ლანგკავი - მალაიზიური ეგზოტიკა

ანდამანის ზღვა... ბავშვობაში მეგონა, რომ კარგი თავგადასავლები სწორედ ამ სიტყვებიდან იწყებოდა, ხოლო ამ ზღვის სანაპიროები ისე ლამაზად და მოულოდნელობებით სავსედ მეჩვენებოდა, როგორც მეკობრეები, რომელთა შესახებ წიგნებში წამეკითხა ან ფილმებში მენახა.

გავიზარდე და ბავშვური ილუზიები გაქრა, მაგრამ დარჩა სურვილი, ცხოვრებაში ერთხელ მაინც მენახა ზღვის სანაპირო, სადაც ჩემი ბავშვური ფანტაზიები დაფრინავდნენ...

მალაიზიის კუნძული ლანგკავი ყველაზე დიდია ანდამანის ზღვის მიდამოებში მდებარე 99 კუნძულს შორის. იგი შტატ Kედაჰ-ის ნაწილია და მისი მაქსიმალური მოცულობა 30 კმ-ია. დედაქალაქი და ყველაზე დიდი ქალაქია კუაჰი. 99 კუნძულიდან დასახლებულია
მხოლოდ ოთხი.

კუნძული პირველ რიგში იმათთვისაა მიმზიდველი, ვისაც ზღვა უყვარს. პლაჟები ძალზე სუფთა და მოვლილია. თუ აქტიური დასვენების მოყვარული ხართ, შოპინგიც გიყვართ და გემრიელად დანაყრებაც, არ მოიწყენთ. მართალია, ღამის ბარები და კლუბები არ არის, მაგრამ იმდენი რამე დაგხვდებათ სანახავი, ღამის გართობას დაგავიწყებთ: ნიანგების ფერმა, საბაგირო გზა, აკვარიუმი, აფრიკული ბიზონების ფერმა, არწივების პარკი, ხილისა და ყვავილების პლანტაციები, მუზეუმები, ბუდისტური ტაძრები... შეგიძლიათ დაათვალიეროთ ჩანჩქერები, გაისეირნოთ ჯუნგლებში ან წყლის სპორტის სხვადასხვა სახეობით გაერთოთ. კარგი იქნება, თუ ნავს იქირავებთ და დამოუკიდებლად, გიდთან ერთად ჩაატარებთ ექსკურსიას კუნძულის გარშემო.

საღამოს გატარება სასტუმროს რესტორნებსა და ბარებში შეიძლება. სურვილის მიხედვით ეზიარეთ ინდონეზიურ, ფრანგულ, ტაილანდურ, ინდურ სამზარეულოს.
არც საზოგადოებრივ ტრანსპორტს შეხვდებით აქ, მხოლოდ ტაქსის თუ გააჩერებთ. თუ არადა, მოტოციკლეტი უნდა დაიქირაოთ, ან მანქანა, ან ველოსიპედი. ფეხითაც შეგიძლიათ გაისეირნოთ.

თეთრქვიშიანი სუფთა პლაჟები გაჯერებულია მინერალებით, მათ შორის ბევრია მანგანუმი, რაც ჯანმრთელობისთვის საუკეთესოა და კურნავს რევმატიზმს, ოსტეოქონდროზს, ბრონქიტს...

კუნძული იმდენად პატარაა, რომ რამდენიმე სათში შეიძლება მანქანით შემოუაროთ.

ულამაზესია ''აღმოსავლეთი სოფელი'', რომელიც სპეციალურად ტურისტებისთვისაა აშენებული. სწორედ აქ იწყება საბაგირო გზა ჩინჩანგის მთისკენ. ბილეთებიც იქვე იყიდება. საბაგირო ნელა მოძრაობს, ამიტომ დეტალურად შეგიძლიათ გარემოს დათვალიერება, სანამ მთის წვერზე ახვალთ. გაითვალისწინეთ, რომ ამ გზით თქვენ 700 მეტრის სიმაღლეზე ადიხართ. თუ ძალზე მამაცი ხართ და სიმაღლის არ გეშინიათ, შეგიძლიათ სპეციალური კაბინა იქირაოთ გამჭვირვალე ძირით და მოგზაურობისას დაბლა ჩაიხედოთ. ამას ბევრი ვერ ბედავს, თანაც უფრო ძვირი სიამოვნებაა.

საოცრებაა, როცა ცაში ხარ გამოკიდებული და შენს თავზე არწივები დაფრინავენ. ისინი აქ უამრავია. მთის წვერზე ასულებს კი შეგიძლიათ არა მხოლოდ ლანგკავის, არამედ ტაილანდსაც გადახედოთ და თუ გაგიმართლათ, სუმატრუსაც დაინახავთ. გამართლებაში ვგულისხმობ ნისლს, რომელიც აქ ხშირია დღის ნებისმიერ მონაკვეთში და იგი მთელ ჰორიზონტს ფარავს. არ დაგავიწყდეთ თან თბილი სამოსის წაღება, რადგან ასეთ სიმაღლეზე ყოველთვის გრილა.

საოცარია საჰაერო ხიდიც, რომელსაც ცის ხიდს ეძახიან. მასზე გასეირნება ფეხით ერთი დიდი სიამოვნებაა. შეგიძლიათ შუშის კაბინას დაელოდოთ და მას გაჰყვეთ, მაგრამ იმხელა რიგებია ხოლმე, აჯობებს, ფეხით გაისეირნოთ. საჰაერო ხიდი გადებულია უფსკრულის თავზე და სწორედ ეს არის მისი მთავარი ღირსება. თუ მშვიდი ამინდია, ხიდი არ ქანაობს, მაგრამ ოდნავი ნიავიც რომ იყოს, იგი ისე ირწევა ჰაერში, თუ გულადი არ ხართ, შეიძლება შეგეშინდეთ, შეიძლება ქარმა ქუდიც კი მოგხადოთ და უფსკრულში გადაგიგდოთ, მაგრამ უსაფრთხოების ყველა ნორმა ისეა დაცული, საშიში მართლაც არაფერია.

თუ ფეხით გაისეირნებთ ხიდზე, დატკბებით ირგვლივ მიმოფანტული პატარა დეკორატიული, მაგრამ უძველესი კოშკების ხილვით, ლამაზი ყვავილებისა და ეგზოტიკური მცენარეების დათვალიერებით. შეგიძლიათ სურათებიც გადაიღოთ. ერთი სიტყვით, ერთი დღე უნდა დაუთმოთ ამ ატრაქციას, რათა მისგან ყველა სანახაობა "გამოწუროთ".

ლანგკავიში კარგი გზებია, ამიტომ ნებისმიერი ტრანსპორტით გადაადგილება კომფორტულია.

ზღაპრული ადგილია მანგროს ტყეები. თუ ექსკურსიას იქითკენ მოაწყობთ, თქვენ გელით: ღამურების გამოქვაბული, მანგროს ხეები, ნიანგების გამოქვაბული, თევზების ფერმა და არწივების ირაოს თვალის დევნება. მანგროს ტყეებში გასეირნება ნავის ქირაობით ხდება. დაუყვებით მდინარე კილიმს და ერთიმეორის მიყოლებით ყველაფერს დაათვალიერებთ. მენავე თვითონაა ექსკურსიამძღოლი, ყველაფერს აგისხნით და თავად მიგიყვანთ ყველა ღირსშესანიშნავ ადგილას.

ღამურების გამოქვაბული გაგაოგნებთ - ჭერზე, კედლებზე, იატაკზე ბეტმენებივით არიან მიწებებულნი. ფარნებს თავიდანვე დაგირიგებენ, რათა იქაურობა გაანათოთ. თქვენი გამოჩენა, რა თქმა უნდა, ღამურებს დისკომფორტს შეუქმნის და ისინი მაშინვე აფრინდებიან, თანაც შუქზე ხომ ვერაფერს ხედავენ და სასაცილო სანახავია, როგორ აწყდებიან აქეთ-იქით. უნდა იაროთ ფრთხილად, არ უნდა ილაპარაკოთ და იხმაუროთ, რათა მთელი ეს ''ფარა'' ბეტმენებისა არ გამოაღვიძოთ.
მერწმუნეთ, დაუვიწყარი სანახაობაა ამ მფრინავი თაგვებით სავსე გამოქვაბული!

მანგროს ტყეში უამრავი მაიმუნია. ისინი ნავით მოსეირნე ტურისტებს ისეთი თავხედი მზერით ათვალიერებენ, თითქოს ეუბნებიან, თუ მაგრები ხართ, ნაპირზე გადმოდით და მერე ჩვენ ვიცითო! საკმარისია, ნაპირს ხელის გაწვდენაზე მიუახლოვდეთ, რომ შეიძლება მაიმუნმა რამე გამოგტაცოთ ხელიდან. ერთ ტურისტს, მაგალითად, წყლით სავსე ბოთლი ისე აართვა, თვალის შესწრება ვერ მოვასწარით.

მერე მოდის თევზების ფერმა. არ ვიცი, ფერმა რატომ ჰქვია, მე, მაგალითად, თევზების ნაკრძალს უფრო დავარქმევდი, რადგან აქ ერთ ადგილას იმდენი თევზია თავმოყრილი, სხვაგან რომ ვერ ნახავთ. წვრილი თევზებიდან დაწყებული, წყლის ცხოველების უამრავი სახეობაა - კიბორჩხალა, კუ, ლოკოკინა, პირანიაც კი. რომელიც მოგეწონებათ, მისგან კერძს იქვე დაგიმზადებენ და გაგიმასპინძლდებიან.

არწივი ალბათ ბევრ ჩვენგანს არ ეყოლება ახლოს ნანახი, მით უფრო, მოწითალო-ყავისფერი შეფერილობის. ეს ფრინველი მალაიზიის სიმბოლოა. ისეთი ლამაზი და ვეებერთელაა ფრთებგაშლილი ეს ტყის მეფე, თვალს ვერ მოსწყვეტთ. პირდაპირ თქვენს თავზე დაფრინავენ, გეგონებათ, საკბილოს ეძებენ, რომ კლანჭები ჩაავლონ და გაიტაცონ. თუმცა მსგავსი არაფერი ხდება. მათ შეგიძლიათ ნაპირზე საკენკიც კი დაუყაროთ.

ნიანგების გამოქვაბულში ნიანგი არსად დაგვილანდავს, სამაგიეროდ, ისინი უამრავია ნიანგების ფერმაში. აქ ათასამდე ნიანგს მოუყრია თავი. სასიამოვნო სანახაობაა, როცა ხედავ, როგორ აპურებს ნიანგებს მათი მომვლელი. შენ დგახარ, შიშისგან გული გისკდება, არ ეცეს ამ ადამიანს და არ გადასანსლოსო, ის კი მშვიდად ურიგებს საჭმელს ნაპირზე გამოსულ ხუთ-ექვს ნიანგს.

ლანგკავიში ზემოთ ჩამოთვლილის გარდა უამრავი ღირსშესანიშნაობაა, თუ მათ დათვალიერებას მოასწრებთ. ჩანჩქერი ''შვიდი ჭა'' და მისი შემოგარენი. აქ შვიდი აუზია, რომლებიც ჭას მოგაგონებთ და ისინი კლდეებშია გამოკვეთილი. წყალი მათში ყინულივით ცივია და გასაგრილებლად ნამდვილი მისწრებაა. ჩარჩქერისკენ კი 638-საფეხურიანი კიბე მიემართება. სწორედ მის თავზე მდებარეობს ჭა-აუზები.

მთა ჰუნუნგ-რაია ყველაზე მაღალი მწვერვალია ლანგკავიში. მის წვერზე მდებარეობს კოშკი, რომლიდანაც კუნძულის საოცარი პეიზაჟი იშლება. აქვეა კაფე და სამვარსკვლავიანი სასტუმრო, თუ ღამის გათევას გადაწყვეტთ. იქვეა ნაციონალური პარკი ლაბოკ სემილანგი, რომელიც 3 კილომეტრზეა გადაჭიმული. მისი დათვალიერებისას თავს ნამდვილ ჯუნგლებში ამოყოფთ. გეძლევათ შანსი, დაათვალიეროთ 400-ზე მეტი მცენარის, 200-ზე მეტი ეგზოტიკური ფრინველის, მწერისა და მაიმუნის სახეობა.

ასევე საინტერესოა თემურუნისა დურიანის ჩანჩქერები. ისინი კუნძულის ჩრდილოეთით მდებარეობს. აქ 14 ჩანჩქერი ერთად გადმოსკდება მთებიდან. შემოგარენში კი უამრავ მაიმუნს ნახავთ, რომელთაც ქურდობა ეხერხებათ.

ლანგკავიში ვეფხვების მინი-ზოოპარკიც არსებობს, თუ მის სანახავად დროს გამონახავთ.

ორქიდეების ფერმა? თავი ზღაპარში გეგონებათ. აქ 200 სახეობის ორქიდეას ზრდიან. დამოუკიდებლად შეგიძლიათ მთლიანი პლანტაციის დათვალიერება.
არ გამოგრჩეთ ბიზონების ფერმაც, სადაც არა მხოლოდ სანახაობრივად ჰყავთ ბიზონები, არამედ უვლიან მათ, წველიან და რძისგან სხვადასხვა ნაწარმს ამზადებენ, მათ შორის ყველ მაცარელას. ფერმის ტერიტორიაზე მდებარე კაფეში ბიზონების რძით დამზადებული იოგურტი და ნაყინიც კი შეგიძლიათ დააგემოვნოთ.

ვისაც ასეთი თავგადასავლები არ იზიდავს და ინტელექტუალური დასვენება სურს, ესტუმროს პერდანას გალერეას, ანუ საჩუქრების მუზეუმს. აქ უამრავი საჩუქარია თავმოყრილი, რაც კი ოდესმე მალაიზიის მთავრობის რომელიმე წევრისთვის სხვა ქვეყნის ხელისუფალთ მიურთმევიათ.
არის ასევე ბრინჯის მუზეუმი, 3დ სურათების გალერეა, სასოფლო-სამეურნეო იარაღების მუზეუმი, ეთნოგრაფიული კომპლექსი მაჰსურის აკლდამით, რომელიც კუნძულის მცხოვრებთა ისტორიაზე მოგითხრობთ.

რაც შეეხება სასტუმროებს. გამოვყოფდი ლანგკავის 5-ვარსკვლავიან სასტუმრო თჰე ღიტზ-ჩარლტონ-ს, რომელსაც ანდამანის ზღვის ფონი გასდევს თან. ბრწყინვალე ნომრები, საოცარი სისუფთავე, კომფორტული მომსახურება და უგემრიელესი კერძები სასტუმროს რესტორანშივე - სხვა რაღა გვინდა მოყვარულ მოგზაურებს?
სასტუმრო არაჩვეულებრივი პროექტითაა აგებული, ჯუნგლების ასოციაცია შეგექმნებათ. ირგვლივ ხეებითაა შემოჯარული. ყველა ნომერი თანამედროვე ავეჯითა და ყველა საჭირო ნივთითაა გაწყობილი, სეიფიც კი დგას, სხვაზე რომ არ ვილაპარაკოთ.

სასტუმროს პლაჟი თეთრია და საოცრად სუფთაა, წყლის მოქცევაც იცის ხოლმე. ნაპირთან ბევრი მედუზა და წვრილი თევზია.

განსაკუთრებით საინტერესოა მზის ჩასვლა, თუ ამ დროს აუზთან ან რესტორნის ღია აივანზე მოხვდებით, ნებისმიერი ქართველი ალბათ ღიღინის ხასიათზე დადგება. თუ გაგიმართლათ, რესტორნის წინ, ბილიკებზე მორბენალ ვარანებსაც დანახავთ, მაიმუნებსაც, ციყვებსაც და უჩვეულო ჩიტებსაც.

ერთ-ერთი საუკეთესო სასტუმროა ''ანდამან რეზორტიც''. ფასები - ნორმალური, მომსახურება - იდეალური, ბუნება - არნახული, პლაჟი - უბრალოდ, ფანტასტიკაა, იმ განსხვავებით, რომ აქ წყლის ფსკერი ქვიანია და არა ქვიშიანი. სხვათა შორის, ლანგკავის ყველა პლაჟი, პრაქტიკულად, ასეთია. წყალი კრისტალივით გამჭვირვალეა. სასტუმროს სამი რესტორანი აქვს. ხორციანი კერძების არჩევანი მწირია, უფრო თევზეულობა ჭარბობს, სამაგიეროდ, უგემრიელესი სასმელები აქვთ, როგორც უალკოჰოლო, ასევე ალკოჰოლური.

ასე რომ, ჩაალაგეთ ბორბლებიანი ჩემოდნები და... წინ, ლანგკავისკენ!


სვეტა კვარაცხელია
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.