”ექსპერიმენტების არ მეშინოდა” - რა წვლილი მიუძღვის გიგა აგლაძეს ჟურნალ ”ბომონდის” რებრენდინგში

წლების წინ, საქართველოში ცნობილმა მუსიკოსმა - გიგა აგლაძემ ჟურნალ "ბომონდის" რებრენდინგი განახორციელა, თუმცა კინოსა და მუსიკაში მოღვაწეობა არ შეუწყვეტია. დღესდღეობით ხელოვნების ყველა ჟანრი ახალ ფილოსოფიაში გააერთიანა - ღვინის კონცეპტუალური ბრენდი AG შექმნა.


_ "ბომონდი" პირველი ფერადი ქართული ჟურნალია, რომელმაც რამდენიმესაფეხურიანი ტრანსფორმაციის შემდეგ, დღევანდელი სახე მიიღო. მისი პირველი მთავარი რედაქტორი იყავი, როგორ ხდებოდა ბრენდის ჩამოყალიბება და რა მოვლენებმა განაპირობა ჟურნალის ფორმატის შეცვლა?
-"ბომონდი" ადრე განსხვავებული, უფრო თხელი ფორმატით გამოდიოდა და სხვა რედაქტორი ჰყავდა, ასე რომ, მე ახალი ფორმატის ჟურნალის პირველი რედაქტორი ვარ. ნოემბერში

სწორედ განახლებული "ბომონდის" მე-100 ნომერი გამოდის. ბრენდის განვითარებას რაც შეეხება, ვცდილობდი, მისგან მოდის ჟურნალი შემექმნა, მოლაპარაკებაც ასეთი იყო - პირველივე ნომერი სქელი, პრიალა და სქელყდიანი უნდა ყოფილიყო.

- იმ პერიოდში წარმატებული მუსიკალური კარიერა გქონდა. რატომ დაინტერესდი ჟურნალის მთავარი რედაქტორის პოზიციით?
- იყო დრო, როდესაც მუსიკალურმა კარიერამ პოპულარობა მართლაც მომიტანა და ეს გარკვეულწილად დღემდე შევინარჩუნე. ჟურნალში მხოლოდ შემოთავაზების გამო არ მივსულვარ - მსგავსი ფორმატის ჟურნალის შექმნას თავად ვაპირებდი, კონცეფციაც მოფიქრებული მქონდა. შემდეგ მივიღე შემოთავაზება "ბომონდის" რებრენდინგი განმეხორციელებინა. შევთანხმდით გვეცადა და მართლაც გაამართლა.

- "ბომონდში" შენ მიერ განხორციელებული რომელი იდეა აღმოჩნდა წარმატებული?
- შეძლებისდაგვარად ბევრი პროექტი გაკეთდა. თავიდან ეს ყველაფერი ექსპერიმენტი იყო. საქართველოში მაშინ მსგავს პროდუქციას არავინ ქმნიდა, ასეთი ჟურნალი არავის ჰქონდა. კონცეფციაზე ძირითადად მე და ჯიჯი რეჯინი ვმუშაობდით. ახალი კადრების ჩამოთვლას არ დავიწყებ, არ მინდა, ვინმე გამომრჩეს. ძველ თანამშრომლებს რატომღაც ეგონათ, რომ გავუშვებდი, მაგრამ ასე არ მოვქცეულვარ. მხოლოდ ერთი თანამშრომელი წავიდა, ისიც საკუთარი სურვილით. რედაქციაში ყველა დავტოვე, რადგან თავიანთი საქმე იცოდნენ, მეც ზუსტად ვიცოდი, მათგან რა მინდოდა. ახალი ჯგუფის აყვანას აზრი არ ჰქონდა, ახალი ის ფაქტი იყო, რომ მე და ჯიჯი სრულიად ახალი ხედვით მივედით.

პირველი მასშტაბური პროექტი, ალბათ, თავად ჟურნალის გამოსვლა იყო -  ამაზე ყველა ლაპარაკობდა. საერთოდ, რასაც ვაკეთებ, ყველაფერზე ლაპარაკობენ ხოლმე, ნეგატიური მოსაზრებებიც მსმენია, თუმცა, ესეც ალბათ, გარკვეულწილად, ცხოვრების ნაწილია. ჟურნალი თითქმის ყოველთვიურად სხვადასხვა ქვეყნიდან რეპორტაჟებს გვთავაზობდა - თავადაც ბევრს ვმოგზაურობ და ყველა ქვეყნიდან საინტერესო ამბავი ჩამომქონდა.

"ბომონდს" ახლა თეა ხელმძღვანელობს და მიმაჩნია, რომ ამას ჩემზე კარგად აკეთებს - მინდოდა, მოდის ჟურნალი გამხდარიყო და სწორედ ამ გზით განვითარდა. ჩემი რედაქტორობის დროს კი უფრო სხვა ხასიათი ჰქონდა - შეიძლება ითქვას, მოდის ჟურნალიც იყო, დანარჩენი ნაწილი სხვა თემებს შეეხებოდა. მაშინაც და ახლაც 2-3 სიუჟეტი ყოველთვის ევროპის სხვადასხვა ქვეყნიდანაა - კანის კინოფესტივალი, მოდის კვირეულები და ასე შემდეგ. კიდევ ბევრი მნიშვნელოვანი პროექტი გავაკეთეთ - არც მე და არც ჯიჯის ექსპერიმენტების არ გვეშინოდა და ეს ამართლებდა.

- რა დატვირთვა ჰქონდა პრიალა ჟურნალს ადრე და რა დატვირთვა აქვს ახლა, სოციალური და ონლაინმედიის ეპოქაში. შეგიძლია 3 მიზეზი დაასახელო, რატომ უნდა გვქონდეს პრიალა ჟურნალი 21-ე საუკუნეში?
- ის, რაც მე-19-20 საუკუნეებში აქტუალური იყო, დღეს აღარ უნდა გვაინტერესებდეს. და მაინც, ჟურნალის საჭიროების დასამტკიცებლად ერთი მიზეზიც მეყოფა - არსებობს მეილი, მაგრამ მინდა, ვინმემ წერილი გამომიგზავნოს, იმიტომ, რომ ეს არსებობდა. არ ვიცი, შეიძლება მომავალმა თაობებმა ეს ფენომენი სრულიად მიივიწყონ, მაგრამ მე მასში რაღაც ძველს ვპოულობ და მომწონს. გარდა ამისა, არის ექსკლუზივები, რასაც ამხელა სამყაროში ინტერნეტშიც ვერ ნახავ. და კიდევ: როდესაც ჟურნალთან ან გაზეთთან უშუალო შეხება გაქვს, მათ სუნს გრძნობ, ინტერნეტს კი სუნი არ აქვს. მგონი, 3-ზე მეტი მიზეზი დავასახელე და დაუსრულებლად შემიძლია ვისაუბრო...
- "ბომონდში" ბევრი წლის გატარების შემდეგ, სარეჟისორო კარიერა არჩიე და გადაწყვიტე, შენი პოზიცია თეასთვის დაგეთმო. როგორ ფიქრობ, რა სიახლეები დანერგა?
- ჟურნალი ახლა ბევრად უკეთესია თეასთან ერთად, ვიდრე ჩემთან იყო - მოდის მიმართულებით განვითარდა. მე კი რეჟისორი მანამდეც ვიყავი, ჩემში ამ კუთხით არაფერი შეცვლილა - ჟურნალი კი მრავალწახნაგოვანი ინტერესის ერთ-ერთი გამოცდილება იყო. მე ჩემი პროფესია მაქვს - კინო და მუსიკა, რასაც დღემდე ვემსახურები და ახლა უკვე ღვინის წარმოებაც დაემატა. ხშირად მეკითხებიან, რას იღებ, კინოს თუ ღვინოს? მართლაც, ორივეს გადაღება სჭირდება...

- რა განასხვავებს AG Alco-ს პროდუქციის კონცეფციას ღვინის და ალკოჰოლური მწარმოებლების სხვა ბრენდებისგან?
- ღვინო - ეს ფანტასტიკაა, რომელსაც ბრენდ AG-ს ქვეშ მალე კონიაკი და ჭაჭა შეემატება. ძალიან ბევრ კარგ საქმეს ვაკეთებთ. თუ ვინმეს სურს, ქართული ღვინო გასინჯოს, აუცილებლად ღვინის გემო უნდა იცოდეს. ეს ღვინო საქართველოს სახე გახდება. რა თქმა უნდა, ჩემი განაცხადი ბევრ მეღვინეს გააბრაზებს, მაგრამ მინდა, ღვინის დამზადებაში ერთმანეთს ბევრი მეღვინე შეეჯიბროს, რადგან ღვინო, კონიაკი და სხვა სპირტიანი სასმელები ჩვენი ერთ-ერთი სიამაყეა... ასე რომ, AG-ს კონცეფციაზე შემიძლია გითხრა - ეს ის ღვინოა, რომელიც გსურს, ვინმეს გაასინჯო და შემდეგ იამაყო, რომ ღვინის ქვეყნიდან ხარ...

ტექსტი: ქეთი ფოფხაძე

ფოტო: გურამ მურადოვი

ჟურნალი ”ბომონდი”

ნოემბრის ნომერი

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.