რეალური ზღაპარი გრანიტის კუნძულებზე

ირგვლივ…უჩვეულო პალმის ტყეები, საოცარი მარჯნები და ზღაპრული სანაპიროა გადაშლილი. აქ ყველაფერია, რომ თავი მიწიერ სამოთხეში იგრძნოთ.
ეს სეიშელის კურძულებია, ულამაზესი ადგილი, სადაც ხარობს მსოფლიოს უდიდესი მცენარე - სეიშელის პალმა, რომლის ნაყოფიც 20 კილოგრამს იწონის. ადგილობრივ მოსახლეობას სჯერა, რომ სწორედ ეს ნაყოფი გახდა ადამისა და ევას ცდუნების მიზეზი. აქ იშვიათი ჯიშის ფრინველებს მოუყრიათ თავი. პალმების კუნძულზე ყოველწლიურად მოფრინავენ გადამფრენი ფრინველები, სეიშელის თუთიყუშები, ბულბულები... მართლაც, რომ სამოთხეა დედამიწაზე.



სეიშელის კუნძულები მდებარეობს ინდოეთის ოკეანის დასავლეთ ნაწილში, მადაგასკართან ახლოს და ტროპიკული მცენარეების სამშობლოა. ქვეყნის შემადგენლობაში
შედის 100-მდე კუნძული, მათგან მხოლოდ 33-ია დასახლებული. ბევრია მცირე მარჯნისა და გრანიტის კუნძული. ისინი მდებარეობს გრანიტებითა და სიენიტებით აგებულ წყალქვეშა მაღლობებზე. სიმაღლე ზღვის დონიდან 915 მეტრამდეა.



გრანიტის ჯგუფის კუნძულების შიდა რაიონებში შენარჩუნებულია ტყეები, რომლებშიც ჭარბობს პალმების, პანდანუსების, გვიმრების იშვიათი ჯიშები. სანაპირო დაბლობებზე ბუნებრივი ფლორა დიდი ხანია შეცვალა ქოქოსის პალმამ და სხვა კულტურულმა ნარგავებმა. შიდა რაიონებში შემორჩენილია მარადმწვანე ტროპიკული ტყე, სადაც ბევრი ენდემია (სეიშელის პალმა).
სეიშელი მსოფლიოში ლიდერია ტურიზმის მხრივ. ამ მდგრადი განვითარების უცვლელი და სტაბილური საფუძველი ბუნებრივი გარემოა, რომელიც ფინანსურად ძლიერ ტურისტებს იზიდავს. სეიშელის გრანიტის კუნძულები 75-მდე ენდემური მცენარის სამშობლოა. სეიშელის პალმა, რომელიც ყველაზე უფროა ცნობილი, ხარობს მხოლოდ ორ კუნძულზე, პრასლინსა და კურიუსზე. მას ხშირად, მისი ნაყოფის ფორმის გამო, მეტსახელად "სიყვარულის კაკალს"ეძახიან. მედუზის ხე, რომელიც ასევე ერთ-ერთი ენდემია, ხარობს მხოლოდ კუნძულ მაეს შემოგარენში. ყოველწლიურად სეიშელის კუნძულები 150 000-მდე ტურისტს მასპინძლობს.



კუნძულებზე ასევე წარმოდგენილია ორქიდეების უნიკალური სახეობები. სეიშელი მასპინძლობს მსოფლიოში უდიდეს ფრინველთა კოლონიას. ქვეყანა დიდ ყურადღებას უთმობს ბიომრავალფეროვნების დაცვას. სეიშელის თვითმმართველობის ინიციატივით, ქვეყანაში შეიქმნა რამდენიმე ეროვნული პარკი. მათ შორის, ალდაბრის კუნძულებზე არსებული ვალე-დე-მე, რომელიც შედის იუნესკოს მსოფლიო მემკვიდრეობის სიაში.

ვალე-დე-მე არის ერთადერთი ეროვნული პარკი, სადაც პალმის ექვსივე ენდემური სახეობაა წარმოდგენილი, მათ შორის სეიშელის პალმაც. ალდაბრის კუნძულების ატოლებზე შენარჩუნებულია რამდენიმე გიგანტური კუს სახეობა, თუმცა მსოფლიოს უძველეს ცოცხალ არსებებს გადაშენების საფრთხე ემუქრებათ. გიგანტური კუ 250 კგ-ს იწონის და ზოგიერთი 150 წელიც კი ცოცხლობს.



სეიშელის ბუნებრივ რესურსთაგან აღსანიშნავია თევზი, ვანილი, დარიჩინი, ქოქოსი, მარილი და რკინა.
ტურისტებისთვის ერთობ მიმზიდველი ადგილია, რადგან ეგრევე თვალში გხვდება თეთრი ქვიშა, განსაკუთრებული ფერების ოკეანის სანაპირო და ჯერაც ხელუხლებელი ველური ბუნება. როგორც კი მიწაზე ფეხს დადგამთ, ხვდებით, რომ მოხვდით საოცარ სამყაროში, სადაც ყველა კეთილგანწყობილი და სტუმართმოყვარეა.

ადამიანთა უმრავლეობისთვის ტროპიკული კუნძული საუკეთესო ადგილია რელაქსაციისთვის და დამღლელი სამუშაოს შემდეგ დროის საუკეთესოდ გასატარებლად. აბა, წარმოიდგინეთ: ნაპირთან ახლოს წყალში ჩადგმული შეზლონგი, ოკეანის ტალღების ხმა, თეთრი ქვიშის სანაპიროები, ფეხებზე მოლამუნე თბილი, ფირუზისფერი წყალი, ვარსკვლავებით მოჭედილი ცა, ჰარმონიული, რომანტიკული საღამოები და მშვიდი გარემო, არაჩვეულებრივი ბუნება, სუფთა წყალი, ფლორისა და ფაუნის უცნაური წარმომადგენლები - ეს ხომ ნამდვილი სამოთხეა დედამიწაზე, რეალობად ქცეული ზღაპარი მშვიდი დასვენების მოყვარულთათვის.



მარჯნისრიფებიან ხმელეთზე განლაგებული თანამედროვე, ბუნებასთან ჰარმონიულად შერწყმული ბუნგალოები ფირუზისფერ წყალშია შეჭრილი. სეიშელის მთავარი სიმდიდრე მისი სანაპიროა, თავისი მდიდარი წყალქვეშა სამყაროთი, რომლის დათვალიერებაც აკვალანგის უბრალო სათვალითაა შესაძლებელი. უამრავი საშუალებაა, რომ გაერთოთ და დაისვენოთ. ბუნგალოს წინ ჩამომჯდარს შეგიძლიათ, მზის ჩასვლის მზერით დატკბეთ, ზღაპრული სანახაობაა. უდავოდ ღვთაებრივი ადგილია. მთელ სიგრძეზე გადაჭიმული მარჯნის რიფები, ჯადოსნური წყალქვეშა სამყარო და ცივილიზაციისგან ხელუხლებელი ბუნება, ლამაზი პალმები და ბროლივით გამჭვირვალე, თბილი წყალი - ეს არის ის, რაც არა მარტო სრულყოფილი დასვენებისთვისაა აუცილებელი, არამედ მთელი ცხოვრება არ დაგავიწყდებათ. შესანიშნავი კლიმატი მთელი წლის განმავლობაში ნარჩუნდება, ზამთარშიც კი.



სეიშელის კუნძულებზე დასვენებისთვის საუკეთესო პერიოდია მარტიდან ნოემბრის ჩათვლით, თუმცა ზამთრის თვეებიც საოცრად თბილი და სასიამოვნოა. საშუალო ტემპერატურა ამ პერიოდში 26-32 გრადუსია. რაც მთავარია, სეიშელის მთელი ტერიტორია გამწვანებული და ტროპიკულია. სეიშელის ყველაზე მნიშვნელოვანი სიმბოლო COCO DE MAR ქოქოსია, რომელიც ზომითა და ფორმით განსხვავებულია და მხოლოდ აქ, სეიშელის კუნძულებზე, მოდის.

არაჩვეულებრივი სასტუმროები მთელ კუნძულზეა გაბნეული. თითოულ მათგანში ხმაურიანი სამყაროსგან იზოლირების, სიმშვიდისა და ყველასა და ყველაფრისგან დასვენების ატმოსფეროა შექმნილი - აქ შეგიძლია, სრულიად მოსწყდე ურბანულ სამყაროს.

სეიშელის სასტუმროების ყველაზე დიდი ქსელია ჩონსტანცე, რომლის სასტუმროები იმდენად მაღალი დონისაა, იმის აღნიშვნაც არ არის საჭირო, რომ აქ ყველა პირობაა შექმნილი დამსვენებლებისთვის.




სასტუმროს ტერიტორია შთამბეჭდავად დიდია, ძალიან მაღალ ტურისტულ სეზონზეც კი შეუძლებელია, დამსვენებელს რაიმე სახის, თუნდაც უმნიშვნელო დისკომფორტი შეექმნას. სასტუმროებში ფუნქციონირებს მაღალი დონის დასვენებისა და რელაქსაციის ცენტრები, სადაც თავს ღვთაებრივად იგრძნობთ.

სასტუმრო Constance Lemuria ნამდვილი სამოთხეა. ამ სასტუმროს აქვს ყველაზე დიდი გოლფის მოედანი და მსოფლიო გოლფის მოყვარულებისთვის საუკეთესო პირობებია შექმნილი.
განსაკუთრებით საინტერესოა კურორტი ოჯახური დასვენების მოყვარულებისა და წყვილებისთვის, აქ ყველაფერია, რომ კარგად დაისვენოთ და გაერთოთ.
საუკეთესო რესტორნებიც ასარჩევადაა და მსოფლიოს საუკეთესო მზარეულები მოგემსახურებიან.



კუნძულს ოდესღაც მხოლოდ ზურგჩანთიანი და კარვიანი ტურისტები სტუმრობდნენ, ახლა კი მთელ სანაპიროზე მაღალი კლასის სასტუმროებია. საოცარია თეთრი ქათქათა პლაჟები, რომელთა სისუფთავეს დიდ ყურადღებას აქცევენ. პლაჟები მრავალფეროვანია. კუნძულთა უმეტესობა წყნარია, ნაწილი კი ხმაურიანი, მრავლად შეხვდებით უკაცრიელ ადგილებსაც, ვისაც განმარტოება სურს, მისთვის აქაურობა ნამდვილი სამოთხეა. თუ დაივინგით არა ხართ გატაცებული, შეგიძლიათ, ადგილობრივი მეთევზეების საქმიანობას ადევნოთ თვალყური. მართლაც ეგზოტიკური და მრავალფეროვანი მოგზაურობა გელით.
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.