ერთი ვიზიტის ორი მნიშვნელოვანი შედეგი

ერთ მნიშვნელოვან თემასა და სიახლეზე ვისაუბრებ, რომელსაც ამავე ბლოგში განვიხილავთ.

მანამდე მინდა, უკრაინაში ვიზიტის შესახებ მოგითხროთ, რომელიც არანაკლებ საინტერესო აღმოჩნდა ჩემთვის.

 


უკრაინის ერთ-ერთი არხიდან შემოთავაზება მივიღე, სატელევიზიო დოკუმენტურ ფილმში უნდა მიმეღო მონაწილეობა. დოკუმენტური ფილმი მრავალსერიანია და მასში პროფესიონალი ექიმები კონტურული ესთეტიკური მედიცინის შესახებ საუბრობენ. ორ სერიაში გადამიღეს. თემები, რომელიც ამ სერიებში განვიხილე, ყველაზე აქტუალური აღმოჩნდა უკრაინელი ქალბატონებისთვის. ალბათ, თქვენც დაგაინტერესებთ, რომელი პროცედურებია პოპულარული უკრაინაში.

ფილმის ავტორებთან ერთად ჩავატარე ინტერაქტიული გამოკითხვა და ასეთი საინტერესო შედეგი მივიღეთ - ლიდერობს ბოტოქსის პროცედურა და პლაზმოლიფტინგი.

ბოტოქსი მართლაც საუკეთესო საშუალებაა ასაკობრივ ცვლილებებთან ბრძოლაში და ეს ფაქტი მსოფლიოში აღიარებულია. გადაღების პროცესში ყველანი შევთანხმდით, რომ სასურველი იყო, მაყურებლისთვის საინტერესო თემებზე, მათთვის გასაგებ ენაზე მიგვეწოდებინა ინფორმაცია, ამიტომ, უარი ვთქვით სამედიცინო ტერმინოლოგიაზე. შესაბამისად, სახალისო მომენტიც უხვად იყო გადაღებებზე და სერიები ინფორმაციული, სახალისოც გამოვიდა.

 

თავიდანვე უკრაინელ მაყურებელს ქართულად მივმართე, ხოლო ბოტოქსის თემაზე საინტერესო ამბავსაც მოვყევი, რომელიც ბრიტანელი მეცნიერების დასკვნებს ეფუძნება: ადამიანის ემოციურ ფონს მიმიკა განსაზღვრავს. როცა ის ბრაზდება, ჯერ მიმიკა იცვლება და გაბრაზების სიგნალი შემდეგ გადაეცემა ტვინს. ბოტოქსის პროცედურის შემდეგ, ადამიანის მიმიკა არ იცვლება და გაბრაზების სიგნალის ხარისხიც შესუსტებულია, ანუ სიბრაზის კოეფიციენტის სკალა დაბალია. სახალისოდ ავხსენი, რომ ბოტოქსიანი ადამიანები გაცილებით მშვიდები და ბედნიერები არიან. სილამაზესა და ახალგაზრდულ იერზე არაფერს ვამბობ. ეს ამბავი უმალ აიტაცეს უკრაინელებმა და ბევრს ლაპარაკობდნენ ამ თემაზე. ვფიქრობ, ქართველი ქალბატონებისთვისაც საინტერესო ინფორმაცია იქნება.

 


არ გამკვირვებია პლაზმოლიფტინგის პოპულარობა, რადგან ამ პროცედურას მრავალი მიმართულება აქვს. გაახალგაზრდავებასთან ერთად, რომელიც კანის რეგენერაციის აღდგენას უწყობს ხელს, აქვს სამკურნალო თვისებაც. უაღრესად ეფექტურია აკნესთან ბრძოლაში. განსაკუთრებული ეფექტი აქვს, თუ კურსის სახით ჩატარდება, საუკეთესო საშუალებაა ფორების დასახურად. ამ პროცედურის შემდეგ კანი ხდება გლუვი და პრიალა. ტრიქოლოგიას იყენებენ თმის ცვენის სამკურნალოდ, როგორც ქალბატონები, ასევე მამაკაცები. მეზოთერაპიასთან ერთად, თმის ძირების სამკურნალოდ ნომერ პირველი საშუალებაა. როცა ამ პროცედურაზე ვმსჯელობდით, დოკუმენტურ ფილმშიც ხაზგასმით ვილაპარაკე ექიმების მაღალპროფესიონალიზმზე _ თუ დიაგნოზი სწორადაა დასმული, ასევე არის სწორად შერჩეული აპარატურა და სინჯარები, მაღალი ეფექტი გარდაუვალია. წინააღმდეგ შემთხვევაში, ამ პროცედურის მიმართ ინტერესი განელდება მთელ მსოფლიოში.
ვფიქრობ, ჩემთვისაც და უკრაინელი ქალბატონებისთვისაც საინტერესო და სასარგებლო აღმოჩნდა ეს ვიზიტი. ამ ვიზიტზე ხანგრძლივად კი ვისაუბრე, მაგრამ, იმედია გამიგებთ, რადგან შთაბეჭდილებებითა და ემოციებით სავსე დავბრუნდი.


ახლა კი თემაზე, რომელიც ინტიმურად ჟღერს, მაგრამ გასაკვირი არცაა, რადგან სწორედ ინტიმურ-კონტურულ პლასტიკას შეეხება.


დამეთანხმებით, რომ ესთეტიკური მედიცინის მიღწევებს არა მარტო ადამიანის გარეგნობაზე ზრუნვა, არამედ ბიოლოგიური განვითარებისგარკვეულ ეტაპზე, მის ორგანიზმში მიმდინარე ცვლილებების კორექცია შეუძლია. ეს მიდგომა უფრო და უფრო ინოვაციური და აქტუალური ხდება მსოფლიოში. ეს მეთოდები ადამიანებს თავდაჯერებულობასა და სიმხნევეს მატებს, სიცოცხლის ხალისს უბრუნებს. ამაზე მშვენიერი რა უნდა იყოს. არ დავფარავ და მართლა მაბედნიერებს, რომ ამ პროცესებში აქტიურად ვარ ჩართული.


უკრაინის ვიზიტი დაემთხვა ჩემთვის მნიშვნელოვან საკითხს: 3-4 წლის წინ დავიწყე ინტიმურ-კონტურული პლასტიკის შესწავლა, თუმცა, უკრაინაში პოლიტიკური რეალობის შემდეგ, მხოლოდ ახლა მოვახერხე სერტიფიკატის აღება.


მინდა მოგითხროთ ჩვენთვის უცნობ, მაგრამ მსოფლიოში ერთ-ერთ პოპულარულ პროცედურაზე. აქვე ხაზგასმით აღვნიშნავ, რომ ინტიმურ პლასტიკაში ინიექციური საშუალებებით ჩარევა იგულისხმება. ეს მეთოდი არა მხოლოდ ფორმების კორექციისთვის გამოიყენება, არამედ ინტიმური პრობლემების მოგვარების არაჩვეულებრივი საშუალებაა, რომელიც გარკვეულ უბნებზე ინიექციური ზემოქმედებით მიიღწევა. პროცედურა უსაფრთხოა და გვერდითი მოვლენები არ ახასიათებს.


სექსუალურობა მნიშვნელოვანი საკითხია ქალის ცხოვრებაში. მისი დარღვევა სტრესებთანაა დაკავშირებული. დამეთანხმებით, ასეთ დროს იკლებს სიცოცხლის ხალისი და თავდაჯერებულობა. პარტნიორებს შორის თავს იჩენს ფსიქოლოგიური პრობლემები, რომელიც დროთა განმავლობაში კიდევ უფრო ღრმავდება. შეიძლება პარტნიორების დაშორების მიზეზიც გახდეს. ლიბიდოს დაქვეითება ხშირად მხოლოდ ასაკობრივ ცვლილებებს არ უკავშირდება, მისი აღდგენა კი ქალურობის დაბრუნებასთან ასოცირდება. მხოლოდ მას შემდეგ უბრუნდება ქალს სრულფასოვანი შეგრძნებები, რომელიც ჯანმრთელი ინტიმური ცხოვრებისთვისაა აუცილებელი. ინიექციური კორექციის შემდეგ ერთი უკრაინელი ქალბატონის მეუღლემ გულახდილად გვითხრა: „ჩემი მეუღლე კიდევ უფრო მეტად შემიყვარდა“. რა მოხდა სინამდვილეში? პარტნიორებს შორის სრული ჰარმონია დამყარდა. რადგან ინიექციური საშუალებებით, ინტიმური უბნების სურვილისამებრ ფორმირებაა შესაძლებელი, რაც ორივე პარტნიორისთვის ორმაგად კომფორტული და სასიამოვნოა.


უკრაინაში შევხვდი ინტიმური პლასტიკის შედეგად გაბედნიერებულ ქალბატონებს. ეს პროცედურა აქტუალურია, რადგან უკრაინელი ქალბატონებისთვის ჯანმრთელობასა და ქალურობასთან ასოცირდება. ჩემთვის მოულოდნელი იყო, რომ ამ პროცედურას ასაკობრივი შეზღუდვა არ აქვს. ინტიმურ-კონტურული პლასტიკა მსოფლიოში აპრობირებული მეთოდია. საქართველოში კი ახლა იკიდებს ფეხს. ვფიქრობ, საკმარისი ინფორმაცია მოგაწოდეთ ახალი მეთოდის შესახებ და გემშვიდობებით იმ იმედით, რომ ეს პროცედურა ქართველი ქალებისთვისაც საინტერესო და მნიშვნელოვანი იქნება. შეიძლება სიფრთხილით, მაგრამ მაინც პოპულარული გახდება ჩვენთანაც. ჩვენი ქალბატონები ხომ ფეხდაფეხ მისდევენ ესთეტიკური მედიცინის სიახლეებს და ამ მხრივ არაფრით ჩამოუვარდებიან ცივილიზებულ სამყაროს.

 

ეკატერინე შალიკიანი

ესთეტიკურ ცენტრ "კოლაგენის" დამფუძნებელი

 

"ბომონდი", აგვისტოს ნომერი

 

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.