სილამაზის კოქტეილები - ესთეტიკ-ბლოგი

ეკატერინე შალიკიანი (ესთეტიკის ცენტრის Collagen დამფუძნებელი)KD VIII N7 Glowing
დასრულდა ზაფხული და მზის აბაზანებისა და ზაფხულის ხვატის შემდეგ, თქვენს კანს ყველაზე მეტად ღრმა დატენიანება ესაჭიროება. თანამედროვე ქალბატონებს გაგვიმართლა, რადგან ესთეტიკური მედიცინა უსაზღვრო შესაძლებლობებს გვთავაზობს, რომ ეფექტურად ვებრძოლოთ სეზონური ცვლილებებით გამოწვეულ კანის სიმშრალეს თუ ასაკობრივ ნაოჭებს. ისიც საგულისხმოა, რომ მაღალტექნოლოგიურ ლაბორატორიებში შექმნილი ჯადოსნური საშუალებები, რამდენიმე პრობლემის მოგვარებას, ხშირად ერთდროულად ახერხებს.

თქვენს ყურადღებას მეზოთერაპიის საოცარ შესაძლებლობებზე შევაჩერებ, რომელიც სხვადასხვა მიმართულებასა და საშუალებებს აერთიანებს.
მეზოთერაპია პროცედურაა, რომელიც სხვადასხვა ასაკობრივ ჯგუფზე გამოიყენება და, კანის გამაახალგაზრდავებელი ეფექტის გარდა, სამკურნალო თვისებაც გააჩნია. ასევე გამოიყენება, როგორც გარდაუვალი აუცილებლობა.


მეზოთერაპია ყველაზე აქტუალური და პოპულარული პროცედურაა ქალბატონებში. არ მეგულება თანამედროვე ქალი, ვისაც იგი გაკეთებული არ აქვს. რადგან, მეზოთერაპიის საშუალებები შეიცავს თქვენი კანისთვის აუცილებელ ვიტამინებს. ეს საშუალებები კანს ყველა იმ ნივთიერებით ამარაგებს, რომელსაც ასაკის ცვლილებასთან ერთად კარგავს ორგანიზმი. მას, გარდა ესთეტიკური ეფექტისა, აკნეს სამკურნალოდაც მიმართავენ და გარდატეხის ასაკიდან შეიძლება მისი გამოყენება. საფრთხეს არ წარმოადგენს, განსაკუთრებით თუ ევროპულ, ხარისხიან საშუალებებს აირჩევთ. მას იყენებენ პოსტაკნეს სამკურნალოდ და როგორც აუცილებელ პროცედურას ნიშნავენ ლაზერით გამაახალგაზრდავებელი პროცედურის შემდეგ.



ქართველი ქალბატონები მეზოთერაპიას, ნაოჭსაწინააღმდეგო, გამაახალგაზრდავებელი ეფექტისთვის მიმართავენ. თავად ეს საშუალებები იმდენად დაიხვეწა, რომ სხვადასხვა სახელით, სხვადასხვა ეფექტის მისაღებად გამოიყენება. მაგალითად, ბიოსტიმულაცია და ბიორევიტალიზაცია, რომელსაც სახის კანის გაახალგაზრდავებისა და დატენიანებისთვის მივმართავთ.

ბიორევიტალიზაცია `მეზოებში~ შედის და მასში მაღალკონცენტრირებადი ჰიალურონის მჟავას წყალობით ეფექტიც უფრო მაღალი აქვს. რამდენიმე პროცედურის ჩატარებაა სასურველი, თუმცა, მაღალი ფასის გამო, ბევრი ქალბატონი მხოლოდ ერთ პროცედურას და ერთ მილიგრამს სჯერდება, რაც ძალიან ცოტა და არაეფექტურია. ევროპულ ქვეყნებში რამდენიმე პროცედურას და ასე, 3-4 მილიგრამს მაინც მიმართავენ.

ბევრმა ქალბატონმა არ იცის, რომ არსებობს გამამკვრივებელი, წერტილოვანი მეზოთერაპია, რომელიც კონკრეტულ ზონებზე კეთდება - მთელ სახეზე ხუთ წერტილში და არაჩვეულებრივი შედეგი აქვს. ამ საშუალებით ხდება მოდუნებული კუნთის სტიმულაცია, ასევე გრავიტაციული ფტოზის აწევა. ეს პროცესი ახალგაზრდული იერის დასაბრუნებლად მშვენიერი მეთოდია.

მეზოკოქტეილების გარდა, ეფექტური შედეგი აქვს მეზოძაფებს. უფრო გასაგებად რომ ავხსნა, ეს გახლავთ უმაღლესი ხარისხის პოლიდოქსანონისგან დამზადებული იმპლანტები, რომელიც ბიოდეგრადირებადია და გარკვეული დროის შემდეგ გაიწოვება. მეზოძაფებს ადრე მხოლოდ ქირურგები დგამდნენ, თუმცა, იმდენად ადვილი პროცედურაა, რომ თერაპევტები და კოსმეტოლოგებიც

მიმართავენ. მის გამოყენებამდე დგება სახის გეომეტრიული ნახაზი, რომელიც შემდგომ კანქვეშ იქსოვება. ნახაზში გათვალისწინებულია კონკრეტული ადამიანის სახის ოვალი, ან ის კონკრეტული ზონა რომლის აწევაც მას სჭირდება. გრავიტაციულ ფტოზთან საბრძოლველად მეზოძაფი ყველაზე შედეგიანია და დიდხანს ინარჩუნებს ეფექტს, - 2 წლის განმავლობაში, რომ იტყვიან, დროს აჩერებს.

მეზოძაფიც სხვადასხვა სახეობისაა, - სწორი და წიწვოვანი. სახის ოვალის დასახვეწად არაჩვეულებრივია 3D ძაფის გამოყენება, ანუ ნახაზის მიხედვით კარკასის შეკვრა, ხოლო შემდეგ 4D ძაფით სახის ოვალის საბოლოო დახვეწა. ეს უკანასკნელი შედარებით მსხვილი მეზოძაფია ორმაგი წიწვით. საპასუხისმგებლო და ეფექტური პროცედურაა, რის შემდეგ სახის კარკასი პირვანდელ მდებარეობას უბრუნდება. ამ პროცედურასთან ერთადმ თუ მეზოთერაპიისა და პლაზმლიფტინგის კურსსაც ჩაიტარებთ, ბრწყინვალე შედეგს მიიღებთ.

სულ ბოლოსთვის მოვიტოვე ყველაზე ახალი პროცედურა - სახის ბიოარმირება. ეს პროდუქტი ახალი შემოტანილია საქართველოში და მაღალეფექტურობით გამოირჩევა. ის თხევადი მეზოძაფით კეთდება და მაღალი კონცენტრაციით შეიცავს ჩვენი კანისთვის ასე აუცილებელ და მნიშვნელოვან ნივთიერებას ჰიალურონის მჟავას. ეს პროცედურაც მეზოძაფის ანალოგიური სისტემით კეთდება, უსწრაფესად და გაცილებით ხელმისაწვდომია.

მგონი, არაფერი გამომრჩა, რაც მეზოთერაპიის კურსსა და სხვადასხვა პრობლემის დროს სხვადასხვა ხერხის გამოყენებას შეეხებოდა. დამშვიდობებამდე ბლოგს იმ აუცილებელი პროცედურის შეხსენებით დავასრულებ, რომელიც არასდროს უნდა დაგავიწყდეთ და როგორც ესთეტიკური მედიცინის მომხმარებლებმა ყოველთვის უნდა გაითვალიწინოთ: ვიდრე ექიმი ინიექციას გახსნის, აუცილებლად დაინტერესდით მისი წარმომავლობით. უკან არ დაიხიოთ და გამოიყენეთ ინტერნეტი, რომ მისი ხარისხი კიდევ ერთხელ გადაამოწმოთ. დაბოლოს, ინიექციური საშუალება აუცილებლად თქვენ თვალწინ გაახსნევინეთ ექიმს.


"ბომონდი" ოქტომბერი


like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.