ბიჭოლას ISABEL GARCIA, ჩინური დღეები და ბრაზილიური შვებულება

თითქმის აღარ ურთიერთობს ქართულ პრესასთან, ამიტომ დიზაინერ ბიჭოლა თეთრაძის წარმატებული კარიერა იშვიათად შუქდება საინფორმაციო საშუალებებით.

ჩვენი საუბარი იმ კონტრაქტს ეხება, რომელიც მან ცნობილ იტალიურ ბრენდთან ISABEL GARCIA გააფორმა. ბიჭოლას ამ

მარკის კრეატიული დირექტორობა შესთავაზეს.


ISABEL GARCIA 2009 წელს დაარსდა. ბრენდის ძირითადი ოფისი ბოლონიაშია. ბრენდი სხვადასხვა ხაზს აწარმოებს, მათ შორის, სამოსსა და აქსესუარებს, მონაწილეობს ლონდონისა და მილანის მოდის კვირეულებზე. მსოფლიოს სხვადასხვა ქვეყანაში 42 მაღაზიის მფლობელია. ბრენდის სამოსის აქტიური მომხმარებლები არიან ცნობილი ვარსკვლავები, სარა-ჯეინ კროუფორდი და ლუსი უოტსონი.


- დიდი ხანია, რაც სამუშაოდ კიევში გადახვედით. ახლა უკვე იტალიურ ბრენდთან თანამშრომლობთ. ამჯერად სად ცხოვრობთ, სად დაბინავდით?
- ძირითადად ჩინეთსა და უკრაინას შორის ვმოძრაობ. იმის გამო, რომ იტალიურ ბრენდთან ISABEL GARCIA გავაფორმე კონტრაქტი და მისი კრეატიული დირექტორი ვარ, ბევრი მოგზაურობა მიწევს. მთელ მსოფლიოში ამ ბრენდს წარმოვადგენ. მსოფლიოს მასშტაბით 42 მაღაზია აქვს. შესაბამისად, სხვადასხვა ქვეყანაში საქმიანი ვიზიტით ჩავდივარ. ჩემი მუშაობის პროცესის გასაჯაროებისგან თავს ვიკავებ, ამიტომ საზოგადოებას ექმნება წარმოდგენა, რომ მხოლოდ ვმოგზაურობ. ვერც გიპასუხებ საცხოვრებელი ადგილის შესახებ, რადგან ბევრგანაა, ძირითადად მაინც ჩინეთში, თუმცა ძალიან შეზღუდულია ჩემი დღის განაწესი. ძირითად დროს საქმეს ვუთმობ, საღამოს სახლში ვატარებ. ქუჩაში იშვითად დავდივარ. დადებითი მხარეებიც აქვს ამ ყველაფერს, ვცდილობ ჯანსაღად ვიკვებო და სპორტით ვიყო დაკავებული.


- იშვიათად ურთიერთობთ ქართველ ჟურნალისტებთან, ამიტომ უკრაინულ პერიოდზე ცოტა რამ ვიცით - იმის შესახებ, რომ ამ ქვეყანაში თქვენს კოლექციებს დიდი აღიარება აქვს. ის პერიოდი რით აღმოჩნდა თქვენთვის საინტერესო?
- იშვიათად კი არა, საერთოდ არ მა¬ქვს ურთიერთობა ქართველ ჟურნალისტებთან. ბევრს ვშრომობდი, რომ მიზნისთვის მიმეღწია... რატომღაც ჰგონიათ, რომ წარმატება ჰაერიდან მოდის. სფეროს არ აქვს მნიშვნელობა, თუკი წარმატების მიღწევა გსურს, თავდაუზოგავად უნდა იშრომო.
უკრაინაში, როგორც კი საკუთარი ბრენდის შექმნა დავიწყე, დიდი პოპულარობა მოვიპოვე. განსაკუთრებით დასამახსოვრებელი იყო კოლექცია, რომელიც ჩიტების თემას მივუძღვენი. ბევრმა ცნობილმა ქალბატონმა მოირგო კაბები ამ კოლექციიდან, მათ შორის იყო ქეთა თოფურია. ქეთასთან დღემდე ვმეგობრობ. სწორედ ეს კოლექცია ნახეს ISABEL GARCIA-ს წარმომადგენლებმა და კონტრაქტი შემომთავაზეს. გადაწყვეტილების მიღება გამიჭირდა. იმ ფაქტორმაც იქონია გავლენა, რომ უკრაინაში პოლიტიკური მდგომარეობა დაიძაბა და ყველა სფეროს შეეხო. კონტრაქტი ჩემთვის საინტერესო პირობებს მთავაზობდა, ეს გახლდათ 3 წლის წინ. ბათუმში დაბადების დღე გადავიხადე და მალევე შევუდექი საქმიანობას. ჩინეთში ცხოვრებამ შემცვალა, დავმშვიდდი. ნებისმიერ გადაწყვეტილებას ვაანალიზებ, ვცდილობ, ნაკლები შეცდომა დავუშვა არა მარტო საქმიანობაში, არამედ პირად ცხოვრებაშიც.


- პირადი ცხოვრება გავლენას ახდენს თქვენს საქმიანობაზე?
- ზოგადად ცხოვრება ახდენს ჩვენზე გავლენას, ზრდის ადამიანს. ცდილობ, შეცდომები არ გაიმეორო. ამას წიგნით თუ მონაყოლით ვერ ისწავლი, თუ გამოცდილებამ არ მოიტანა.


- თქვენ საქმიანობდით საქართველოში, უკრაინაში, ახლა კი ჩინეთში რა განსხვავებას ხედავთ საქმის მიმართ დამოკიდებულებაში ამ ქვეყნებს შორის?
- სადაც უნდა იყო, შრომა არ უნდა გეზარებოდეს, ეს პრინციპი საერთოა ყველა ქვეყნისთვის. ISABEL GARCIA არ უკავშირდება ჩემს ჩინეთში ცხოვრებას. ევროპული ბრენდია, კერძოდ იტალიური. წარმოება ჩინეთში აქვს. ვაკონტროლებ წარმოების პროცესს - ტყავის ნაწარმის დამუშავებას, ფეხსაცმელს თუ სამოსს.


- ბრენდ ISABEL GARCIA-ს შესახებ მოგვიყევით, რა სტილის სამოსს უშვებს და რა ცვლილება შეიტანეთ მის ძირითად კონცეფციაში?
- ბრენდი შეიქმნა იტალიაში, კერძოდ, ბოლონიაში. ებრაელი და იტალიელი დამფუძნებლები ჰყავს. იტალიაში ძირითადად ტყავის და ნაქსოვ პროდუქციას აწარმოებენ, ხოლო ტექსტილის სამოსს, - ჩინეთში. ამიტომ, ძირითადად მაინც ჩინეთში მიხდება მუშაობა, რადგან კოლექციის მთავარი და ძირითადი ნაწილი იქ იკერება. დიზაინის სტუდიასაც და ფაბრიკაში წარმოებასაც თავად ვაკონტროლებ. ბრენდის ნაწარმის რეალიზება მთელ მსოფლიოში ხდება, მათ შორის, პოსტსაბჭოთა ქვეყნებშიც. ISABEL GARCIA-ს სამოსი ნიუ-იორკის შოურუმებშიცაა წარმოდგენილი. მისი წარმოება დღითი დღე იზრდება და ფართოვდება. ჩვენ არ წარმოვადგენთ ე.წ. ლაქშერის სეგმენტს. ბრენდის ძირითადი მიმართულებაა პრემიუმ მას-მარკეტი.

საშუალო ფენისთვის ჩვენი ნაწარმი ხელმისაწვდომია. ბრენდის ძირითად კონცეფციაში შევიტანე ჩემი ხელწერა. არ ვღალატობ ძირითად ხაზს, რომ სამოსი უნდა იყოს ქალური და დახვეწილი, ამასთან სექსუალური ელემენტით. ბოლო პერიოდში მოდის სტერეოტიპები ინგრევა, მოდაში შემოვიდა სპორტული სტილის კომბინაცია კლასიკურთან, უფორმო სამოსი. მე მაქვს ჩემი მიმართულება, რომელსაც არ გადავუხვევ. ვფიქრობ, ამანაც მომიტანა წარმატება, რადგან ქალურობის ერთგული დავრჩი. კიევმა მომცა ის, რომ ძალიან კარგად ჩავწვდი სლავი ქალბატონების სურვილებს.

 

კლასიკურმა, დახვეწილმა, რაღაც დეტალებით სექსუალურმა კოსტიუმებმა უკრაინაშიც მომიტანა წარმატება. ამასობაში გავიზარდე. საქართველოში პოდიუმზე თუ გამომქონდა 20 ლუქი, ახლა 180-დან 250 ლუქამდე ავედი. ეს ძალიან ბევრია. რასაკვირველია, მყავს ასისტენტები, დამხმარეები და კოლეგების მთელი გუნდი. გუნდს მე ვმართავ და ყველა კაბა, თითოეული ლუქი ჩემი შექმნილია. შეიძლება პრინტზე სხვა მუშაობს, მაგრამ დასაპრინტად გამზადებული ვიზუალური მასალა ჩემი შექმნილია. მომწონს, რომ მაქვს საშუალება, ამ ბრენდის სამოსი `შევფუთო~ საქართველოში და ამ საქმეში ჩემი მეგობარი, ფოტოგრაფი გრეგორი დევეჯიევი მეხმარება.


- თქვენი კოლექციის ფოტოსესიების გადაღებას ძირითადად ჯიჯის ანდობთ?
- სხვა ფოტოგრაფებთანაც წარმატებით მითანამშრომლია, მაგრამ ჯიჯის ძალიან კარგად ვუგებ. კარგი ტანდემი გვაქვს. ამასთან, მირჩევნია, მეგობართან ერთად დავგეგმო გადაღება, ვის ტალანტშიც ეჭვი არ მეპარება. მომწონს ისიც, რომ ჯიჯიც და მოდელებიც საქართველოს წარმოადგენენ.


- საერთაშორისო ბრენდთან თანამშრომლობამ ალბათ უკეთ გაგარკვიათ ბაზრის ნიუანსებში. მისი გათვალისწინებით კორექცია შეიტანეთ თქვენს სტილში?
- სათათბირო მაგიდასთან სამხატვრო საბჭოს 20 წარმომადგენელი მიზის, მათ შორისაა სეილმენეჯერი, პროექტმენეჯერი, გაყიდვების მენეჯერი, ბრენდმენეჯერი, ხარისხის კონტროლზე პასუხისმგებელი პირი და ა.შ. ყოველი მათგანი წარმოების გაზრდაში თითო აგურს დებს. კაბა წარმოებაში არ ჩაეშვება, თუ თითოეულმა თანხმობა არ მოგცა. ეს ნიშნავს, რომ კაბა წარმოებაში უნდა ჩაეშვას ყველა იმ სირთულის გათვალისწინებით, რომელსაც პრობლემატური ადგილები ქმნის.

 

მაგალითად, კაბა, რომელსაც ღრმა დეკოლტე არ აქვს, აზიელებისთვისაა გათვალისწინებული. დახურულ კაბას შესაბამისი ქსოვილი სჭირდება და ბევრი წინააღმდეგობის დაძლევა გვიხდება. სამაგრები როგორი უნდა იყოს, ამასაც ვითვალისწინებთ. ამ ყველაფერთან ერთად, ძირითადი კოლექცია პატარ-პატარა კაფსულა-კოლექციებად იშლება. ერთ-ერთია ასაკობრივი კაფსულა, რომელიც სხვადასხვა ასაკის ადამიანებისთვისაა გათვალისწინებული. საკმაოდ სპეციფიკური სფეროა, რომლის დეტალებზე საუბარი შორს წაგვიყვანს. თუ დიდი წარმოება არ გაქვს, ასეთი ნიუანსების გათვალისწინება არ გიხდება. კონსტრუქტორებმა, ტექნოლოგებმა, მენეჯერების მთელმა გუნდმა პროფესიონალად ჩამომაყალიბა. ვთვლი, რომ ამ ბრენდთან თანამშრომლობით დიდი გამოცდილება შევიძინე და ყველა თანამშრომლის მადლობელი ვარ. ახლა ზუსტად ვიცი, როგორ უნდა ვიმუშაო, ეს ეხება კონსტრუქციას თუ ქსოვილის შერჩევას. ვიცი, რა შეიძლება სეზონის ჰიტად იქცეს.


- მას-წარმოებაში თავს კომფორტულად გრძნობთ? ბიჭოლას სახელი მაინც თამამ ექსპერიმენტებს უკავშირდებოდა.
- ბევრ იდეაზე შეიძლება უარსაც ვამბობ, მაგრამ ეს ჩემი საქმეა. ადამიანები ცხოვრების გარკვეულ ეტაპზე დათმობებზე მივდივართ. ვიცი, რასაც ვაკეთებ და მომწონს. მიხარია, რომ ამ საქმის პროფესიონალი გავხდი. ბოლოს და ბოლოს, შემიძლია შინ მივიდე, გიჟური იდეების ჩანახატები გავაკეთო და ამით მივიღო სიამოვნება.


- ISABEL GARCIA-ს კოლექციებში თუ არის თქვენი ფავორიტი კოლექცია?
- არის და სწორედ ამ კოლექციას წარმოვადგენ ჟურნალ ”ბომონდში”. რომც მკითხოთ კოლექციის ისტორიის შესახებ, ვერ მოგიყვებით, იმდენი ნიუანსისგან შედგება. ერთ ხაზში 12 სხვადასხვა კოლექციაა გაერთიანებული. შემიძლია, გითხრათ ზოგადი კონცეფციის შესახებ. მთავარი იდეა იყო, რომ არ მეღალატა ჩემი სტილისთვის და რაც შეიძლება ქალური, დახვეწილი და სექსუალური სამოსი შემექმნა. ეს კოლექცია ბევრ კაფსულად იყოფა. ერთ-ერთს ”ფლამინგო” ჰქვია, ერთ-ერთია ”ანგელოზების ქალაქი”, რომელიც თეთრ ფერშია გადაწყვეტილი. თემებად იმიტომ იყოფა ეს კოლექცია, რომ რაც შეიძლება ბევრი მომხმარებელი მიიზიდოს. ხავერდთან ერთად ჰაეროვან ქსოვილებსაც შეხვდებით, ანუ სხვადასხვა ასაკისა და გემოვნების ქალბატონებისთვისაა გათვალისწინებული.


- თქვენი წარმატება რამ განსაზღვრა?
- რთული შეკითხვაა. შრომისმოყვარეობამ, პრიორიტეტების განსაზღვრამ, ანუ რა არის მთავარი და ყველაზე მთავარი, საკუთარი შესაძლებლობებისა და სიკეთის რწმენამ. როცა გშურს, როცა ვიღაცის ცხოვრებაში იჭრები, აუცილებლად დაგიბრუნდება. თავად არასდროს ჩავრეულვარ ვინმეს ცხოვრებაში და არც აუგად მომიხსენებია ვინმე. ენერგიას მხოლოდ ჩემს საქმეს, ოჯახს და მეგობრებს ვუნაწილებ. ვერც იმას ვიტყვი, რომ ფანტასტიკურ წარმატებას მივაღწიე. ყველაფერი მაინც წინ მაქვს.


- აღნიშნეთ, რომ ქართველ ჟურნალისტებთან არ ურთიერთობთ, ამის მიზეზი გაქვთ?
- არ იფიქროთ, რომ ნაწყენი ვარ, უბრალოდ, ძალიან დაკავებული ვარ. ქართველ ჟურნალისტებს ჩემი კოლექციები დიდად არ აინტერესებთ. იმ თემებზე საუბარი კი, რაც მათ აინტერესებთ, არ შემიძლია. ზედმეტი პოპულარობაც შემაწუხებელი აღმოჩნდა, მიუხედავად იმისა, რომ თავის დროზე მომწონდა. მაშინ პატარა ვიყავი და, ვფიქრობ, ზედმეტი მომივიდა. დრო გავიდა, მაგრამ ჩემ მიმართ ინტერესი არ განელებულა. უკრაინიდან პირველად 5 წლის შემდეგ დავბრუნდი. მეგონა, აქ არავის ვემახსოვრებოდი, მაგრამ შევცდი.


- როგორია თქვენი გეგმები, ითანამშრომლებთ ამ ბრენდთან თუ საკუთარს მეტ დროს დაუთმობთ. სად წარმოგიდგენიათ საკუთარი თავი?
- არაფერს ვგეგმავ. არც არასდროს დამიგეგმავს. ახლა მთელ შემოქმედებით მუხტს იზაბელ გარსიაში ვდებ. შემდგომი 6 თვე დაგეგმილი მაქვს. იმდენად დაკავებული ვარ, ამაზე ფიქრის დროც არ მაქვს.


- ბიჭოლა, ახლა ბრაზილიაში იმყოფებით, - ეს საქმიანი ვიზიტია თუ შვებულება?
- ბრაზილიაში დასასვენებლად ჩამოვედი. შარშან კარნავალზე ვიყავი და ძალიან მომეწონა. აქ მეგობრებიც მყავს. ზოგიერთი საცხოვრებლად საფრანგეთიდან და ბრიტანეთიდან გადმოვიდა. აქ მოვინახულე მსოფლიოში ერთ-ერთი უდიდესი ჩანჩქერი იგუასუ. ვერასდროს წარმოვიდგენდი, თუ ამდენს ვიმოგზაურებდი და ასეთ შთაბეჭდილებებს მივიღებდი. ძალიან ბევრი ქვეყანა მოვიარე, ახლა 33 ქვეყნის 68-ე ქალაქში ვიმყოფები. ყოველი ქვეყანა რაღაცით გამორჩეულია. ძალიან დიდი შთაბეჭდილება დატოვა კამბოჯამ. აფრიკას და აზიას თავისი ხიბლი აქვს, ასევე ლათინურ ამერიკას. ბრაზილიაში კარგად ვგრძნობ თავს, ყოველ წელს ერთი კვირით მაინც ჩამოვალ.


- კლუბებში ისევ ერთობით?
- რამდენადაც გასაკვირი უნდა იყოს, არა. ჩემი უკრაინელი მეგობრებიც გაკვირვებულები არიან. ჩემი დასვენებაც და გართობაც საღამოს, სასიამოვნო გარემოში კარგი ვახშამია. ვცდილობ, ჯანსაღი ცხოვრების წესი მქონდეს. იმიტომ არა, რომ იმიჯი შევიქმნა, ასე მსიამოვნებს. დიდ კომპანიასთან თანამშრომლობამ პასუხისმგებლობის გრძნობა გამიმძაფრა. სადაც უნდა ვიყო, აუცილებლად ხაზზე ვარ, სულ თანამშრომლებთან მაქვს კომუნიკაცია. როგორც უკვე აღვნიშნე, ძალიან ბევრს ვმუშაობ, მინდა მეტი გავაკეთო და მიზანს მივაღწიო.


ქეთი დარჩია

ჟურნალი ”ბომონდი”

მარტის ნომერი

 

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.