ამერიკული ოცნება მოდის ინდუსტრიაში

დიდ ხანია მოდის ინდუსტრიაში საქმიანობს. დღემდე აგრძელებს თანამშრომლობას ისეთ გავლენიან არხთან, როგორიცაა Fashion TV.

ამჯერად ნიუ-იორკში ცხოვრობს და სამი უმსხვილესი მოდის კვირეულის - New York Fashion Week, Couture Fashion Week და Style Fashion Week-ის არტდირექტორია. ტოპმოდელ სტეფანო სუაროსთან ერთად დააფუძნა სამოდელო New York Fashion აკადემია, ასევე გამოსცემს ჟურნალს, რომელიც ფეშენინდუსტრიას მიმოიხილავს. ამჯერად ნიუ-იორკში მცხოვრებ კიდევ ერთ წარმატებულ ქართველზე, დიმიტრი ჩხეიძეზე მოგიყვებით.

- ბატონო დიმიტრი, ნიუ-იორკში წარმატებული კარიერის მიუხედავად, საქართველოში ნაკლებად გიცნობენ, რატომ?

- საქართველოში ნაკლებად მიცნობენ, რადგან 16 წლის ასაკიდან

ევროპის სხვადასხვა ქვეყანაში ვცხოვრობდი. 3 წელია ნიუ-იორკში დავფუძნდი. რაც შეეხება აქაურ წარმატებას, როგორც იტყვიან, საჭირო დროს საჭირო ადგილზე აღმოვჩნდი. ფეშენინდუსტრიაში დაგროვებული კონტაქტები გამოვიყენე.

-თქვენი კარიერა ყოველთვის ფეშენინდუსტრიას უკავშირდებოდა?

- პროფესიით ექიმი ვარ. მშობლების სურვილით სამედიცინო ინსტიტუტი დავამთავრე, თუმცა, ამ პროფესიით არასდროს მიმუშავია. გარკვეული დრო ტურიზმის სფეროში ვსაქმიანობდი. იქიდან მოდის ინდუსტრიაში გადავედი. მიშელ ადამსთან ერთად Fashion TV-ზე ვმუშაობდი. ამ არხთან დღემდე ვთანამშრომლობ. ჩემი ევროპული კარიერა Fashion TV-ზე 15 წელი გრძელდებოდა. ის კონტაქტები, რომელიც საქმიანობაში მეხმარება, სწორედ იქ მოვიპოვე. როგორც კი ნიუ-იორკში აღმოვჩნდი, ამ კონტაქტების გამოყენება დავიწყე. მრავალ ენაზე ვლაპარაკობ, ასევე მაქვს ამ სფეროში საქმიანობის დიდი გამოცდილება, კარგი ცვ მქონდა და წარმატებული კარიერის გაგრძელება ნიუ-იორკში არ გამიჭირდა. აღმოვჩნდი ჯერ New York Fashion Week-ზე, შემდეგ Style Fashion Week-სა და Couture Fashion Week-ზე. ჩემი პირველი სამსახური ბრენდენ მაქსველს უკავშირდება. მისი სთეიჯისა და ბექსთეიჯის ორგანიზატორი ვიყავი. მოგვიანებით, კელვინ კლაინსა და დოლჩე გაბანასთან ვითანამშრომლე. New York Fashion Week-თან, Couture Fashion -სა და StyleFashion Couture-სთან დღესაც ვთანამშრომლობ. ვმუშაობდი ისეთ დიზაინერებთან, როგორებიც არიან: მელენ ბრენტონი, დევიდ თუფაზი, ადრიანა ლიჯა. კუტიურ ფეშენვიკის ფარგლებში Andres Aquino, Alexsandra Papascu-სა და სხვა დიზაინერებთან ვთანამშრომლობდი. ამჯერად ამ სამი ტოპმოდის კვირეულის არტდირექტორი და ქასთინგების დირექტორი ვარ.

- მოდის ინდუსტრია ევროპას უკავშირდება. რატომ გადახვედით აშშ-ში?

- სიმართლე გითხრათ, ხასიათით ევროპელი ვარ, მიყვარს ევროპა. აშშ-ში წასვლა იმდენად მოულოდნელად გადავწყვიტე, რომ თავადაც გამიკვირდა. პირად ცხოვრებას უკავშირდება, ყველაფრის თავიდან დაწყება მომინდა. ევროპაში მივატოვე აწყობილი კარიერა და ახალ გარემოში დავსახლდი. ნიუ-იორკში, ფაქტობრივად, არავის ვიცნობდი. სხვა მოლოდინი მქონდა და სულ სხვა სამყარო დამხვდა -ქაოსი, ბევრი არასანდო ადამიანი, რაც ჩემთვის სიურპრიზი იყო. ბევრი წინააღმდეგობა გადავლახე. ალბათ ღირდა ამ წვალებად. უკვე თავი შემაყვარა ამ ქალაქმა. ახლა გაცილებით სტაბილური კარიერა მაქვს, მაგრამ ამ შედეგის მისაღწევად იმდენი რამ გამოვიარე, მთელი ცხოვრება მემახსოვრება. ერთგვარი გამოცდილებაც იყო ჩემთვის. თავიდან ვერ ვშოულობდი სასურველ სამსახურს, რომელიც ჩემს გამოცდილებას შეეფერებოდა. მქონდა მხოლოდ სეზონური სამუშაოები. მოგეხსენებათ, მოდის კვირეულები წელიწადში მხოლოდ ორჯერ იმართება. დანარჩენი დრო უმუშევარი ვიყავი. გამიჭირდა, რადგან არასტაბილურად ვიგრძენი თავი.

- რა მოვლენებმა მოახდინა გარდატეხა და შეცვალა თქვენთვის არასტაბილური გარემო?

- ქართველი დიზაინერია ფატუნა ბუშიჰედი. ანდრეს აქუინოსთან ერთად Couture Fashion Week-ზე ჩვენება ჰქონდა, სადაც მიმიპატიჟა და ანდრეს აქუინო გამაცნო. ანდრესმა თანამშრომლობა შემომთავაზა. ის პერიოდი იყო, როცა ნიუ-იორკის მოდის კვირეულზე, კუტიურ ფეშენვიკსა და სთაილ ფეშენვიკზე ჩემი CV მქონდა გაგზავნილი. ორ კვირაში სამივე კვირეულიდან დადებითი პასუხი მივიღე. თავიდანვე შევთანხმდით, რომ გაყიდული პროდუქციიდან მივიღებდი პროცენტს. მოგეხსენებათ, იქ მოხვედრა რთულია და ამ წინადადებას დავთანხმდი. დავიწყე პირველი შოუს მომზადება. ბრენდენ მაქსველის ქასტინგებისა და ბექსთეიჯის მენეჯერად დამნიშნეს. შეგახსენებთ, რომ ბრენდენ მაქსველი ლედი გაგას მოსავს, ცნობილი და საინტერესო დიზაინერია, სასიხარულო და საინტერესო იყო მასთან მუშაობა. 24 საათის განმავლობაში თავდაუზოგავად ვიშრომე. შთამბეჭდავი შოუ გაიმართა. ჩვენებას სერიოზული დამკვეთები და სელებრითები დაესწრნენ. შოუ ლედი გაგამ გახსნა. შოუს მერე ავთერ ფართიზეც კარგად მოვილხინეთ. ანდრესმა მეორე სეზონზეც თანამშრომლობა შემომთავაზა. მასთან თანამშრომლობის შემდეგ ჩემი რევიუ კიდევ უფრო მიმზიდველი გახდა და სხვა დიზაინერებმაც მიმიწვიეს, მათ შორის კელვინ კლაინმა და დოლჩე&გაბანამ. ახლა უკვე საკუთარი კომპანია მაქვს. ჩემთან თანამშრომლობს ცნობილი ტოპმოდელი, კელვინ კლაინის სახე, სტეფანო სუარო. ერთად გავხსენით New York Fashion აკადემია. გვყავს სტუდენტები. სტუდია მანჰეტენზე მდებარეობს, სტუდიის ფილიალი ბრუკლინშია. პარალელურად გამოვცემთ ფეშენაკადემიის ჟურნალს. ვმუშაობთ მოდელების ფოტოსესიებზე, ვაკეთებთ სარეკლამო რგოლებს. დატვირთული სამუშაო გვაქვს.

- თუ გქონდათ მოქმედების სისტემა, რომელიც წარმატებაში დაგეხმარათ?

- ყოველთვის ჩემი კანონებით ვმოქმედებ: ზუსტად ვიცი, როდის და სად უნდა ვიყო, სად რა უნდა გავაკეთო, ყველაფერი ჩანიშნული და სისტემაში მოყვანილი მაქვს. როდის ვწვები და ვდგები ამასაც კი ვაკონტროლებ. როცა ამ პროგრამას არ ღალატობ, წარმატებას მიაღწევ. ცხოვრების ასეთ სისტემას უარყოფითი მხარეც აქვს. სიამოვნებისთვის დრო არ გრჩება. შეიძლება ორ კვირაში ერთხელ ერთი დღე შენი სიამოვნებისთვის იცხოვრო, მაგრამ დანარჩენ დროს ჩვეულებრივი რობოტი ხარ. მაგრამ წარმატების მისაღწევად ბევრი უნდა იშრომო. თან ცხოვრება დღითი დღე რთულდება, განსაკუთრებით აშშ-ში. აქ ხომ დიდი კონკურენციაა. ბევრ პროფესიონალსა და ნიჭიერ ადამიანს შეხვდებით. აქ მხოლოდ წარმატებისთვის ჩამოდიან. საკმარისია ჩემეული სისტემიდან გადავუხვიო, სხვა დამეწევა და გამასწრებს. შეცდომის უფლებაც არ მაქვს.

-აშშ-ის მოდის კვირეულები ევროპულისგან განსხვავდება?


- ევროპული მარკეტი მსოფლიოში პირველია. ნიუ-იორკის ფეშენინდუსტრია განსხვავებულია, სხვა სისტემაა. ამერიკა ხომ ემიგრანტების ქვეყანაა. აქაური დიზაინერების კოლექციებში სხვადასხვა კულტურის სინთეზი იგრძნობა. იმას რასაც ევროპაში ვერ შეხვდებით, წააწყდებით აშშ-ში. ამასთანავე, დიდი შესაძლებლობებია, რადგან უზარმაზარ ბაზარს წარმოადგენს. თუ გსურს, რომ ამერიკული ოცნება აიხდინო, აქ უნდა ცხოვრობდე. ყველაფერს მიაღწევ, თუ სულიერად ძლიერი ხარ, თუ არადა, გადაგყლაპავს, ჩაგძირავს. თავად თავდაჯერებული ვიყავი და ზუსტად ვიცოდი რაც მინდოდა.

-რომელ ცნობილ მოდელებთან გიმუშავიათ?

- ვთანამშრომლობდი ჯიჯი ჰადიდისთან, პარეს ჰილტონთან, ირინა შეიკთან, ლედი გაგასთან და ბევრ საინტერესო მოდელთან. მიუხედავად იმისა, რომ ლედი გაგა პოპვარსკვლავია, ბრენდენ მაქსველის შოუში განვითარემონაწილეობდა.

ჩვენთან ქასტინგზე მსოფლიოს სხვადასხვა ქვეყნიდან უამრავი მოდელი ჩამოდის. მოდელების მიმართ ის მოთხოვნები გვაქვს, რაც აუცილებელია პოდიუმზე გამოსასვლელად, -პარამეტრები, უნდა შეეძლოს კამერების წინ პოზირება, საკუთარი თავის პრეზენტაცია. მიუხედავად იმისა, რომ ქასტინგებს ვხელმძღვანელობ, ჩვენებებს ის დიზაინერებიც უნდა ესწრებოდნენ, ვისი შოუცაა დაგეგმილი მოდის კვირეულზე. თავად უნდა შეარჩიოს ის მოდელი, რომელიც კოლექციისთვის სჭირდება. რაც შეეხება დიზაინერების მიმართ მოთხოვნებს, Style Fashion Week-ზე თუ გინდა კოლექცია გაიტანო, შესრულების მაღალი ტექნიკა, შთამბეჭდავი ბეგრაუნდი უნდა გქონდეს. აუცილებელია სამშობლოში პოპულარული იყო.Couture Fashion Week-ზე ხელით შესრულებულ ნამუშევრებს აქცევენ ყურადღებას. რაც შეეხება New York Fashion Week-ს, იქ მხოლოდ ცნობილი ბრენდები მონაწილეობენ. იქ რომ მოხვდე, დიდი ინვესტიცია უნდა გქონდეს დაბანდებული.

- ბატონო დიმიტრი, დიდი ხანია მოდის ინდუსტრიაში საქმიანობთ, დიდი ინფორმაცია გაქვთ, როგორ შეაფასებდით თანამედროვე მოდას? რამდენად საინტერესოა თქვენთვის, ან ვის აღიარებდით ახალ, საინტერესო სახედ?


-ის, რაც თანამედროვე მოდის ინდუსტრიაში ხდება, ნამდვილი სიგიჟეა, ყოველგვარ ზღვარს სცდება. ბევრი რამ არ მომწონს. ისეთი ნამუშევრები გამოაქვთ, რასაც მოდასაც ვერ ვუწოდებდი. რასაკვირველია, ეს ჩემი სუბიექტური აზრია. კომპლექსიანი ნამდვილად არ ვარ, მაგრამ ჩემი პრინციპები, ღირებულებები მაქვს, რითაც ვაფასებ ნამუშევრებს. მაგალითად, ამერიკაში პოპულარულია ადრიან ალიჯა, Style Fashion Week-ზე მონაწილეობდა. პირადად არ მომწონს, თუმცა ბევრი თაყვანისმცემელი ჰყავს. არ მომწონს მის კოლექციებში ფერთა შეხამება, ვარცხნილობები, მაკიაჟი, ფეხსაცმელები, რომლითაც მოდელები ძლივს დადიან პოდიუმზე. მომწონს მალან ბრეტონი, დევიდ თუფაზი. მიყვარს ბრენდენ მაქსველი, უმაგრესი დიზაინერია. მიუხედავად ასეთი შეფასებებისა, ვთვლი, რომ მოდა კრიზისშია. რასაც თანამედროვე დიზაინერები აკეთებენ, უკვე სხვებმა გააკეთეს. სიახლე არაფერია. მოდის განვითარებას ვერ ვხედავ ვერც ერთი დიზაინერის ნამუშევარში. ან ძველს იმეორებენ, ან ორიგინალურობისთვის მარაზმში გადადიან. ჩემი ფავორიტი დიზაინერი გალიანოა. მისი შარვლები და პიჯაკები კლასიკაა. მომწონს ის ფერები, რომელსაც ირჩევს. ყველაფერია მასში, კლასიკაც, ავანგარდიც, მოდერნიც.

- ქართველი დიზაინერების ნამუშევრებს თუ იცნობთ, რამდენად საინტერესო იქნება საერთაშორისო ბაზარზე?

-ვიცი საინტერესო და ნიჭიერი დიზაინერი დევიდ კომა. ვიცნობ დიზაინერებს, რომლებიც საქართველოში ქმნიან პროდუქტს. მომწონს დათუნა სულიკაშვილი, ბევრი სხვა დიზაინერიც. მიყვარს ჩვენი ქვეყანა და ვთვლი, რომ ნიჭიერი ერი ვართ. საუბედუროდ, ჩვენს ხალხს, ისევე როგორც დიზაინერებს, განვითარებაში ფინანსები უშლის ხელს. ბევრი ქართველი დიზაინერი ევროპული მარკეტითაა დაინტერესებული. მიდიან ევროპისკენ. მე ვურჩევდი ამერიკისკენ წამოსვლას, აქ გაცილებით დიდი შესაძლებლობებია, კომერციული თვალსაზრისითაც. თუ ამერიკაში გაღიარებენ, ჩათვალე, რომ მსოფლიოში ხარ პოპულარული.…

- ბატონო დიმიტრი, ქართველ დიზაინერებს თუ დაეხმარებით აშშ-ში თქვენი საქმიანი კონტაქტებით?

- რა თქმა უნდა. ბევრ ქართველ მოდელს ვეხმარები ნიუ-იორკში, მოდის კვირეულების შოუებში გამოსასვლელად. ჩემს ფეშენაკადემიაში ბევრი ქართველი სტუდენტი სწავლობს. ვეხმარები ასევე ქართველ დიზაინერებს. მე ქართულ მარკეტზე არ ვარ ორიენტირებული. თავად არავის ვეძებ. ვინმეს სურვილი თუ ექმება მომმართოს, სიამოვნებით დავეხმარები.

- ბატონო დიმიტრი, "ამერიკული ოცნება" აიხდინეთ?


- რა თქმა უნდა. თუმცა კიდევ დამრჩა საოცნებო, მომავალში საკუთარი მოდის კვირეულის დაფუძნება მინდა. ჩემს პარტნიორ სტეფანო სუაროსთან ერთად მამაკაცისა და ქალის სამოსის ახალ ხაზზე ვმუშაობ. ასე ნაბიჯ-ნაბიჯ მივიწევ წინ.

ქეთი დარჩია

"ბომონდი" აგვისტოს ნომერი

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.