კიარა მასტროიანი - ბინდში დარჩენილი მამაკაცები

ცნობილი მსახიობი კიარა მასტროიანი მარჩელო მასტროიანისა და კატრინ დენევის ქალიშვილია. იგი დაიბადა პარიზში, 1972 წლის 28 მაისს, ზუსტად ორი კვირის შემდეგ, რაც მარკო ფერერის ფილმი, "ლიზა" ფართო ეკრანებზე გამოვიდა. ეს ის დროა, როცა კიარას მშობლებს ბობოქარი რომანი ჰქონდათ. მერედა, რა მშობლებს! იქნებ ამიტომაც ვერ გაექცა კინემატოგრაფიას! რადგან მარჩელოსა და კატრინს ერთად ერთი დღეც არ უცხოვრიათ, გოგონას ბავშვობა იტალიასა და საფრანგეთს შორის მგზავრობაში გაილია. ალბათ ამიტომაც ითამაშა "იძულებით" თავისი პირველი როლიც - დედას ვერ გაუტეხა ხათრი, მეორედ კი მამას ვერ უთხრა
უარი და ნიკიტა მიხალკოვის მიწვევა მიიღო...

"დედა მკაცრი იყო, თან როგორი მკაცრი. კატრინი დედაჩემი რომ არ ყოფილიყო, ის ქალი იქნებოდა, ვისიც ყველაზე მეტი შიში მექნებოდა", - ამბობს მსახიობი.

16 წლის რომ გახდა, დედამ გადაწყვიტა, - რადგან კიარას არქეოლოგიისადმი ჰქონდა მიდრეკილება, ქალიშვილს სორბონის უნივერსიტეტში შესაბამის ფაკულტეტზე "უკრა თავი". მაგრამ ბავშვობის მეგობარმა, მელვილ პუპომ იქონია გავლენა გოგონაზე და ურჩია, სამსახიობოზე ჩაებარებინა, ოღონდ მშობლებისგან მალულად. რა თქმა უნდა, დამოუკიდებლად ამას ვერ მოახერხებდა, მაგრამ ბოლოს და ბოლოს, დაუსრულებელი კასტინგების შემდეგ, მხსნელად კვლავ დედა მოევლინა - "ჩემი საყვარელი წელიწადის დროს" გადასაღებად რეჟისორს კეთრინისთვის ქალიშვილის როლის შემსრულებელი დასჭირდა და რაღა სხვაგან უნდა ეძებნათ?.. და კიარა ეკრანს დაუბრუნდა.


თუმცა ამ ფილმით აღებული "სეზარი" უფრო დედის საამებელი ჯილდო იყო, ვიდრე მისი ნიჭიერების აღიარება. პროტექციების ისტორია კი გაგრძელდა: იგი კიდევ რამდენიმე ფილმში დენევის "ხათრით" გადაიღეს...

არავინ იცის, სადამდე გაგრძელდებოდა ეს პროტექციები და "საქმიანი კავშირები", პირველი "დიდი" როლი რომ არ გამოჩენილიყო - მკაცრმა და უკომპრომისო ქსავია ბოვუამ ნაზი და რომანტიკული მსახიობი კონტრამპლუაში მოსინჯა...
მოსინჯა და კიარასაც მაშინვე გამოუვიდა!


ადრე მას "არასწორად" იღებდნენ. ქსავიამ კი სწორად გადაიღო. ხოლო ერთი წლის შემდეგ მსახიობის ცხოვრებაში დიდი ხნით დაიდო ბინა გრეგ არაკმა, რომელმაც ასევე სწორად გამოიყენა კიარას ნიჭი. თვით კეთრინისთვისაც კი თავზარდამცემი აღმოჩნდა, როცა აზიზად გაზრდილი ქალიშვილი ლესბოსელის როლში იხილა.

კიარამ დედ-მამის ჩრდილისგან საბოლოოდ დაიძვრინა თავი. მას უკვე აღარ სჭირდებოდა მათი პროტეჟეობა და ჩამოაყალიბა ცხოვრების მისეული გზა: არანაირი კომერცია და თავბრუდამხვევი საერთაშორისო პროექტები - უმჯობესია, თავისი ნიჭი პატარა გადასაღებ მოედნებზე, სერიოზულ რეჟისორებთან გამოავლინოს.
არავითარი რომანტიკული სახე - მხოლოდ მკაცრი რეალობა და ცხოვრებისეული რეალიზმი!

კიდევ ერთი პლუსი, რაც მსახიობს მშობლებისგან გამოარჩევს - საბედნიეროდ, კიარა შორს დგას ყოველგვარი "გლამურისგან" და არ მიეკუთვნება "ნაციონალურ მონაპოვარს" - არც ფრანგულს, არც იტალიურს. მას ეს სულაც არ უშლის ხელს კარიერულ წინსვლაში, პოტენციალი კი უზარმაზარი აქვს. ასე რომ, მთავარი როლები ჯერ კიდევ ელის.

ისე, ამბობენ, რომ გოგონას მშობლებში არ გაუმართლა. დედა, კატრინ დენევი, საფრანგეთის სიმბოლოა. მამა, მარჩელო მასტროიანი - იტალიის. აბა, როგორ გინდა ამით იცხოვრო? გინდა, არ გინდა, მაინც მარჩელოს და კატრინის შვილი ხარ და არა კიარა - ნიჭიერი მსახიობი. ასეა თუ ისე, ერთი რამ ფაქტია! ასეთი გენები ყველას ხვედრი როდია!

ინტელიგენტურობა, დამოუკიდებლობა, ბუნებრივი ელეგანტურობა, სურვილი და ცოდნა გარისკვისა, თანდაყოლილი გემოვნება, თავმდაბლობა - ის თვისებებია, რომელიც დაეხმარა მსახიობს, ახალგაზრდა ფრანგი რეჟისორების მთელი თაობების მუზა ყოფილიყო - ქსავიე ბოვუადან დაწყებული, კრისტოფ ონორეთი დამთავრებული.

21 წლის იყო, პირველად რომ ითამაშა ეკრანზე. ეს იყო ანდრე ტიშინის ფილმი "ჩემი საყვარელი წელიწადის დრო", ისიც, როგორც უკვე აღვნიშნეთ, დედის ხათრით. იღებდნენ როგორც კლასიკოსი რეჟისორები - რობერტ ოლტმანი, მანუელ დე ოლივეირი, ისე ყველაზე მოდურებიც - გრეგ არაკი, მაიკ ფიგისი, კრისტოფ ონორე და სხვები.
მისი ხუთი საუკეთესო ფილმის ჩამონათვალი ასე გამოიყურება:
"მზა კაბა", "არსად", "სასტუმრო", "ყველა სიმღერა სიყვარულზე" და "პერსეპოლისი". ეს უკანასკნელი მულტფილმია, სადაც კიარამ მთავარი გმირი გაახმოვანა.

რაც შეეხება პირად ცხოვრებას...
სასიყვარულო რომანი ჰქონდა მსახიობ ბენისიო დელ ტოროსთან და სკულპტორ პიერ ტორეტონთან. მასთან შეეძინა ვაჟი, მილო. მოგვიანებით ცოლად გაჰყვა მწერალს, მომღერალსა და კომპოზიტორს, ბენჟამენ ბიოლეს, რომელთან ერთადაც 2004 წელს ალბომი გამოუშვა, სახელწოდებით Hომე. მათ ეზრდებათ ქალიშვილი ანა. და-ძმას შორის ასაკობრივი სხვაობა 6 წელია.

პირადი ცხოვრების დალაგება ყოველთვის უჭირდა. როცა მორიგ მარცხს განიცდიდა, მაშინვე დედას ურეკავდა საშველად.
- არაფერი საშინელება არ მომხდარა! ამასაც გადაიტან! მანამ კი, მგონი, აჯობებს, ჩემთან გადმოხვიდე საცხოვრებლად, ჭრილობები მოიშუშო. - დედის ხმა ყურმილის მეორე მხარეს მბრძანებლურად ჟღერდა.

და მიუხედავად იმისა, რომ კიარა უკვე ორმოცი წლის იყო, მაინც დაემორჩილა დედას. მისი მკაცრი ტონი, მოუთმენლობა ხმაში, კიარას ყოველთვის პულსს უჩქარებდა. დედის შეგონებების მოსმენისას ისეთი შეგრძნება ეუფლებოდა, თითქოს ეს-ესაა, სასიკვდილო განაჩენი გამოუტანესო.
ღამის ორი საათი იყო, დედას ატირებულმა რომ დაურეკა და აუწყა:

- მან მითხრა, ჩვენ განსაკუთრებული ურთიერთობა არასდროს გვქონია, ერთმანეთთან სერიოზული არაფერი გვაკავშირებდაო.
- საერთოდ არ მაინტერესებს, რას ამბობს ის ნაძირალა! - მკაცრად გააწყვეტინა დედამ. კატრინ დენევი, ლეგენდარული ფრანგი მსახიობი და ერთ-ერთი ყველაზე ლამაზი ქალი მსოფლიოში, ვერ იტანდა, როცა კიარა თავს იმცირებდა "არარაობა მამაკაცების" წინაშე. - წამითაც არ მჯეროდა, რომ თქვენ ერთად იქნებოდით. ის კაცუნა საშენო არ არის, ყველა სიკეთესთან ერთად, ბებერიცაა.

რამდენჯერ მიუცია შენიშვნა ქალიშვილისთვის, საყვარლის შერჩევა ვერ ისწავლეო. რამდენჯერ გაუმეორებია: "შენ სრულიად დამოუკიდებელი, თავისუფალი ადამიანი ხარ. თუ ურთიერთობა არ გამოგდის, არ ღირს პირველსავე შემხვედრთან გააბა რომანი! რატომ ავსებ შენს ცხოვრებას ამდენი სისულელით? მიმატოვა-მაწყენინა-მიღალატა! გეყოფა! არაფრის მოსმენა არ მსურს!"

კატრინი არასდროს თანაუგრძნობდა შვილს. შეიძლება იმიტომაც, რომ თავადაც ვერ ეღირსა პირად ბედნიერებას. მაგრამ ცხოვრება ხომ გრძელდება? ის ასეირნებს ძაღლს, რწყავს აივანზე ყვავილებს, პროდუქტებს ინტერნეტით უკვეთს, თამაშობს ფილმებში... და რა, განა ვერ ერევა მარტო ამ ყველაფერს? მშვენივრად! კიარას რაღა ემართება? რატომაა სულ დეპრესიაში? გამუდმებით სიყვარულს რატომ დაეძებს? სულაც არ სურდა, ასეთი შვილი ჰყოლოდა. უნდოდა, დამოუკიდებელი ყოფილიყო, მამაკაცებისგან დამოუკიდებელი და მთელი ცხოვრება ცივი გონებით ეხელმძღვანელა, საღად ეაზროვნა.

თუმცა, გავა წლები და კიარას ყველაფერი გამოუვა. დღეს მისი სრული ბედნიერება მთავარი როლები და უფრო მთავარი - შვილებია... მისგან წასული მამაკაცები კი სამუდამოდ წარსულის ბინდში დარჩებიან...

სვეტა კვარაცხელია
"ბომონდი" ოქტომბრის ნომერი
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.