ექსკლუზივი: ჯოანა პლაფსკი - რეალურ და ირეალურ სამყაროთა შერწყმა

ჰოლივუდის გავლენიანი კინოპროდიუსერი, გაყიდვების აგენტი, დევიდ ლინჩის ფონდის საპატიო წევრი, დევიდ ლინჩის კინო-სკოლის თანადამფუძნებელი ჯოანა პლაფსკი, "ბომონდის" ექსკლუზიური სტუმარია.

Homme

საინტერესო ცხოვრების სტილი და საოცარი შინაგანი სამყარო დიდ კვალს ტოვებს ჯოანას წარმატებულ კარიერაზე.


პლაფსკიმ უამრავი ფილმი დააფინანსა, თუმცა, სანამ ამ საქმიანობას შეუდგებოდა, კომპანია „Radiance Films“ დააარსა, რისი მეშვეობითაც მსოფლიოს მასშტაბით დამწყები კინორეჟისორების ფილმებს ყიდდა. როგორც აღნიშნავს, მას არასდროს ჰქონდა შეხება თეატრთან, რადგან მისთვის საზოგადობის ფართო სეგმენტს კინო მოიცავდა.


ჯოანა ისეთი წარმატებული ფილმების

აღმასრულებელი პროდიუსერია როგორიცაა: „Women of Desire“ , „My reincarnation“ , „The Comedian“ და ა.შ.


ფილმის წარმატებულ ბიზნესთან ერთად ტრანსცენდენტული მედიტაცია დიდ ადგილს იკავებს პროდიუსერის ცხოვრებაში. მედიტირებით გატაცებული ჯოანა 6 თვე ინდოეთში ცხოვრობდა, ამასთან, სისტემატურად მოგზაურობდა აზიის სხვადასხვა ქვეყანაში.


ჯოანა 2005 წელს დაარსებული მრავალპროფილური ორგანიზაციის, დევიდ ლინჩის ფონდის წარმომადგენელიც არის. ფონდის ოფისი რამდენიმე ქვეყანაშია გახსნილი, ახლახან ამ ჩამონათვალს საქართველოც შეემატა. ჩვენი სტუმარი საქმიანი ვიზიტით იმყოფება თბილისში და ვრცლად გვესაუბრა თავის პროფესიულ საქმიანობასა და საქართველოსთან დაკავშირებულ გეგმებზე.

- ვინ არის ჯოანა პლაფსკი?


-  ჯოანა პლაფსკის უყვარს ადამიანები, ადიდებს სილამაზეს და სულიერ შეგრძნებებს. არაფერია იმაზე უკეთესი, აღმოაჩინო ხელოვანი ადამიანები ჩვენს ეპოქაში. ეს ჩემი მოწოდებაა. ვფიქრობ, ნიჭიერებას არ გააჩნია საზღვრები, ტალანტი მსოფლიოს ნებისმიერ კუთხეში ერთი და იგივეა, სწორედ ეს არის ჩემი შთაგონების წყარო - ნიჭიერი ადამიანები მსოფლიოს სხვადასხვა კუთხიდან, რომლებიც მინდა გავაცნო სამყაროს. თამამად შემიძლია ვთქვა, ახალი ტალანტების აღმოჩენის შეუქცევადი პროცესი ჩემი ცხოვრების მთავარი მამოძრავებელი ძალაა. ჩემი მოვალეობაა, შინაგანი სილამაზე გამოვიტანო და მოვახდინო რეალური და ირეალური სამყაროს ჰარმონიული შერწყმა, რომელიც სიყვარულისა და მშვიდობის მომგვრელი იქნება თითოეული ჩვენგანის ცხოვრებაში.

- რა როლს ასრულებს სპირიტუალური სამყარო თქვენს შემოქმედებასა და ცხოვრებაში?


- ძალიან გამიმართლა, როცა კოლეჯში მერი ჟიმანშისთან ერთად გავდიოდი მედიტაციის კურსებს, პარალელურად კინომაც დამაინტერესა და გადავწყვიტე, საფუძვლიანად შემესწავლა ეს დარგი. დიდხანს ვიფიქრე, რა მეკეთებინა, სწორედ მედიტაციამ მიმიყვანა უმაღლეს ამბიციამდე და დამეხმარა კინობიზნესშიც. შესაბამისად, სპირიტუალური სამყაროს როლი ჩემს ცხოვრებაში უდიდესია. მედიტირებას ოჯახის წევრებს, მეგობრებსა და თანამშრომლებსაც კი ვასწავლიდი. დღეს ცხოვრება ისეთი დაძაბული და დამთრგუნველია, საჭიროა განტვირთვა, მედიტაცია კი საუკეთესო საშუალებაა, აღმოაჩინო ჭეშმარიტება და განავითარო საკუთარი შინაგანი სამყარო, ისე, რომ უმაღლეს შეგრძნებამდე მიხვიდე.

 

ამბობთ, რომ შესაძლებელია, მედიტაციის საშუალებით პიროვნების ტრანსფორმაცია?


- რა თქმა უნდა, ასი პროცენტით! მედიტაციის დაწყებიდან ადამიანები უმოკლეს პერიოდში აღმოაჩენენ რადიკალურ ცვლილებებს საკუთარ თავში. რამ შეიძლება მოგანიჭოთ ბედნიერება, საუკეთესო წვეულებებზე სიარულმა თუ აქტიურმა ღამის ცხოვრებამ? რა თქმა უნდა, შესაბამის პერიოდში ორივე სასიამოვნო გადაწყვეტილებაა დროის გასატარებლად, მაგრამ ეს არ არის ნამდვილი განტვირთვა. TM მედიტაცია გვაძლევს შესაძლებლობას, რომ ვიგრძნოთ თავი უკეთესად და ვისწავლოთ სიჩუმის მოსმენა.
- საინტერესოდ ჟღერს. ვფიქრობ, დაინტერესდება ჩვენი მკითხველი მედიტაციით...


_ მედიტირებისთვის, პირველ რიგში, აუცილებელია ტექნიკის კარგად ცოდნა. ეს ტექნიკა ათასობით წლის წინ არსებობდა ინდოეთში. ამის შესწავლის შემდეგ აუცილებელია გონებრივი კონცენტრაცია, ფოკუსირება მხოლოდ ერთ წერტილზე და ფიქრებისგან სრული განწმენდა. მედიტირება ნებისმიერ ადგილასაა შესაძლებელი, თვითმფრინავი იქნება ეს თუ სახლი. TM მედიტაცია არ არის დაკავშირებული რელიგიასა და ფილოსოფიასთან, არ საჭიროებს ცხოვრების სტილის შეცვლას. ჩვენ ისედაც უამრავი ტრადიცია დავკარგეთ, ხოლო რომელიც სასარგებლოა და შემოვინახეთ, აუცილებლად უნდა შევინახოთ და გავუფრთხილდეთ.

კინო ბავშვობიდან გიყვართ. დღესდღეობით არაერთი წარმატებული ფილმის პროდიუსერი ხართ. მიგაჩნიათ, რომ კინობიზნესი თქვენი საოცნებო სფერო იყო?


-  ადრეული ასაკიდან მიტაცებდა ხელოვნება, ამიტომ კარგად დავეუფლე მხატვრობას. მას შემდეგ, რაც სასწავლებლად ნიუ-იორკიდან კალიფორნიაში გადავედი, უამრავ ცნობილ პიროვნებას ვხვდებოდი კინობიზნესში. მუდმივად მქონდა კითხვა საკუთარ თავთან, რა უნდა მეკეთებინა მთელი ცხოვრების განმავლობაში. გითხარით, რომ ჩემთვის მთავარი ადამიანია, შეიძლება, სწორედ ამიტომ შევარჩიე კინობიზნესი, ეს ხომ მსოფლიო მასშტაბის კომუნიკაციაა სხვადასხვა რასის, ეროვნებისა და კულტურის ადამიანებთან. მამაჩემი წარმატებულად უძღვებოდა ბიზნესს, ბავშვობიდან ვამჩნევდი, რომ ბიზნესის ალღოც მქონდა. ზუსტად ეს ორმხრივი დაინტერესება გახდა მიზეზი, რომ ჩემი სამყარო და საოცნებო სფერო ხელოვნება და კინობიზნესი გამხდარიყო.

 

- თქვენი ნამუშევრებიდან რომელ ფილმს გამოარჩევდით?


-  ჩემთვის თითოეული პროექტი ღირებული და დასამახსოვრებელია. გამიჭირდება გამორჩევა, თუმცა,
განსაკუთრებულად „ჩემი რეინკარნაცია“ მომწონს, რადგან ფილმში ჩემი ცხოვრებაა ჩადებული. ვაფასებ ჯგუფს, რომელთანაც ვმუშაობ. გაისად ერთ-ერთი პროექტის პრეზენტაცია იგეგმება, რომელშიც დიდ ენერგიასა და რესურსებს ვდებთ. ფილმში დაკავდებიან ბრწყინვალე ჯგუფი და მსახიობები. ვფიქრობ, „ოსკარის“ დონის პროექტი გამოვა.

 

-  მნიშვნელოვანია თქვენთვის ჟანრი, რომელზეც უნდა იმუშაოთ?


-  ჟანრი არა, მსახიობი და რეჟისორი ნამდვილად მნიშვნელოვანია. ტეილორ ჰეკფორდი, ერთ-ერთი საყვარელი რეჟისორია, რომელთანაც შარშან ვითანამშრომლე და გადავიღეთ კომედიური დრამა „ჩომედიანს“, სადაც მთავარ როლს ლეგენდარული მსახიობი, რობერტ დე ნირო ასრულებს. ფილმი წარმატებული გამოვიდა.

- როგორია თქვენი, როგორც ფილმის პროდიუსერის, სამუშაო პროცესი?


- ბევრი ადამიანი ვერ ხვდება, რამდენად მნიშვნელოვანია პროდიუსერის როლი ფილმში. ის მთლიანად უნდა ეკუთვნოდეს პროექტს, რომელზეც აპირებს მუშაობას. პროდიუსერის სამუშაო პროცესი ერთდროულად მრავალფეროვანი და დატვირთულიცაა. მთავარი პრინციპი, ფინანსური საკითხების მოგვარებასთან ერთად, შემოქმედებითი ჯგუფის წევრობაც არის. ახალ ფილმზე მუშაობის დაწყებისას აუცილებლად ვხვდებით უამრავ სცენარისტს, რეჟისორს, ბროკერს, პროდიუსერს... ეს შეხვედრები რიტუალივითაა. მას შემდეგ, რაც ფინანსური და კრეატიული საკითხები გადაწყდება, ვატარებთ კასტინგს ახალი ჯგუფისთვის, სადაც ათასობით ადამიანისგან რამდენიმე ათეულს ვირჩევთ. საინტერესოა მსახიობების შერჩევის პროცესი: პირველ რიგში, რა თქმა უნდა, წინასწარ ვიცით, რომელი მსახიობი უნდა დავაკავოთ კონკრეტულ როლზე. თუმცა აქაც უამრავი დეტალია გასათვალისწინებელი. ერთ-ერთი მნიშვნელოვანი ფინანსური მხარეა.


მაგალითად, თუ გვსურს, რომ ბრედ პიტი დავამტკიცოთ როლზე, უნდა განვსაზღვროთ მისი შემოსავალი,
რათა შესაბამისი ჰონორარი შევთავაზოთ.


ფილმზე მუშაობა რთული და საინტერესო პროცესია, კარგმა შემოქმედებითმა ჯგუფმა და საერთო სწორმა გადაწყვეტილებებმა, შესაძლებელია, დიდი გავლენა იქონიოს ფილმის ხარისხსა და ბიუჯეტზე.

 

ენ ლეიბოვიცთან ერთად
კოსტიუმი: GUCCI

- მოდა თქვენს ცხოვრებაზე დიდ გავლენას ახდენს. რას ფიქრობთ ამ ორი მსხვილი ინდუსტრიის, კინოსა და მოდის ურთიერთგავლენაზე?


- როდესაც ფილმს ვუყურებ, პირველ რიგში, გარდერობი მხვდება თვალში. ყოველთვის, თუ ფილმი მაღალხარისხიანია, აუცილებლად მიიპყრობს კოსტიუმები საზოგადოების ყურადღებას. სამოსი ხომ გვეხმარება, ჩავწვდეთ პერსონაჟის ხასიათს. კოსტიუმის დიზაინი ერთ-ერთი მნიშვნელოვანი ასპექტია ფილმისთვის. რა თქმა უნდა, ამ საკითხზე ცალკე მუშაობს ადამიანი, რომელსაც კოსტიუმების მხატვარი ჰქვია. ყველა დროის ფილმში გასაოცარია შესაბამისი ეპოქის დამახასიათებელი ტანსაცმელი.

ეპოქათაშორისი ცვლილებები კი შთამბეჭდავია და დიდ ემოციებს აღძრავს ჩემში. დღესდღეობით ფილმს აქვს იმის უპირატესობა, გააცნოს მაყურებელს ახალბედა დიზაინერები და პოპულარიზაცია გაუწიოს მათ შემოქმედებას ან პირიქით - ცნობილი დიზაინერის კოსტიუმმა აქციოს ფილმი დასამახსოვრებელი. სწორედ ეს არის მთავარი გავლენა ამ ორ გენიალურ ინდუსტრიაში. საზოგადოებას ყოველთვის ახსოვს, რა ეცვა მსახიობს მის საყვარელ ფილმში. მოდის ინდუსტრიის გავლენა თითქმის ყველა სახელოვნებო სფეროში გვხვდება. ალბათ ერთ-ერთი მთავარი პოპკულტურაცაა. შემიძლია ქართული ბრენდებიც გავიხსენო, მაგალითად MAჩH&MAჩH-ის ხაზი, რომლის სამოსიც ჩემს კარგ ნაცნობს, ნიჭიერ მომღერალს, ქეთი პერის ეცვა. დარწმუნებული ვარ, დაწერდნენ მსოფლიოს გავლენიანი გამოცემები ამის შესახებ. უამრავი ადამიანიც დაინტერესდებოდა ამ მოდის სახლით. ეს კი სერიოზული პლატფორმაა წარმატებისკენ, რადგან მსოფლიო ვარსკვლავი მისაბაძია საზოგადოებისთვის.

 

- როგორია თქვენი დამოკიდებულება ცნობილი დიზაინერებისა და მოდის სახლების მიმართ?


- სიგიჟემდე მიყვარს მოდა და სხვადასხვა დიზაინერის შექმნილი სამოსი. ყველაზე შთამაგონებელი მოდის ეპიცენტრი ჩემთვის ლოს-ანჯელესია. რაც შეეხება ბრენდებსა და დიზაინერებს, ალბათ დიდი დრო დამეხარჯება მათ ჩამოთვლაში. მიყვარს ვალენტინო, რობერტო კავალი, ლუი ვიტონი თავისი განსაკუთრებული მარკეტინგული ხრიკებით. ასევე ვაფასებ ტომ ფორდს, ის, არაჩვეულებრივ დიზაინერთან ერთად, საოცარი კინორეჟისორიცაა. დამწყები დიზაინერების დიდი გულშემატკივარი ვარ, მართლაც არსებობს ახალ თაობაში რაღაც განსაკუთრებული, რაც აღტაცებას იწვევს ჩემში.

- საქმიანი ვიზიტით ხართ ჩამოსული საქართველოში, მნიშვნელოვანი თუ არის დევიდ ლინჩის ფონდი საქართველოში და თუ გაქვთ გეგმები, როგორც ამ ფონდის წარმომადგენელს?


- დევიდ ლინჩის ფონდი უნივერსალური ჯგუფისაგან შედგება. ჩვენი თვითმიზანი ცვლილებებია დადებითისკენ. ვფიქრობ, ფონდი კარგ შედეგამდე გაგვიყვანს თქვენს ქვეყანაში. უამრავი სამომავლო გეგმა მაქვს საქართველოსთან დაკავშირებით:

იგეგმება კინო-სკოლის გახსნა, სიციალური პროექტები, რომელსაც ყველა მალე გაიგებს. კავკასიის ოფისი და მისი პრეზიდენტი, გიგა აგლაძე აქტიურად არიან ჩაბმული გლობალურ პროექტებში. მყუდრო და ლამაზი ქალაქია თბილისი. ბედნიერი ვარ თქვენთან სტუმრობით, რადგან უამრავი საინტერესო ადამიანი გავიცანი, დადებითი ენერგიით დავიმუხტე და აქვე გეტყვით, რომ მალე დავბრუნდები დიდი შემართებითა და უამრავი ახალი იდეით!

 

ტექსტი - დათა ალექსეევი
სტილი - ივანე ქეშიკაშვილი
ფოტო - გიორგი ჟამერაშვილი

like
2

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.