M.G. – ახალი მარკის ისტორია

პირველი კოლექცია თბილისის მოდის კვირეულისთვის შეიქმნა, დიდი შრომისა და გამოცდილების შედეგად.
დიზაინერ მეგი გაბუნიას ნამუშევრები მაშინვე გაიყიდა. პირველი წარმატება იმდენად შთამბეჭდავი იყო, რომ გაჩერება არ შეიძლებოდა. მეგი ამჯერად 2018 წლის კოლექციაზე მუშაობს და სიამოვნებით გვესაუბრება საკუთარი გამოცდილებისა და ახალი კოლექციის შესახებ.

მეგი
- სამხატვრო აკადემიის მოდელირების ფაკულტეტი დავამთავრე. სწავლის პერიოდშივე დავიწყე ფეხსაცმლის დიზაინზე მუშაობა. 18 წლიდან ვმუშაობდი ტყავზე. თვრამეტწლიანი გამოცდილება მაქვს ამ მიმართულებით. აკადემიის დასრულების შემდეგ, სხვადასხვა პერიოდში, სხვადასხვა დიზაინერთან ვთანამშრომლობდი, ძირითადად ფეხსაცმლის კოლექციებზე.



- შეიძლებოდა ფეხსაცმლის ხაზი გაგეგრძელებინათ, თუმცა
სხვა მიმართულება აირჩიეთ.


- დიახ, ბუნებრივი იქნებოდა, თუმცა საინტერესო პრაქტიკული გამოცდილება მომიტანა ფილმებზე, კერძოდ კი ტელევიზიაში საქმიანობამ. პირველ არხთან ვთანამშრომლობდი დოკუმენტური სერიის "საქართველოს ისტორია" გადაღებებზე, სადაც კოსტიუმების მხატვარი ვიყავი. ვიმუშავე შუა საუკუნეების ქართულ კოსტიუმებზე, ნატურალურ ტყავზე, ყოველი ნაკეთობა ხელით იყო შექმნილი. ამ საქმეში დამეხმარა ტყავზე მუშაობის გამოცდილება. შუა საუკუნეების კოსტიუმებში ტყავი ერთ-ერთი მთავარი მასალა გახლდათ, ბეწვთან და ლითონთან ერთად. ქალს არ შეეფერება, ისეთი უხეში და მძიმე იარაღებით მიწევდა საქმიანობა. ჯაჭვის პერანგები და მასთან ერთად აბჯარზე მიმაგრებული სამკლავურები და მოსართავები ხელით გავაკეთე. ეს კოლექცია დღემდე ინახება ტელევიზიაში. მას შემდეგ რამდენიმე ფილმზე ვიმუშავე და გარკვეული გამოცდილების შემდეგ, საკუთარი კოლექციის შექმნის იდეა დაიბადა, რომელიც შარშან, შემოდგომაზე განვახორციელე. თბილისის მოდის კვირეულამდე ერთი კვირით ადრე დრო გამომითავისუფლდა - ეს პერიოდი გამოვიყენე კოლექციაზე სამუშაოდ და კვირეულში მივიღე მონაწილეობა. ძირითადი საქმიანობის პარალელურად ვაკეთებდი ჩანახატებს. ასე შეიქმნა სერია აფრიკულ მოტივებზე. ეს ნამუშევრები პრინტის სახით ქალის ყოველდღიურ კაბებზე გადავიტანე.



- ეს იყო თქვენი პირველი კოლექცია?


- დიახ. ეს გახლდათ ყოველდღიური ტანსაცმელი, აფრიკულ თემაზე შექმნილი აპლიკაციების გამოსახულებით. მიუხედავად იმისა, რომ მთავარი ინსპირაცია აფრიკა გახლდათ, არ იყო ჭრელი. კოლექციაში დღემდე შავსა და ნაცრისფერს ვიყენებ, გამომიყენებია თეთრი და კრემისფერიც. აფრიკის თემა შავ-თეთრ გრაფიკაში წარმოვადგინე. მოდის კვირეულზე გამოვიტანე თუ არა, უმალ გაიყიდა და ცარიელი საკიდები რომ არ ყოფილიყო შოურუმში, სასწრაფოდ დავამატე კოსტიუმები. პრაქტიკული კაბები გამოვიდა, სასიამოვნო ქსოვილით შექმნილი და კომფორტულად სატარებელი.

- თქვენი ძირითადი მასალა მაინც ტყავია. მაღალი ხარისხის მიღწევაზე როგორ მუშაობთ?


- მაღალი ხარისხის მიღწევას წლები დასჭირდა. ტყავს სხვადასხვა ფერი და სტრუქტურა აქვს. თითოეულს სხვადასხვანაირად უნდა მიუდგე - ზოგს უხდება საღებავებით და სანთლებით ზედმეტი დამუშავება. მრავალი ტექნოლოგია არსებობს, ტყავი რომ ხარისხიან მასალას დაამსგავსო. არის ისეთი ტყავი, რომლის ბევრი დამუშავება უარყოფით ეფექტს გაძლევს. ტყავს კარგად უნდა იცნობდე, რომ ამგვარი შეცდომები გამორიცხო.



- როგორ ჩამოყალიბდა თქვენი ტანსაცმლის კონცეფცია?


- ეს პროცესი ძალიან მარტივად წარიმართა. მუშაობის პროცესიც ინდივიდუალურია, მხოლოდ და მხოლოდ საკუთარ თავს და გემოვნებას მივყვები. ვაკეთებ იმას, რასაც თავადაც სიამოვნებით ვატარებ. მეტიც, ამა თუ იმ მოდელს პირველი ყოველთვის მე ვიცვამ, რათა მისი კომფორტულობის ხარისხი შევამოწმო. ამით იმის თქმა მსურს, რომ ვქმნი ისეთ სამოსს და აქსესუარებს, როგორსაც თავად ვატარებ. აფრიკულ მოტივებზე შექმნილი კოლექცია დღემდე აქტუალურია, ყოველთვის კითხულობენ მაღაზიაში. თუმცა, ვცდილობ, ბევრი მოდელი არ შევკერო.

- თემებს როგორ ირჩევთ?


- აფრიკელების შემდეგ ორ თემაზე ვიმუშავე. შარშან მთელი წელი საქართველოს ისტორიაზე ვიმუშავე და იმდენად ძლიერი მუხტი ჰქონდა სამუშაო პროცესს, მომინდა ამ გამოცდილების კოლექციაში გადატანა. ინსპირაციისთვის ხშირად ამ თემას ვუბრუნდები. ვიმუშავე სამაჯურებზე, რომელსაც საბრძოლო სამკლავურების ფორმა აქვს, გამოვიყენე დაძველების ეფექტის მქონე ტყავი. მასზე მიმაგრებული მეტალიც დაძველების ეფექტითაა შექმნილი. ყოველდღიურად სატარებელი აქსესუარია, რომელიც ყურადღებას იქცევს. როგორც უკვე გითხარით, ვმუშაობდი დოკუმენტურ ფილმზე, სადაც ხელნაკეთი კოსტიუმები შევქმენი.



ძალიან მინდოდა ეს კოლექცია მხოლოდ ტელევიზიის კედლებში არ დარჩენილიყო. კოსტიუმები ჩვენთვის ცნობილ მსახიობებს მოვარგე და ფოტოები აპლიკაციის სახით კაბებზე გადავიტანე. ვფიქრობ, ლამაზი და საინტერესო გამოვიდა. პროექტს "ისტორიის მცველები" დავარქვი. ამჯერად 2018 წლის კოლექციაზე ვმუშაობ, მთავარი დეტალი მეტალის ფირფიტები იქნება. ეს დეტალები როგორც აქსესუარებში, ისე კოსტიუმებშიც იქნება გამოყენებული. ამ მეტალის ფირფიტებზე, ძირითადად, ბერძნულ-რომაული მითოლოგიის პერსონაჟები გამოისახება. ტყავის ელემენტებს ტანსაცმელშიც გამოვიყენებ.



რაც მთავარია, ვიწყებ ფეხსაცმლის ხაზის გამოშვებას. ეს იქნება ქართული თექის და ადგილობრივ ბაზარზე წარმოებული ნატურალური ტყავის სინთეზით შექმნილი კოლექცია. ტყავი საქართველოშია დამზადებული, თუმცა იტალიური ტექნოლოგიით და მაღალი ხარისხის პროდუქტს წარმოადგენს. თექა თუშური იქნება. ყოველთვის ვცდილობ საქართველოში წარმოებული მასალის გამოყენებას. აქაც გვაქვს ხარისხიანი პროდუქცია. უცხოურ ბაზარზე ძებნა ნამდვილად არ მჭირდება. ახალი 2018 წლის კოლექცია ტრადიციულად მუქ ფერებში იქნება. ეს ჩემი ყოველდღიური ფერებია და M.G-ის სავიზიტო ბარათს წარმოადგენს.

ქეთი დარჩია



ქართული ბრენდი JANINI: ხელით შექმნილი სუტაჟის სამკაული - გემოვნებიანი ქალბატონებისთვის

ქართველი დიზაინერი, რომლის ნამუშევრები მსოფლიო კატალოგშია და მის ლუქს-კლასის სამკაულებს ცნობილი ადამიანები ირგებენ


like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.