პატარა გოგონა დიდი ამბიციებით

დაბადების ადგილი: ამსტერდამი, ნიდერლანდები


ოჯახური მდგომარეობა: დაუოჯახებელი
სიმაღლე: 179 სმ
პარამეტრები: 79-59-87

სამოდელო ინდუსტრიაში ხმები დადის, რომ მოდელისთვის წარმატებული კამპეინის გაკეთება ეს იგივეა, რაც მსახიობისთვის "ოსკარის" მინიჭება. მით უფრო, ახალ სახეს პრადას კამპეინი გაუკეთო, უდავო წარმატებაა. სწორედ ასეთი "ოსკარით" "დაჯილდოვდა" 2016 წელს ნიდერლანდელი მოდელი, იასმინ ვეინალდუმი, რომელმაც სულ რაღაც ორი წელია, სამოდელო ბიზნესში ფეხის ადგმა დაიწყო. იგი ახლა 18 წლისაა. გოგონამ ელვის სისწრაფით გადაინაცვლა მაღალი რანგის მოდელების ეშელონში. ამ ყველაფერში კი "დამნაშავე" სტივენ მეიზელი აღმოჩნდა, რომელმაც პრადას შარშანდელი "პრადა" გაზაფხული\ზაფხულის

კოლექცია გადაიღო. გოგონას ფოტოსესიაზე გვერდს უმშვენებდნენ ისეთი ცნობილი მოდელები, როგორებიც არიან ნატალია ვოდიანოვა და საშა პივოვაროვა. ასე რომ, მკითხაობა უკვე აღარ არის საჭირო - პრადას ახალი სახე სახეზეა!



რა არის ცნობილი მიუჩი პრადას ახალ ფავორიტზე? ბევრი არაფერი, რადგან იგი ძალიან ახალგაზრდაა და ჯერ არაფერი გამოუცდია. მთავარი ისაა, რომ თავად მოდელობაზე არასდროს უოცნებია. არც უცდია, ბედი პოდიუმზე ეცადა, მიუხედავად იმისა, რომ ბევრი ურჩევდა.

- სანამ "ელიტთან" კონტრაქტს ხელს მოვაწერდი, გამუდმებით მიკავშირდებოდნენ და მთავაზობდნენ მოდელობას. მე კი აი, ასეთი რეაქცია მქონდა: ვინ? მე? არა, რას ამბობთ, მე ნამდვილად არ ვარ მოდელი, მაგრამ ერთხელაც დავფიქრდი. რატომაც არა? ვცდი. ავდექი და მონაწილეობა მივიღე ელიტ მოდელ ლუქის კონკურსში... მაშინვე კონტრაქტი შემომთავაზეს. აი, ასე დაიწყო ყველაფერი".
- ღიმილით იხსენებს იასმინი.
16 წლის გოგონა ბევრს კითხულობდა სამოდელო საქმიანობის შესახებ, რაც წინსვლაში დიდად დაეხმარა. ახლა კი გამოდის პოდიუმზე, იძლევა ინტერვიუებს და წარმატებით პოზირებს ფოტოკამერის წინ. მისი კერპია ქეით მოსი, უყვარს პიცა და სერიალი "ვამპირის დღიურები".

ძალზე შთამბეჭდავია იასმინის კარიერული წინსვლა. პრადას შოუს შემდეგ მან ისეთი ბრენდების ჩვენებებში მიიღო მონაწილეობა, როგორიცაა: ვალენტინო, ქლოე, ჯანბატისტა ვალი, კენზო, ლანვინი და ა.შ.
იასმინი გაჩერებას არ აპირებს.

- ჩემი ოცნება იყო პრადას კამპეინში მონაწილეობა. და ეს ოცნება უკვე ამიხდა. შემდეგი ოცნებაა, რომელიმე ცნობილი, პრიალა მოდის ჟურნალის გარეკანზე მოვხვდე.

ის ახალგაზრდაა, თან ნიჭიერი, მოხდენილი და მოდელისთვის დამახასიათებელი ყველა თვისება გააჩნია. ჯერ ყველაფერი წინ აქვს. მოხვდება, აბა რა!

სვეტა კვარაცხელია

"ბომონდი", აგვისტო

 

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.