ნორმანდია-კალვადოსისა და იმპრესიონიზმის სამშობლო

უდიდესი პატივი მხვდა წილად, როცა ტურიზმის განვითარების სააგენტომ საფრანგეთში, Atout France-მ და ნორმანდიის რეგიონის ხელისუფლებამ, Normandy Tourist Board-მა საფრანგეთის საოცარ მხარეში მიმიწვია პრესტურზე.

ამ გრანდიოზულ ღონისძიებაზე მთელი მსოფლიოდან ათასამდე ჟურნალისტი იყო ჩამოსული. ჩემი ჯგუფი ძალიან საინტერესო ადამიანებისგან შედგებოდა. ავსტრიიდან, ბრაზილიიდან, პორტუგალიიდან, იტალიიდან საბერძნეთიდან, მალაიზიიდან, სამხრეთ აფრიკიდან და საფრანგეთიდან ნორმანდიაში ერთ ოჯახად შეკრული სხვადასხვა ეროვნებისა და შეხედულების ადამიანებმა ჰარმონიულად გავატარეთ დღეები.

ჩვენი ტურლიდერი სოფი, ხალისიანი და, როგორც ყველა ფრანგი,"აჯენდაზე გაგიჟებული", ყოველი ლოკაციის შემდეგ გვითვლიდა და უბედნიერესი იყო, როდესაც იტყოდა, ,,კატოღზ"! ანუ

ბორტზე ყველანი ვიყავით.

გრაფიკი, საკმაოდ დატვირთული და მძიმე, თუმცა უაღრესად ინფორმაციული და საინტერესო იყო. მთელ ტურს კი კალვადოსის არაომატი სდევდა თან. ნორმანდიაში ვაზი არ ხარობს, ამიტომ თითქმის ყველა სასმელი ვაშლისაგან მზადდება. ნორმანდიის რეგიონის სავიზიტო ბარათია, აქაური სიდრი და კალვადოსი, რომლის მიქსიც შესანიშნავი აპერიტივია და ჩვენი მოგზაურობის უპირობო ლაიტმოტივი!


მონ-სენ-მიშელი იყო ჩემი პირველი ნორმანდიული შთაბეჭდილება, რომელიც სიცოცხლის ბოლომდე გამყვება. საფრანგეთში პირველი ადგილია, რომელიც იუნესკოს მსოფლიო მემკვიდრეობის ნუსხაშია შესული. Mont Saint Michel ის მონასტერს სოფლის დიდი ნაწილი უკავია და შუა საუკუნეების დახვეწილი ხუროთმოძღვრების საუკეთესო ნიმუშია. შედგება 20 დარბაზისაგან, გასაგიჟებელია გოთური ფრთა, ,,საოცრების" სახელწოდებით. საუკუნეების მანძილზე არაერთი ხანძრის, დანგრევის, რეკონსტრუქციისა თუ არქიტექტურული ფუნქციური ცვლილებების შედეგად, მონასტერმა უამრავი ტრანსფორმაცია განიცადა. დღეს კი ის ტურისტებისათვის უმნიშვნელოვანესი ძეგლია, რომელიც საფრანგეთის ეროვნული მონუმენტების სახელმწიფო ცენტრის მეთვალყურეობის ქვეშ იმყოფება.


შემდეგი ლოკაცია, Cite de la Mer, 1930 წლიდან განლაგებულია ყოფილი ტრანსატლანტიკური ლაინერის ტერმინალის ტერიტორიაზე, აქ ტრანზიტული გაჩერებებით შემოდიან მსოფლიოს ყველაზე პრესტიჟული ლაინერები. Cite de la Mer-ში შეგიძლიათ შეიცნოთ საფრანგეთის ფლოტილიის მარგალიტის Le Redoutable წყალქვეშა სამყარო. აქ ნახავთ მსოფლიოში უდიდეს წყალქვეშა ნავს და ევროპაში უღრმეს აბისალის აკვარიუმს, სადაც აღბეჭდილია წყალქვეშა გამარჯვებების ისტორია.

 

მეორე მსოფლიო ომის დროს ამერიკულმა ჯარმა უდიდესი წვლილი შეიტანა ნორმანდიის გათავისუფლებაში. Sainte-Mere-Eglise-ში საავიაციო მუზეუმი ეძღვნება ამერიკელი პარაშუტისტების 82-ე და 101-ე საჰაერო დესანტს. მუზეუმში უამრავი რარიტეტული ნივთია დაცული, რითაც ჩანს ფრანგი ხალხის უდიდესი მადლიერება.

ქალაქი შერბური ჩემთვის და არა მარტო ჩემთვის, ფილმთან ,,შერბურულ ქოლგებთან" ასოცირდება, თუმცა ამ ქალაქის ტურისტული ღირსშესანიშნაობა მე-18 საუკუნეში ლუი მე-16-ის მეფობის დროს აშენებული უდიდესი ნავსადგურია, რომელიც საფრანგეთსა და დიდ ბრიტანეთს ლამანშის სრუტით ყოფს. ჩვენს პროგრამაში არ შედიოდა ქოლგების საწარმოს მონახულება, თუმცა მაინც შევძელით სახელობითი ქოლგები შეგვეძინა საკმაოდ ძვირად, საუკუნეების მანძილზე საოჯახო ბიზნესად ქცეულ პრივატულ მაღაზია-საწარმოში, რადგან ამ ქალაქის სიმბოლო ჩემთვის ყოველთვის იქნება შერბურული ქოლგა! 


ყოველწლიურად მილიონობით ტურისტი სტუმრობს ომაჰა ბიჩს. Colleville-sur-Merის სასაფლაოზე კი ათასობით ამერიკელი ჯარისკაცი განისვენებს.
ძალიან შთამბეჭდავი იყო ფილმი ,,ნორმანდიის 100 დღე", რომლის ჩვენებაც, HD ხარისხით ცხრა ეკრანზე ერთდროულად მიმდინარეობს. მასში გაერთიანებულია საარქივო მასალები ნორმანდიის ბრძოლების ამსახველი კადრებით. ეს ფილმი ეძღვნება ყველა იმ მებრძოლის ხსოვნას, რომელიც ბრძოლის ველზე დაეცა.


Bayeux მოკირწყლული ქუჩებით, რესტორნებითა და მუზეუმებით იუნესკოს მსოფლიო მემკვიდრეობის სიაში შედის. ბაიო გობელენის სამშობლოა. 1944 წელს მას საფრანგეთის დროებითი დედაქალაქის სტატუსი მიენიჭა და პირველი ქალაქი იყო, რომელიც გერმანიის ოკუპაციისგან გათავისუფლდა.

Chateau La Cheneviere ულამაზესი და დიდი ისტორიის მქონე შატოა. აქ ღამის გატარება და საუზმე უდიდესი ფუფუნებაა. დახვეწილი მასპინძლობა საკუთარ თავზე გამოვცადეთ, და წამოსვლა აღარ გვინდოდა!

 

ნორმანდია ცხენოსნობით განთქმული ქვეყანაა და ოთხი ათასამდე საცხენოსნო ღონისძიებას მასპინძლობს. ლე პენ ის ,,ვერსალის ცხენების" სახელწოდებით ცნობილი ეროვნული საჯინიბო საფრანგეთში ყველაზე პრესტიჟულია. სპეციალურად ჩვენთვის ულამაზესი დოღი ჩაატარეს და თავლებიც დაგვათვალიერებინეს, სადაც მილიონებად ღირებული საჯიშე და ჩემპიონ ცხენებს უვლიან.


Cabourg -ი მოდური, დახვეწილი ზღვისპირა კურორტია. აქ არისტოკრატული ატმოსფერო სუფევს. ამ რომანტიკულ ქალაქს სიყვარულის ქალაქსაც უწოდებენ და ინსტაგრამზე, ქალაქის სახელწოდების გვერდით გულისინიციალებიანი ჰაშთეგები ჭარბობს.

Grand Hotel MGallery-ის შარმი დროს არ ექვემდებარება, მარსელ პრუსტი განსაკუთრებულ სიყვარულს განიცდიდა ამ ადგილის მიმართ. სასტუმროს ნომრებიდან იშლება როგორც ზღვის სანაპიროს, ასევე ყვავილების ბაღის ხედი. ჩვენთვის პრივატული ვახშამი გამართეს, სადაც საქართველოდან წაღებული ღვინო საღამოს ჰიტი გახდა.


Honfleur-ი პატარა ქალაქია, გასართობი და კომერციული პორტით. ეს ქალაქი გამოირჩევა ტრადიციული ნორმანდიული არქიტექტურით და აგრეთვე, იუჟენ ბუდენის მუზეუმით, სადაც იმპრესიონისტების ნახატებია დაცული. აქაურ ,,მშრალ ხიდზე" საინტერესო სუვენირი შევიძინე.


ქალაქი ეტრეტა, ულამაზესი ფრიალო კლდეებით, იმპრესიონისტების შთაგონების წყაროა. ფლობერი და მოპასანიც არაერთხელ მოხიბლულან ეტრეტას ხედებითა და სილამაზით. კოკო შანელის ცნობილი ფოტოებიც ეტრეტას პლაჟებზეა გადაღებული. Damaine Saint- Clair-Le Donjon- ში ლანჩითა და უგემრიელესი ადგილობრივი წარმოების კალვადოსით გაგვიმასპინძლდნენ.



Giverny- მომხიბვლელი ნორმანდიული სოფელი ცნობილი იმით გახდა, რომ კლოდ მონე აქ რამდენიმე ხანს ცხოვრობდა. როდესაც ხედავ ტბას შროშანებით, ხვდები, რომ ეს ადგილია მონეს ცნობილი ტილოს შთაგონების წყარო.

Chateau du Champ de Bataille წარმოადგენს საფრანგეთის ნოუ ჰაუს. ყველამ ერთხმად აღვნიშნეთ, რომ პირად მფლობელობაში ასეთი სიმდიდრე არასოდეს გვენახა. შატო ცნობილ ინტერიერის დიზაინერ ჟაკ გარსიას ეკუთვნის. ვერც კი წარმოვიდგენდი, თუ ვერსალის ბაღების შემდეგ რამე გამაკვირვებდა. აქ ნანახმა ინტერიერმა და ჰექტრობით ტერიტორიაზე გადაჭიმულმა ულამაზესმა ბაღებმა არა მარტო უდიდესი შთაბეჭდილება მოახდინა ჩემზე (და სხვებზეც), არამედ კიდევ დიდხანს იქნება საუკეთესო მოსაგონარი.

Rouen- ნორმანდიის ისტორიული დედაქალაქი გამოირჩევა შუა საუკუნეების არქიტექტურით. რუანის სახვითი ხელოვნების მუზეუმს, იმპრესიონისტული ნამუშევრების მხრივ საფრანგეთში პირველი ადგილი უკავია. ამ ქალაქში, ბაზრის მოედანზე, დაწვეს ჟანა დარკი. ჟანა დარკის მუზეუმი განთავსებულია ცნობილი კათედრალის გვერდით არსებულ არქიეპისკოპოსის ულამაზეს სასახლეში.


რუანში მოეწყო, ვორქშოპები და გრანდიოზული გალა-ვახშამი, კონცერტები და მსვლელობა ქალაქში. მოვინახულეთ ბენედიქტების სასახლე პალაის ბენედიცტინე, სადაც დახვეწილი ვახშამი მოგვიწყო ხელისუფლებამ.


საინტერესო ნაცნობები, დაუვიწყარი შთაბეჭდილებები და ბევრი სითბო წამომყვა საფრანგეთის ამ საოცარი რეგიონიდან. ფრანგებს უყვართ თავისი ქვეყანა და ძალიან უფრთხილდებიან მას და, რაც მთავარია, ამაყობენ! უკვე მენატრება მეგობრული და მხიარული ჯგუფის წევრები და მეც ვამაყობ, რომ უკვე კარგად ვიცნობ ნორმანდიას -კალვადოსისა და იმპრესიონიზმის სამშობლოს!


თეა აგლაძე

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.