დევიდ ლინჩი: "სამყარო, რომელსაც ვირჩევ"

მისი თითოეული ფილმი უნიკალური და დამოუკიდებელი სამყაროა, სადაც ყველაზე უცნაური არსებები ცოცხლდებიან, მისტიკურ-დეტექტიური ისტორიები თავბრუს ახვევენ და აბნევენ მაყურებელს...

ძნელია, გენიოსის ტვინში შექმნილ და შემდეგ ფილმში გადატანილ გროტესკულ სამყაროში არ დაიკარგო და ერთხელ მოგზაურობის შემდეგ კვლავ დაბრუნების სურვილი არ გაგიჩნდეს. "ლინჩიანურ განზომილებაში" ყოფნისას ემოციას ემოცია ცვლის, რეჟისორის ფიქრთა სვლას მიჰყვებით და იძირებით სამყაროში რომელსაც ხან Mulholand Drive ხანაც Blue Velvet ან Twin Peaks ჰქვია. კეთილი იყოს თქვენი მობრძანება კინოს ისტორიაში ყველაზე ცნობილი სიურრეალისტის, დევიდ ლინჩის სამყაროში!



ყველაზე გიჟურ იდეებს კინოენით აცოცხლებს
და მისი ფილმების ყურებისას თითქოს ლინჩის ცნობიერების ნაკადში აღმოჩნდებით - "დღის სიზმრები ყველაზე მნიშვნელოვანია, ზოგჯერ უბრალოდ ვჯდები სკამზე, თვალებს ვხუჭავ და ჩემს გონებას სახეტიალოდ ვუშვებ. ძილში სიზმრებს ვერ აკონტროლებ. მიყვარს ჩემ მიერ შექმნილი ან აღმოჩენილ სიზმრების სამყაროში ჩაძირვა, ესაა სამყარო, რომელსაც ვირჩევ და იქაა კინოს სიძლიერე, ხშირ შემთხვევაში სწორედ ამ დროს იბადება იდეები", - ამბობს 71 წლის ლინჩი. ასე გაჩნდა წითელი ოთახი 90-იანი წლების საკულტო სერიალ Twin Peaks-ში და გოლიათის პერსონაჟი აგენტი კუპერის ოთახში. ლინჩის "სიზმრისეული ლოგიკა" კინოში თხრობის ახალ, არასწორხაზოვან სტრუქტურას ქმნის.

თხრობის მსგავს ფორმას მის საკულტო ფილმებში Eraserhead, Mulholand Drive და Inland Empire შეხვდებით. მაგიური რეალიზმის ენით ლინჩი ძალადობის, სიყვარულის, შურისძიებისა და დანაშაულებრივი საქმეების ისტორიებს გვიყვება - "იდეა წამიერად მოდის და თუ გაჩერდები და დაფიქრდები, აღმოაჩენ, რომ მას ხმა, გამოსახულება და ხასიათი აქვს. პერსონაჟის გარდერობსაც კი გიკარნახებს, იმასაც მიგახვედრებს, როგორია ეს გმირი, როგორ საუბრობს ან რა სიტყვებს იყენებს. წამიერად უამრავი რამ იბადება გონებაში", - ამბობს რეჟისორი.



რთულია, სახელი დაარქვა განწყობას და იმ ატმოსფეროს, რომელიც ლინჩის ფილმებშია. სპეციფიკური იუმორის, გროტესკული პერსონაჟებისა და მათი არაპროგნოზირებადი ქცევების წყალობით ფილმში მოთხრობილი სიუჟეტი ხშირად ლოგიკის ჯაჭვს არ ექვემდებარება, მაგრამ ეს ხელს არავის უშლის, ბოლომდე ისიამოვნოს ფილმის ხასიათით და მაგიური რეალიზმის ენით შექმნილი ისტორიით.

დევიდ ლინჩი ბავშვობიდან ხატავდა. იხსენებს, როგორ მოჰქონდა მამას სამსახურიდან დოკუმენტების ფურცლები, რომელსაც მეორე მხარე სუფთა ჰქონდა და მასზე თვითმფრინავებსა და ტყვიამფრქვევებს ხატავდა. ხატვის შესასწავლად ფილადელფიაში გატარებულ წლებს ყველაზე დიდ შთაგონებას უწოდებს. საკუთარი ნახატების ამოძრავების სურვილმა პირველი მოკლემეტრაჟიანი ფილმის გადაღების იდეამდე მიიყვანა. ასე შეიქმნა Alphabet - ლინჩის ფილმოგრაფიის ერთ-ერთი ადრეული ნამუშევარი, სადაც მთავარი როლი მისმა მაშინდელმა მეუღლე პეგიმ შეასრულა. ფილმის გადასაღებად საკუთარი სახლის კედლები შავად შეღება, იგივე გაიმეორა მეორე ფილმზე -The Grandmother - მუშაობისას.



ფილადელფიიდან ლოს-ანჯელესში, ბევერლი ჰილზზე გადასახლდა და კინოსკოლაში განაგრძო სწავლა. ერთი წლის შემდეგ კი დაიწყო პირველ სრულმეტრაჟიან მხატვრულ ფილმ Eraserhead-ზე მუშაობა. Eraserhead საკულტო ფილმია, რომლის სიუჟეტი დისტროფიურ სამყაროში ვითარდება. წყნარი ახალგაზრდა მამაკაცი უცნაური ბავშვის მშობელი ხდება. დევიდ ლინჩის პირველი სრულმეტრაჟიანი ნამუშევარი სიურრეალიზმის კლასიკადაა აღიარებული და მას ლინჩის უსაყვარლესი რეჟისორი, სტენლი კუბრიკი ყველა დროის ფავორიტ ფილმს უწოდებდა.

დევიდ ლინჩს მასშტაბური სახალხო აღიარება The Elephant Man-მა მოუტანა. ფილმში სხეულის დეფორმაციული სინდრომით დაავადებული ჯოსეფ მერიკის ამბავია გადმოცემული. მას მოჰყვა სამეცნიერო ფანტასტიკა Dune da Blue Velvet. 1990 წელს კი დევიდ ლინჩმა მარკ ფროსტთან ერთად მთელი მსოფლიო ტელევიზორის ეკრანებს მიაჯაჭვა. ათწლეულების წინ ტელეკომპანია ABC-ის აღმასრულებელი პროდიუსერები დევიდ ლინჩისა და მარკ ფროსტის სცენარმა მოხიბლა და ასე შეიქმნა სრულიად ახალი სამყარო Twin Peaks, რომელიც ერთდროულად იყო კლასიკური საპნის ოპერაც, მკვლელობის იდუმალი ამბავიც, პატარა ქალაქის საგაც და სიყვარულის ისტორიაც.



"ვინ მოკლა ლორა პალმერი", - კითხვა ისმოდა ყველგან და აინტერესებდა ყველას. აგენტ კუპერის ამბავი პატარა ქალაქში, გასცდა ამერიკის საზღვრებს და აალაპარაკა მსოფლიო. წითელი ოთახის მისტიკა, კრიმინალური დაჯგუფებები და საიდუმლო კავშირები ორ სეზონად გაერთიანდა და საკულტო სერიალად იქცა. Twin Peaks -ს ბევრი ტელევიზიის ოქროს ხანის დასაწყისად მიიჩნევს. წლების შემდეგაც მაყურებელს ხიბლავს და ატყვევებს სიუჟეტური ხაზი, პერსონაჟების სიღრმე, მონტაჟი და განწყობა, რომელიც ლინჩმა სერიალში მარკ ფროსტთან ერთად შექმნა. მეორე სეზონის ბოლოს ერთ-ერთი პერსონაჟი ამბობს, "შევხვდებით 25 წლის შემდეგ" და, მიუხედავად იმისა, რომ სერიალის გაგრძელება არ იყო დაგეგმილი, დაახლოებით 25 წლის შემდეგ Twin Peaks  სატელევიზიო სამყაროს დაუბრუნდა. დევიდ ლინჩი სერიალის მესამე სეზონს 18-საათიან ფილმს უწოდებს, რომელიც ნაწილ-ნაწილ უნდა ნახოთ და რომელიც უკვე აღიარეს 2017 წლის სატელევიზო სეზონის მოვლენად.



Twin Peaks -ის ყურებისას გამუდმებით ფიქრობ მის გავლენასა და იმაზე, რომ დევიდ ლინჩმა წლების წინ გადაიღო სერიალი, რომელიც თანამედროვე ტელეინდუსტრიის პირველწყაროდ შეგვიძლია მივიჩნიოთ. სერიიდან სერიამდე გაოცებთ და გითრევთ ლინჩის სამყარო და როდესაც ამ სამყაროს შემქმნელს თბილისის ცენტრალურ ქუჩაზე ხედავთ, თავი მართლა სიურრეალისტურ ფილმში გგონიათ.

Twin Peaks -ის პერსონაჟ გორდონის მსგავსად დევიდ ლინჩსაც უყვარს ყავა, ოღონდ არა "უმთვარო ღამესავით მუქი და ძლიერი", არამედ ლატე. ჟესტები კი მას და გორდონს საერთო აქვთ. საყვარელ თემებზე საუბრის დროს ცისფერი თვალები უბრწყინავს და წარმოუდგენელია, ეს აღფრთოვანება არ გადაგედოს, თითების მოძრაობას თვალს ვერ მოსწყვეტ და გიჩნდება სურვილი, დევიდ ლინჩს დაუსრულებლად ელაპარაკო კინოზე, მუსიკაზე, მხატვრობასა და ტრანსცენდენტალური მედიტაციის უპირატესობებზე.

ტრანსცენდენტალური მედიტაცია მედიტაციის უძველესი ფორმაა, რომელიც ლინჩმა 70-იან წლებში აღმოაჩინა. "ვფიქრობდი, რომ მედიტაცია იქნებოდა გზა ჭეშმარიტი ბედნიერებისკენ. უამრავი ტიპის მედიტაცია ვცადე, მაგრამ არც ერთი არ იყო საჩემო. ერთხელ დამ დამირეკა და ტრანსცენდენტალურ მედიტაციაზე მიამბო, მას ხმა ჰქონდა შეცვლილი და უფრო ბედნიერი ჩანდა, ამიტომ მეც ამ ტექნიკის შესწავლა გადავწყვიტე. ამ დროს შემოქმედებითი ვიყავი, მაგრამ თვითდაჯერება მაკლდა, მუდმივ სიბრაზეს ვგრძნობდი, რომელიც პირველ ცოლზე გადამქონდა. მედიტაციის დაწყებიდან ორ კვირაში კი თავად მკითხა, რა ხდებოდა, სად წავიდა ჩემი სიბრაზე. ყველაფერი თავისით მოხდა. ცოლსაც კარგად ვეპყრობოდი და მეც უფრო ბედნიერი ვიყავი. საქმის კეთებისას კი ენერგია და ენთუზიაზმი გამიძლიერდა", - იხსენებს ლინჩი, რომელმაც 2005 საკუთარი ფონდი შექმნა, რომელიც 600 000-ზე მეტ ბავშვსა თუ მოზარდს სტრესის დაძლევაში ეხმარება. დევიდ ლინჩის ფონდი წელს უკვე კავკასიაშიც დაარსდა და მისი მთავარი მიზანია, დაეხმაროს საქართველოს, აზერბაიჯანისა და სომხეთის მცხოვრებთ სტრესის დაძლევაში. დევიდ ლინჩთან ჩვენი ინტერვიუც ტრანსცენდენტალური მედიტაციით იწყება.



- როდის აღმოაჩინეთ ტრანსცენდენტალური მედიტაცია?

- მაშინ ფილადელფიიდან ლოს-ანჯელესში გადავედი საცხოვრებლად, ბევერლი-ჰილზზე დიდ სახლში ვცხოვრობდი. ფილადელფია ჩემთვის შთაგონების უდიდესი წყარო იყო. ის ბნელი, გიჟური, ჭუჭყიანი, კრიმინალური და გარყვნილი ქალაქია, მაგრამ იქაური ხასიათი, ქარხნები და ატმოსფერო სამუშაოდ ფანტასტიკურ განწყობას მიქმნიდა. ლოს-ანჯელესში ღამით ჩავედი. მახსოვს, პირველი, რაც შევამჩნიე, იყო სინათლე. ლოს-ანჯელესი - გაშლილი ქალაქია და ამ სინათლესთან ერთად ის თავისუფლების განცდას ბადებს. პირველ ფილმზე დავიწყე მუშაობა, მომცეს სამუშაო სივრცე, აღჭურვილობა, მომიწყვეს სტუდია. ყველაფერი მქონდა, რაც მჭირდებოდა. თუმცა, აღმოვაჩინე, რომ ჩემს თავში სიცარიელე იყო. მქონდა ყველაფერი, რაც მინდოდა, მაგრამ არ ვიყავი ბედნიერი, სწორედ ამ დროს დავიწყე მედიტაციის ძიება. ბედნიერება შენშია და ეს უნდა იპოვო, მაინტერესებდა, სადაა ეს "შენში" და ასე აღმოვაჩინე ტრანსცენდენტალური მედიტაცია, რომელიც მუშაობასა და ცხოვრების გაუმჯობესებაში დამეხმარა. ტრანსცენდენტალური მედიტაცია არც კულტია და არც რელიგია.

- შედეგი მაშინვე იგრძენით, თუ დრო დაგჭირდათ?

- მაშინვე დამეხმარა და მომეწონა. ტრანსცენდენტალური მედიტაცია მასწავლებელმა უნდა შეგასწავლოს. ამას ოთხი დღის განმავლობაში დღეში საათნახევარი სჭირდება. მასწავლებელი მოგცემს მანტრას, რომელიც ხმა ან ვიბრაციაა. უნდა ისწავლო მისი გამოყენება. ოთხი დღის შემდეგ გეცოდინებათ, როგორ გააკეთოთ მედიტაცია, პასუხი გაეცემა თქვენს კითხვებს და მერე მთელი ცხოვრება გეცოდინებათ ეს ტექნიკა. დილით და შუადღეს ოც-ოცი წუთით მედიტირებთ, შემდეგ კი საქმეს აკეთებთ და აკვირდებით, როგორ იცვლება ყველაფერი უკეთესობისკენ, ნეგატივი ტოვებს თქვენს სხეულს და ადგილს ბედნიერებასა და ჰარმონიას უთმობს.

- დეპრესიისა და მღელვარების დროს ეხმარება ადამიანს?


- თუ ექიმის ზედამხედველობის ქვეშ ხართ, წამლებს იღებთ და ამ დროს იწყებთ მედიტირებას, უნდა იმუშაოთ ექიმთან შეთანხმებით, უნდა გააგრძელოთ მედიკამენტების მიღება. ორი კვირის შემდეგ ექიმმა შეიძლება უკეთესობა შეგატყოთ. ყველაფერი ჰარმონიაში მოდის და ეს ცხოვრების სხვადასხვა ასპექტზე აისახება. ამ ყველაფერზე დაკვირვება ლამაზი პროცესია.

- ჰოლივუდსა და ზოგადად შოუბიზნესში უამრავი სტრესის გამომწვევი მიზეზი არსებობს...

- სტრესი ყველგანაა. ბავშვებიც კი სკოლაში ხშირად ჩხუბობენ, მოსწავლეებს კონცენტრაცია უჭირთ, მათ უამრავ წამალს აძლევენ, რომელიც მხოლოდ ნიღბავს პრობლემებს. სწავლება არც მასწავლებლებს სიამოვნებთ. კეთილისმსურველები უამრავი იდეით გამოდიან, მოგვიწოდებენ, შევღებოთ კედლები ან ახალი წიგნები გამოვუშვათ. ტრანსცენდენტალური მედიტაცია კი მათ რეალურად ეხმარება. უკეთ სწავლობენ, სტრესი ქრება, სწავლის პროცესი უფრო ბედნიერი ხდება. ერთ წელში გარემო მთლიანად იცვლება. დაუჯერებელი ეფექტი აქვს და ამის ყურება სასიამოვნოა. სკოლა ხდება ადგილი, სადაც სიამოვნებით გაუშვებთ თქვენს შვილს.



- რთულია საკუთარი მანტრის პოვნა?

- ყველას თავისი მანტრა აქვს და მისი ხმამაღლა წარმოთქმა არ შეიძლება. მანტრა ცხოვრების მხარდამჭერია, მეგობარი ხმა, რომლის გამოყენებაც უნდა ისწავლო და რომელიც საშუალებას გაძლევს, საკუთარ თავს ჩაუღრმავდე.

- ხატვა ბავშვობიდან დაიწყეთ და ხშირად ხატავდით სამხედრო თვითმფრინავებს...

- მეორე მსოფლიო ომი ახალი დამთავრებული იყო, მაგრამ ომის განწყობა მაინც ჰაერში იგრძნობოდა. მიყვარდა დანების, პისტოლეტების, თვითმფრინავების ხატვა, ყველაზე მეტად კი ტყვიამფრქვევებისა და ავტომატების ხატვა მიტაცებდა.

- მშობლები გასაფერადებელ ფურცლებს არ გაძლევდნენ, რატომ?

- დედაჩემმა რაღაც მიზეზით უარი თქვა, რომ გასაფერადებელი რვეული მქონოდა. ჩემს და-ძმას ჰქონდა. მახსოვს, მამას სამსახურიდან ფურცლები მოჰქონდა, ცალ მხარეს დოკუმენტები იყო, მეორე მხარეს კი ცარიელი და მეც ვხატავდი. ახლა მადლობას ვუხდი დედაჩემს მოცემული თავისუფლების გამო.

- ხანდახან ხატვისას ხორცსაც კი იყენებთ...

- დიახ, ხორცი გამოვიყენე. ბუნება უამრავ მნიშვნელოვან რამეს გვაძლევს, იდეას, ტექსტურას... და ეს მომწონს. ხორცი ნახატს მივაწებე, ცოტა ხანში საშინელი სუნი აუშვა, დავიწყე მარილიანი წყლის დასხმა და მალე შესანიშნავი ტექსტურა მივიღე.

- როცა ფილმს არ იღებდით, ხატავდით?

- დიახ, მაგრამ მე ორივე საქმის ერთად კეთება მიყვარს.

- როდის გაჩნდა მოძრავი ფოტოები?

- მე და ჩემს მეგობარს გვქონდა სივრცე, სადაც ვხატავდით. ამ დროს ფილადელფიაში ვცხოვრობდი. ერთხელ ღამით მარტო ვხატავდი, დავხატე ბაღი. ნახატის უმეტესი ნაწილი იყო შავი და მწვანე. მოსაწევად გავედი და ამ ნახატს შორიდან დავუწყე ყურება, უცბად ნახატიდან მომავალი ქარის ხმა გავიგონე და სიმწვანემაც მოძრაობა დაიწყო. ნარკოტიკული ზემოქმედების ქვეშ არ ვიყავი, სრულიად ფხიზელი ვიყავი. სწორედ მაშინ აღმოვაჩინე მოძრავი ნახატი.

- გაგჩენიათ სურვილი, თქვენს ფილმებში შექმნილ სამყაროში აღმოჩნდეთ?

- Eraserhead - არის ფილმი, რომლის სამყაროშიც ვიქნებოდი, თუმცა, არ ვიცი, მინდა თუ არა სამუდამოდ იქ დარჩენა.

- სანამ კინოინდუსტრიაში წარმატებული გახდებოდით, გქონდათ თუ არა ალტერნატივა - გემუშავათ შემოსავლისთვის თუ თავი მხატვრობისთვის მიგეძღვნათ?

- ჩემი მშობლები საშუალო კლასის წარმომადგენლები იყვნენ, ფინანსურად მეხმარებოდნენ, მაგრამ მეც ვმუშაობდი. მეცოდება ხელოვანები, რომელთაც კვირაში ხუთი დღე უწევთ მუშაობა მასალების შესაძენად. სახატავად მხოლოდ უქმეები რჩებათ, ხელოვანმა კი კვირაში ხუთი დღე უნდა ხატოს და ფულისთვის მხოლოდ ორი დღე იმუშაოს.

- როდესაც სცენარს წარადგენდით, ფინანსების მოპოვება გიჭირდათ?

- რთული იყო, მაგრამ ბედი დიდ როლს თამაშობს ადამიანის ცხოვრებაში. არ ვიცი, რატომ მაფინანსებდნენ, კინოში მწვანე შუქი ამინთეს, მითხრეს, მემუშავა. უამრავი ნიჭიერი ადამიანია, რომელთაც, სამწუხაროდ, უარს ეუბნებიან. მე ძალიან იღბლიანად ვთვლი თავს.

- რას ნიშნავს თქვენთვის Twin Peaks ?

- Twin Peaks არის განსხვავებული სამყარო. მიყვარს Twin Peaks -ის პერსონაჟები, ადგილი, იდეა და საერთოდ ყველაფერი.

- როდესაც მეორე სეზონი დასრულდა და ერთ-ერთმა პერსონაჟმა თქვა, 25 წლის შემდეგ შევხვდებითო, იცოდით, რომ გააგრძელებდით Twin Peaks-ის გადაღებებს?

- არ ვიცოდი. ეს ისევ ბედის დამსახურებაა. მე მომივიდა წითელი ოთახის იდეა, სადაც კუპერი იყო გაჭედილი. მეორე სეზონის ბოლო ეპიზოდში ლორა ეუბნება კუპერს: "გნახავ 25 წლის შემდეგ", მაშინ არ ვიცოდით, რომ ეს მოხდებოდა. ეს სცენა უფრო სიზმარს ჰგავდა და არა რეალობას. მაგრამ თითქმის 25 წლის შემდეგ კვლავ დავბრუნდით Twin Peaks-ის გადასაღებად.



- ბევრი დრო გავიდა მას შემდეგ, რაც Twin Peaks პირველად გავიდა ეთერში და მისი ყურებისას ყოველთვის გრძნობ თანამედროვე ტელევიზიაზე მის უდიდეს გავლენას. თავად თუ შეგიმჩნევიათ Twin Peaks-ის ეფექტი?

- არა, ხშირად მეუბნებიან ამას, მაგრამ არ შემიმჩნევია. ვფიქრობ, ეს ყველაფერი არსებობს. მაგალითად, მარკონი და ტესლა სხვადასხვა ადგილას ცხოვრობდნენ, მაგრამ ორივემ შექმნა რადიო. მართალია, ეს გამოგონება ტესლას მიეწერა, რადგანაც მან უფრო ადრე მიაგნო, მაგრამ დიდი ხნის განმავლობაში ამ აღმოჩენას მარკონის მიაწერდნენ. იდეები "ჰაერშია" და ადამიანები იჭერენ ამ იდეებს, ასე მიდის ევოლუცია. ახალი იდეები ცურავს და მათ იჭერენ იმისთვის, რომ რაღაცები წინ წავიდეს.

- საიდან მოგდით ეს იდეები?

- ცხოვრებიდან და ძალიან ცოტა სიზმრებიდან. მე მიყვარს "სიზმრის ლოგიკა", იდეა შეიძლება ნებისმიერ დროს მოგივიდეს. მიყვარს დღის ზმანებები და ხანდახან მინდა, იდეა მომივიდეს. შემდეგ ეს სურვილი თევზაობას ჰგავს, გადააგდებ ანკესს და იჭერ რაღაც იდეებს, ამას კი ძლიერი სურვილი განაპირობებს.

- მნიშვნელოვანია, რომ გადასაღებ მოედანზე ყველაფერი ისე იყოს, როგორც ეს სცენარის წერისას წარმოგედგინათ, თუ მიდიხართ რაღაც დათმობებზე?

- ეს უაღრესად მნიშვნელოვანია და ზოგჯერ ფილმი ზუსტად ისეთია, როგორიც გონებაში დაბადებული იდეა იყო. მაგრამ თუ კონკრეტულ გადასაღებ მოედანს ვეძებ და მას ვერ ვპოულობ, ვიწყებ მაქსიმალურად მიახლოებული ადგილის ძიებას. გარემოს შესაქმნელად შეიძლება განსხვავებული ავეჯის ან ნივთების შეტანა, მაგრამ ამ შემთხვევაში იდეა იგივეა, მაგრამ სურათი არ გამოდის ისეთი, როგორიც ჩაფიქრებული გქონდა.

- ამბობთ, რომ სერიალებში Breaking Bad მოგწონთ...

- Breaking Bad პერსონაჟების გამო მომწონს. არაჩვეულებრივი და ძლიერი პერსონაჟებია შექმნილი.

- როგორც ვიცით, საქართველოში კინოსკოლის შექმნასაც აპირებთ...




- საქართველოში გიგა აგლაძესთან ერთად ვმუშაობ. გიგა იქნება სკოლის ამბებში ჩართული. ადამიანებს მთელი მსოფლიოდან შეეძლებათ აქ ჩამოსვლა. საქართველო კარგი ადგილია კინოფესტივალის დასაარსებლადაც. ქართულ კინოსა და მის ტრადიციებზე ფედერიკო ფელინიც კი საუბრობდა. ასე რომ, საქართველო კინოხელოვნებისთვის ნამდვილად კარგი ბაზაა.



ავტორი: რუსკა გიორგაძე



like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.