კონტენტმარკეტინგი მარკეტინგის აწმყო თუ მომავალი?

ტექნიკურმა პროგრესმა, თანამედროვე საკომუნიკაციო სისტემებმა მსოფლიო შეცვალა, სამყარო ნამდვილ კალეიდოსკოპად გადაიქცა, სადაც ელვის სისწრაფით ენაცვლება ერთმანეთს უამრავი ინფორმაცია. სპეციალისტები იკვლევენ, რას ირჩევ ან რა იქცევს შენს ყურადღებას, განსაკუთრებით მარკეტინგის სფეროში, სადაც მაღალი კონკურენცია და იდეების მუდმივი ცვლილებებია.

კონტენტმარკეტინგმა, რომელიც ახალი მიდგომაა ამ სფეროში, რეკლამის მიმართ ტრადიციული შეხედულებები ჩაანაცვლა, უფრო დამაჯერებელი და სანდო გახადა აუდიტორიასთან ურთიერთობა. გაცილებით რთული, ამავდროულად კრეატიული გახდა სარეკლამო ბაზარი - ორიგინალური იდეა, დამაჯერებელი მესიჯები და შემოქმედებითი მიდგომაა მთავარი.


სალომე მეცხვარიშვილი ჰოლდინგ "პალიტრა მედიაში" კონტენტმარკეტინგის მთავარი კონსულტანტია. ემსახურება

როგორც "პალიტრა მედიაში" შემავალ კომპანიებს, ასევე დამკვეთ ორგანიზაციებს. კონტენტმარკეტინგი ახალი სიტყვაა საქართველოში. ჰოლდინგში ორ წელზე მეტია, დაინერგა და წარმატებული და ეფექტიანი საქმიანობის შედეგად, არაერთი მსხვილი კომპანიის ნდობაც მოიპოვა.

სალომე ერთ-ერთი პირველი სპეციალისტია, რომელმაც სარეკლამო ბაზარზე ახალი იდეის დანერგვასა და მის განვითარებასთან ერთად კარგად შეისწავლა ეს სფერო და დღეს კონტენტმარკეტინგი "პალიტრა მედიის" ერთ-ერთი პრიორიტეტული მიმართულებაა. როგორც თავად აღნიშნავს, მის ყოველდღიურ ცხოვრებაში, ნებისმიერი ყოფითი დეტალიც ახალ-ახალი იდეების დაბადების წყაროა. შემოქმედებითი მიდგომა კი ამ საქმის მთავარი ხიბლია.

- სალომე, მარკეტინგის მიმართულებით დიდი გამოცდილება გაქვს. რა გზა გაიარე?
- ტელე-რადიოჟურნალისტიკის ფაკულტეტი მაქვს დამთავრებული. მე-4 კურსზე უნივერსიტეტში პირველმა არხმა კონკურსი ჩაატარა, სადაც გავიმარჯვე და პირველი არხის საინფორმაციო გამოშვებაში მოვხვდი. თავიდან დიდი ენთუზიაზმით დავიწყე მუშაობა, ეს ჩემთვის დიდი სტიმული და გამოცდილება იყო, თუმცა მუშაობის პროცესში მივხვდი, რომ საინფორმაციო ნიუსები ჩემი სფერო არ იყო, ამიტომ მოგვიანებით პიარის კურსი გავიარე და მაგისტრატურაც პიარისა და მარკეტინგის მიმართულებით დავამთავრე.

ჯერ ერთ-ერთ ფარმაცევტულ კომპანიაში დავიწყე საქმიანობა, შემდეგ "პალიტრა მედიაში" მოვხვდი, სადაც დღემდე ვმუშაობ. თავიდან რეკლამასა და პრომოუშენზე ვმუშაობდი. ორი წლის წინ დავნერგეთ კონტენტმარკეტინგი, რამაც ძალიან გამიტაცა. ამ სფეროს წარმომადგენლები ვხვდებით, რომ მკითხველს ერთი და იმავე სარეკლამო სტატიების კითხვა მოჰბეზრდა. ყველა კომპანია ჰპირდება მათ, რომ "სთავაზობენ უმაღლეს ხარისხს", "ზრუნავენ მომხმარებელზე"... მარკეტინგის სფეროში ასეთმა მიდგომამ ნდობა დაკარგა. კონტენტმარკეტინგი ქართული ბაზრისთვის ახალი გამოწვევაა.

 

მიმაჩნია, რომ ჩვენ მხარი უნდა აგვება მსოფლიოს ამ ტენდენციისთვის, რადგან გვაქვს დიდი რესურსი, სხვადასხვა აუდიტორიაზე მორგებული, ყველაზე რეიტინგული პრინტ თუ ინტერნეტგამოცემები, რადიო, ტელევიზია, ანუ ვფლობთ ყველა იმ პლატფორმას, რომელიც მნიშვნელოვანია სამიზნე აუდიტორიისთვის საჭირო კონტენტის მისაწოდებლად.

ამას გარდა, ჩვენთან კონტენტს ქმნის გამოცდილი ჟურნალისტების, რედაქტორებისა და პიარსპეციალისტებისგან შემდგარი გუნდი. შესაბამისად, იქმნება ზუსტად განსაზღვრული აუდიტორიისთვის საინტერესო და სასარგებლო კონტენტი. სწორედ ამიტომ, დიდი შეცდომა იქნებოდა, არ გამოგვეყენებინა ეს რესურსი და თანამედროვე მარკეტინგის მიღწევები არ გაგვეთვალისწინებინა. მარკეტინგის სფეროში მსოფლიოში წამყვანი ადგილი სწორედ კონტენტმიმართულებამ დაიკავა, რაც გულისხმობს, რომ უნდა შევქმნათ ღირებული ინფორმაცია, რაც მკითხველს აინტერესებს და ამ ინფორმაციის ქვეშ მოვახდინოთ დამკვეთი კომპანიის ინტეგრირება.

- რა სირთულეებს წააწყდი კონტენტმარკეტინგის დანერგვის პროცესში?
- ქართულ ბაზარზე კონტენტმარკეტინგის დანერგვისას ყველაზე დიდი დრო და რესურსი კომპანიების დაინტერესებაზე დაგვეხარჯა. მათთვის უნდა აგვეხსნა კონტენტმარკეტინგის უპირატესობა, ამასთან, მათთვის დამაჯერებელად. ჩვენმა მონდომებამ შედეგი გამოიღო და დღეს მარკეტინგის ამ მიმართულების უპირატესობაზე ყველა საუბრობს.

ამ გზაზე დაგვეხმარა `პალიტრა მედიის~ მიმართ მაღალი ნდობა. დამკვეთებიც მოგვყვებიან, რადგან ჰოლდინგში ყოველთვის ღირებული და სანდო პროდუქტი იქმნება. კონტენტმარკეტინგის დანერგვა არ გულისხმობს რეკლამის მიმართ ტრადიციულ მიდგომაზე უარის თქმას. აქ კომპლექსურობაზეა ლაპარაკი, რომელიც ყველა სფეროში ერთმანეთს ავსებს. ჩვენი პრაქტიკიდან გამომდინარე, ასეთი მიდგომა გაცილებით ნაყოფიერია.

- მსოფლიო ბაზრის სიახლეებს თუ ეცნობი. ქართული კომპანიები ცდილობენ, არ ჩამორჩნენ ახალ ტენდენციებს.
- მუდმივად მსოფლიო ბაზარზე დანერგილი სიახლეების საქმის კურსში ვარ. ვეცნობი ახალ-ახალ ქეისებს. ყოველთვის ვცდილობ სიახლეების შემოტანასა და დანერგვას, ვსწავლობ ქართულ ბაზარს, რადგან სიახლის პირდაპირ გადმოტანა და დანერგვა არაეფექტური იქნება. მთავარია, რომ ამ საქმიანობას შემოქმედებითად ვუდგები.

- ვიცი, რომ ბლოგზეც მუშაობ, სადაც წარმატებით შეაჯერე ჟურნალისტისა და მარკეტინგის სპეციალისტის საქმიანობა. რა თემებით იქცევ მკითხველის ყურადღებას?
- ჟურნალისტური გამოცდილება მეხმარება, სხვა რაკურსით შევაფასო მოვლენები. მომწონს ბლოგზე მუშაობა. ძირითადად კონტენტმარკეტინგის თავისებურებებს განვიხილავ. ვცდილობ, ამ ყველაფერს მშრალი ინფორმაციის სახე არ ჰქონდეს. ჩემი ყოველდღიური შთაბეჭდილებებიდან გამომდინარე ვეხები ამ თემას, ყველაფრიდან ვცდილობ დასკვნების გამოტანას, ვეძებ ახალ-ახალ იდეებსა და ინსპირაციის წყაროს. ბავშვებთან ურთიერთობამაც შეიძლება ახალი იდეა დაბადოს. ჩემი ცხოვრება შთაბეჭდილებებითაა გაჯერებული, რაც საქმიანობაშიც მეხმარება.

 

სალომე მეცხვარიშვილის ბლოგი კონტენტ მარკეტინგზე: https://contentmarketingroom.wordpress.com/

ქეთი დარჩია

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.