ფოტოები, რომლებიც ბრაიან გრიფინმა ჟურნალ "ბომონდს" აჩუქა

 ბრიტანელი ფოტოგრაფი, ბრაიან გრიფინი მსოფლიოსთვის ვარსკვლავებისა და უცნობი ადამიანების სახასიათო პორტრეტებით და მუშათა კლასის ცხოვრების ამსახველი ნამუშევრებითაა ცნობილი. 2015 წლის ივნისის თვეში, ის საქართველოს, ფოტოფესტივალ "ქოლგას" ფარგლებში სტუმრობდა. გრიფინმა ჟურნალ "ბომონდს" საჩუქრად თავისი ფოტოები გადასცა.


ამ ფოტოგრაფის ბიოგრაფიაში კიდევ ერთი საინტერესო დეტალია ქართველი მკითხველისთვის: მას შემდეგ, რაც გიორგი შენგელაიას "ფიროსმანი" ნახეს, ბრაიან გრიფინმა და რეი კავაკუბომ საქართველოში ჩამოსვლა და ნიკო ფიროსმანის სახლ-მუზეუმის მონახულება გადაწყვიტეს. ვიზიტის ფარგლებში, 1989 წელს, ადგილობრივ გლეხებს ნაციონალურ სამოსსა და Comme Des Garcons-ის კოსტიუმებში ფოტოები გადაუღეს. ეს

ფოტოსესია ჟურნალ Six Magazine-ში გამოქვეყნდა, როგორც ბრაიანისა და რეის ერთობლივი პროექტი.

ბრაიანის და რეი კავაკუბოს ქართველი მასპინძლის მიერ სამოყვარულო კამერით გადაღებული 1989 წლის ვიდეოჩანაწერი ასეთია: ახალგაზრდა ფოტოგრაფი თავის ასისტენტთან ერთად განათებას აყენებს, რეი კავაკუბო, პერსონალურ ასისტენტსა და სტილისტთან ერთად, ადგილობრივებს Comme Des Garcons-ის კოსტიუმებს არგებს. შემდეგ ფოტოსესია იწყება. ნელ-ნელა ცა იღრუბლება და გადამღები ჯგუფი მასპინძლის ოჯახში გადაინაცვლებს, სადაც ტრადიციული ქართული სუფრაა გაშლილი, ოჯახის უფროსი სადღეგრძელოებს უძღვნის, ხოლო დიასახლისი მაგიდის გარშემო ტრიალებს და ღვინოს სთავაზობს სტუმრებს. რეი თავისი ჩვეული უემოციო და იდუმალი გამომეტყველებით აგემოვნებს ჯონჯოლს და სხვა ქართულ კერძებს, გადამღები ჯგუფის დანარჩენ წევრებთან ერთად. სუფრას ქართული საეკლესიო გუნდის მომღერლებიც უსხედან და პერიოდულად საგალობლებს ასრულებენ.

ბრაიან გრიფინი: `საქართველოში 89 წლის აპრილში, 26 წლის წინ, რეის სურვილით ჩამოვედით. ისიც ჩემსავით მოიხიბლა შენგელაიას ფილმით და ფიროსმანის სახლ-მუზეუმის ნახვა სურდა. 5-7 დღე გავჩერდით თბილისის პატარა სასტუმროში. Comme Des Garcons-ის გადაღებების ფარგლებში "ქართლის დედაც" გადავიღე. ძალიან მომეწონა ქართველების გარეგნობა, განსაკუთრებით მოხუცი მამაკაცების. ქალებიც უკიდურესად საინტერესო, ერთმანეთისგან რადიკალურად განსხვავებული გყავთ: ზოგი მათგანი საოცრად ღია ფერისაა, ზოგიც - უფრო სამხრეთული გარეგნობის. თქვენი პორტრეტები ხასიათებითაა აღსავსე.

არცთუ ისე უსაფრთხო იყო მაშინ თბილისი. ქუჩაში სულ რამდენიმე ავტომობილი დადიოდა, ახლა სრული საგიჟეთია. არა მხოლოდ საქართველო, მას შემდეგ რადიკალურად შეიცვალა ზოგადად მთელი მსოფლიო... ჩვენი ჯგუფი შედგებოდა მძღოლისგან, რეის პერსონალური ასისტენტის - იუკისგან, რეისსავე სტილისტისა და ჩემი ასისტენტისაგან. რეის მსგავსად, ჩემი ასისტენტიც აღარ მინახავს თითქმის უკვე 20 წელია.


საქართველოში ჩვენი ჩამოსვლის მიზეზი გიორგი შენგელაიას მიერ გადაღებული ფილმი - "ფიროსმანი" იყო. ამ ფილმმა, რეის მსგავსად, ლონდონის უცხოური ფილმების ფესტივალზე, ჩემზეც დიდი ზეგავლენა მოახდინა. სხვათა შორის, კიდევ ერთი ქართველი რეჟისორის ფილმი - ფარაჯანოვის "ბროწეულის ფერი" მაქვს ნანახი და ძალიან მომწონს. "ფიროსმანიც" და "ბროწეულის ფერიც", პირადი არქივისთვის, ვიდეოკასეტებზე მაქვს ჩაწერილი.


განსაკუთრებულად მომეწონა მონაზვნების სამოსი, კათოლიკური ქუდებისგან განსხვავებით, შარფები რომ აქვთ შემოხვეული. მღვდლების სამოსიც საინტერესოა. ვფიქრობ, საქართველოში კვლავ ჩამოვალ და ფოტოპროექტს გავაკეთებ. იხილეთ ფოტოგალერეა

ი: ი 

ჟურნალი "ბომონდი"

2015 წლის ივნისის ნომერი

  • წინა
like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.