ბიზნესი ქუსლებზე: ლიკა ლობჟანიძის წარმატების ფორმულა

"არტფარმა" ერთ-ერთი პირველი კომპანიაა, რომელმაც ქართულ ფარმაცევტულ ბაზარზე, ქალბატონებს, სილამაზის ალტერნატიული, თუმცა ევროპაში აპრობირებული ნუტრიკოსმეტიკური საშუალება შესთავაზა. დღეს ქართველმა ქალბატონებმა იციან, რომ გარეგანი სილამაზისა და ახალგაზრდული იერის გასამყარებლად სასურველია, შინაგან სიჯანსაღეზეც იზრუნონ. ლიკა "არტფარმას" დამფუძნებელია და სიამოვნებით მოგვიყვება კომპანიის კონცეფციასა და მისი განვითარების გზაზე, - თუ როგორ იქცა მისი ჩანაფიქრი წარმატებულ ბიზნესად.

- რა გზა გაიარეთ კომპანია "არტფარმამდე"?

- მოსკოვში დავიბადე. მყავს მეუღლე და 16 წლის ვაჟი. განათლება საქართველოში მივიღე. მიუხედავად იმისა, რომ იურისტობაზე ვოცნებობდი, პროფესიით ვარ ზოგადი პროფილის ექიმი.
უნივერსიტეტის დამთავრების შემდეგ, 2007 წელს, დავიწყე მუშაობა ერთ-ერთ წამყვან საერთაშორისო ფარმაცევტულ კომპანიაში. ცხრაწლიანმა სამუშაო სტაჟმა, დაწყებული დაბალი საფეხურიდან გაყიდვებისა და მარკეტინგის ჩათვლით, შემძინა საიმისო ცოდნა და გამბედაობა, რომ დამოუკიდებლად გავძღოლოდი საქმეს. 2014 წელს დავაფუძნე კომპანია "არტფარმა", რომლის ძირითადი მისია გახლავთ ევროპული ბრენდების დამკვიდრება საქართველოს ფარმაცევტულ სფეროში ინოვაციებისა და პრევენციების კუთხით. "არტფარმას" სტრატეგია მოიცავს ჯანრმთელობაზე ზრუნვის თანამედროვე მოდელის შექმნას და დამკვიდრებას საქართველოში.

- თქვენი კომპანია პირველია, რომელმაც ბაზარზე ნუტრიკოსმეტიკური საშუალება შემოიტანა. რატომ შეაჩერეთ არჩევანი "ვიადერმზე"?

- კომპანიის სტრატეგიიდან გამომდინარე, ინოვაციური ბრენდების ძიებისას, 2014 წლის ბოლოს გაფორმდა პირველი კონტრაქტი ევროპის ერთ-ერთ უმსხვილეს კომპანიასთან. ეს არის ჩეხური ფარმაცევტული კომპანია "ვალმარკი", რომელსაც ევროპის ქვეყნებში ლიდერის პოზიცია უკავია ოტის მწარმოებელ კომპანიებს შორის. მათთან ჩემი პირველი საქმიანი ვიზიტისას ადგილზე გავეცანი საწარმოს და მათ პროდუქციას. სწორედ მაშინ გავხდი "ვიადერმის" პირველი ქართველი მომხმარებელი. აღმოვაჩინე, რომ ევროპაში ნუტრიკოსმეტიკა დიდი პოპულარობით სარგებლობს და გადავწყვიტე, ქართველი საზოგადოებისთვის შემეთავაზებინა "სილამაზის კაფსულები". იმ პერიოდში ჩვენთვის, ყველასათვის, სიახლე იყო იმის აღმოჩენა, რომ გარდა გარეგანი მოხმარების კოსმეტიკური საშუალებებისა, არსებობს ასევე, პერორალური გზით მისაღები კოსმეტიკა, რომელიც შიგნიდან ზრუნავს სილამაზეზე და ამავდროულად აძლიერებს გარეგანი საშუალებების ეფექტს.


- როგორც ვიცით, "ვიადერმის" ეგიდით თქვენ შექმენით ინტერნეტსივრცეში ვებგვერდი, პირველი ბლოგი სილამაზის შესახებ. რა მიზნით შეიქმნა ვებგვერდი?

- სულ ახლახან ჩვენ გავმართეთ ორიგინალური კამპანია, რომლის ფარგლებში "ვიადერმი", როგორც სილამაზის ექსპერტი" დაინტერესებულ მომხმარებელს უზიარებს პრაქტიკულ და სასარგებლო ინფორმაციას თავის მოვლასთან დაკავშირებით, აცნობს ექიმებისა და დერმატოლოგებისგან მიღებულ ინფორმაციას, უახლეს ტენდენციებსა და მიდგომებს, რომლებიც დამკვიდრებულია ევროპასა და ამერიკაში და აპრობირებულ მეთოდად ითვლება. ამ მიზნით შეიქმნა ვებგვერდი - ბლოგი სილამაზის შესახებ, რომელზეც სპეციალური ტესტიც განთავსდა. მის შედგენაზე გამოცდილმა კონსულტანტებმა და დერმატოლოგების ჯგუფმა იმუშავეს, შესაბამისად, მაქსიმალურად ზუსტი რეკომენდაციების მიღების საშუალებაა. თქვენ შეგიძლიათ გაიგოთ, რა ტიპის კანი, თმა და ფრჩხილები გაქვთ და როგორ უნდა მოუაროთ მათ.

- რა სპეციფიკა აქვს ფარმაცევტულ ბაზარზე საქმიანობას?

- ფარმაცევტულ ბაზარზე, ისევე როგორც ზოგადად ბიზნესსაქმიანობისას, საჭიროა ეთიკის ნორმების დაცვა და მომსახურების ხარისხის უზრუნველყოფა. განსაკუთრებულ მოთხოვნას კი ის წარმოადგენს, რომ ჩვენ ვემსახურებით ჯანმრთელობას, ამიტომ, ჩვენი უპირველესი დანიშნულებაა, მომხმარებელს მივაწოდოთ ხარისხიანი და უსაფრთხო პროდუქცია. ფარმაცევტული სფერო ერთ-ერთი კარგად განვითარებული ინდუსტრიაა. სხვა ქვეყნების მსგავსად, ჩვენთანაც მაღალკონკურენტული გარემოა და თავის დამკვიდრებისთვის სათანადო ძალისხმევაა საჭირო.

- როგორ უმკლავდებით ასეთ მძლავრ კონკურენციას?

- შეიძლება ითქვას, ადვილად, რადგანაც მომზადებული შევხვდი ცხოვრების ახალ ეტაპს. ჩემი პიროვნული თვისებებიდან გამომდინარე, მიზანდასახული, შრომისმოყვარე და თვითკრიტიკული ვარ. ყოველთვის ზუსტად ვიცი, რა მინდა და რა მიზანი მაქვს. მიზნის მისაღწევად კი ვსახავ კონკრეტულ სტრატეგიას. ამ შემთხვევაში, ვაანალიზებ კონკურენტების საქმიანობის მიმდინარეობას და ყოველთვის ერთი ნაბიჯით წინ მივიწევ, რათა მომხმარებელს შევთავაზო უფრო სასარგებლო და განსხვავებული პროდუქცია. თუმცა დასაშვებ ფარგლებში, კონკურენტებთანაც ვინარჩუნებთ მეგობრულ ურთიერთობას. მუდმივად მზად ვარ ჯანსაღი კონკურენციისთვის. გარდა ამისა, ზურგს მიმაგრებს მეუღლე, რომელიც უკვე 15 წელია ფარმაცევტულ სფეროშია და დიდი პატივისცემით და წარმატებით სარგებლობს. უკანასკნელი 5 წელია, მის ბიზნესს შეემატა სააფთიაქო ქსელი "ფარმაცევტული სახლი", რაც მეხმარება ჩემს საქმიანობაშიც. მისი პროფესიული რჩევებისა და ბაზრის მოთხოვნების გათვალისწინებით სირთულეები ადვილად დასაძლევი ხდება.

მიუხედავად ამისა, გარკვეული ბარიერები, რასაკვირველია, ჩნდება, ამის გარეშე ვერც განვითარდები. მთელი გუნდი ჩემთან ერთად მობილიზებულია, რომ თვალყური ვადევნოთ, როგორც გაყიდვების სტატისტიკას, ასევე მომხმარებელთა ქცევის თავისებურებებს, მათ დამოკიდებულებას, მიდგომას... იმდენად რაციონალურად გვაქვს გაწერილი სტრატეგია და ტაქტიკური ამოცანები, რომ წინააღმდეგობებს ადვილად დავძლევთ ხოლმე.


- რა თვისებებია აუცილებელი საქმიანობაში წარმატების მისაღწევად?

- ეს საკვანძო საკითხია. პირველ რიგში, მიზანდასახულობა, კონკრეტული მიზნის ჩამოყალიბების გარეშე ვერავინ მივა სასურველ შედეგამდე. მე ყოველთვის მკაფიოდ განსაზღვრული მიზანი მაქვს და ზუსტად ვიცი, რა რესურსია ამისთვის საჭირო. აუცილებლად უნდა იყო შრომისმოყვარე, გიყვარდეს ის საქმე, რომელსაც აკეთებ, იცოდე დროის სწორად მართვა. ვფიქრობ, მუდმივი მუშაობა საკუთარ თავზე გვეხმარება წარმატების მიღწევაში. ჩემთვის გულმოდგინე შრომა, დაკვირვებულობა და ანალიზის უნარი ის მნიშვნელოვანი კომპონენტებია, რომლებიც წარმატებულ ბიზნესქეისებს ქმნის.

- ხელმძღვანელ თანამდებობაზე მუშაობა ადამიანის ხასიათზე ახდენს გავლენას?

- ზეგავლენას ახდენს იმ თვალსაზრისით, რომ იზრდება მომთხოვნელობა გუნდის წევრების მიმართ, პასუხისმგებლობა გადანაწილებული საქმეების დროულ და ხარისხიან შესრულებაზე. პოზიცია კი არ გცვლის ან რაიმე პრივილეგიას კი არ განიჭებს, რომ შეიფერო ხელმძღვანელის პოსტი და იყო მკაცრი, სიმკაცრე გიწევს გუნდურად მუშაობის დასარეგულირებლად, გონივრულად გააზრებული ქმედებების სისრულეში მოსაყვანად. მე მუდმივად ვზრუნავ, როგორც საკუთარ პიროვნულ განვითარებაზე, ასევე თანამშრომლების კვალიფიკაციის ამაღლებაზე, რათა ბიზნესინტერესებიდან გამომდინარე, წინ წავწიო დაწყებული საქმე. ამავდროულად, ვარ ლოიალური, ძალიან ვაფასებ ერთგულებას, თანამშრომლობა ჩემთვის არაა ცალმხრივი პროცესი. ეს ნიშნავს, რომ თანამშრომელიც გენდობა, რაკი შენი კომპანია აირჩია. ამ ურთიერთდამოკიდებულებაში უმთავრესია სამართლიანობისა და ობიექტურობის დაცვა.


- რთული გამოწვევების დროს როგორ იქცევით, გადაწყვეტილებების მიღებაში რა თვისება გეხმარებათ?

- რთული და საპასუხისმგებლო გადაწყვეტილებების მიღებაში მეხმარება სიმშვიდე. უპირველესად, დინჯად ვერკვევი საქმის ვითარებაში. ნებისყოფის სიმტკიცით ვახერხებ, არ ავყვე ემოციებს, კარგად ავწონ-დავწონო სიტუაცია. კონკრეტული სირთულის ობიექტურად შეფასებისთვის არ მერიდება, მივმართო ჩემზე კომპეტენტურ, გამოცდილ პიროვნებებს და ვითვალისწინებ მათ რჩევებს.- რისკიანი, ამავდროულად წარმატებული გადაწყვეტილება, რომლითაც ამაყობთ.…

- საკუთარი კომპანიის შექმნა და მის განვითარებაზე ზრუნვა. ძალიან დიდი პასუხისმგებლობაა არა მარტო ბიზნესის მართვა, არამედ თანამშრომლების მოტივაციაზე ზრუნვა, მათთვის კომფორტული გარემოს შექმნა და რაც მთავარია, პროფესიული ზრდა-განვითარების ხელშეწყობა.

- ბუნებრივია, მოგზაურობა გეყვარებათ, რომელია თქვენი საყვარელი ადგილები და - დაუვიწყარი შთაბეჭდილებები...

- მოგზაურობა ჩემთვის არის როგორც განტვირთვის, ასევე სიახლეებით გამდიდრების საშუალება. წელიწადში რამდენჯერმე მიწევს გამგზავრება უცხოეთში, როგორც საქმიანობიდან გამომდინარე, ასევე დასასვენებლად. ყველა ადგილს გამორჩეული ხიბლი აქვს. ყოველი მოგზაურობისას ვცდილობ, დავიმუხტო დადებითი ემოციებით და უფრო ენერგიული დავუბრუნდე ჩემს საქმიანობას. დაუვიწყარი შთაბეჭდილება ჩეხეთს და პრაღას უკავშირდება, რადგან ეს ადგილი კომპანიისთვის ბიზნესის ათვლის წერტილი აღმოჩნდა.

- ადგილი, სადაც ძალიან გინდათ მოხვედრა?

- ბევრი ქვეყანა მინახავს, თუმცა სანახავი კიდევ ბევრია. ვცდილობ, ყველა მომდევნო მოგზაურობა დავგეგმო იმ ქვეყნების გათვალისწინებით, რომელთა ნახვაც მსურს. წელს, მეგობრების რჩევით, დავისვენე მალტაზე და, ვფიქრობ, სწორად გადავწყვიტე. ზუსტად ასეთი განტვირთვა მჭირდებოდა. უკვე შევიგულე რამდენიმე ადგილი, რომელთა მონახულებას უახლოეს პერიოდში ვგეგმავ. ოქტომბრის ბოლოს კი კიდევ ერთი საქმიანი ვიზიტი მელის გერმანიაში.

- სად და როგორ ისვენებთ იდეალურად?

- ჩემთვის იდეალური დასვენება ნიშნავს ყოველი დღის საინტერესოდ და შინაარსიანად გატარებას სასურველი ადამიანების გარემოცვაში. არ აქვს მნიშვნელობა, საქართველოს რომელიმე კუთხეში იქნება ეს, ევროპასა თუ აზიაში. მარტო არასდროს მივემგზავრები, ყოველთვის ვარ ოჯახის წევრებთან ან მეგობრებთან ერთად, ამიტომ ყველგან იდეალურად და კომფორტულად ვგრძნობ თავს მათთან.

- რომელი ქვეყნის სამზარეულო მოგწონთ?

- მშობლიური. ვარ ძალიან კარგი კულინარი, მიყვარს სამზარეულოში ფუსფუსი და ყოველთვის ვიტოვებ დროს რაიმე გემრიელის მოსამზადებლად. სხვა ქვეყნების სამზარეულოდან იაპონური, თავისი ეგზოტიკურობითა და სიჯანსაღით, ყველაზე უფრო მომწონს.

- როგორი სტილის სამოსს ანიჭებთ უპირატესობას?

- სამოსშიც ბუნებრიობა არის პრიორიტეტული. საქმის ვითარებიდან გამომდინარე, სპორტულ-კლასიკური სტილი მირჩევნია. ჩემთვის უფრო კომფორტულია სპორტული სტილის ტანსაცმელი ყოველდღიური ცხოვრებისთვის, ხოლო კლასიკურს საქმიანი შეხვედრებისას ვიყენებ, იქნება ეს ფერის შეხამება თუ ელეგანტურობა.

- თქვენი საყვარელი დიზაინერები და ადგილები, სადაც სამოსის შეძენა გიყვართ?

- როცა გავდივარ ევროპის რომელიმე ქვეყანაში, ვცდილობ, იქ შევიძინო რაიმე ორიგინალური და მიმზიდველი. ჩემი საყვარელი ბრენდებია: "არმანი", "გესი", "დიზელი", "ივ სენ ლორანი", "გალიანო" და სხვა. დიდი სიამოვნებით დავდივარ საყიდლებზე მილანსა და რომში. ქართველი დიზაინერებისგან კი გამოვარჩევ თამუნა ინგოროყვას. ჩემთვის მისაღებია მისი სტილი. მას მივმართავ, როდესაც მინდა გამოვიყურებოდე განსხვავებულად.

- თქვენს საქმიანობას დავუბრუნდეთ, მომავალში სად და როგორ წარმოგიდგენიათ თავი, რა იქნებოდა თქვენთვის იდეალური შედეგი?

- ათწლიან პერსპექტივაში ჩემს თავს ვხედავ ჰოლდინგის ხელმძღვანელად, რომელიც მნიშვნელოვნად აფართოებს ბიზნესს გაყიდვებისა და მარკეტინგის მიმართულებით. სხვათა შორის, ძალიან მიზიდავს სარეკლამო სფეროც. იდეალური შედეგის მისაღწევად გულმოდგინედ უნდა იშრომო, მუდმივად აკონტროლო ბაზრის სიტუაცია და შენი პროდუქტი მოარგო არსებულ მოთხოვნებს, აქედან გამომდინარე, ყოველი წინ გადადგმული ნაბიჯი ეფუძნება სწორ პროგნოზს, რესურსების რაციონალურ ხარჯვას და, რაც მთავარია, იმ შემართებას, რომ მოპოვებული ნდობით გაიმყარო ლიდერის პოზიცია.

ქეთი დარჩია
"ბომონდი", ოქტომბერი

ემა ტუხიაშვილი. იმიჯის ორი მხარე
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.