Lady Gaga & George Keburia

სოციალურ ქსელებში უმალ გავრცელდა ინფორმაცია, რომ ახალგაზრდა, ნიჭიერი დიზაინერის, გიორგი ქებურიას კაბა ცნობილმა პოპვარსკვლავმა, ლედი გაგამ მოირგო.

პოპდივამ გიორგის კაბაში გადაღებული ფოტო ინსტაგრამზე ატვირთა. ხოლო, თავის, მხრივ, გიორგის უკვე ცნობილი კოლექციაMercedes Benz Fashion Week Tbilisi-დან ცნობილ საიტზე vogue.com მოდის კვირეულზე გამოქვეყნებულ რევიუში მოხვდა. სწორედ აქედან დაიწყო ეს ისტორიაც.

გიორგი ქებურია:


- ლედი გაგას პირადი სტილისტი, ბრენდენ მაქსველი დამიკავშირდა და რამდენიმე კოსტიუმის გაგზავნა მთხოვა. ჩემი კოლექცია ვოგის საიტზე ნახა. ამ კოლექციას დიდი გამოხმაურება ჰქონდა. მის შესახებ საიტზეც დაიწერა და ბევრი სტილისტიც დამიკავშირდა.

Mercedes Benz Fashion Week Tbilisi-ზე კოლექციის გამოტანა ერთგვარი პლატფორმა აღმოჩნდა, რომ ქართველ დიზაინერებს საერთაშორისო გამოცემების ყურადღება მიგვეპყრო. ამასთან, ვოგუე.ცომ-ზე მოხვედრაც რთულია. მისი წარმომადგენელი მოდის კვირეულს დაესწრო, თუმცა მის სტატიაში ყველა დიზაინერი ვერ მოხვდა. ჩემი ფოტოებიც მაღალი ხარისხით არ გამოირჩეოდა.
მიუხედავად ამისა, კოლექცია მაინც დაიდო.

- ლედი გაგას სტილისტთან კომუნიკაცია როგორ შედგა?

- მას შემდეგ, რაც ჩემი ნამუშევრები ნახეს, გადაწყვიტეს დაკავშირება. 9 ლუქის გაგზავნა მოითხოვეს, მაგრამ არ მქონდა და 6 ლუქი გავუგზავნე. ლედი გაგას შესახებ ფილმს იღებენ და წინა კოლექციიდან, ორგანზისიასამნისფერი კაბის გაგზავნაც მთხოვეს. ძალიან ეჩქარებოდათ. კაბა ფილმში ვერ მოხვდა, ამიხსნეს, რომ მის სტილისტიკაში ბოლომდე ვერ ჩაჯდა და უკან დამიბრუნეს. თუმცა, ახალი კოლექციიდან ლედი გაგას ივენთებისთვის რამდენიმე ლუქი მაინც შეიძინეს. ამ ლუქებს შორისაა კოპლებიანი კაბა, რომელიც ინსტაგრამზე მოხვდა. შეიძინეს ხავერდის ყვითელი შარვალი, ორგანზის შავი კაბა და ორი სათვალე. არაა გამორიცხული, რომ ამ კოსტიუმების ჩაცმა გადაიფიქროს, თუმცა, ძალიან მაინტერესებს სად და როგორ გამოჩნდება ამ სამოსით.


- ლედი გაგა ერთ-ერთი საინტერესო პოპვარსკვლავია თავისი იმიჯით, რომელიც ხშირად იცვლება. ამ თვალსაზრისით ყოველთვის საინტერესოა მისი გამოჩენა საზოგადოებაში. როგორ ფიქრობ, ეს ლუქები მის ხასიათში ჯდება?


- ადრე უფრო ექსტრავაგანტური სტილი ჰქონდა. განსაკუთრებით მაკქუინის დროს. ვფიქრობ, რომ ახლა გაცილებით სადად იცვამს. უფრო მშვიდია, თუმცა ეპატაჟურობას ინარჩუნებს. მისი ფეხსაცმელი, კაბა თუ სათვალე ხშირად სითამამით გამოირჩევა. სიმართლე გითხრათ, არ ველოდი თუ ჩემი კოლექციით დაინტერესდებოდა.

- საინტერესოა იმ თვალსაზრისითაც, რომ ამ რანგის არტისტები ფრთხილად ეკიდებიან ახალ, უცნობ დიზაინერებს.
-ლედი გაგა ხშირად იცვამდა ახალგაზრდა დიზაინერების, სენ მარტინის ახალი კურსდამთავრებულების სამოსსაც.
- მგონი არავინ იცის, რომ სენ მარტინი კი არა, თბილისის სამხატვრო აკადემიის დიზაინის ფაკულტეტზეც თქვით უარი, ისე მოიპოვეთ წარმატება.


- კი, არავინ იცის. ყველას ჰგონია, რომ სამხატვრო აკადემია დავამთავრე. ვფიქრობ, რომ ამას დიდი მნიშვნელობა არ აქვს.


- როგორ იმუშავეთ ამ კოლექციაზე?


- კოლექციის ინსპირაცია 70-80-იანი წლები იყო. მინდოდა ფერადი გამოსულიყო და ქსოვილებზე განსაკუთრებული აქცენტი გავაკეთე. ამავდროულად არ მინდოდა მხიარული ყოფილიყო. კოსტიუმების სილუეტი და ფორმები ქსოვილმა მიკარნახა. გამოვიყენე როგორც სადა, ისე კუბოკრული ქსოვილები. ვიმუშავე ხავერდზე, ველვეტზე, ორგანზასა და ვინტაჟური სტილის მასალაზე. კოპლებიან კაბაზე მუშაობაც კი მახსოვს, საკუთარი ხელით გამოვჭერი. დიდი ხანი იყო, რაც კოპლებიან ქსოვილზე მუშაობა მინდოდა. ერთ-ერთი ბოლო კაბა იყო, რომელიც კოლექციისთვის შევკერე. ყველაზე გვიან დავასრულე.

- ქალის ცხოვრების განვითარებაზე საუბრობდით. ამ კაბას რომელ ეტაპზე მიაკუთვნეთ ადგილი?

- ქალის ცხოვრების დასასრულისკენ.

- მიუხედავად იმისა, რომ თქვენი კოლექცია კლასიკურ ფორმებში ჯდება, ვერ იტყვი, რომ ზუსტად იცავთ სტილს.

- დიახ, კლასიკურ სტილს ვარღვევ. მინდოდა, ყველა ასაკის ქალბატონს მორგებოდა. ამ კოლექციაში ქალის ცხოვრების სხვადასხვა სტადია, განვითარება გამოვხატე – თინეიჯერობის ასაკიდან, სიბერემდე, ან დაბადებიდან - სიკვდილამდე.… კოლექცია იწყებოდა უმოკლესი ქვედაკაბით, რომელიც სკოლის უნიფორმას ჰგავდა და სრულდებოდა ვარდიანი კაბებით. ვფიქრობ, კოლექციაში საკმაოდ დრამატული ხაზი შევიტანე.

- საინტერესო შედეგით დასრულდა მოდის კვირეულები. ქართველ დიზაინერებს საერთაშორისო გამოხმაურება გაქვთ, რაც თქვენი საქმიანობისთვის მნიშვნელოვანია.

- არ ვიცი, ლედი გაგას ინსტაგრამზე ატვირთულ ფოტოს რა გაგრძელება ექნება. საქართველოში დიდი გამოხმაურება ჰქონდა. აქ რომ დიდი ყურადღება დაიმსახურა, ესეც სასიხარულოა. ეს ფაქტი მნიშვნელოვანია სხვა დიზაინერებისთვისაც. ასევე წარმატებილი იყო მაჩებისთვის, ქეითი პერიმ რომ მოირგო მათი სამოსი, ჰადიდის ირაკლი რუსაძის კოსტიუმები ეცვა. ქართველი დიზაინერები ყველაფერს ვაკეთებთ, რომ საინტერესო კოლექციები ვაჩვენოთ. უკვე საერთაშორისო ასპარეზზეც გავედით, რაც მნიშვნელოვანია ჩვენი განვითარებისთვის. ვფიქრობ, რომ ყოველივე საბჭოთა კავშირის დაშლასა და ამ ქვეყნების მიმართ ინტერესს, საერთაშორისო ბაზარზე ახალი დიზაინერების გამოჩენას, მაგალითად, დემნა გვასალიას სახელს უკავშირდება, რომელმაც დიდი გარდატეხა შეიტანა მოდის სამყაროში. საერთაშორისო გამოცემები, ამ სამი წლის წინ, კიევის მიმართ იჩენდნენ დიდ ინტერესს. მთელი სამყარო კიევის მოდის კვირეულს ადევნებდა თვალს. ახლა ამ ინტერესმა თბილისისკენ გადმოინაცვლა. ვგრძნობდი, რომ ერთ დღეს ასეც მოხდებოდა, რადგან ბევრი ნიჭიერი დიზაინერი გვყავს. ეს მხოლოდ დასაწყისი მგონია. ამ წარმატებაში ხელი შეგვიწყო სოფო ჭყონიამ და Mercedes Benz Fashion Week თბილისმა. ასევე, დიდი როლი ითამაშა სოციალურმა ქსელებმაც, სადაც უცებ ვრცელდება ინფორმაცია. როგორც კი ვოგი ქომზე სტატია დაიდო, რამდენიმე დღეში დამიკავშირდა მაქსველი. მსოფლიოს სხვადასხვა ქვეყნიდან მიკავშირდებიან ინსტაგრამზეც.



- ინსტაგრამზე არ იყო მითითებული, რომ კაბა გიორი ქებურიას ეკუთვნოდა? შეიძლება ლედი გაგას არა, მაგრამ ქართველ გულშემატკივრებს მიეწერათ.

- მის ფანფეიჯებზე რამდენიმე ადგილზე მიუთითეს.

- ახლა რა ეტაპზე ხართ, რაზე მუშაობთ?

-ბოლო შეკვეთებს ვასრულებ და ახალ კოლექციაზე მუშაობას დავიწყებ. ეს იქნება გაზაფხული-ზაფხულის 2018 წლის კოლექცია. ამჯერად ქსოვილებს ვარჩევ, ვიწერ, რადგან აქ დიდი არჩევანი არაა. რაც დრო გადის, მეტი კონკურენციაა ბაზარზე და საუკეთესო ხარისხის ქსოვილების არჩევანია. ახალი კოლექციის სტილი გამოკვეთილია. ალბათ უფრო კლასიკური იქნება. თუმცა ჩემეული ხედვა მის ჩარჩოებს დაარღვევს და საინტერესო გამოვა. ფორმების თვალსაზრისით ახალი არაფერი იყო წინა კოლექციაშიც. უფრო დეტალები შეცვლის განწყობას.

ქეთი დარჩია

"ბომონდი", ივლისი

like
1

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.