ჯეფ კუნსი - ახალი ხედვის დიდოსტატი თუ კიტჩის მეფე?!

თანამედროვე ხელოვნებაში უამრავ საინტერესო შემოქმედს, კერძოდ, მოქანდაკეს ვხვდებით. დღესდღეობით მასალების მრავალფეროვნება შესაძლებლობას იძლევა, შეიქმნას ახალი და სრულიად წარმოუდგენელი ნიმუშები. ალბათ, გასული საუკუნის მიწურულს ვერავინ იფიქრებდა, რომ უბრალო ბუშტის ძაღლი დიდ ქანდაკებად გადაიქცეოდა და უამრავ წამყვან გალერეაში საპატიო ადგილს დაიკავებდა. ყველა მიხვდება, რომ ლაპარაკია ამერიკელ არტისტზე, მოქანდაკე ჯეფ კუნსზე. მას ბანალური ობიექტების დიდოსტატს უწოდებენ. ეს, რა თქმა უნდა, ხუმრობით. კუნსის შემოქმედება თანამედროვე მოქმედი არტისტებიდან ყველაზე ძვირად ღირებულია.

მისი ნარინჯისფერი "ბუშტის ძაღლი" 2013 წელს კრისტის აუქციონზე 58,4 მილიონ ამერიკულ დოლარად გაიყიდა, რაც
სრული რეკორდია მსოფლიოში. კრიტიკოსების აზრი მისი შემოქმედების მიმართ ორ ნაწილად არის გაყოფილი. ზოგს ახალი ხედვის დიდოსტატად მიაჩნია, ზოგი კი არსებულის სარფიანად გამოყენებაში სდებს ბრალს. ასეა თუ ისე, თამამად შეგვიძლია ვთქვათ, რომ ჯეფ კუნსი სრულიად ახალი სახელია თანამედროვე ხელოვნებისა და ქანდაკების ისტორიაში. მისი შემოქმედება ყოველთვის ექსპერიმენტია, საზღვარია განვითარებულ ხელოვნებასა და მასკულტურას შორის, ურთიერთობაა საკუთარ თავსა და სამყაროს შორის.


"ვფიქრობ, ხელოვნება იყენებს ყველაფერს, რაც შენ გარშემოა, რაც შენი წარსულია. ჩემმა შემოქმედებამ გააქრო ჩემში ყველა შინაგანი დაბრკოლება და შიში. აი ესაა წარმატების მთავარი გასაღებიც" - ჯეფ კუნსი.


კუნსი 70-იანი წლებიდან იყენებს გასაბერი სათამაშოების იდეასა და ფორმებს თავის შემოქმედებაში. მისი ერთ-ერთი პირველი ნამუშევარია "კურდღელი", რომელიც მაღალ ტემპერატურაზე გაპრიალებული ფოლადისგანაა დამზადებული. ქანდაკებამ უდიდესი აურზაური და დაინტერესება გამოიწვია. მისი ექსპონატად ქცევა ძალიან ბევრ მუზეუმს და გალერეას უნდოდა. ქანდაკებამ ჩიკაგოს ხელოვნების მუზეუმში დაიდო ბინა და მის სავიზიტო ბარათადაც იქცა. მაგრამ, ყველაფრის მიუხედავად, ჯეფ კუნსის სახელის ხსენებისას, პირველ რიგში თვალწინ ბუშტის დიდი ძაღლები წარმოგვიდგება. ამიტომაც კუნსის ყველაზე წარმატებულ სერიად "დღესასწაული" ითვლება, რომელშიც გაერთიანებულია ბუშტის ძაღლი, ტიტები, ბრილიანტი და კვერცხი. ოცი სკულპტურისგან შედგენილი სერია რამდენიმე წლის განმავლობაში იქმნებოდა. სულ ცოტა ხნის წინ, ბოლო ქანდაკებები - ბუშტის გედი, კურდღელი და მაიმუნი დაემატა. ქანდაკებები მსოფლიოს მასშტაბით სხვადასხვა გალერეასა და მუზეუმშია წარმოდგენილი.

მინდა განვიხილო კუნსის კოლაბორაციები სხვადასხვა არტისტთან, სამოსისა თუ ავტომობილების ბრენდებთან. ჯეფ კუნსის ერთ-ერთი დიდი კოლაბორაცია 2013 წელს შედგა მომღერალ ლედი გაგასთან. მათ ერთობლივად იმუშავეს გაგას მესამე სტუდიურ ალბომზე ARTPOP. ალბომის მთლიანი ვიზუალი კუნსის შემოქმედებაა. შიშველ ქანდაკებად ქცეული ფოტოები დიდი, ლურჯი სარკისებრი სფეროებით, რომლებიც ადამიანის უხერხულ ადგილებს ფარავენ. კუნსმა სპეციალურად შექმნა ქანდაკებების სერია, რომელშიც ლურჯი სფეროებია გამოყენებული, შეიქმნა უამრავი ტილოც. ცნობილი იტალიელი მხატვარის, სანდრო ბოტიჩელის "ვენერას დაბადებით" ინსპირირებულმა ჯეფმა ერთ-ერთ ინტერვიუში განაცხადა: "მე მინდოდა, გაგა ყოფილიყო ქანდაკება. ალბათ არ გაგიკვირდებათ და მართლაც, მისგან შევქმენი ცხოვრებაში პირველად ცოცხალი სკულპტურა ლურჯი სფეროთი". ალბომის ვიზუალი ერთ-ერთ საუკეთესოდ დასახელდა მსოფლიოში.



მოდის მოყვარულებისთვის ჯეფ კუნსისა და ლუი ვიტონის მოდის სახლის კოლაბორაცია ერთ-ერთი საუკეთესოა. კუნსმა, მიმდინარე წლის აპრილში, წარმოადგინა ჩანთებისა და აქსესუარების კოლაბორაცია, რომელზეც პრინტებად ცნობილი მხატვრების ნამუშევრები გამოიყენა. კოლექციაში "Masters"გაერთიანებულია ლეონარდო და ვინჩის, ტიციანის, პეტერ პაულ რუბენსისა და ვინსენტ ვან გოგის ნამუშევრები. კოლაბორაციამ გამოსვლისთანავე გაყიდვების რეკორდულ მაჩვენებელს მიაღწია და ბრენდმა კუნსს თანამშრომლობის გაგრძელება სთხოვა. სულ რამდენიმე დღის წინ ფრანგული ბრენდის ვიტრინებში გამოჩნდა ახალი ჩანთები და აქსესუარები სხვა მხატვრების ნამუშევრებით.


კოლაბორაცია "Masters II" მოიცავს კლოდ მონეს, ედვარდ მანეს, პოლ გოგენის, ნიკოლა პუსენის, ფრანსუა ბუშესა და უილიამ ტერნერის ნამუშევრებს. ხელოვნების ისტორიისა და მოდის კოლაბორაციამ კიდევ ერთხელ შექმნა ძალზე დასამახსოვრებელი პროდუქტი. ლუი ვიტონის ჩანთებზე მორგებული უდიდესი მხატვრების ნამუშევრებით, კუნსმა კიდევ ერთხელ გააოცა საზოგადოება. დაპრინტულ ჩანთებზე ოქროსფრად წერია მხატვრის გვარი და რა თქმა უნდა, "LV" თავისი ტრადიციული ლოგოებით. კუნსმა რეკონფიგურაცია გაუკეთა ბრენდის ცნობილ ლოგოს, რაც ბრენდის 163-წლიან ისტორიაში არასოდეს მომხდარა. ძალიან საინტერესო იყო მოდის და ხელოვნების კრიტიკოსების აზრი. მოდის კრიტიკოსების განცხადებით, კუნსმა შთამბეჭდავი კოლაბორაცია შექმნა და მოდის მიმდევრებს შემოქმედებითობისკენ მოუწოდა. მაგრამ სრულიად საპირისპიროდ გამოიყურება ხელოვნების კრიტიკოსების აზრი. ამ კოლაბორაციას წინ უძღოდა 2014 წელს, შვედურ ბრენდ H&M-ისთვის შექმნილი ჩანთები, რომლებსაც ამშვენებდა მისი "ყვითელი ძაღლი".

აქსესუარი განსაზღვრული რაოდენობით შეიქმნა და იყიდებოდა მხოლოდ ნიუ-იორკში, მეხუთე ავენიუსა და 48-ე ქუჩების კუთხეში მდებარე აღნიშნული ბრენდის მაღაზიაში.



2010 წელს ავტომობილების გერმანულმა ფირმამ BMW, რომლის სპორტული მანქანების დიზაინზე იმუშავეს თანამედროვეობის ყველაზე ცნობილმა შემოქმედებმა - ალექსანდრე კოლდერმა, ოლაფურ ელიასონმა, როი ლიხტენშტეინმა, ენდი უორხოლმა, ჯონ ბალდესარიმ, ცაო ფეიმ და სხვა, დიზაინი ჯეფ კუნსს დაუკვეთა. თანამშრომლობა წარმატებული გამოდგა.შედეგად შეიქმნა არტ მანქანა BMW M3 GT2. კუნსის განცხადებით, ის დიდხანს მუშაობდა ავტომობილის დიზაინზე. შეისწავლა უამრავი ნიმუში, ასევე გაეცნო სხვადასხვა გრაფიკულ მიმდინარეობას. BMW M3 GT2 შექმნილია უახლესი მასალების გამოყენებით და ფერადი ზოლებით მიღწეულია 3D ეფექტი. შავ ფონზე ასობით ფერადი ხაზის დინამიკურობა იძლევა დაუძლეველი სისწრაფის ეფექტს. სწორედ ეს იყო კუნსის ამოცანაც, შეექმნა ავტომობილის დიზაინი, რომელიც კიდევ უფრო გადაჭარბებულად წარმოადგენდა მის რეალურ სიჩქარეს.


ასევე, ძალიან საინტერესოა და აღსანიშნია ჯეფ კუნსის კოლაბორაცია "Dom Perignon"-თან. თანამშრომლობა შამპანურის ისეთ ბრენდთან, რომლის დიზაინზეც პაბლო პიკასო, სალვადორ დალი, ენდი უორხოლი და ამერიკელი რეჟისორი დევიდ ლინჩი მუშაობდნენ. 2013 წელს შედგა ვინტაჟური, 2003 წლის შარდონესა და პინო ნუარის საუკეთესო მოსავლით შექმნილი, ვარდისფერი, მშრალი ცქრიალა ღვინის პრეზენტაცია, რომელიც სპეციალურად შეიქმნა ჯეფ კუნსთან ერთად. ბოთლის ქეისის, სახელწოდებით Balloon Venus (ბუშტის ვენერა), ინსპირაციას პალეოლითის ხანის ვენერას ქანდაკება წარმოადგენდა. შამპანურის ლიმიტირებული სერია გამოვიდა და მისი ფასი ქეისით 15 ათას ევროს შეადგენდა.


2016 წელს Kunsmagoogle-სთან კოლაბორაციით შექმნა ე.წ. ცოცხალი ტელეფონის ქეისი Nexus 6P და Nexus 5X სმარტფონებისთვის. ქეისები შექმნილია მხატვრის პოპულარული სერიის Gazing Ball სამი ნიმუშის მიხედვით. ქეისში ჩამონტაჟებული ჩიპის საშუალებით, ეკრანზე გადმოდის იგივე გამოსახულება, რაც ქეისის გარეკანზეა.

ჯეფ კუნსის ბოლო, მასშტაბური გამოფენა სახელწოდებით "რეტროსპექტული", მის მშობლიურ ქალაქ ნიუ-იორკში, უიტნის ამერიკული ხელოვნების მუზეუმში ჩატარდა. უზარმაზარ გამოფენას მუზეუმის მთელი ტერიტორია დაეთმო, წარმოდგენილი იყო კუნსის ნამუშევრები სერიების მიხედვით.



შეიძლება დაგაინტერესოთ: პროვოკაციული ოპტიკური ილუზია - ივანე ქეშიკაშვილის ბლოგი

ივანე ქეშიკაშვილის ბლოგი: სანაპირო მოდის ევოლუცია

მოდა ათწლეულების პრიზმაში - ივანე ქეშიკაშვილის ბლოგი
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.