cover Girl: ელენე მახარაშვილი - წარმატებული მოდელი მსოფლიო მოდის ასპარეზზე

ელენე მახარაშვილი ქართველი მოდელების პირველი თაობის წარმომადგენელია, რომელმაც საერთაშორისო წარმატება მოიპოვა.

მოღვაწეობა თბილისში, ნინო ცქიტიშვილის მიერ დაარსებულ სააგენტო Look Models-ში დაიწყო. მალე აზიის ქვეყნებში გაემგზავრა, შემდეგ Look Models-მა ელენეს პორტფოლიო ევროპის ერთ-ერთ ყველაზე გავლენიან სააგენტო IMG-ს წარუდგინა და სამუშაოდ პარიზში, შემდეგ კი - მილანში წავიდა. დღეს ნიუ-იორკში, სააგენტო Next Models-ის კონტრაქტორია, საერთაშორისო ინდუსტრიაში ასევე ყველასთვის კარგად ნაცნობ თაკო ნაცვლიშვილთან ერთად.

თუ მოდელის მონაცემები გაქვთ და ამ მხრივ კარიერის აწყობა გსურთ, სანამ Iნსტაგრამ-ის "ვარსკვლავების" გავლენით წარბებს დაიხატავთ ან ტუჩებს დაიბერავთ, ელენე მახარაშვილის ინტერვიუს

გადაავლეთ თვალი. მორალი: ყველაზე ძვირად ღირებული ბუნებრივია, ყველაზე ელეგანტური -  სადა. სწორედ თავისი ბუნებრივი, განსხვავებული გარეგნობით იმკვიდრებს საერთაშორისო, კონკურენტულ გარემოში ელენე თავს.

- დღეს საერთაშორისო მასშტაბით წარმატებული მოდელი ხარ. როგორ ფიქრობ, რა მომენტი იყო შენს ცხოვრებაში გადამწყვეტი, რის გარეშეც არაფერი მოხდებოდა?
- ვფიქრობ, რომ საერთაშორისო წარმატებულ მოდელობამდე კიდევ დიდი გზა მაქვს გასავლელი და ასეთი გადამწყვეტი მომენტი ჯერ არ დამდგარა.

ქურთუკი - GWEN SALAKAIA
კაბა- Janashia
საყურე, ჩანთა - 711


- აზიის ქვეყნებში წარმატებული კარიერა გქონდა, ამას მალე პარიზში IMG-სთან გაფორმებული კონტრაქტი მოჰყვა. რა განსხვავებაა ევროპისა და აზიის ბაზარს შორის? სად უფრო მეტია ანაზღაურება და სად უფრო კომფორტულია მოდელისთვის მუშაობა?
- აზიაში ევროპასთან შედარებით ბევრად დიდი ანაზღაურებაა, თუმცა ევროპაში შანსები გაქვს, ის ადამიანები გაიცნო, რომლებიც კარიერულ წინსვლაში დაგეხმარებიან.

- ამერიკაში გამგზავრების შესახებ მოგვიყევი, როგორ მიიღე ეს შემოთავაზება? რომელ სააგენტოს წარმოადგენ ახლა და რა პროექტებზე მუშაობ?
- Look Models -ს სპეციალური ვიზიტით Next Models-ის უფროსი ეწვია, რომელმაც ჩვენთან ქასთინგი ჩაატარა. ამის შემდეგ, 3 თვეში საერთაშორისო კონტრაქტი გავაფორმე და ყველაფერი აქედან დაიწყო. პროექტებზე წინასწარ არ ვილაპარაკებ.

- ბუნებრივი სილამაზე გეხმარება თუ არა წარმატების მისაღწევად ამერიკაში, სადაც პლასტიკური ქირურგია გავრცელებულია? არსებობს განსაკუთრებული მოთხოვნები ბუნებრიობაზე?
- მოდელს პირველ რიგში ბუნებრიობა მოეთხოვება. ქირურგიული ჩარევებით რთულია ამ სფეროში წარმატების მიღწევა.

ქურთუკი - GWEN SALAKAIA
კაბა - JANASHIA
საყურე, ჩანთა - 711

- სამოდელო ბიზნესში დიდი კონკურენციაა. მოდელებთან ცხოვრებისა და ურთიერთობის შესახებ რა გამოცდილებას გაუზიარებდი ახალბედებს?
- რა თქმა უნდა, უცხო ადამიანთან ცხოვრება რთულია, თუმცა ვისთანაც მიცხოვრია, დღემდე თითქმის ყველასთან ვმეგობრობ.

- რას ურჩევდი დამწყებ მოდელებს თავის მოვლის შესახებ? ვიცით, რომ ვარჯიშობ და ჯანსაღად იკვებები, კონკრეტულად რა ვარჯიშებს აკეთებ, რამდენ საათს უთმობ ან რომელიმე საჭმელზე უარის თქმა ხომ არ მიწევს.
- ბოლო პერიოდში, ჩემი რეჟიმიდან გამომდინარე, ვარჯიშს ვერ ვახერხებ, თუმცა ყოველთვის ვცდილობ, სწორად ვიკვებო. ამის გამო საჭმელზე უარის თქმა მიწევს ხოლმე.
- განსხვავდება მოდელის სილამაზის სტანდარტები ევროპასა და ამერიკაში?
- სტანდარტებში დიდი განსხვავება არ არის - მოდელები, რომლებიც ამერიკაში მუშაობენ, ევროპაშიც მოგზაურობენ.

-ხშირად აღნიშნავენ, რომ მოდელებმა ყველაზე კარგად იციან, რა ჩაიცვან - ამ გამოცდილებას იმ უამრავი დიზაინერისგან იღებენ, რომელთა ჩვენებებზეც გამოდიან. განსაკუთრებით რომელმა დიზაინერმა მოახდინა გავლენა შენი გემოვნების ჩამოყალიბებაზე?
-რაც უნდა უცნაური იყოს, მოდას არ მივყვები და ასე გამორჩეულად არც ერთ დიზაინერს არ მოუხდენია ჩემზე გავლენა.

კაბა- AKA NANITASHVILI
ფეხსაცმელი - LALO
ჩანთა - 711
- მოდელის ცხოვრება ყველას წარმოუდგენია, რომ პოდიუმიდან პოდიუმს შორის წვეულებებითაა შევსებული. რეალურად რა არის შენი და საერთაშორისო მასშტაბით წარმატებული მოდელის ყოველდღიურობის ნაწილი? გრჩება დრო გართობისთვის?
- მოდელობა გარედან სულ სხვანაირად ჩანს. ქასთინგების გამო დღის განმავლობაში ბევრჯერ გვიწევს გადაადგილება და ეს ყველაფერი მცირე დროის მონაკვეთში უნდა მოვასწროთ... გადაღებები დილის 6-7 საათზე გვეწყება და საღამომდე გრძელდება.

-კარიერის გამო რამის დათმობამ მოგიწია?
- ჯერ არ დამდგარა ჩემს ცხოვრებაში ისეთი მომენტი, რომ კარიერასა და რამე კონკრეტულს შორის არჩევანი გამეკეთებინა.

ქურთუკი - LALO
კაბა - GEORGE KEBURIA
ქუდი, ჩანთა - 711
საყურე - SILHOUETTE

- რა სჭირდება საქართველოს, ინდუსტრია სრულყოფილად რომ განვითარდეს და მოდელების შრომა დაფასდეს?
- მოდელობა, როგორც პროფესია რომ დაფასდეს, აუცილებელია საქართველოში ამ ყველაფერს უფრო სერიოზულად შეხედონ.

- გრჩება დრო მომავალზე ფიქრისთვის? თუ ასეა, სად განიხილავ შენს თავს 10 წლის შემდეგ?
- ჯერ არ მიფიქრია 10 წლის შემდეგ სად შეიძლება ვიყო.

ურნალი "ბომონდი"

ტექსტი: ქეთი ფოფხაძე

ფოტო: საშა პრიშვინი

დეკემბრის ნომერი

like
0

კომენტარები

sofi 2017-01-13 13:07
ukacravad magram sashinlad ushnoa :/

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.