თავისუფლება, დამოუკიდებლობა და პროგრესი | ბიზნესი ქუსლებზე

"ბომონდი" ხშირად აკეთებს აქცენტებს 21-ე საუკუნის წარმატებულ ქალებზე, მათ ძალასა და ღირებულებებზე, რაც მკითხველისთვის მეტად შთამაგონებელი და მოტივაციის მიმცემია.

ჩვენი რუბრიკის დღევანდელი სტუმარი სასტუმროების სფეროში მრავალწლიანი გამოცდილების მქონე, "ბათუმი აქვას" გენერალური მენეჯერი ეკა ყაველაშვილია.

როგორც ჩვენი დღევანდელი რესპონდენტი აღნიშნავს, მისი ჩვეულებრივი დღე დილის 7 საათიდან ფინჯანი ყავით იწყება და არასდროს მთავრდება. უამრავი სირთულისა და დაბრკოლების მიუხედავად, მისთვის კარიერული წარმატება ბედნიერებასა და კომფორტთან ასოცირდება...

- როგორია იყო სასტუმროს გენერალური მენეჯერი და იყო ქალი?

- ძალიან სასიმოვნო შეგრძნებაა. მენეჯერი და ქალი -
ეს ორი პოზიცია ერთმანეთს ხელს არ უშლის. პირიქით... სასტუმროს სფეროში მუშაობისას ყოველდღიური მოლაპარაკებები და შეხვედრები სამუშაო დროის დიდ ნაწილს მოიცავს. ჩემი აზრით, ქალებს მოხერხებულად შეუძლიათ რთული და ჩიხში შესული საკითხების გადაწყვეტა. ვფიქრობ, ქალებს ხშირად კაცებზე მეტად უადვილდებათ სასურველი მიზნის დასახვა და მიღწევა.

- რასთან ასოცირდება თქვენთვის წარმატება?

- წარმატება ჩემთვის ასოცირდება მეტ თავისუფლებასთან, ცნობადობისა და გავლენის სფეროს გაზრდასთან, როდესაც დამოუკიდებლად შეგიძლია მიიღო გადაწყვეტილებები, გაიუმჯობესო ცხოვრებისეული პირობები, განავითარო კონკრეტული ბიზნესის სფერო და ხელი შეუწყო თანაგუნდელთა პროფესიულ განვითარებას. ჩემთვის ჩემი ოჯახის წევრების წარმატება ბედნიერებაა.

- თქვენი მიღწევებიდან ყველაზე მეტად რომლით ამაყობთ და რატომ?

- ყველაზე მეტად ვამაყობ იმ მიღწევებით, რომლებიც ულევ ენერგიასა და ძალისხმევას ითხოვს ადამიანისაგან, ვგულისხმობ განათლების ყველა საფეხურს, რაც გავიარე და ვაპირებ, კიდევ ვისწავლო.

- როგორია თქვენი ერთი ჩვეულებრივი დღე?

- ჩემი ჩვეულებრივი დღე არის საგიჟეთი, რომელიც აუცილებლად იწყება ბევრი ყავით და არასოდეს მთავრდება...

- რა გამოწვევების წინაშე დგახართ როგორც სოციალურ, ისე კარიერულ ცხოვრებაში?

- მიმაჩნია, რომ ამჟამად საინტერესო გამოწვევების წინაშე ვარ. სულ რამდენიმე თვეა, ბათუმის ახალ ბულვარში კიდევ ერთი კარგი ზღვისპირა სასტუმრო "აქვა ბათუმი" გავხსენით, რომელიც სამშენებლო და დეველოპერული კომპანია "ნიუ თაიმის" ერთ-ერთი წარმატებული და დასრულებული პროექტია.

გარდა ამისა, საინტერესოა მუშაობა მიმდინარე პროექტზე "Sunway Apartments Batumi".
2020 წელს დასრულდება სასტუმრო კომპლექსის მშენებლობა გოდერძის უღელტეხილზე.

- რამდენად რთულია მართო გუნდი, შექმნა ღირებულებები...

- იმისათვის, რომ სწორად მართო გუნდი, აუცილებელია ჯერ სწორად დააკომპლექტო ის. გუნდის ჩამოყალიბებაში მხოლოდ თანამშრომლების პროფესიონალიზმი და მრავალწლიანი სამუშაო გამოცდილება არ არის საკმარისი, მნიშვნელოვანია ადამიანის ხასიათი და მონდომება, მისი მიდგომა სამუშაოს მიმართ. როდესაც თანამშრომლები უთქმელად ხვდებიან, თუ რა არის გასაკეთებელი, ე.ი. გუნდი ჩამოყალიბებულია.

მენეჯერმა პირველ რიგში თანამშრომლებს უნდა შეუქმნას სივრცე, სადაც თავს ისე იგრძნობენ როგორც ოჯახში, შეძლებენ განვითარებას, დაეხმარებიან ერთმანეთს.

- მოტივაცია...

- ჩემი მოტივაციაა, იყო სამაგალითო გუნდის წევრებისთვის და შესაბამისად, მომდევნო თაობებისთვისაც. მოტივაციაა, დაუღალავი შრომის შემდეგ დაინახო მოქმედება, სარგებელი და სიცოცხლე იქ, სადაც ცოტა ხნის წინ არაფერი ხდებოდა.  

- 10 წლის შემდეგ...

- 10 წელი არ არის შორს, დიდი ალბათობით, მაშინაც ვიქნები ამ სფეროსთან ახლოს და, რაღა თქმა უნდა, ქუსლებზე...


დათა ალექსეევი



like
1

კომენტარები

შორენა 2019-08-13 05:15
ვაუ ეკუშ :* როგორც ყოველთვის ულამაზესად გამოიყურები.უდიდეს წარმატებებს გისურვებ ცხოვრებაში.
ნანა 2019-08-12 15:49
მიხარია ეკას ნახვა - "ბიზეს-ვუმენ"-ის ამპლუაში. ის ხომ შესანიშნავი ფილოლოგიცაა. გამიხარდება მასთან შეხვედრა

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.