პიტო სეთურიძის ინსპირაცია - დათა ალექსეევის ბლოგი

სმარტფონებისა და ინსტაგრამის ეპოქაში დაფასებულია ნიჭიერი ადამიანების საინტერესო ხედვა და კრეატიული იდეები.

სოციალური მედია საუკეთესო პლატფორმაა ნებისმიერი წამოწყების წარმატების განსასაზღვრად. მთავარია, პროდუქტი, რომელსაც მომხმარებელს შესთავაზებ, მნიშვნელობა არ აქვს, მაისურის პრინტი იქნება, აქსესუარი თუ უბრალოდ ილუსტრაცია. თუ გეზი სიახლისკენ გექნება და ძველს არ ჩაებღაუჭები, აუცილებლად გეყოლება მომხმარებელიც, წარმოებული პროდუქტი კი ტენდენციური გახდება. სწორედ ამ მომენტში გააცნობიერებ კრეატივისა და ბიზნესის მათრობელ სინთეზს, რომელიც აუცილებლად იქნება საკუთარი თავის განვითარების მყარი საფუძველი.

პიტო სეთურიძე იმ ადამიანთა რიცხვს მიეკუთვნება, რომელთაც არ აქვთ სიახლის შიში და

ნებისმიერი დაბრკოლების გადალახვა ადვილად შეუძლიათ. თბილისის სამხატვრო აკადამიის არქიტექტურის ფაკულტეტის დამთავრების შემდეგ მოღვაწეობს პროდუცტ დესიგნ-ისა და თატტოო-ს ხელოვნების მიმართულებით. ერთი შეხედვითაც შეამჩნევთ, რომ მისი ნებისმიერი ნამუშევარი გამორჩეულია თემატიკითა და ფერებით. პიტოს ცხოვრებაში დიდი ადგილი უჭირავს ინსპირაციას. მისი ყურადღება შეიძლება უმნიშვნელო დეტალმაც კი მიიპყროს და შთაგონების წყაროდაც იქცეს. შეუმჩნეველი არც იმიჯი დაგრჩებათ, რომლის ნიშაც სხვადასხვა სტილიზებური მიმართულების გემოვნებიან ინტერპრეტაციაში მდგომარეობს, შესაბამისად ხშირად ხდება მსოფლიო მედიის ინტერესის ობიექტი.

დათა ალექსეევი


ბოლოს, პიტოს შემოქმედებით ერთ-ერთი გავლენიანი გერმანული ჟურნალი „Zeit Campus" დაინტერესდა და ვრცლად მოუთხრო ფართო აუდიტორიას მისი ცხოვრების შესახებ.


დღეს ხელოვნების სხვადასხვა ჟანრში მოღვაწე გემოვნებიანი ქართველი ჩემი ბლოგის სტუმარია.

- როგორია პიტო სეთურიძის ცხოვრების სტილი?


- ცხოვრებაში ყველაზე მეტად მიყვარს მოგზაურობა და საქმე, რომელსაც ვემსახურები. კარიერული წინსვლისა და განვითარებისთვის ჩემი გრაფიკი ზომაზე მეტად არის გადატვირთული, თუმცა ამით კმაყოფილი ვარ. მოგზაურობისას მიყვარს სხვადასხვა კულტურის აღმოჩენა და შეცნობა, ასევე ახალი ადამიანები და მათთან კომუნიკაცია.

- ეს მოგზაურობის მთავარი პლუსია და ამ ყველაფერს თუ გართობაც ემატება - ორმაგი სიამოვნება.


- ჩემი ცხოვრების სტილი მჭიდრო კავშირშია ხელოვნებასა და მოდასთან. მიყვარს ჩაცმა, გემოვნებიანი ადამიანები, საინტერესო საგნები ნებისმიერ რაკურსში, ავეჯიდან დაწყებული აქსესუარებით დამთავრებული. შესაბამისად, ვცდილობ, მაქსიმალურად ისეთი ვიყო, როგორიც მესახება საკუთარი თავი.

- რა როლს თამაშობს მოგზაურობა შენს შემოქმედებაში?


- ინსპირაციის თვალსაზრისით ძალიან საინტერესო მხარეები აქვს მოგზაურობას და მნიშვნელოვან როლსაც თამაშობს. ბოლოს მიკონოსის კუნძულზე ვიყავი და შთაბეჭდილებით დატვირთული დავბრუნდი. თითოეულ ქვეყანას, ქალაქსა თუ რეგიონს, განსაკუთრებული ესთეტიკა აქვს, როგორც არქიტექტურის, ისე ადამიანთა ცხოვრების თვალსაზრისითაც. მოგზაურობისას უამრავ ადამიანთან გაქვს შეხება, სხვადასხვა ერის ეთნოკულტურა კი, შესაძლებელია, შთაგონების წყარო გახდეს.


ჩემს გარდერობში აზიური სტილის სამოსი და აქსესუარები ჭარბობს. ჩაცმაში მნიშვნელოვანია, როგორ წარმოადგენ ერთმანეთისგან განსხვავებული სამოსის ინტერპრეტაციებს, რაც დაგეხმარება სიახლის შექმნაში და ეს „მიქსი“ ინდივიდუალიზმის იარლიყიც შეიძლება გახდეს.

- როგორ დაახასიათებდი საკუთარ იმიჯს?


- ჩემი იმიჯი არ ჯდება კონკრეტულ ჩარჩოში, ბევრი მიმართულებით ვხედავ მას და ხშირად მივდივარ ექსპერიმენტებზეც. ნებისმიერი სტილი შეიძლება მომეწონოს, თუმცა მე მაინც „მიქსს“ ვამჯობინებ ლუქის ასაწყობად, რომელიც სხვადასხვა შტრიხებითა და დეტალებით მიესადაგება ჩემს ხასიათს. აზიური სტილის სიყვარული ინდოეთში მოგზაურობამ განაპირობა. ჩემი აზრით, აზიური დეტალების მინიმალისტური ვერსია მრავალფეროვან და კომფორტულ ლუქს ქმნის. მაგალითად, წარმოვიდგინოთ ტილო, ეს აქსესუარი შეიძლება წელზე შემოვიხვიო ან თავზე. შედეგი კი ყოველთვის საინტერესო იქნება.

- სად ყიდულობ ტანსაცმელს?


- ძირითადად მოგზაურობისას ვყიდულობ, ზოგჯერ საქართველოშიც ვიმოსები.

- ქართული მოდის ინდუსტრია თამამად მიიწევს წინ, რას გვეტყვი ქართველი დიზაინერების შემოქმედებაზე?


-დასაფასებელია მათი შრომა და წინსვლა საერთაშორისო ასპარეზზე. ხშირად გამოუგზავნიათ საჩუქრებიც. თუმცა, სიმართლე გითხრა, არ ვარ მომხმარებელი. იმ ფასად, რაც ქართველი დიზაინერების სამოსი ღირს, სხვაგან უფრო საინტერესო და სასურველ პროდუქტს შევიძენ. რაც შეეხება შემოქმედებას, გამოვარჩევდი დათუნა სულიკაშვილსა და ვასკა ტაბატაძეს.

- ყურადღებას იქცევს შენი ინსტაგრამის გვერდი საინტერესო ფოტოებით, დაინტერესებული ხარ ფოტოგრაფიით?


-ნებისმიერ ხელოვნებაში მომწონს ესთეტიკა და ჰარმონია, ფოტო იქნება ეს თუ ნახატი. ინსტაგრამი საუკეთესო საშუალებაა, წარმოაჩინო საკუთარი თავი, შენი ხედვა კი მსოფლიოს აჩვენო...

-მნიშვნელოვანია ბიზნესისთვის მსგავსი სოციალური ქსელით სარგებლობა?


-ძალიან მნიშვნელოვანია. ჩემს მაგალითზე ინსტაგრამი პიართან ერთად მარკეტინგიც არის. მომხმარებლის 70%-მდე მაინც ინსტაგრამით მიკავშირდება. როდესაც აქცენტი კონკრეტულ ნამუშევარზე კეთდება, ინფორმაცია უფრო მალე ვრცელდება. ხშირად მყავს უცხოელი მომხმარებლებიც, რაც ძალიან მახარებს. უფრო ვაანალიზებ ამ მომენტში სოციალური მედიის დადებით მხარეებს, როგორც კრეატივის, ასევე ბიზნესის სპექტრში.

- Tattoo ხელოვნება...


- ჩემი ნამუშევრები უფრო მინიმალისტურ მიმართულებას ეკუთვნის. არ მიყვარს გადატვირთული ნახატები და ვაფასებ ზომიერებას. თატტოო ხელოვნებაც ჩემი თავის გამოვლენაა. ესკიზებს რაც შეეხება, მათ თავად ვქმნი. ყოფილა შემთხვევები, როდესაც მომხმარებელს თავისი ვარიანტი შემოუთავაზებია, თუმცა ზუსტი ანალოგი არ დამიხატავს, მხოლოდ დეტალები შემიცვლია. ამ შემთხვევაში დიდ როლს თამაშობს ნდობა, ხოლო როცა უცხო ადამიანი მენდობა, ამით ბედნიერი ვარ.


- შენს ესკიზებში ღია ფერის ტონალობები ჭარბობს...


- კი, ხშირად ფიგურირებს ღია ფერის ტონალობები. სამხატვრო აკადემიაში ფერწერის პედაგოგი მყავდა, ირინა ზარიძე, რომელმაც ერთი წლის განმავლობაში ფერთა თეორიასა და აკვარელის სწორად გამოყენებას დამაუფლა. მომწონდა აკვარელში მუშაობა, ფერთა გრადაცია, მათი ხასიათი... სწორედ ეს გახდა წინა პირობა იმისა, რომ პასტელური ფერებით მეხელმძღვანელა, ამ მიმართულებით კი სამხატვრო აკადემიაში მიღებული ცოდნა გამოვიყენე.

- წლევანდელ მოდის კვირეულზე რამდენიმე დიზაინერის ჩვენებაზე გიხილე, რას განიცდი, პოდიუმზე დგომის დროს?


- პირველად შარშან გამოვედი ჩვენებებზე. დიდი ადრენალინია, პოდიუმზე გავლა... უცნაური შეგრძნებაა, როდესაც ვერაფერს ხედავ განათების გარდა, მაგრამ აუდიტორიას გრძნობ. ეიფორიის მსგავსია, რომელიც მომწონს. ალბათ, მომავალში ვიაქტიურებ.

-ყველაფერთან ერთად, ერთ-ერთი პრესტიჟული კლუბის თანამშრომელი ხარ, რას გვეტყვი დღევანდელი კლუბის კულტურაზე? აქვთ ქართველ ქლაბერებს დამახასიათებელი, თემატური იმიჯი?


-ელექტრონულ მუსიკასა და ქართველ არტისტებზე თუ ვილაპარაკებთ, შეიძლება ითქვას, მოწინავე ადგილზეც ვართ. გულწრფელად გეტყვი, მთელი მსოფლიოს მასშტაბით ასეთი მაღალი დონის კლუბები, როგორიც თბილისშია, არსად მინახავს, გარდა ბერლინისა. თუმცა ქართველი საზოგადოება ვერ დაეწია მაღალ სტანდარტებს, თუნდაც რიგში დგომის კულტურით. რაც შეეხება კლუბური ჩაცმულობის კულტურას, ჯერ იმდენად არ არის განვითარებული, რომ მთლიანად დადებითად შევაფასო, თუმცა შემხვედრია ადამიანები, რომლებიც გამოირჩევიან დამახასიათებელი იმიჯით და საზოგადოების ყურადღებასაც იპყრობენ.

-სამომავლო გეგმების შესახებ...


-ჩემი მთავარი მიზანია განვვითარდე product design-ის კუთხით და დავეუფლო ამ სფეროს პროფესიულად. დიდი სურვილი მაქვს, მაგისტრატურის კურსი გავიარო ლისაბონში. ამჟამად მე და ჩემი მეგობარი ლიზა ტიმჩენკო ვმუშაობთ ავეჯის დიზაინზე, ვამზადებთ სავარძლებს, მაგიდებს, სკამებს... იმის მიუხედავად, რომ ამ სფეროში დამწყები ვარ, ხშირად მაქვს შეკვეთები კაფე-ბარებისა და მოდის მაღაზიებისგან. ეს მახარებს და ვფიქრობ, საწყისი გამოცდილება წარმატების ერთ-ერთი მთავარი კომპონენტია.


დათა ალექსეევი
ფოტო: დათა ალექსეევი

"ბომონდი", აგვისტოს ნომერი

 

იხილეთ ასევე: მეორადი ტანსაცმლის ტენდენცია და 90-იანები 



like
2

კომენტარები

mentori 2017-09-09 02:44
დათა, კარგად აგებული სტატიაა. ყოჩაღ, მომეწონა. ე.ც.

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.