სებასტიან ერასის ორიგინალური ნაკვალევი - ბიჭი, რომელიც მსოფლიოს ყველაზე ეგზოტიკურ იატაკებზე ”ნადირობს”

Orange Live-მა ცოტა ხნის წინ მოკლე დოკუმენტური გამოაქვეყნა ძალიან საინტერესო ბიჭის შესახებ, სახელწოდებით: "ერთი ტიპი, ერთი ქალაქი, ერთი პერსპექტივა".

 

ფილმი ახალგაზრდა ფოტოგრაფის შესახებ გვიამბობს, რომელიც ყოველდღე სახლიდან იატაკებზე სანადიროდ გადის - მისი ინტერესის სფერო სხვადასხვა ქალაქის მოზაიკური იატაკებია. პირველ წარმატებულ პროექტს "პარიზული იატაკები" ერქვა, დღეს კი სებასტიანის ნაფეხურებს უკვე სხვადასხვა ქალაქში მიჰყვებიან: მისი პორტფოლიო მოიცავს პროექტებს - "ლონდონის იატაკების", "ბარსელონას იატაკების" და "პარიზის იატაკების" შესახებ; ინტერიერის და მაღაზიის ორიგინალური შესასვლელების ფოტოებთან ერთად. ფოტოები დიდი ხანია, რაც სოციალური ქსელის ფარგლებს გასც

და და ELLE Decor-თან ერთად, სხვადასხვა საერთაშორისო გამოცემაში ქვეყნდება.


- სებასტიან ერასი გერმანელი ფოტოგრაფია, რომელმაც პოპულარობა ორიგინალური პროექტით - "პარიზული იატაკებით" მოიპოვა. დღეს მის Instagram-ის გვერდს - Parisianfloor-ს 130 000 მიმდევარი ჰყავს.

- ფოტოგრაფის კარიერა ბუნების ელემენტების გადაღებით დაიწყო, დღეს კი მისი ნამუშევრების სტილი არავის არ ჰგავს: ფოტოებზე იატაკის დეკორატიული ელემენტები - მოზაიკით მიღებული სხვადასხვა ფაქტურა და უნაკლოდ გაპრიალებული ფეხსაცმელები ჩანს, რომლებიც ფერებით იდეალურად შეხამებულია იატაკთან. სებასტიანი ნამუშევრებს Instagram-ის გვერდზე აქვეყნებს და იმ ლოკაციების მისამართებსაც უთითებს, სადაც ესა თუ ის იატაკი აღმოაჩინა: თუ ევროპაში მოხვდებით, თამამად შეგიძლიათ მის ნაფეხურებს გაჰყვეთ და ორიგინალური ფოტოები თავადაც გადაიღოთ. 

ყველაფერი მაროკოში დაიწყო, როდესაც იქაური მოზაიკით მოიხიბლა. სანახაობამ ხელოვანზე იმდენად დიდი გავლენა მოახდინა, რომ ყველგან მოზაიკის იატაკებზე დაკვირვება დაიწყო და საინტერესო აღმოჩენების გაკეთება პარიზში დაბრუნების შემდეგაც გააგრძელა.


- თქვენი ბიოგრაფიის მოძიებისას ამოვიკითხე, რომ სანამ ბუნების ელემენტების გადაღებას დაიწყებდით, განათლება ბიზნესის მიმართულებით მიიღეთ. პირველად როდის აღმოაჩინეთ ხელოვნება და რა ფორმით?


- სამხრეთ გერმანიაში გავიზარდე. გარდატეხის წლებში ექსტრემალური სპორტის სახეობებით ვიყავი გატაცებული - სკეიტბორდით და სნოუბორდით. თანაც, ამ თავგადასავლებს მეგობრებთან ერთად კამერით ვიღებდი ხოლმე. სწორედ ამ პერიოდში დავიწყე საკუთარ თავში შემოქმედებითი მხარეების აღმოჩენა.


ერთხელ მთელი ოჯახი კენიაში წავედით საფარიზე. აფრიკის ულამაზესმა ბვუნებამ და ცხოველებმა უდიდესი შთაგონება მომცეს და სწორედ იქ გადავწყვიტე, საკუთარი გამოცდილებებით დაგროვილი ემოციები ფოტოებზე აღმებეჭდა. ევროპაში დაბრუნების შემდეგ, ისევ ბუნების ელემენტებზე ფოკუსირებულმა, ფრინველების და ველური ორქიდეების გადაღება დავიწყე. მას შემდეგ კი, რაც პარიზში გადავედი, ჩემი ფოტოგრაფიული ინტერესის სფერო შეიცვალა - ინტერიერის და არქიტექტურის გადაღებამ გამიტაცა. მივხვდი, რომ ფოტოგრაფია ჩემთვის მხოლოდ ჰობი აღარ იყო: პარიზში ჩასულმა მივიღე გადაწყვეტილება, საკუთარ ვნებას მივყოლოდი და "სრულგანაკვეთიანი" ფოტოგრაფი გავმხდარიყავი.


- როგორ დაავიწროვეთ ინტერესის სფერო არქიტექტურის და ინტერიერის გადაღებისას 2 საგნამდე - როგორ ფოკუსირდით ფეხსაცმელსა და იატაკზე? რამ მიიქცია თქვენი ყურადღება მაროკოში იმ მომენტში, როდესაც პროექტ Parisianfloors-ის იდეა დაიბადა?


- იატაკების ფოტოებზე აღბეჭდვის იდეა მარაკეშში მოგზაურობის შემდეგ გამიჩნდა, მას შემდეგ, რაც ბაჰიას სასახლე მოვინახულე. იქ რამდენიმე ულამაზესი მოზაიკის იატაკია და მათი თვალიერებისას უნებურად გადაღება დავიწყე. ზოგადად, სასახლის იატაკის ფერების შეხამება და დიზაინი იმდენად დახვეწილი იყო, წარმოუდგენელია, ყურადღება არ მიგექცია. ფოტოებში ჩემი ფეხსაცმელებიც გამოვაჩინე, ყველასთვის გასაგები რომ ყოფილიყო, რას ვიღებდი. პარიზში უამრავ პროექტზე მიწევს მუშაობა, რომელთა ფარგლებშიც ინტერიერის დიზაინს ვიღებ, მარაკეშის მოგზაურობიდან დაბრუნებულმა კი სადარბაზოების, რესტორნების, გალერეების და კაფეების შესასვლელების სწორედ სხვადასხვა ფერში გადაწყვეტილ მოზაიკურ იატაკებზე დაკვირვება დავიწყე.


ამ დაკვირვებების შედეგად, 2015 წლის მაისში პროექტ Parisianfloor-ის იდეაც დამებადა: თავიდან ინტერესის მთავარი სფერო ფეხსაცმელები არ ყოფილა, გამოსახულების უმნიშვნელოვანეს ელემენტს ჩემთვის უშუალოდ იატაკი წარმოადგენდა, თუმცა დროთა განმავლობაში Instagram-ში გამოქვეყნებულ ნამუშევრებზე კომენტარები ჩემი ფეხსაცმელების მიმართაც წამოვიდა და გავიაზრე, რომ ჩემს ფოტოებში ფეხსაცმელი ერთადერთი პერსონალური ელემენტი იყო, რომლებიც ადამიანებს ჩემ შესახებ უამბობდა და ერთგვარად მე წარმომადგენდა. მას შემდეგ, ფოტოებისთვის დაკვირვებით დავიწყე ფეხსაცმელების შერჩევა. ჩემი სურვილია, ფოტოები უფრო მაღალ შემოქმედებით საფეხურზე ავიყვანო - ფერებით იატაკის ფერს და ფაქტურას შევუხამო. ესაა ჩემი ახალი გამოწვევა.


- რა პრინციპით არჩევ ფეხსაცმელებს, რომლებიც შენს ფოტოებში ხვდება?


- მთავარია, ადამიანებმა მათი ნახვისას ესთეტიკური სიამოვნება მიიღონ. ამიტომაც განსაკუთრებული ფერი ან პრინტი უნდა ჰქონდეს და იატაკსაც იდეალურად მიესადაგებოდეს. უპირატესობას კლასიკური სტილის, ტყავის ფეხსაცმელებს ვანიჭებ, სპორტული ფეხსაცმელი იშვიათად მაცვია, თუმცა ერთხელ იდეალურ ვარიანტს მივაგენი, რომელიც მოცემულ იატაკს ძალიან მოუხდა.


- ზოგადად, ხელოვნების ან ბუნების რა ფორმები გაინტერესებს იატაკების გარდა?


- მე სიმეტრიის, გრაფიკის და დიზაინის დიდი თაყვანისმცემელი ვარ, როდესაც ახალ გარემოში მოხვედრისას ამ ელემენტებს აღმოვაჩენ ხოლმე, გზად აუცილებლად ფოტოებს ვუღებ. უდიდეს შთაგონებას მანიჭებს ასევე თანამედროვე ხელოვნება - მიყვარს პარიზის მუზეუმებში ბოდიალი და ახალი ემოციებით დამუხტვა.


- თქვენი პროექტი Parisianfloors-ი მთელ მსოფლიოში საკმაოდ პოპულარული გახდა. სოციალურ მედიაში უამრავი მიმდევარი გყავთ. ხომ არ ყოფილა ფეხსაცმლის რომელიმე ბრენდის მხრიდან კოლაბორაციის შემოთავაზება? დათანხმდებით მსგავს წინადადებას?


- დიახ, ამ ეტაპზე უკვე ვმუშაობ ფეხსაცმლის რამდენიმე ბრენდთან: როგორც უკვე აღვნიშნე, ჩემი იდეა ვი-ზუალების უფრო დახვეწა - ფეხსაცმლის და იატაკის ფერის შეხამებაა, ეს კი მოითხოვს, სხვადასხვა სტილის და ფერის ბევრი წყვილი მქონდეს. ამის გამო, თავის დროზე ისეთი ბრენდების მოძიება დავიწყე, რომლებსაც მრავალფეროვანი არჩევანი აქვთ და შევთავაზე, ჩემთან მუშაობით ხომ არ დაინტერესდებით-მეთქი.


ახლა უკვე თითქმის ყოველკვირეულად ახალი შეთავაზება მომდის სხვადასხვა მოდის სახლისგან, მაგრამ მათ ძალიან დიდი სიფრთხილით განვიხილავ: აუცილებელი პირობაა, ფეხსაცმელი პროექტის ფორმატიდან ამოვარდნილი არ იყოს.


- Orange Live-ის მოკლე დოკუმენტურ ფილმში ამბობთ: "Instagram-ი საშუალებას მაძლევს, ჩემი ნამუშევრები მთელ მსოფლიოს წარვუდგინო - თითქოს ჯიბეში საკუთარი გალერეა მაქვს". Instagram-ის შესახებ ფოტოგრაფების მოსაზრებები რადიკალურად განსხვავებულია: ზოგიერთი მათგანი აღნიშნავს, რომ მან ფოტოგრაფია მოკლა, ზოგი კი პირიქით - ამბობს, რომ მისი დამსახურებით ფოტოგრაფიაში სრულიად ახალი ეპოქა დაიწყო. რას ნიშნავს თქვენთვის სოციალური მედიის პლატფორმა და რა მხრივ დაგეხმარათ Instagram-ი?


- ჩემი აზრით, მას ფოტოგრაფია არ მოუკლავს, პირიქით - ჩვენი ოსტატობა მთელ მსოფლიოს აჩვენა. რაღა თქმა უნდა, ამან კონკურენციაც გააძლიერა, რადგან ასპარეზობა არა მხოლოდ შენი ქვეყნის, არამედ - გლობალური ფოტოგრაფიის წარმომადგენლებთან გიწევს. საბოლოო ჯამში ვიტყოდი, რომ ეს პლატფორმა კიდევ ერთ მარკეტინგულ ხერხს წარმოადგენს, რომლის დახმარებითაც ჩვენს ნამუშევრებს ფართო აუდიტორიას წარვუდგენთ: თუ ადრე ვინმესთვის ფოტოების ჩვენება გსურდა, იმ ადამიანისთვის სავიზიტო ბარათი უნდა მიგეცა, სადაც შენი ვებგვერდის მისამართი იქნებოდა მითითებული, დღეს გიპოვო?" მოკლედ, ის შენი პოტრფოლიოს პრეზენტაციის ძალიან ძლიერი იარაღია. თუმცა აუცილებლად უნდა აღვნიშნო, რომ საჭიროა სოციალური მედიის მოხმარების ცოდნა: უნდა გესმოდეს, როდის გაავლო ხაზი პროფესიული პორტფოლიოს წარდგენასა და საკუთარი პირადი ცხოვრების დემონსტრირებას შორის.

 


საბოლოო ჯამში, Instagram-ი ჩემი პროექტისთვის საუკეთესო პლატფორმა აღმოჩნდა. გარდა იმისა, რომ საშუალება მომცა, ჩემი ნამუშევრები მილიონობით ადამიანისთვის წარმედგინა, ყოველდღიურად ახალი სურათის ატვირთვისას, პროექტის პროგრესირებაში ის ადამიანებიც იღებენ მონაწილეობას, რომლებიც გამოქვეყნებულ ფოტოზე კომენტარებს წერენ. გამოდის, რომ ეს მეტად ცოცხალი პროცესია, ვიდრე იმ შემთხვევაში იქნებოდა, მათთვის რამდენიმე წლის შემდეგ უკვე დასრულებული პროექტი რომ მეჩვენებინა. ძალიან მიყვარს, როდესაც ადამიანების მხრიდან უკუგებას ვხედავ და აუდიტორიასთან პირდაპირ კავშირს ვამყარებ.


- გაქვთ თუ არა რამე გამოგონილი, მისტიკური ადგილი, სადაც მოგზაურობას და იატაკების გადაღებას ისურვებდით?


- დიახ, დაახლოებით 1 წელია, რაც კუბაზე ვფიქრობ: ყველა ქალაქი გადავიღე, რაც კი მაინტერესებდა, კუბას შესწავლისას კი რამდენიმე ფოტოს წავაწყდი, სადაც საინტერესო იატაკები აღმოვაჩინე. თანაც ისეთი შეგრძნება მაქვს, რომ კუბას უდიდესი პოტენციალი აქვს და იქ ჩასვლისას კიდევ უამრავ საინტერესო აღმოჩენას გავაკეთებ. ამ ეტაპისთვის იქ მოგზაურობა ოცნებაა, თუმცა ვინ იცის, იქნებ ერთ დღეს რეალობადაც იქცეს.


- იატაკების თემასთან ერთად, პარიზსა და ლისაბონში ძალიან საინტერესო პროექტი - Re-Tale-ი გადაიღეთ, რომელზეც მაღაზიების ორიგინალური ფასადებია გამოსახული ადამიანებთან ერთად. რას წარმოადგენს ამ პროექტის შინაარსი?
- ეს პროექტი იტალიურ პოლიგრაფიულ ფირმა პიხარტპრინტინგ-თან ერთად განვახორციელე. ჩვენი იდეა პარიზის და ლისაბონის ძველი, ლამაზი მაღაზიების ფასადების აღმოჩენა, მათი შექმნის ოსტატობა და მფლობელების ამბების გადმოცემა იყო.


P.S. სებასტიან ერასმა, ინტერვიუს პარალელურად, "ბომონდის" აპრილის ნომრისთვის პარიზში გადაიღო ფოტოსესია: Parfum de Printemps

 

  • წინა
like
1

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.