გურია - მოგზაურობა ღრუბლებს ზემოთ

ყველაფერი ერთი წლის წინ, ბახმაროში დაიწყო. ვმოგზაურობთ ორნი. მე და ჩემი მეუღლე, დავით ხელაშვილი.

პარასკევს, სამსახურის შემდეგ, ბახმაროსკენ გავეშურეთ. მეორე პროფესია, ფოტოგრაფია საერთო გვაქვს.

შეყვითლებული წიწვოვანი ხეები, ნისლში გახვეული მთები თუ ,,ირმის ნახტომი“ ბახმაროს ცაზე - კვირას, სახლში დაბრუნებულებმა ფოტოებს გადავხედეთ, ორდღიანი ფოტომოგზაურობის შედეგი იმაზე მრავალფეროვანი აღმოჩნდა, ვიდრე მოველოდით. სწორედ მაშინ დაგვებადა იდეა გვეწარმოებინა ფოტოდღიური და მასში საქართველოს სხვადასხვა კუთხე მოგვექცია. პროექტს ,,სეზონები-ფოტოდღიური“ დავარქვით.


ერთი წლის შემდეგ, სიმბოლურად, თარიღის აღსანიშნად, იმავე მხარეში დავბრუნდით. დანიშნულების პუნქტი კი ამჯერად კურორტი გომის მთაა.


თბილისიდან დილის 7 საათზე გამოვედით. ვმგზავრობთ მაღალი გამავლობის მანქანით, თუმცა გზა გომის მთამდე რთული არაა და ნებისმიერი ტიპის ავტომობილის გამოყენება შეგიძლიათ. გადაღების მადა უკვე გურიაში შესვლისას მატულობს. სივრცე აქედან გომისმთამდე ცალკე ჩანაწერებს ითხოვს, მაგრამ დრო მკაცრად გვაქვს გაწერილი და არ ვრჩერდებით. გურული სახლები აჟურული დეტალებით, მწვანე პეიზაჟები და ნაკადულები ერთმანეთს ცვლის, შემდეგ კი ყველაფერი ნისლში ეხვევა.


უკვე გომის მთაზე ვართ. ხილვადობა თითქმის შეუძლებელია. აქ ეს ჩვეული ამბავია. ადგილობრივების რჩევას ვითვალისწინებთ და ყველაზე მაღალ გორაკზე ვბანაკდებით. აქედან წესით, მთლიანი დასახლება უნდა გამოჩნდეს, თუმცა ჯერჯერობით ერთმანეთის გარჩევას ძლივს ვახერხებთ. კარავს ვშლით და ცეცხლის ანთებას ვცდილობთ. გორაკზე მეზობლებიც გვყავს. ცოტა ხანში აჭარული ღვინის დაგემოვნებაც გვიწევს. ვიგებთ, რომ ბოლო რამდენიმე დღეა დასახლებაში ნისლი არ გაფანტულა. ეს კი ნიშნავს, შესაძლოა, დაბრუნება ფოტოების გარეშე მოგვიწიოს. ბახმაროს მაგალითი გვახსენდება და იმედს არ ვკარგავთ. ოპტიმისტმა არ გვიმტყუნა, მზის ჩასვლისას ნისლი ნაწილობრივ გაიფანტა და დაახლოებით, 40 წუთი გომისმთა ჩვენი ობიექტივების განკარგულებაში იყო.


დათმობა მალევე მოგვიწია და კარვებში დავბრუნდით. საკმაოდ ცივა და ზამთრის სქელ ჯემპრებში ვართ გახვეული. დასახლებას უკვე კარვებიდან ვუყურებთ. ნისლში ნელ-ნელა ყვითელი შუქები ჩნდება. გომის მთაზე ელექტროენერგია ხელმისაწვდომი არაა, 1990-იან წლებში კაბელები მოიპარეს და ახლა მოსახლეობის უმეტესობა გენერატორებით სარგებლობს.

 

 

მოსაწესრიგებელია წყალმომარაგების სისტემაც. მობილური და ინტერნეტ სიგნალი დასახლებაში რთულად, მაგრამ იჭერს. ბევრი ყოფით პრობლემის მიუხედავად, გომისთმა ტურისტებისთვის ერთ-ერთ ყველაზე საინტერესო დასახლებაა. მიზეზი ჩვენი ფოტოებიდანაც კარგად ჩანს - მდებარეობა ზღვის დონიდან 2100 მეტრ სიმაღლეზე, წიწვოვანი ხეებით

გარშემორტყმული, ნაკადულებითა და მინერალური წყლებით. რაც ყველაზე მთავარია, აქ მთისა და ზღვის ჰავა ერწყმის ერთმანეთს და მის სამკურნალო თვისებებსაც განაპირობებს. ამას უკავშირდება ლეგენდაც გომის მთაზე - ამბობენ, რომ პირველად ერთ-ერთი მწყემსი მოადგა გომისმთას ვითომდა უკურნებელი სენით შეპყრობილ ქალიშვილთან ერთად. ხალხური გადმოცემის თანახმად, ქალიშვილი გომისმთაზე განიკურნა...


ნისლების სამფლობელო გამთენიისას დავტოვეთ. სანამ გურიის ყველაზე მისტიკურ მთას პირადად ესტუმრებით, გომისმთაზე მოგზაურობა ჩვენი ფოტოების საშუალებით შეგიძლიათ... დაგვემგზავრეთ.


ეკატერინე მამამთავრიშვილი


like
3

კომენტარები

ნინო 2018-05-01 16:04
ეს ძალიან კარგი ფოტოებია ულამაზესი!!!
nanakostava 2017-11-10 14:27
ulamazesia tveni patara sakartvelo-madloba tkven aseti xedebistvis gaixaret
ertad sevdlot am kvelapris gaprtxileba,,,,
nana m 2017-11-05 20:39
ulamazesia! didi madloba am siamovnebistvis
ეკატერინე 2017-10-22 06:43
დიდი მადლობა
natia 2017-10-18 08:35
უმაგრესი ხედვაა ყოჩაღ თქვენ (Y) ძალიან ლამაზი ფოტოებია

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.