მოდელის კარიერიდან წარმატებული ბიზნესის შექმნამდე: ლიკა კვარაცხელიას საქმიანი ბიოგრაფია

საქმიანი, მომხიბლავი და ელეგანტური, ნებისმიერ პოზიციაზე მაღალპროფესიონალური მიდგომით გამოირჩევა, რაც მისი წარმატების საიდუმლოა.

მოდელის კარიერიდან წარმატებული ბიზნესის შექმნამდე ბევრი იშრომა და დღეს ერთ-ერთი საუკეთესო რესტორნების ქსელის მმართველია. პარალელურად არც მოდის სფეროს ივიწყებს და სამოდელო სააგენტო "ჯეომოდელსთან"თანამშრომლობს.


- ლიკა, თქვენი საქმიანი ბიოგრაფია მოდელის კარიერით იწყება, რაც ალბათ საინტერესო ეტაპი იყო.

- ახლა ჩემი პირველი ინტერვიუ მახსენდება, რომელიც "ბომონდმა"ჩაწერა. მაშინ თქვენი ჟურნალი გაზეთის ფორმატით გამოდიოდა. კარგად მახსოვს, ინტერვიუში ვისაუბრე, რომ მიყვარს სპორტი, ხოლო, შეკითხვაზე, როგორი მამაკაცები მომწონდა, ვუპასუხე, - სპორტული აღნაგობის-მეთქი. გავიდა

წლები და გავხდი სპორტსმენის მეუღლე, მასთან ერთად უცხოეთში გადავედი საცხოვრებლად და მოდელის კარიერაზეც უარი ვთქვი.

როცა პოდიუმზე გამოვდიოდი, ვიცოდი, რომ არ ვემსახურებოდი საქმეს, რომელსაც მთელ ცხოვრებას მივუძღვნიდი. კულისებში ყოფნა უფრო მომწონდა, იქ კომფორტულად ვგრძნობდი თავს. ახლა, როცა თბილისის მოდის კვირეულის ბექსთეიჯს ვმართავ, ის დრო და ჩემი განსაკუთრებული დამოკიდებულება მახსენდება. ეს სურვილიც ამისრულდა, ანუ წინა პლანზე ყოფნა არასდროს მხიბლავდა.



- ოჯახის გამო თქვით უარი მოდელის კარიერაზე?

- არა. სამოდელო კარიერა ავტოკატასტროფის შემდეგ დავასრულე, მაშინ მძიმედ დავშავდი. ოთხი თვე წოლითი რეჟიმი მქონდა, ყავარჯნების გარეშე ვერ დავდიოდი. ფაქტობრივად, იმდენად ამოვვარდი ჩემი საქმიანობიდან, რომ დაბრუნების სურვილი აღარც გამჩენია. ახლა ისევ სამოდელო სააგენტო "ჯეომოდელსში"ვსაქმიანობ და ახალგაზრდა მოდელების კარიერაზე ვზრუნავ. სააგენტო მოდელებს საზღვარგარეთ წასვლასა და მსოფლიოს წამყვან სააგენტოებთან ურთიერთობის ჩამოყალიბებაში ვეხმარებით.

- როდის დაინტერესდით სარესტორნო ბიზნესით და როგორ გაართვით თავი ახალ სფეროს?

- როცა პირველი და მეორე რესტორანი ავაშენეთ, ყველაზე დიდი გამოწვევა და წინააღმდეგობა, შესაფერისი კადრის პოვნა აღმოჩნდა. მაშინ რთული იყო მაღალი კლასის მიმტანის, მზარეულისა და სხვა მომსახურე პერსონალის მოძებნა. ყველაფერს მეუღლესთან ერთად ვუძღვებოდი. იყო პერიოდი, როცა მიმტანის, მზარეულისა და დამლაგებლის პოზიციებსაც ვითავსებდი. ახლა ვხუმრობთ, რესტორნის სცენაზე არ გვიმღერია, თორემ ყველაფერი მოგვისინჯავსო. შემდგომ წლებში შევკრიბეთ საუკეთესო გუნდი, რომელიც დღემდე მოგვყვება. ამასობაში ახალგაზრდა თაობაც მიხვდა, რომ რესტორანში მუშაობა სწავლის პარალელურად მიმზიდველი საქმიანობაა.

- რა არის აუცილებელი ამ ბიზნესის დაწყებისას?

- სხვებისთვის კომფორტის შექმნა. უნდა იყო უჩინარი, მაგრამ არაფერი გამოგეპაროს, რომ სტუმარმა კარგად იგრძნოს თავი.

გუშინ სასიხარულო ამბავი გვაცნობეს, ჩვენი რესტორანი საუკეთესო რესტორნების ხუთეულში შევიდა - "მონოპოლი"მე-4 ადგილზე გავიდა. საუკეთესო მომსახურებასთან ერთად ვცდილობთ, ბაზარზე რეალური ფასები გვქონდეს.

- ბიზნესის წარმართვაში რომელი თვისება დაგეხმარათ?


- პირველ რიგში, თავდაჯერებულობა. უნდა გწამდეს, რომ კარგ საქმეს აკეთებ. ყოველთვის ვიცოდი, რომ წარმატებული პროექტი იქნებოდა, რადგან სხვებისთვის ზეიმის მოწყობა მიყვარს. ვცდილობ, დამკვეთებს ბედნიერი წუთები ვაჩუქო. ამასობაში გავფართოვდით. ხშირად ვცვლი ინტერიერს, რომ გარემო მრავალფეროვანი გავხადო.

- როდის დაუბრუნდით სამოდელო ბიზნესს?

- როცა ჩემი გოგონები წამოიზარდნენ და უფროსმა ქალიშვილმა, ანა შელიამ, სამოდელო კარიერაში პირველი ნაბიჯები გადადგა. თაკო ჩხეიძის დამსახურებით "ჯეომოდელსში"დავიწყე საქმიანობა. რამდენიმე წელია, რაც სააგენტოში ვმუშაობ.

- როგორც გამოცდილმა მოდელმა რა ცოდნა გადაეცით ანას?

- ჩემგან განსხვავებით, ანა ადრეული ასაკიდან პოზირებდა კამერებთან. ყველაფერი იმდენად ბუნებრივად გამოსდიოდა, კორექციის შეტანა არც მიცდია. ერთადერთი, ვურჩიე, რომ საქმე, რომელსაც აკეთებს, უნდა აბედნიერებდეს. ვითხოვ, იმაზე მეტად დაიხარჯოს საქმეში, ვიდრე მისგან ელიან. როცა მოდის კვირეულის კულისებში ვართ, ყველაზე მომთხოვნი ანას მიმართ ვარ.



- რა მოგწონთ და აფასებთ ანაში, როგორც მოდელში?

- პროფესიონალიზმი. მისთვის არა აქვს მნიშვნელობა გადაღების ადგილსა და პრესტიჟულობას. საქმეს მაქსიმალური სერიოზულობით ეკიდება. რომელ სააგენტოებთანაც შეხება ჰქონია, ყველასგან მადლობის წერილებს ვიღებთ. რამდენიმე დღის წინ, მსოფლიოში ერთ-ერთი პრესტიჟული, პარიზის სააგენტო Metropolitan Models Management-სგან მივიღეთ ასეთი წერილი. ემოციისგან ცრემლი მომადგა. გვწერდნენ, რომ იშვიათად შეხვედრიან ასეთ პუნქტუალურ, მოღიმარ, კარგად აღზრდილ მოდელს.

- რომ არა ავტოკატასტროფა ან ოჯახური მდგომარეობა, ანასავით წარმატებული იქნებოდით?

- ჩემგან განსხვავებით, ანა არაჩვეულებრივად გრძნობს თავს კამერების წინ. ამ მხრივ გაცილებით თავდაჯერებულია. 14 წლის ვიყავი, როცა თბილისში ცნობილი ამერიკული სააგენტოს წარმომადგენელი ჩამოვიდა. ჩემს მშობლებს შეხვდა და სთხოვა, რომ მასთან ერთად წავსულიყავი. მოდელის ბრწყინვალე კარიერას მიწინასწარმეტყველებდა. დიდად არ აღმაფრთოვანა ამ წინადადებამ, რადგან ჩემს თავს ამ სფეროში ვერ ვხედავდი. საკმაოდ რთული პროფესიაა. ანას მაგალითზე გეტყვით, ძალიან პატარა ასაკში, სხვა ქალაქში, სრულიად უცხო გარემოში წავიდა საცხოვრებლად. კასტინგიდან კასტინგზე ისე უნდა ევლო, რომ ენერგია შეენარჩუნებინა. ასეთ წინააღმდეგობებს ისე ბუნებრივად უმკლავდებოდა, რომ მასზე არ ვდარდობდი.

- როგორ და სად ხედავთ ანას მომავალს?

- ანას დროებითი შესვენება აქვს. სკოლას ამთავრებს და გამოცდებისთვის ემზადება. ახლა ამაზეა კონცენტრირებული და ეს თვისება მომწონს მასში. შემდეგ ვნახოთ, როგორ განვითარდება მოვლენები. სააგენტოებიდან ახლაც ვიღებ წერილებს. ივლისში ოტ კუტიურის ჩვენებებზე იწვევდნენ, ასევე სექტემბერში იყო დაგეგმილი საინტერესო ჩვენებები. სექტემბრიდან თავად მიიღებს გადაწყვეტილებას, წავა თუ არა სამოგზაუროდ. თუ ამ გადაწყვეტილებას მიიღებს, მოუწევს აკადემიურის აღება. მისი ასაკის გათვალისწინებით, კარგი და წარმატებული კარიერა აქვს, იმ კონკურენციის პირობებში, რომელიც მსოფლიო სამოდელო სფეროშია. მით უფრო, რომ დღესდღეობით სულ სხვა გარეგნობის მოდელებზეა მოთხოვნა.

- როგორც უკვე აღვნიშნეთ, მეორე პლანზეც არაჩვეულებრივად გრძნობთ თავს. ყველაზე მეტად რა გიზიდავთ ბექსტეიჯში?

- ბევრი დამწყები მოდელის თუ დიზაინერისთვის კარიერულ წინსვლაში ბიძგი მიგვიცია, რაც სასიამოვნოა. ბევრი გოგონა აღმოგვიჩენია, რომლებიც მსოფლიოს წამყვან სააგენტოებთან თანამშრომლობენ. ყველაზე მეტად მომწონს, რომ ბევრ ნიჭიერ ადამიანს ვეხმარებით. ჩემთვის ჩვენებაზე ბევრად საინტერესო ბექსტეიჯია, ის ფუსფუსი თუ დაძაბულობა, რომელიც მას ახლავს. ადრე გაცილებით მეტად დაძაბული სამუშაო გვქონდა, ახლა დაიხვეწა და ბევრად უფრო აწყობილია. მკაცრი და მომთხოვნი ვარ. მინდა, ყველაფერი წუთი წუთზე გათვლილი იყოს.

- მოდის სფეროსთან კავშირმა პირადი სტილის ჩამოყალიბებაში რამდენად დიდი გავლენა იქონია და თუ ითვალისწინებთ ტენდენციებს?

- ჩემი ყოველდღიური სტილი ქეჟუალია. ვცდილობ, სადად და კომფორტულად მეცვას. როცა წვეულებისთვის ვემზადები, აუცილებლად ქართველი დიზაინერების ნამუშევარს ვირჩევ. ჩემს გარდერობში თითქმის ყველა ქართველი დიზაინერის ნამუშევარს ნახავთ. ეს მიდგომა, არა მარტო მათ პოპულარიზაციას უწყობს ხელს, სადაც წავსულვარ, განსაკუთრებით ჩვენი ქვეყნის ფარგლებს გარეთ, ყველგან ყურადღების ცენტრში მოვხვედრილვარ. რაც შეეხება მარკებს... მოდის სფეროში ისეთი მრავალფეროვნებაა, ამასთან, მოდა იმდენად დემოკრატიულია, ძნელია რომელიმეს გამორჩევა. მომწონს ისეთი ბრენდები, სადაც ინდივიდუალიზმს ესმება ხაზი. ორი სეზონის წინ Pროენზა შცჰოულერ-ის კოლექცია იყო ჩემი ფავორიტი. ახლა DELPOZO გახდა. ამით იმის თქმა მინდა, რომ სხვადასხვა სეზონზე სხვადასხვა მარკაა ფავორიტი.

- რომელ აქსესუარს ატარებთ?

- ყოველთვის ვატარებ ბეჭედსა და საათს. არასდროს მკეთებია ყელსაბამი და სამაჯური. საყურეს ხშირად ვიკეთებ, მაგრამ ზედმეტი მგონია და გადამწყვეტ მომენტში ვიხსნი.


- ლიკა, თავს როგორ უვლით, ფორმის შესანარჩუნებლად რა პროცედურებს იტარებთ?

- ფორმის შენარჩუნებაში ვარჯიში მეხმარება. მთელი ოჯახი სპორტული ცხოვრებით ვცხოვრობთ. ხშირად ავდივართ კუს ტბაზე და ვვარჯიშობთ. გარდა ამისა, წონასაც ვაკონტროლებ. განტვირთვის დღეებს ვაწყობ. ვიკვებები მცირე ულუფებით. ამასთანავე, ვსვამ ბევრ წყალს. ამ რეჟიმიდან თუ გადავუხვიე და გემრიელად დავნაყრდი, ვარჯიშსა და ფეხით სიარულს ვუმატებ. სახის კანს რაც შეეხება, მივმართავ სხვადასხვა, მსუბუქ ინიექციურ საშუალებას, მაგალითად, ბიორევიტალიზაციას, ასევე RF ლიფტინგს. ეს პროცედურები მომწონს. ბოლო ორი წელია, ხშირად ვიცვლი ვარცხნილობას და თმის ფერსაც. კოსმეტიკური საშუალებებით ვიკეთებ პილინგს და კვირაში ორჯერ თეთრი თიხის ნიღბებს. ვიყენებ Darhhin-ის პროდუქციას. ზაფხულის სეზონზე ვიყენებ დამატენიანებელ გელისებრ კრემებს. შედარებით მსუბუქი კონსისტენციისას, რომ ადვილად შეიწოვოს კანმა განსაკუთრებით გარუჯვის შემდეგ. და კიდევ ერთხელ აღვნიშნავ, რომ ვსვამ ბევრ წყალს.

ქეთი დარჩია
"ბომონდი" , ივნისი

like
2

კომენტარები

leila. 2017-06-29 15:38
chemianebi xarт.meamakebiт zalian.
leila. 2017-06-29 15:36
umagresi xar.
gia ruxadze 2017-06-29 06:21
lika magari xar,dzalian miyvarxar

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.