ექსტრავაგანტური სილამაზე - დათა ალექსეევის ბლოგი

თითოეული ჩვენგანისთვის მამოძრავებელი ძალა სრულყოფილებისკენ სწრაფვაა, თუმცა სრულყოფილება ყოველთვის სილამაზესთან არ ასოცირდება. ხშირად გვესმის საუბრები გემოვნებასა და იდეალებზე, დამკვიდრებულ სილამაზის სტანდარტებზე, რომელიც ესთეტიკურ ტკბობას იწვევს, მაგრამ არასდროს გვიფიქრია, ვინ შექმნა დაუწერელი კანონები ვიზუალის სრულყოფილების შესახებ, რომელიც მოდურ "ბიბლიად" არის გადაქცეული.

ჩემი აზრით, გაბატონებული სტანდარტების გათვალისწინება მასტიმულირებელია ინდივიდუალური "მე"-ს დასაკარგად. ეს ყველაფერი ესთეტიკური კოლექტივიზმის წარმომადგენლებად გვაყალიბებს, სადაც სილამაზე ადრიანა ლიმას ტუჩებით, მონიკა ბელუჩის ცხვირითა და ანჯელინა ჯოლის თვალებით უნდა განისაზღვრებოდეს. რა თქმა უნდა, მათ მომხიბვლელობაში ეჭვი არავის ეპარება, თუმცა დაუვიწყარი იერისთვის
სულაც არ არის საჭირო ვიზუალური იდეალებით ხელმძღვანელობა. თითოეულ ჩვენგანში არსებობს სილამაზის ის ნაპერწკალი, რომელიც უნდა გავაღვივოთ და წინა პლანზე გადმოვიტანოთ.


ბუნებრივი უფრო შთამბეჭდავია, ვიდრე ხელოვნური, შთამბეჭდავი კი უფრო საინტერესოა, ვიდრე ლამაზი!


დღევანდელი ბლოგი მინდა დავუთმო ესთეტიკურ "კრახს", ექსტრავაგანტურ სილამაზეს, რომელიც განსხვავებულ ემოციებს აღძრავს. ვიზუალური ესთეტიკის ეკლექტიკური აღქმა დამოკიდებულია პიროვნებაზე, რომლის ხასიათშიც სტაბილური და კონცეპტუალური ხედვა არ ჯდება. ხშირ შემთხვევაში ვიზუალის დისჰარმონიულობა აზრთა დიდ სხვადასხვაობასაც იწვევს, თუმცა, მოდის სფეროში ნაკლებად უნდა გაგვიკვირდეს ექსტრავაგანტური ვიზუალის ფენომენი, თუ პირველ რიგში კანადელი მოდელის, ვინი ჰერლოუს, მაგალითს განვიხილავთ.

ვინი ჰერლოუ


ჰერლოუს კანის იშვიათი დაავადება, ვიტილიგოს (პიგმენტური დისბალანსი) სინდრომი აქვს. ადრეულ ასაკში ხშირად გამხდარა თანატოლების დაცინვის ობიექტი, მოდელი, როგორც აღნიშნავს, ამ ნაკლს თვითმკვლელობამდეც კი მიუყვანია, თუმცა დღეს ვინისთვის ზუსტად ვიტილიგოს სინდრომია წარმატების მთავარი კომპონენტი.
იგი გამოირჩევა მეამბოხე ხასიათითაც. 2011 წელს გაავრცელა ვიდეომიმართვა, სადაც დაუფარავად ილაპარაკა თავისი ცხოვრების უცნობ დეტალებსა და დაავადებაზე, რომელსაც არ მისცა რეალობის უარესობისკენ შეცვლის უფლება. რამდენიმეწუთიანმა მიმართვამ დიდი გავლენა მოახდინა მაყურებელზე, რის შედეგადაც, მას ხშირად უწევდა კომუნიკაცია მსგავსი სინდრომის მქონე ადამიანებთან, რომლებისთვისაც ჰერლოუ სტიმული და მაგალითი იყო.
სამოდელო კარიერა მის ცხოვრებასი Aმერიცან Nეხტ თოპ Mოდელ-იდან იწყება, დღესდღეობით კი გოგონა ვიტილიგოს სინდრომით გავლენიანი მოდის სახლების ყველაზე მოთხოვნადი მოდელია.

ანდრეა ფეჯიკი


თვალის ფერი - მწვანე, თმა - ბუნებრივი ქერა, სიმაღლე - 185 სანტიმეტრი.
ნამდვილად გაგაოცებთ ამბავი, რომელსაც იუგოსლავიელ მოდელ ანდრეა ფეჯიკზე გიამბობთ. ერთი შეხედვით ულამაზესი გოგონა, რომელიც საზოგადოებისა და მედიის მხრიდან მუდმივად ყურადღების ცენტრშია, არცთუ ისე დიდი ხანია, რაც პოდიუმს ქუსლიანი ფეხსაცმლით იპყრობს. ანდრეა ტრანსსექსუალი ტოპმოდელია, რომელსაც ბავშვობიდან გაცნობიერებული ჰქონდა გენდერისა და სექსუალობის ფენომენი, თუმცა მისი პირველი ნაბიჯები ანდროგენული ვიზუალის მიმართულებას უკავშირდება.

პარიზის მოდის კვირეულის განმავლობაში, ტრანსგენდერი მოდელი ხშირად მონაწილეობდა ჟან პოლ გოტიეს ჩვენებებში, სადაც ქალის ტანისამოსს ირგებდა, ამავდროულად - მამაკაცისას მარკ ჯეიკობსის ჩვენებებში. უნივერსალური გარეგნობის წყალობით ანდრეა 2011 წელსვე მოხვდა Mოდელს. ცომ-ის 50 საუკეთესო მოდელს შორის, დღესდღეობით კი იგი ერთ-ერთი საუკეთესო ტრანსგენდერი მოდელია მსოფლიოში და მამაკაცის სამოსზე პოდიუმზეც კი უარს ამბობს.

გრეის ჯონსი


რევოლუციური სტანდარტების ეპოქაში დღემდე არ კარგავს აქტუალურობას იამაიკელი მსახიობის, მომღერლისა და კომპოზიტორის, გრეის ჯონსის განუმეორებელი გარეგნობა.
ჯონსი ხშირად თანამშრომლობდა ფრანგ ფოტოგრაფსა და საუკეთესო გრაფიკულ დიზაინერთან, ჟან-პოლ გუდთან, რომელმაც სრულყოფილად აღიქვა ჯონსის ექსტრავაგანტური გარეგნობა და დაეხმარა, ჩამოყალიბებულიყო მუსიკის ისტორიის ლეგენდად. გროტესკული ხასიათის ნამუშევრები ნეოკუბიზმისა და ანდროგენული სტილის მიმართულებას ქმნის. გრეის ჯონსის დახვეწილი ნაკვთები და გეომეტრიული სრუყოფილება თითქოს გიბიძგებს, მოუსმინო მის მუსიკას, უყურო ფილმებს, სადაც თამაშობს...იმიჯი ხომ ხელოვანის შეუქცევადი პროცესი და შემოქმედების ხერხემალია.

როსი დე პალმა


მოდის სამყაროს გარდა, კინოინდუსტრიაშიც უდიდეს როლს თამაშობს ვიზუალი. სად შეიძლება შეგხვდეს ექტრავაგანტური გარეგნობის პერსონაჟები თუ არა ესპანეთის კულტურის გმირის, პედრო ალმოდოვარის, ფილმებში. მისი ფილმები განსხვავებული ადამიანების ურთიერთობებზეა აგებული. თუმცა, თითოეულ ნიუანსს თავისი ქვეტექსტი და სიმბოლური დატვირთვა აქვს. ალმოდოვარისთვის უმნიშვნელოვანესია პერსონაჟის არაორდინარულობა და ხასიათი. რეჟისორი მაყურებელზე მათრობელ ეფექტს ახდენს, თითქოს ამ პერსონაჟებს ყოველდღიურ ცხოვრებაშიც ვხვდებით. ამჯერად პენელოპა კრუზს არ შევეხები და ესპანელ მომღერალსა და მოცეკვავეს, როსი დე პალმას, გაგაცნობთ.

პედრო ალმოდოვარი პირველი იყო, ვინც როსის ექსტრავაგანტურობა აღმოაჩინა. მსახიობი იხსენებს, რომ ერთ ჩვეულებრივ დღეს, გენიალურმა რეჟისორმა მადრიდის კაფეში შენიშნა იგი და დაუფიქრებლად შესთავაზა როლი მომავალ ფილმში.
როსი დე პალმას ხშირად აიგივებენ პიკასოსეულ ნატურასთან, უნიკალური გარეგნობის მქონე ქალბატონმა ეკრანზე გამოჩენისთანავე დაამსხვრია სილამაზის სტერეოტიპები და შემდეგ უკვე ჟან პოლ გოტიეს და ტერი მიუგლერის მუზაც გახდა.

დათა ალექსეევი
"ბომონდი" ოქტომბერი





like
2

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.