სიზმარი ცხადში: Co.Lab by Nino Sepo/Mariam Oniani

"სამხატვრო აკადემიაში სწავლისას მუდმივად მაწუხებდა ის პრობლემა, რომ იქმნებოდა უამრავი კოლექცია, რომელთა რეალიზებაც ვერსად ხდებოდა". -აღნიშნავს მარიამ ონიანი.

2013 წელს, სამხატვრო აკადემიის დამთავრებისთანავე, პარტნიორთან ერთად მაღაზია Co.mode გახსნა, პირველი სივრცე,

სადაც მხოლოდ დამწყებ დიზაინერთა ნამუშევრები იყო წარმოდგენილი. მაღაზია მარიამის და მისი თანაკურსელების ნამუშევრებით გაიხსნა. სტუდენტებს საშუალება ჰქონდათ, თავიანთი პროფესიით ემუშავათ და შემოსავალი ჰქონოდათ.

შიდა რებრენდინგთან ერთად მაღაზია სახელს იცვლის და ამიერიდან Co.Lab დაიწყებს ფუნქციონირებას. მაღაზიის კონცეფციაც ტრანსფორმირდება და გარდა დიზაინერებთან ექსკლუზიური კოლაბორაციისა, მისი სახელის ქვეშ ახალი კოლექციები შეიქმნება. კოლექციებზე მუშაობისას განსაკუთრებული ყურადღება ხარისხს მიექცევა.

- მარიამ, რომელ დიზაინერებთან თანამშრომლობთ?

- სია დიდია. ახალი წესის მიხედვით, დიზაინერებს რამდენიმე საფეხურის გავლა მოუწევთ, რომ ჩვენს პარტნიორებს შემოუერთდნენ. ასევე მნიშვნელოვანია პროდუქციის ხარისხი და მათი სტაბილური მუშაობა ბაზარზე. პირადად ჩემთვის თითოეულ მათგანთან საინტერესო იყო თანამშრომლობა. ყველა ინდივიდუალურია, ყველასგან რაღაცის მიღება შეიძლება. უამრავი ხელოვანი გავიცანი. ამ თანამშრომლობით მეტი იდეა ჩნდება, რაც გაცილებით საინტერესოს ხდიდა სამუშაო გარემოს. ვინც ჩვენთან დაიწყო თანამშრომლობა, ბევრმა მათგანმა საკუთარი მაღაზია გახსნა. ამჯერად ჩართულები ვართ ბევრ პროექტში, ვმონაწილეობთ შოურუმებში. თუმცა, ყველაზე საინტერესო მაინც ამ საქმის დაწყების პროცესი გახლდათ. გამოუცდელი რომ ვიყავი, ყოველი დღე აღმოჩენა იყო, - თურმე ძალიან საინტერესო საქმე დამიწყია.



ბრენდის Co.Lab სახელით გამოშვებულ კოლექციებზე თავად მარიამი მუშაობს. თუმცა, მაღაზიის კონცეფცია სხვა დიზაინერებთან კოლაბორაციასაც ითვალისწინებს. ამგვარი ტანდემის შედეგად განხორციელდა მარიამისა და დიზაინერ ნინო სეფოს შექმნილი ახალი კოლექცია.

ნინოსთან თანამშრომლობა რამდენიმე წლის წინ დაიწყო, რაც ძალიან ნაყოფიერი და საინტერესო აღმოჩნდა. იგი საკუთარ ბრენდზე მუშაობის პარალელურად, ბრენდის Co.mode სახელის ქვეშ ქმნიდა კოლექციებს.

"ნინოს სხვა დიზაინერებისგან განსხვავებული ხედვა აქვს, ინდივიდუალური. ის არავის ჰგავს. რაც შეეხება ჩვენს წარმატებულ ნაბიჯებს, სწორედ ახლა ვდგამთ. ასეთ დიდ კოლექციაზე პირველად ვიმუშავეთ. იმედი გვაქვს, ნამუშევარს მოგვიწონებენ, თუმცა, კრიტიკისთვისაც მზად ვართ", -აღნიშნავს მარიამი.


დიზაინერ ნინო სეფიაშვილს ჩვენ ნინო სეფოს სახელით ვიცნობთ. მისი კოლექცია გამოჩენისთანავე კარგად მიიღო საზოგადოებამ და პერსპექტიულ ახალგაზრდა დიზაინერადაც მიიჩნია. მის შესახებ ინფორმაცია არა მხოლოდ ქართულ, უცხოურ გამოცემებშიც ხშირად იბეჭდებოდა. იგი ინდივიდუალური ხედვით გამოირჩეოდა და მისი ნამუშევრები, გარდა იმისა, რომ ფუნქციური იყო, ყოველი კოლექციიდან ART-ს ქმნიდა.
"მუშაობის პროცესში ჩემთვის მნიშვნელოვანია განწყობა, ხოლო შემდეგ სწორად განსაზღვრა იმის, თუ რისი თქმა მსურს და კონკრეტულ რეალობასთან კავშირში როგორ ვხედავ ნამუშევარს", -აღნიშნავს ნინო.

დიზაინერი არჩეული სტილის ერთგულია. როგორც თავად აღნიშნავს, ბოლო ნამუშევრებში, ეს იქნება სამოსი თუ აქსესუარი, სხვა სიღრმეებში შეჭრას და ამ ხედვის განვითარებას ცდილობს.

Co.Lab-თან თანამშრომლობა ერთ წელზე მეტია გრძელდება. თავიდან პატარა პროექტი იყო ჩაფიქრებული, თუმცა მარიამთან მუშაობა იმდენად სასიამოვნი აღმოჩნდა, რომ მუშაობის პროცესში ახალი იდეები გაჩნდა. კარგად მოვერგეთ ერთმანეთს. ჩემთვის სასიამოვნო კოლაბორაციით შეიქმნა კოლექცია "სიზმრები".


კოლექციაზე მუშაობა რამდენიმე თვის განმავლობაში გრძელდებოდა. საკმაოდ შრომატევადი პროცესი გახლდათ, რადგან კოლექციის კონცეფცია სიზმარი იყო, დიზაინერებმა ამ თემასთან დაკავშირებით ბევრი მასალა მოიძიეს. კოლექციაზე მუშაობის პროცესში მათ სამხატვრო აკადემიიდან ნინო მგალობლიშვილი დაეხმარა, რომელმაც ისინი იმ ადამიანებთან დააკავშირა, ვინც სიზმრების რუკაზე მუშაობენ. ისინი თანამედროვე რეალობაში სიზმრებს სწავლობენ, რაც კარგი ინსპირაცია აღმოჩნდა კოლექციაზე სამუშაოდ.

კოლექციაში "სიზმარი" გამოყენებულია როგორც მყარი, ასევე ორგანზა. მთავარი მახასიათებელი კი შიდა დამუშავების ზედაპირზე გადმოტანაა, რაც მთავარ იდეას, უხილავის ხილულად ქცევას უკავშირდება. ამგვარი გადაწყვეტილებით მართლდება სიზმრის თემა.
ჟურნალი "ბომონდი" პირველი გამოცემაა, რომელმაც კოლექცია "სიზმარი" გააშუქა და დიზაინერების სამოსი საინტერესო ფოტოსესიაში გადაიტანა. დიზაინერების მხრიდან, ყოველი ლუქი დიდი პასუხისმგებლობით, სეზონის გათვალისწინებით შეირჩა.

-გაგრძელდება თუ არა დიზაინერ ნინო სეფოსა და Co.Lab-ის კოლაბორაცია?

-მომავალზე საუბარს ყოველთვის გავურბივარ, რადგან არ ვიცი, რა იქნება. ამ ეტაპზე ძალიან სასიამოვნოა კოლაბორაცია. იშვიათია, ორი დიზაინერი ასე ლავირებდეს ერთ კოლექციაში, ისე ჰარმონიულად იმუშაონ, როგორც ჩემი და მარიამის შემთხვევაში მოხდა.

კოლექცია "სიზმარი" უახლოეს პერიოდში Mercedes-Benz Fashion Weekთბილისი შოურუმში იქნება წარმოდგენილი. "მოდის კვირეული ჩემთვის მნიშვნელოვანია. ეს გახლავთ მსოფლიო მნიშვნელობის ღონისძიება. მოდის სამყაროში ჩემთვის რაიმე სახით მონაწილეობა პასუხსაგები და საამაყოა. მადლობა მინდა ვუთხრა სოფო ჭყონიას, რომლის მხარდაჭერას ყოველთვის ვგრძნობ, რომელმაც ქართული მოდის მსოფლიო მოდის ნაწილად ქცევა შეძლო", -აღნიშნავს ნინო.

Apparel: Co.Lab by Nino Sepo/Mariam Oniani
Collection: Dreams
Models: Elene Asatiani (Geomodels Agency) Tekla Dvalishvili (Geomodels Agensy)
Photo: Ana Margiani

ქეთი დარჩია

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.