაკეთებას რა უნდა, მოიფიქრე, დახატე და ჩაუშვი წარმოებაში... ასე ნამდვილად არ არის. მარტო თარგს უამრავჯერ ვცვლი, ერთი მოდელი ხშირად განიცდის ტრანსფორმაციას. სამი კვირა სჭირდება, რომ დასრულებული სახე მიიღოს. მანამდე ყველაფერი კეთდება, რომ ნიმუში მაქსიმალურად კომფორტული იყოს. ხომ ვიცით, როგორი ცუდი სატარებელია არაკომფორტული ფეხსაცმელი.

 

ხშირად თაროზეც შემოგვიწყვია. კომფორტის შექმნისთვის ახალ ნიმუშს ჯერ მე ვატარებ. ერთკვირიანი ხმარების შემდეგ ვიცი რა დადებითი და უარყოფითი მხარე აქვს. ვბრუნდები კონსტრუქტორთან და ვიწყებ თარგის შეცვლას. ასეთმა მიდგომამ გაამართლა. თვითკრიტიკული ვარ და მცირე ლაფსუსსაც არ ვუშვებ. ხშირად შეიძლება რვაჯერ მომიხდეს ფეხსაცმლის გადაკეთება. ეს დიდ თანხებთანაა დაკავშირებული. ჩვენ მხოლოდ მაღალი ხარისხის ტყავით ვმუშაობთ. ფეხსაცმლის სარჩულიც ტყავია. სხვანაირად მუშაობა ვერც წარმომიდგენია. მირჩევნია, მეტი დანახარჯი მქონდეს და ხარისხიანი მასალა ჩავუშვა. ნიმუშის საბოლოო ვერსიის დამტკიცების შემდეგ მას წარმოებაში ჩავუშვებთ, ამ დროს შეიძლება ნამუშევარი დასრულებულადაც ჩაითვალოს. ამიტომ ვიბნევი, როცა დამკვეთი მოდის და მთხოვს, ოთხ დღეში ქორწილისთვის ახალი ფეხსაცმელი შევუკერო. ვინც ამ სფეროში არ არის ჩახედული, ეს პროცესი მარტივი ჰგონია. ბევრი ნიუანსია, რომელსაც ვერ გადმოსცემ, მაგრამ გასათვალისწინებელია.


ფოტოსესიისთვის


- "ბომონდის" ფოტოსესიისთვის ბოტფორტი და წითელი ფეხსაცმელი შევარჩიე. ბოტფორტი სატარებლად კომფორტულია. რაც შეეხება წითელ ფეხსაცმელს და იმ კაბას, რომელიც ამ ფეხსაცმელს მოვარგეთ, თავისი ისტორია აქვს: ვინტაჟური კაბაა, რომელიც 12 წლის წინ ჯვრისწერაზე მეცვა. ვთვლი, რომ იმდენად საინტერესო სამოსია, რომ აქტუალურობას არ კარგავს. ამ კაბას ხშირად არც ვატარებ. არც კი ვიცი, მისი ჩაცმა დღეს რატომ მომინდა, გადაწყვეტილება უცებ მივიღე. ისევე როგორც უცებ გადავწყვიტეთ მე და ჩემმა მეუღლემ ჯვრისწერა და ასეთი უცნაური სამოსი გამოგვივიდა. ჩემი მეუღლე ფეხბურთელია, საქართველოში არ ვცხოვრობდით და შესაბამისად, ჯვრისწერის ოფიციალურ მხარეზე არ გვიფიქრია. დიდი პომპეზურობის გარეშე, დღესასწაულმა ახალგაზრდულ მხიარულებაში ჩაიარა. ყველანაირი სტერეოტიპი დავამსხვრიეთ. ჩემი მეუღლეც შავ კოსტიუმში იყო გამოწყობილი. ერთი დღე ოჯახში_ ოჯახთან ერთად ყოფნის სიამოვნება საღამოს საათებში მაქვს, როცა მუშაობას ვასრულებ. ადვილი არ ყოფილა სამი შვილის დედობა. სამივე განსხვავებული ადამიანია და ერთნაირი დოზით მოითხოვენ ყურადღებას. სამივეს სხვადასხვა პრობლემა აქვს გადასაჭრელი. ახლობლები, რა თქმა უნდა, მეხმარებიან, მაგრამ დედას კიდევ სხვა, გაცილებით მნიშვნელოვანი ადგილი უკავია ბავშვის ცხოვრებაში.

 

მეუღლეც მეხმარება. ვფიქრობ, მათ ანებივრებს და ამ თემაზე ხშირად აზრთა სხვადასხვაობაც გვაქვს. მე უფრო მკაცრი და მომთხოვნი ვარ. მეუღლეს ბავშვებთან კონტაქტი აკლდა. თითქმის 10 წელი უცხოეთში ცხოვრობდა, ბავშვების მიმართ მისი მამობრივი გრძნობები არ იყო რეალიზებული და ახლა ინაზღაურებს. რაც შეეხება ერთად ყოფნის დღეებს, დილიდან საღამომდე შაბათ-კვირას ვარ ერთად, ხშირად გავდივართ ქალაქიდან. მეგობრებთან ერთად ოჯახებით ვაწყობთ პიკნიკებს. ვფიქრობ, ასეთ დღეებს საინტერესოდ და სასიამოვნოდ ვატარებთ. სტილი_ ჩემი სტილი დაგეგმილ დღეზეა დამოკიდებული. ძირითადად, სპორტული სტილის სამოსს ვატარებ, რომელიც კლასიკურთან კომბინაციაში საინტერესო და პრაქტიკულია. ბევრს დავდივარ ფეხით და კომფორტულად რომ ვიგრძნო თავი, სპორტულ ფეხსაცმელს ვირჩევ. საქმიან შეხვედრაზე კლასიკური სტილის სამოსს ვიცვამ, შეხვედრის ეტიკეტსაც გააჩნია. მეგობრებთან ერთად კაფეში წასვლა კიდევ სხვა სტილის სამოსს მოითხოვს. შესაბამისად, ჩემი სტილი ხშირად იცვლება.


შოპინგის დღე


- შოპინგი მნიშვნელოვანი თემაა ჩემთვის, ისევე როგორც ქალბატონების უმრავლესობისთვის. მომწონს ქართველი დიზაინერების ნამუშევრები და ვატარებ კიდეც. ხარისხიან პროდუქციას ქმნიან. უცხოურ ბრენდებსაც მივმართავ და როცა საინტერესო სამოსს ვხედავ, მაღაზიის ვიტრინას გულგრილად ვერ ჩავუვლი. ნიუ-იორკში ნამყოფი არ ვარ და ვერ გეტყვით, იქ როგორ ვიგრძნობდი თავს, მაგრამ შოპინგისთვის მიყვარს პარიზი და მილანი. სამოსის შეძენას კონცეპტუალურ მაღაზიებში ვამჯობინებ, სადაც სხვადასხვა დიზაინერის საინტერესო ნამუშევრებს გვთავაზობენ. შესაბამისად, იქ რამის არჩევა მიჭირს, იმდენი კარგი და საინტერესო კოსტიუმია წარმოდგენილი. ყველაფრის შეძენა კი შეუძლებელია. ერთი კონკრეტული ბრენდის მომხარებელი არ ვარ. დიზაინერების და მარკების კოლექციები ყოველ წელს სხვადასხვანაირია, ამიტომ კოლექციასაც გააჩნია. შეიძლება ერთ დროს ჩემთვის უინტერესო დიზაინერთანაც აღმოვაჩინო სასურველი ნამუშევარი. ახლა მომწონს "ბალენსიაგა". ჯერ ერთი, იმიტომ, რომ მისი სახელი ქართველ დიზაინერს დაუკავშირდა, რაც საამაყოა, ამასთან, ჩემთვის საინტერესოა. ვფიქრობ, მოდის სახლის "დიორის" ახალმა დიზაინერმაც კარგი კოლექცია წარმოადგინა. უფრო საინტერესო, ყოველდღიურად სატარებელი გახადა ამ მარკის სამოსი.


ერთი დღე ჩემთვის


- ეს დღე ჩემთვის თავის მოვლას უკავშირდება, თუმცა ვერ ვიტყვი, რომ ამ მხრივ ვინებივრებ თავს. ახლახან იმიჯი შევიცვალე, თმა გადავიღებე. ერთ დღეს გავიღვიძე და საკუთარი თავის განსხვავებულ რაკურსში დანახვა მოვისურვე. თმის ფერთან დაკავშირებით ბევრი კომპლიმენტიც მივიღე, თუმცა ძნელი სატარებელი აღმოჩნდა, რადგან ყველაფერი არ უხდებოდა. მთელი გარდერობის თმის ფერზე მორგება რთული იყო. რაც შეეხება ფორმაში ყოფნას, მეუღლე ვარჯიშს ხშირად მთხოვს, მაგრამ აქამდე ვერ დავიწყე. თავად სულ ვარჯიშობს, დარბის და ჯერ მხარი ვერ ავუბი. წონის დიდი კონტროლი არ მჭირდება, მიუხედავად იმისა, რომ სამი შვილის დედა ვარ. ვიკვებები ჯანსაღი საკვებით, პატარა ულუფებით, მაგრამ ხშირად. სულ ეს არის ჩემი ფორმაში ყოფნის მთელი საიდუმლო.


ქეთი დარჩია

"ბომონდი" მაისის ნომერი

like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.