ლიდსი - "ღამის ბუების" ქალაქი

ბრიტანეთი, ამწვანებული იორკშირი, ქალაქი ლიდსი, რომლის ქუჩები სიმშვიდითაა მოცული და მხოლოდ ქალაქის უნივერსიტეტის კართან აჟრიამულებული სტუდენტები თუ არღვევენ იორკშირის მყუდროებას...

ქალაქი ლიდსი ბრიტანეთში სიდიდით მეხუთეა. იგი მანჩესტერის ჩრდილოეთით მდებარეობს და "ღამის ბუების" ქალაქს უწოდებენ, ანუ ღამის ცხოვრების მოყვარულთა ქალაქია, სადაც ლუდი ძალიან უყვართ.

ქალაქის მოსახლეობა თითქმის ნახევარი მილიონია. მართალია, პატარა ქალაქია, მაგრამ ყველაზე ძველია. არც ისაა გასაკვირი, რომ ლივერპულისა და მანჩესტერის შემდეგ მისი სახელი ოდნავ ჩრდილში რჩება, თუმცა მაინც გამოირჩევა ბრიტანეთის სხვა ქალაქებისგან. ეს კი სწორედ ის მიზეზია, რომლის გამოც

ლიდსში ტურისტების ნაკადი არ წყდება.
გაგიგონიათ რამე იორკშირული ტერიერების შესახებ? სწორედ ლიდსში გამოიყვანეს ძაღლის ეს საყვარელი ჯიში. გარდა ამისა, ფეხბურთის მოყვარულებმა კარგად იციან, რომ "ლიდსი იუნაიტედის" სახელი სწორედ ამ პატარა ქალაქს უკავშირდება.


ღირსშესანიშნაობები? უამრავი. ქალაქის ულამაზესი რატუშა, რომელიც 1852 წელსაა აგებული არქიტექტორ კატბერტ ბროდერიკოს მიერ, თვით დედოფალ ვიქტორიას გახსნილია და ერთ-ერთი ყველაზე დიდი რატუშაა დიდ ბრიტანეთში.
ჯერ იმით დავიწყოთ, როგორ ჩავიდეთ ლიდსამდე. ქალაქს საკუთარი აეროპორტი აქვს -ლიდს-ბრედფორდი. ლონდონიდან ლიდსამდე მატარებლით შეიძლება მგზავრობა, გზას დაახლოებით 3 საათი მოუნდებით. გარდა ამისა, რეგულარულად მოძრაობენ ავტობუსები, მათ შორის - ღამითაც.
ცოტა ისტორია
ქალაქის შესახებ ცნობები ისტორიაში პირველად მე-11 საუკუნის ძეგლებში გვხვდება, ხოლო მე-13 საუკუნეში ლიდსი ქალაქი ოფიციალურად გახდა. მოხერხებული მდებარეობის გამო იგი სწრაფად იქცა მსხვილ სამრეწველო და სავაჭრო ცენტრად, ხოლო მე-18 საუკუნეში გაყვანილმა არხმა ლიდსი-ლივერპული, მისი მრეწველობა უფრო ააყვავა. მე-19 საუკუნეში აქ გაიყვანეს რკინიგზა და ინგლისის ექსპორტირებული საქონლის უდიდესი ნაწილი სწორედ ლიდსის გავლით გადიოდა ქვეყნიდან. შალის მწარმოებელი და საქსოვი ფაბრიკები მთელ ევროპაში იყო ცნობილი. ქალაქი სწორედ ამით მდიდრდებოდა. გარდა ამისა, გაიხსნა უნივერსიტეტი, რომელიც დღემდე ერთ-ერთი უდიდესი სასწავლო დაწესებულებაა ქვეყანაში - სტუდენტთა რაოდენობის მიხედვით უნივერსიტეტების პირველ ათეულში შედის.



პარკინსონის კორპუსი, არქიტექტურულად ულამაზესი შენობა, უნივერსიტეტის სიმბოლოდ მიიჩნევა.
მეორე მსოფლიო ომის შემდეგ ქალაქს გაუჭირდა და მისი სამრეწველო განვითარება თანდათან შეჩერდა. იგი სხვა ქალაქებს ჩამორჩა. საჭირო გახდა სერიოზული კაპიტალდაბანდება, რომელიც მხოლოდ ბოლო რამდენიმე ათეული წლის განმავლობაში განხორციელდა.
დღეს ქალაქი ქვეყნის ფინანსური და იურიდიული მომსახურების ერთ-ერთი უდიდესი ცენტრია.
ღირსშესანიშნაობები
თუ ისტორიული ძიებები გიზიდავთ, ლიდსი თქვენთვის ზედგამოჭრილი ადგილი იქნება. მიუხედავად იმისა, რომ ქალაქი პატარაა, მისი ისტორიული ცენტრი საკმარისად კომპაქტურია. რატუშა, რომელიც ზემოთ ვახსენეთ, პირველი კატეგორიის არქიტექტურული ძეგლია, ხოლო მასში მდებარე უნიკალური სამხელიანი ორგანი, რომელიც გრემმა და დევიდსონმა შექმნეს, ყველაზე დიდია ევროპაში. რატუშაში იმართება ოფიციალური საღამოები და სადღესასწაულო კონცერტები, აქვე ტარდება ლიდსის საერთაშორისო კინოფესტივალი. რატუშის მეზობლად მდებარე შენობაში -ქალაქის სამხატვრო გალერეაში, მე-20 საუკუნის ცნობილი ინგლისელი მხატვრების ნამუშევრებია დაცული. სკულპტურები, ფერწერული ტილოები, აკვარელითა თუ ზეთით შესრულებული ნახატები ტურისტების განსაკუთრებულ ყურადღებას იპყრობს.


წლების განმავლობაში ლიდსში ცხოვრობდა და მოღვაწეობდა სახელგანთქმული მოქანდაკე ჰენრი მური. ქალაქის მუზეუმში მისი უამრავი ნამუშევრის ნახვაა შესაძლებელი.
რაც შეეხება მილენიუმის მოედანს, გვერდს ვერ აუვლით. აქ ნახავთ საქალაქო მუზეუმს, სადაც განთავსებულია ექვსი გალერეა, რომელთა შორის გამორჩეულია ნატურალისტურ-გეოგრაფიული ექსპოზიცია "ცხოვრება დედამიწაზე", "უძველესი სამყაროები" და "შეხედულება მსოფლიოზე".
სამი რამ, რაც აუცილებლად უნდა მოიმოქმედოთ ლიდსში:
გაემგზავროთ პატარა ქალაქ უეზერბში, რათა იქაური იპოდრომი ნახოთ, დატკბეთ მდინარე უორფზე გადებული უძველესი ხიდით და მოინახულოთ საუცხოო ბაზარი.
გვერდი არ უნდა აუაროთ მიდლთაუნს, რომელიც 1758 წელს გაიხსნა და ერთ-ერთი უძველესი რკინიგზაა მსოფლიოში, რომელსაც მუშაობა არასდროს შეუწყვეტია. დაათვალიერეთ იქაური მუზეუმები და გაისეირნეთ ორთქმავლით.
უარი არ უნდა თქვათ ექსკურსიაზე, რომელიც ბუების მარშრუტზეა აგებული. თუ გსურთ, ბრინჯაოსგან ჩამოსხმული სიმპათიური ბუების კოლექცია დაათვალიეროთ, ამ ექსკურსიაზე ფულის დახარჯვა არ დაგენანოთ.
ლურდის ღვთისმშობლის ტაძარი კარდიგან როუდზე მდებარეობს და სპეციფიკური არქიტექტურით გამოირჩევა.
ღირსშესანიშნაობებიდან არ უნდა გამოგრჩეთ მე-12 საუკუნეში აშენებული ჰეირვუდის ფერწერის სასახლე, სამეფო იარაღის მუზეუმი, სადაც ქვეყნის ნაციონალური იარაღის კოლექცია და ინგლისის ტაუერის უძველესი აღჭურვილობა ინახება. დაახლოებით 75 000 ექსპონატია ამ მუზეუმში შემონახული. აქვე ნახავთ ოტომანების იმპერიის, ველური დასავლეთის შეიარაღებას, იაპონელი სიოგუნებისა და ინდიელი მეომრების ამუნიციას, ასევე, ევროპული სამეფო სახლების საბრძოლო აღჭურვილობას.
გვერდს ვერ აუვლით ნახევრად დანგრეულ კერკსტოლის სააბატოს. ეს არის ერთ-ერთი საუკეთესო ნიმუში, რომელმაც შუა საუკუნეების სამონასტრო კომპლექსები შემოინახა. იგი მე-12 საუკუნის ადრეული ცისტერცინის არქიტექტურის შესანიშნავი ნიმუშია. სააბატო ულამაზეს სახალხო პარკში მდებარეობს, ხოლო გზის მოპირდაპირე მხარეს სააბატოს მუზეუმია.


ყურადღებას იპყრობს თეკერეის სამედიცინო და წისქვილის მუზეუმები, ხოლო რაუნდჰეის პარკში განლაგებული "ტროპიკული სამყარო", რომელიც ერთ-ერთი უმსხვილესი ორანჟერეაა დიდ ბრიტანეთში, მდიდარია არა მხოლოდ ტროპიკული ფლორითა და ფაუნით, არამედ ჯუნგლებისა და უდაბნოების ეკოსისტემით, სურიკატების სიმპათიური ოჯახის ჩათვლით.
ლიდსში ყოველწლიურად უამრავი კონცერტი და ფესტივალი იმართება. მათ შორის: იორკშირის ფესტივალი გაზაფხულსა და ზაფხულში, ჰეირვუდის კოშკში მიმდინარე ავტოშოუ ივნისში და დასავლურინდური კარნავალი აგვისტოში. გარდა ამისა, 2014 წელს აღდგა ტრადიცია საჭმელ-სასმლის ფესტივალის ჩატარებისა, რომელიც მაისის ბოლოსა და ივნისის დასაწყისში იმართება.
განსაკუთრებით აღსანიშნავია ლიდსის ღამის ცხოვრება. ქლაბერების დასამახსოვრებელ გამოსვლას ტურისტები აღტაცებაში მოჰყავს. თუ ლუდის მოყვარული ბრძანდებით, გამოდის, რომ ბედმა გაგიღიმათ - ვერსად ისე გემრიელად ვერ დააგემოვნებთ ლუდს, როგორც ბრიტანეთის ამ პატარა ქალაქში. ლუდიც არის და ლუდიც, არჩევანი ნამდვილად მრავალფეროვანია.


ნანათე ნელსონი

"ბომონდი", ივლისის ნომერი

like
0

კომენტარები

Cliff 2017-08-20 10:42
LIᏦE WHAT DADDY, TELL US, TEᒪL US.? Each oys jumped up and down wanting to know tips on hoow to make God hɑppy.



Chek οut my websіte - Jack: http://www.linux.ca

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.