კეტი პერი და Mach&Mach

ისევ სოციალური ქსელი და Mercedes Benz Fashion Week თბილისი, სადაც ქართულმა ბრენდმა Mach&Mach კოლექცია წარმოდგინა.

ბრენდი დებ გვანცა და ნინა მაჭარაშვილებს ეკუთვნით, რომლებიც ყოველთვის საინტერესო და შთამბეჭდავი კოლექციებით გამოირჩევიან. ბოლო კოლექცია, AW17/18, სახელით Cosmic Girl, წარმატებული ჩვენების შემდეგ საერთაშორისო გამოცემებში მოხვდა, მისით ცნობილი პოპვარსკვლავი  Katy Perry-ც დაინტერესდა და კოლექციიდან ერთ-ერთი კოსტიუმი მნიშვნელოვან ტურზე ჩაიცვა.

 

- გვანცა, ბრენდის Mach & Mach გამოჩენა თბილისი Tbilisi Fashion Week-ს უკავშირდება? მოგვიყევით ბრენდის შექმნის ამბავი.

- პროფესიით კოსტიუმის დიზაინერი ვარ, ხოლო ნინა ექიმია. განსხვავებული პროფესიები გვაქვს, მაგრამ ეს

სფერო ორივესთვის ახლოა. ბრენდი 2011-12 წლებში დაარსდა. სანამ Mach & Mach & Tbilisi Fashion Week-ზე მონაწილეობას მივიღებდით, დიდი მოსამზადებელი პერიოდი გვქონდა. შემდეგ იყო TFW, FWRussia. ჩვენი ნამუშევრები გაგვაქვს საზღვარგარეთ და ვცდილობთ საერთაშორისო მომხმარებლისთვისაც ნაცნობი გავხადოთ ბრენდი და ჩვენი ქვეყანა. ვართ ქართული ბრენდი დიდი ამბიციებით.

- ბოლო დროს სოციალურ ქსელში გავრცელდა ინფორმაცია პოპვარსკვლავ Katy Perry-ს შესახებ, რომელსაც სცენაზე თქვენი შეკერილი კომბინეზონი ეცვა. როგორ დაგიკავშირდათ მომღერლის წარმომადგენელი?

- Katy Perry-მ ჩვენი ახალი კოლექციიდან ერთ-ერთი კოსტიუმი მოირგო. ლოს-ანჯელესში, ახალი, რიგით მე-4 ალბომის საპრეზენტაციო ლაივტურნეს გახსნა ჰქონდა. კონცერტამდე რამდენიმე დღე, ქეთი დახურულ შენობაში იმყოფებოდა და მის პირად ცხოვრებას ონლაინრეჟიმში ათობით კამერა გადმოსცემდა. რის შემდეგაც იგი მაყურებლის წინაშე წარდგა. ღია ცის ქვეშ გამართულ კონცერტზე ჩვენი AW17/18 კოლექციიდან ვერცხლისფერი სამოსი ეცვა. კოლექციას Cosmic Girl დავარქვით, რასაც ეს კოსტიუმი და ქეითი პერი მთლიანად გამოხატავენ. სხვათა შორის, ის და მისი ერთ-ერთი ნამუშევარი ამ კოლექციის ინსპირაციის წყარო იყო.

- მოგვიყევით წარმომადგენელთან მოლაპარაკებაზე, თუ ჰქონდათ თქვენ მიმართ სხვა მოთხოვნები?

- მომღერლის წარმომადგენელმა MACH & MACH ინტერნეტსივრცეში აღმოაჩინა და დაგვიკავშირდა. ქეითი პერის კონცერტებისთვის და დაჯილდოებებისთვის ჩვენი რამდენიმე ნამუშევარი მოეწონა. უეცრად ქართული ბრენდის კოლექციით დაინტერესდა. ეს ფაქტი ჩვენთვის დაუჯერებელი იყო, რადგან ვარსკვლავი მსოფლიო ბრენდების კოსტიუმებით იმოსება. განსაკუთრებული მოთხოვნები არ ჰქონიათ. ახალი კოლექციიდან პირდაპირ შეარჩიეს კოსტიუმები, ჩასწორება ან შეცვლა არ მოუთხოვიათ.

- როგორც ვიცით, ეს კოლექცია Mercedes Benz Fashion Week თბილისი-ზე წარმოადგინეთ? ჩვენების შემდეგ მოწვეული სტუმრების მხრიდან როგორი შეფასება ჰქონდა?

- კოლექცია შემოდგომა-ზამთარი 17/18 პირველად მარტში - მოსკოვში Mercedes Benz Fashion Week Russia-ზე გვქონდა წარმოდგენილი, პერსონალური ჩვენებით. შემდეგ იგივე კოლექცია, შედარებით დახვეწილი ფორმით, მაისში Mercedes Benz Fashion Week Tbilisi-ის ფარგლებში ვაჩვენეთ. ორივე მოდის კვირეულს დიდი გამოხმაურება ჰქონდა, განსაკუთრებით უცხოურ პრესაში. თითქმის ყველა გავლენიანმა და პრესტიჟულმა გამოცემამ დაწერა კოლექციაზე. მათ შორის ამერიკულმა vogim, W Magazine, Fashionsta.com-მ და ასე შემდეგ. ყველა აღნიშნავდა, რომ ქართული ბრენდია, რაც ყველაზე მნიშვნელოვანია ჩვენთვის.

- როგორ იმუშავეთ კოლექციაზე, რა იყო ინსპირაცია? ქსოვილები როგორ შეარჩიეთ?

- კოლექციას Girls Democraty - გოგონების დემოკრატია, ასევე Cosmic Girl დავარქვით. ინსპირაციის წყარო გოგონა 90-იანი წლებიდან იყო, მისი ემანსიპაცია საზოგადოებაში. ეს არის გოგონა საზღვრების გარეშე, რომელიც აკეთებს იმას, რაც სურს. ინსპირაცია 90-იანი წლებიდან იღებს სათავეს, როდესაც მნიშვნელოვანი და გადამწყვეტი დრო დადგა ჩვენს ქვეყანაში. იყო არეულობა, ომი, იყო ასევე დამოუკიდებლობაც, როცა ქალმა განსხვავებული როლი დაიკავა საზოგადოებაში. ზოგადად, ეს პერიოდი, ქალის ემანსიპაციის კუთხით, გადამწყვეტი იყო ამერიკაში, ევროპასა და საქართველოშიც, რომელიც ევროპისა და აზიის გზაგასაყარზეა და ფემინისტური განწყობის შექმნაში გარკვეული როლი შეასრულა. სამოსის დამახასიათებელი ელემენტები სწორხაზოვანია და მამაკაცის პიჯაკის ხაზებს იმეორებს. კოსტიუმებზე გამოყენებული ფრაზები კონკრეტულ შინაარსსა და ინფორმაციას გადმოსცემენ ქალებისა და მათი მდგომარეობის შესახებ სოციუმში. კოლექცია თამამი, ლოკალურ ფერთა გამითაა წარმოდგენილი. ძირითადი ტონი ვარდისფერი და მასთან ახლოს მდგარი ფერებია - იასამნისფერი, წითელი. მასალებად მბრწყინავი ქსოვილები და ფაქტურები გამოვიყენეთ. ეს არის ჩვენი "სისუსტე", რასაც თითქმის ყველა კოლექციაში ვიყენებთ.

- გაიხსენეთ უკვე ცნობილი კომბინეზონის შექმნის ამბავი...

- ცნობილი კომბინეზონი რთული შესაქმნელი იყო, რადგან მთლიანად ხელით შეიკერა. მასში სიარულიც კი რთულია, რადგან ფარფლებიანი და ბისერებიანი ქსოვილია. საბოლოოდ, არცთუ ისე კომფორტული სამოსი კარგად მოირგო მსოფლიო დონის ვარსკვლავმა, დიდი კონცერტი გამართა და სცენაზე იცეკვა კიდეც.

-იცოდით, რომ Katy Perry კონცერტზე აპირებდა კოსტიუმის ჩაცმას?

-ვიცოდით, რომ ჩაიცვამდა, მაგრამ სად, რა ვითარებაში ან როდის, ეს ინფორმაცია არ გვქონდა.

- პოპვარსკვლავთან კომუნიკაცია თუ გქონდათ?

-უშუალოდ ვარსკვლავთან ურთიერთობა და კონტაქტი არ გვქონია, ჩვენ მხოლოდ მის წარმომადგენელთან ვკონტაქტობდით.

- ამ კონცერტის შემდეგ საქართველოში ძალიან დიდი გამოხმაურება გქონდათ. როგორ გრძნობთ თავს და როგორია თქვენი მოლოდინი?

- დიახ, დიდი გამოხმაურება გვქონდა, განსაკუთრებით უცხოელების მხრიდან, რაც მნიშვნელოვანია ჩვენთვის. გვიხარია, რომ ვქმნით პროდუქციას, რომელიც მსოფლიო ვარსკვლავის რჩეული გახდა.

- ახალ კოლექციაზე თუ მუშაობთ? მოგვიყევით მის შესახებ?

- დიახ, ახალი გაზაფხული-ზაფხული 2018 წლის კოლექციაზე აქტიურად ვიწყებთ მუშაობას, თუმცა ყველაფერი ჯერ იდეის და მონახაზის დონეზეა.

დიდი გამოხმაურება გვქონდა, განსაკუთრებით უცხოელების მხრიდან, რაც მნიშვნელოვანია ჩვენთვის. გვიხარია, რომ ვქმნით პროდუქციას, რომელიც მსოფლიო ვარსკვლავის რჩეული გახდა.

ქეთი დარჩია

"ბომონდი", ივლისი

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.