ოცნება შორეულ ქვეყნებზე - მოგზაურობა მაროკოში

ზაფხული შესაბამისი დროა ეგზოტიკური ქვეყნების მოსანახულებლად. ქართული ზამთრის შემდეგ კი ზღვის, სითბოსა და ფერების საძიებლად მაროკოს უნდა ეწვიოთ. მაროკოს განსაკუთრებული გეოგრაფიული მდებარეობა
უკავია აფრიკის კონტინენტის ჩრდილო-დასავლეთით. ზღვის და ოკეანის სანაპიროები, მთები და უდაბნოები უნიკალურ ლანდშაფტებს ქმნის.


იგი მონარქიული სახელმწიფოა, ეკონომიკური სიძლიერით აფრიკის კონტინენტზე მეხუთეა. ქვეყანა მდიდარია ფოსფორით, მოსახლეობა შედგება არაბებისა და ბერბერებისგან.

ეგზოტიკური მაროკო ყოველთვის იზიდავდა ტურისტებს. ყოველწლიურად აქ ათასობით ტურისტი ჩადის ქვეყნის ულამაზესი ქალაქებისა და უძველესი კულტურის ძეგლების მოსანახულებლად. მის ერთ-ერთ მთავარ ღირსშესანიშნაობას სხვადასხვა ფერის ქალაქები წარმოადგენს. ლამაზ ფერებად სახლების

შეღებვა აქ უძველესი დროიდან იქცა ტრადიციად, მაროკოელები კი ტრადიციების მკაცრი მიმდევრები არიან და დღესაც გვხიბლავს ეს ქვეყანა წითელი თუ ყვითელი, 
მწვანე თუ ზურმუხტისფერი ადგილებით.


მე-19 საუკუნიდან მაროკოს ტერიტორია ოკუპირებული იყო საფრანგეთისა და ესპანეთის მიერ. ქვეყანამ დამოუკიდებლობა 1956 წელს მოიპოვა და მას შემდეგ მაროკოს სამეფო ეწოდა. სამეფო, ზოგადად,
ზედგამოჭრილი სახელია მაროკოსთვის, განსაკუთრებით იმის გათვალისწინებით, თუკი ატლასის მთებში საჰარის მიმართულებით მოგზაურობთ. 1961-99 წლებში ქვეყანას მართავდა მეფე ჰასან მე-2, რომელმაც დიდი როლი შეასრულა ახლო აღმოსავლეთის სამშვიდობო პროცესებში. ახლო წარსულში მაროკოს ჰქონდა ტერიტორიული დავა მავრიტანიასთან ესპანეთის ყოფილი პროვინცია დასავლეთ საჰარის თაობაზე. 1979 წელს მავრიტანიამ უარი თქვა თავის პრეტენზიებზე. ამჟამად დასავლეთი საჰარა მთლიანად ოკუპირებული აქვს მაროკოს.


შეფშაუენი ულამაზესი პატარა ქალაქია და მთების ფერდობებზეა შეფენილი. იგი ფერადოვანი ქალაქია, სადაც თითქმის ყველა სახლი ცისფერი ან პასტელის ფერებშია. მიუყვები ვიწრო ქუჩებს და ეს ყველაფერი სიზმარი გგონია, მხოლოდ უკიდურესად გაჭირვებული, სასოწარკვეთილი ქუჩის მოვაჭრეების თავგამოდებული და დაჟინებული დევნა გაგრძნობინებს, რომ რეალურ სამყაროში ხარ. შეფშაუენი მაროკოს პოპულარული ტურისტული დანიშნულების ადგილია. ამის გარდა, `საშოპინგე~ ადგილიცაა, სადაც ადგილობრივი ოსტატების მიერ შეკერილი და დამზადებული ნივთები იყიდება, ასევე გამორჩეულია თხის ყველით. ეს ქალაქი დაარსდა 1471 წელს. სახელწოდება დაკავშირებულია იმ მთის ფორმასთან, რომლის მახლობლადაც ქალაქია გაშენებული. შეფშაუენი ადგილობრივ ენაზე "რქას" ნიშნავს. თუმცა ქალაქის სავიზიტო ბარათს მისი ლურჯად შეღებილი შენობები წარმოადგენს. ამ პატარა ქალაქს მდიდარი ისტორია, კულტურა და, რაც მთავარია, ულამაზესი არქიტექტურული ძეგლები ამშვენებს. მედინას სექტორი გადაწყვეტილია ესპანური და მორაკანული არქიტექტურის ნაზავით.


შეფშაუენი XV საუკუნეში გახდა იმ ებრაელების თავშესაფარი, რომლებიც ესპანურ ექსპანსიას გამოექცნენ. ისინი აქ ცოტა ხანს დარჩნენ, მაგრამ წასვლის წინ თავიანთი სახლები სამახსოვროდ ცისფრად შეღებეს. ადგილობრივ მოსახლეობას მოეწონა ებრაელების იდეა და გააგრძელა მათი დაწყებული საქმე _ სახლების ცისფრად შეღებვა, მით უფრო, რომ ეს ფერი მათ წარმოდგენაში ღმერთთან სიახლოვეს აღნიშნავდა. ძველი წყაროები გვამცნობენ, რომ ძველად აქ სახლებს ღია ცისფერი შეფერილობა ჰქონდა, შემდეგ საუკუნეებში კი, ტურისტების მისაზიდად, ლურჯი გახდა. შეფშაუენის ხილვისას გეგონება, თითქოს ქალაქი მთების კალთებზე ციდან დაეშვა.


მას სილამაზის გამო არაერთი სახელი შეარქვეს: ზურმუხტის ქალაქი, ქალაქი-ღრუბელი, ცისფერი ოცნების ქალაქი და სხვა. აქ ყველაფერი შერწყმულია ცისფერ ზეცასთან: სახლების კედლები, გაზონები, კარები, ღობეები, ფანჯრის რაფები... შეფშაუენი მიმზიდველი მხარეა ტურისტებისთვის, მით უფრო, რომ აქ ყოველ ნაბიჯზე ყიდიან და ეწევიან მარიხუანას. ქალაქის შემოგარენი მარიხუანის პლანტაციებითაა სავსე. ქალაქი განსაკუთრებით შთამბეჭდავად მაშინ გამოიყურება, როცა ღრუბლებშია გახვეული. ასე რომ, გაემგზავრეთ შეფშაუენში და აიხდინეთ ცისფერი ოცნება.

  • წინა
like
3

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.