ინდოეთი - კონტრასტების ქვეყანა

ინდოეთი საოცრებებითა და იდუმალებით აღსავსე ზღაპრული სიმდიდრისა და, ამავდროულად, უკიდურესი სიღარიბის ქვეყანაა, თავბრუდამხვევი სიმაღლის მთებითა და გაუვალი ტყეებით, დიდებული ტაძრებითა და ღარიბების ქოხმახებით. ეს არის უდიდესი რელიგიისა და უდიდესი წმინდანების
ადგილი. ქვეყანა, სადაც შეიძლება სულისა და ხორცის თავისუფლებას ეზიარო.



ინდოეთი საინტერესოა ისტორიული, კულტურული და არქიტექტორული მემკვიდრეობით. ველური ბუნება, ჯუნგლები, ტროპიკული ტყეები, ნაკრძალები, ჩანჩქერები, ეროვნული პარკები და სხვა აღაფრთოვანებს მნახველს. აქ მრავლად შეხვდებით ფეშენებელურ სასტუმროებს, რომლებიც მომსახურების მაღალი დონით გამოირჩევიან.
ქალაქებში იმართება სეზონური ფესტივალები, გამოფენები. უხვადაა გამაჯანსაღებელი სპა-ცენტრებიც.
განსაკუთრებით დამაინტრიგებელია მთიანი რეგიონები _ წმინდა ჰიმალაები და 12 უმაღლესი მწვერვალი, 7,517 კმ-იანი სანაპირო ზოლი და უნიკალური ტროპიკული კუნძულები – ანდამანი, ნიკობარი.
აბა, რა უნდა იყოს ინდოეთი საფარის უდაბნოს გარეშე? არ გამოტოვოთ ექსტრემალური ტურები, ექსტრემალური ლაშქრობები, დაუვიწყარი საქორწინო ტურები, ვიზიტი წმინდა აშრამებში, იოგატურები, გასტრონომიული ტურები, სარკინიგზო კრუიზები ელიტური მატარებლებით. მოინახულეთ კერალის ყურეები – მოგზაურობა "ბრინჯის ნავებზე".
თუ ცალ-ცალკე ვერ ახერხებთ ყოველივე ამას, დაგეგმეთ კომბინირებული ტურები. ძირითადი ტურისტული ქალაქებია: გოა, აგრი, ვარანასი და მუმბაი.


გოა

ტურისტული თვალსაზრისით, ერთ-ერთი ყველაზე პოპულარული დასასვენებელი ადგილია, რომლის ოქროსფერი პლაჟები და ნოტიო ტროპიკების უმდიდრესი ბუნება მას განუმეორებლობასა და იდუმალებას ანიჭებს. ეს ის ადგილია, სადაც ადამიანს შეუძლია დაისვენოს ისე, როგორც მას სურს. შეგიძლიათ, გაისეირნოთ პლაჟზე ან ველურ ბუნებაში და გაეცნოთ ადგილობრივების წეს-ჩვეულებებს.



ტაჯმაჰალი

დიდებული, ღვთიური, ბრწყინვალე... 74 მეტრი სიმაღლის მიუხედავად, ტაჯმაჰალი ისეთი მსუბუქი და ჰაეროვანია, რომ ზღაპრულ ხილვას მოგაგონებს. მდინარე იამუნას დაბლობში აღმართული ტაჯმაჰალი უმშვენიერესი არქიტექტურული ქმნილებაა ინდოეთში... ცადაა აზიდული თეთრი მარმარილოს გუმბათები – ერთი დიდი და ოთხი მცირე, რომელთა უზადო შემოწერილობაში ქალის ფორმები შეგიძლიათ ამოიცნოთ. ხელოვნური არხის უდრტვინველ ზედაპირში არეკლილი ტაძარი თითქოს ჰაერშია გამოკიდებული, მზერას არამიწიერი სილამაზე და სრულყოფილი ჰარმონია ბოლომდე იპყრობს. მილიონობით მოგზაურს არანაკლებ შთაბეჭდილებას უქმნის მისი შექმნის ისტორიაც... ისტორია, რომელიც უფრო აღმოსავლურ ზღაპარს ჰგავს, ვიდრე რეალურ ამბავს...

ეს ძეგლი დიდი მოგოლების მუსლიმი სულთნის, შაჰ ჯაჰანისა და მისი მეუღლის – ზღაპრული სილამაზის მუმთაზ მაჰალის სიყვარულზე მოგვითხრობს. შაჰ ჯაჰანი ჯერ კიდევ პრინცი იყო, როცა 19 წლის მუმთაზზე დაქორწინდა. წყვილს უსაზღვროდ უყვარდა ერთმანეთი. მიუხედავად იმისა, რომ შაჰ ჯაჰანს ჰარამხანა ჰქონდა, იმდენად იყო შეყვარებული თავის ახალ მეუღლეზე, რომ სხვა ქალებს იოტისოდენა ყურადღებასაც არ აქცევდა. საყვარელმა ცოლმა ჯაჰანს 8 ვაჟი და 6 ქალიშვილი აჩუქა, მაგრამ, მე-14 შვილის გაჩენის შემდეგ მუმთაზი გარდაიცვალა... შაჰ ჯაჰანი იმდენად უბედური იყო, რომ სიცოცხლე უაზროდ ეჩვენებოდა. ცოლის სასიკვდილო სარეცელთან სულთანი ერთბაშად გაჭაღარავდა... მან ქვეყანაში ორწლიანი გლოვა გამოაცხადა, რომლის დროსაც აიკრძალა ზეიმები, ცეკვა და მუსიკა. მოგვიანებით აგრაში, რომელიც იმ დროს მოგოლების იმპერიის დედაქალაქი იყო, მუმთაზის საფლავზე აღიმართა მავზოლეუმი, რომელიც, შაჰ ჯაჰანის ჩანაფიქრის მიხედვით, მისი გარდაცვლილი მეუღლის ზღაპრული სილამაზის სიმბოლო უნდა გამხდარიყო... ამ გრანდიოზული მავზოლეუმის მშენებლობა, რომელიც სილამაზითა და ზომებით ყველა მანამდე არსებულს აღემატებოდა, 20 წელზე მეტხანს გრძელდებოდა და მას 20 ათასზე მეტი ადამიანი აშენებდა, არქიტექტორებისა და ხუროთმოძღვრების ჩათვლით, რომლებიც მიწვეულნი იყვნენ სპარსეთიდან, თურქეთიდან, სამარყანდიდან, ვენეციიდან. დასრულებული ტაძარი ხაზებისა და ფერების სრულყოფილებითა და სილამაზით აღაფრთოვანებს მნახველს. ეს მართლაც რომ სასწაულთა სასწაულია. კუთხეებში ოთხი მოხდენილი მინარეთია აღმართული.

ტაჯმაჰალის კედლები თეთრი გაპრიალებული მარმარილოთია მოპირკეთებული, რომელიც ოქროსავით ბზინავს შუადღის მზის ქვეშ. უმშვენიერესი, სრულყოფილი ფორმების ტაჯმაჰალი მნახველს აკვირვებს თავისი დეტალებითაც – ხის კოხტა ორნამენტებით, კუბოკრული ჩარჩოებითა და ფერადი ქვებით. ტაჯმაჰალის გარშემო დიდებული დეკორატიული ბაღი გაშენდა ტბებით, შადრევნებითა და ხელოვნური არხებით, რომელსაც მთლიანობაში 18 ჰექტარი უკავია. შენობის მარჯვენა და მარცხენა მხარეს განლაგებულია წითელი აგურით ნაგები ორი მეჩეთი. სრულყოფილების სურათს ავსებს ლაჟვარდოვანი მინდვრები და კაშკაშა ყვავილები, რომლებიც ამ ბაღს ზღაპრულ იერს სძენენ.
ტაჯმაჰალი ინდურ-მუსლიმური ხელოვნების ყველაზე შესანიშნავ ქმნილებად რჩება, რომელსაც დედამიწაზე პატივს მიაგებენ, როგორც ულამაზეს ნაგებობას და რომლის ნახვაც ამ სასწაულებრივ ქვეყანაში ჩასულ ნებისმიერ ადამიანს სურს.



ოქროს ტაძარი

სიქჰების ოქროს ტაძარი პუნჯაბში მდებარეობს და ყველაზე წმინდა ადგილია სიქხიზმის მიმდევართათვის. ტაძარი ყოველთვის სავსეა მომლოცველებით და ტურისტებით. ტაძრის მშენებლობა პატარა ტბიდან დაიწყო, რომელიც იმდენად წყნარი იყო, რომ ბუდაც კი მოდიოდა აქ მედიტაციისთვის. ათასი წლის წინ გურუ ნანაკი, რომელიც სიქხიზმის დამფუძნებელი იყო, სწორედ ამ ტბასთან ეძლეოდა მედიტაციას (სვეტა, ალბათ აქ უნდა იყოს ნირვანა, რაც მედიტაციით მიიღწევა). მეოთხე გურუმ ტბა გააფართოვა და გადააქცია წმინდა ქალაქად, ანუ უკვდავების ნექტრად, რომლის ნაპირასაც ააგო ტაძარი და ააშენა ქალაქი. სიქხებისთვის ოქროს ტაძარი სრულ თავისუფლებასა და სულიერ დამოუკიდებლობასთან ასოცირდება. ტაძარი მორთულია დეკორატიული მარმარილოს სკულპტურებით, ოქროთი და ძვირფასი თვლებით. კედლები კი დაფარულია ოქროთი.

აჯანტა

ბუდისტური მონასტერი აჯანტა მაჰარაშტრას შტატში მდებარეობს. იგი შედგება ფრიალო კლდეში გამოკვეთილი 29 გამოქვაბულისგან.
ბუდისტი ბერების საცხოვრებელი იყოფა ორ ძირითად ტიპად: ჩაიტია (სამლოცველო დარბაზი) და ვიჰარა (კვადრატული დარბაზები, რომელშიც სამი მხრიდან შემოწყობილია ბუდას სხვადასხვა ზომის გამოსახულებები).



ვარანასი

ვარანასი, რომელიც მსოფლიოს ერთ-ერთ უძველეს ქალაქად ითვლება, მდებარეობს ჩრდილოეთ ინდოეთში, უტარ პრადეშის შტატში, მდინარე განგის ნაპირას. ზოგი მას აღმოსავლეთის ვენეციას უწოდებს ვიწრო ქუჩებისა და ნავების სიმრავლის გამო. ის ერთ-ერთია ინდუსების შვიდი წმინდა ქალაქიდან. თუ ვარანასი არ ნახე, გამოდის, რომ ინდოეთიც არ გინახავს. მისი ისტორია 3000 წელს ითვლის.

ინდური სამზარეულო

ინდური კულინარია ერთ-ერთი ძველი და პოპულარულია მსოფლიოში. ეროვნული კერძები და სასმელები არც ერთ სხვა სამზარეულოს არ ჰგავს – ნებისმიერი კერძი ერთდროულად უნდა შეიცავდეს 5 განსხვავებულ გემოს: მარილიანს, მჟავეს, ცხარეს, ტკბილსა და მწარეს. ინდური სამზარეულო ამასთანავე ვეგეტარიანულია, ხოლო ცოცხალი ბოსტნეული _ არც ისე პოპულარულია. სამაგიეროდ, ყველი, სოკო, პარკოსნები, ბრინჯი, ფერადი კომბოსტო და ზოგიერთი სხვა ბოსტნეული უხვად გამოიყენება მრავალფეროვან კერძებში. საბედნიეროდ, ევროპული (კონტინენტური), ტიბეტური და ჩინური სამზარეულოს კერძების ჩამონათვალი თითქმის ყველგანაა წარმოდგენილი მენიუში და ევროპულ გემოს მიჩვეულ ადამიანებს ცხოვრებას უადვილებს. სამზარეულოს ძირითადი კომპონენტებია: ბოსტნეული თევზი, ბრინჯი, ცომეული, ლავაში და რძის პროდუქტები. ადგილობრივი მზარეულების სავიზიტო ბარათი სხვადასხვა საკაზმია, რომლებსაც ყველანაირ საკვებში იყენებენ. ძალიან პოპულარულია ჩაი, რომელსაც რძით ან საკაზმებით შეზავებულს სვამენ, ასევე პოპულარულია ყავა, ახალი წვენები და ხილიანი წყლები. სუფრასთან მიღებული არ არის სპირტიანი სასმელები. კერძების უმრავლესობას ცივ წყალს აყოლებენ.
რაც შეეხება წვენებს, იგი ორი სახისაა: ფრეშ ჯუსი, ანუ ახალდაწურული წვენი და უბრალოდ, ჯუსი. წვენი ქაღალდის პაკეტებში ნატურალური გემოსია და ფრეშს მოგაგონებთ.
ეროვნული სასმელებიდან გირჩევთ, გასინჯოთ "ლასი" – სასიამოვნო სასმელი, რომელიც წყურვილს მოგიკლავთ და გამოგაცოცხლებთ. სასმელი შეიძლება მარილიანი იყოს, ტკბილი ან ხილის.

ალკოჰოლიანი სასმელები ინდოეთში დიდი პოპულარობით არ სარგებლობს, ასე რომ, სუპერმარკეტებში არყის, ღვინის, ვისკის და სხვა სასმლის შესაძენად დროს ნუ დაკარგავთ, დიდი ალბათობით, ვერსად იშოვით. კაფე-ბარებსა და რესტორნებში მეტწილად ლუდისა და ვისკის შეკვეთას თუ შეძლებთ.



ფასები

ფასები ინდოეთში ძალიან დაბალია. "ველურად" ჩასული ევროპელი ტურისტების უმეტესობა დღეში 10 დოლარზე მეტს არ ხარჯავს ტრანსპორტის, საცხოვრებლისა და საკვების ფასების ჩათვლით. უიაფესი ქვეყანაა. შესაძლოა, დღეში 2 დოლარზე მეტიც არ დახარჯოთ, თუ დაზოგავთ ფულს ტრასპორტზე და ხანგრძლივი დროით იქირავებთ არა სასტუმროს, არამედ კერძო აპარტამენტებს, სადაც საკუთარი სამზარეულო გექნებათ და თვითონ მოიმზადებთ სადილს ბაზარში ნაყიდი პროდუქტებით.

ათას ერთი ღამის ზღაპარი

ინდოეთი ერთ-ერთია იმ მცირერიცხოვან ქვეყანათაგან, სადაც რიქშები ჯერაც არსებობენ. არიან რიქშები, რომლებიც თვითონ ებმებიან ეტლებში, ასევე შეგხვდებათ ველორიქშები და მოტორიქშები.
საიუველირო ნაწარმი – ინდოეთში მოგზაურობის სავიზიტო ბარათია. ძვირფასი და ნახევრად ძვირფასი ქვებით შემკული ოქროსა და ვერცხლის ნაკეთობები არც ერთ ადამიანს არ დატოვებს გულგრილს. მათი სილამაზე თვალს მოგჭრით და შევაჭრებაც მოსულა!



ხალიჩების რაოდენობა და სილამაზე ათას ერთ ზღაპარს მოგაგონებთ. დამზადებულია სხვადასხვა მასალისგან, ძირითადად ქვეყნის ჩრდილოეთში. მთელ მსოფლიოშია ცნობილი ქიშმირის შალი და შარფები. ძალიან ლამაზია სპილენძისა და ბრინჯაოს ნაკეთობებიც, თეთრი ან ვარდისფერი მარმარილოს სუვენირები. სანდალის, ვარდის, წითელი და შავი ხის მასალები ერთობ პოპულარულია და გამოიყენება როგორც საყოფაცხოვრებო ნივთების, ასევე სუვენირების დასამზადებლად.



like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.