Luxury Streetwear - ლუქსბრენდების ბრძოლა თინეიჯერული აუდიტორიისთვის

ჩვენ სულ უფრო ხშირად ვხდებით მოწმენი სხვადასხვა ბრენდის თანამშრომლობისა. ბრენდებისა, რომელთაც თითქოს მკაცრად განსხვავებული მომხმარებელთა სეგმენტი ჰყავდათ - ერთი მხრივ, მოდის სახლები, რომელთა მუდმივი კლიენტურა წარმოადგენდა შეძლებულ სოციალურ ფენას და, მეორე მხრივ, ბრენდები, რომელთა მომხხმარებელი ახალგაზრდული, დინამიკური თაობა იყო, ტრადიციების ნგრევის მოთხოვნილებით. ამ მოვლენების მიზეზების გარკვევას გთავაზობთ მოდის ექსპერტ მანანა ანთელიძის ბლოგში.
ლუქსკატეგორიის მოდის სახლები ცდილობენ, თავიანთი პროდუქცია ხელმისაწვდომი გახადონ უფრო ფართო წრის მომხმარებლებისთვის და პარალელურად ძველი კლიენტურაც შეინარჩუნონ. ამის მიზეზი ის არის, რომ ტრადიციების ერთგულ თაყვანისმცემელთა რიგები ბოლო წლებში
საკმაოდ შეთხელდა. სწორედ ამან განაპირობა ახალგაზრდულ ბრენდებთან თანამშრომლობის დაწყება და ამ გზით ახალგაზრდა მომხმარებლის ძიება. მანანა ანთელიძის ბლოგში სწორედ ამ თემაზე იქნება საუბარი.

- რა ხდება იმ მოდის სახლებში, რომლებიც ყოველთვის ლუქსკატეგორიას მიეკუთვნებოდნენ? რატომ დაიწყეს მათ თანამშრომლობა ახალგაზრდულ ბრენდებთან, რომლებიც ასახიერებენ hip-hop, punk, skate კულტურას? მხედველობაში მაქვს Louis Vuitton-ის კოლაბორაცია supreme-თან, Karl Lagerfeld-ისა - Vans-თან.

- მიზეზი ცალსახად ახალგაზრდა მომხმარებლის ძიებაა. საქმე ისაა, რომ ფუფუნების სამყარო მრავალ მიზეზთა და უმთავრესად ინტერნეტის გამო აღარ არის იდუმალი და მომაჯადოებელი. როდესაც იგებ სიმართლეს იმ უსინდისო დამატებითი ღირებულების შესახებ კაბაზე, რომელიც საშინელ პირობებში მალაიზიის ან ბანგლადეშის ფაბრიკებში მზადდება და იყიდება რამდენიმე ათას დოლარად, მისი შეძენის სურვილი ბევრს უქრება.



გლამურზე უარის თქმას მომხმარებელი მიჰყავს ალტერნატივის ძიებისკენ. კარლ ლაგერფელდი, რომელიც სწრაფად რეაგირებს განწყობებზე, ცდილობს, შეინარჩუნოს მუდმივ მყიდველთა სეგმენტი და, ამავდროულად, მიიზიდოს ახალგაზრდობა - ის თავისი კოლექციების რეკლამირებისთვის იწვევს ცნობილი მშობლების ცნობილ შვილებს - თინეიჯერებს.

მისი მუზები ხდებიან: Cara Delevigne, Willow Smith, Lily-Rose Depp. ის თითქოს ამბობს: აი, თქვენი კერპები, მიჰბაძეთ მათ, ჩაიცვით მათსავით, იყიდეთ Chanel. მაგრამ საქმე ის არის, რომ ეს კერპები რეალურ ცხოვრებაში ძალიან იშვიათად ატარებენ Chanel-ს. ძირითადად მათ აცვიათ ტანსაცმელი, რომელიც შეიძლება დავახასიათოთ, როგორც მოსახერხებელი, ყოველდღიური, სპორტული ელემენტებით, ოდნავ დაუდევარი, რომელსაც პირობითად streetwear-ს ეძახიან.


თითქოსდა ახალგაზრდების არჩევანი მიმართულია ტანსაცმლისა და მათი ფასების დემოკრატიზაციისკენ, მაგრამ არც ისე მარტივია ეს ყველაფერი. სწორედ ახალგაზრდების პრიორიტეტების ფონზე ჩნდება Luxury Streetwear, ეს მოდის ის სეგმენტია, რომელსაც ქმნიან Demna Gvasalia (Vetements), Virgil Ablo (Off White), Kanye West (Yeesy).  რატომ luxury? იმიტომ, რომ კოლექცია მკაცრად განსაზღვრული ტირაჟით გამოდის - მოთხოვნა აღემატება შეთავაზებას და ნაწარმი ხდება რარიტეტული - მათი ფასი მაღლა იწევს. აი, სწორედ ამ სეგმენტში მოხვედრას ითვალისწინებს Karl Lagerfeld-ის კოლაბორაცია Vans-თან, ისევე როგორც Louis Vuitton-ის Supreme-თან.

- ჩემი აზრით, საინტერესოა ისიც, რაც მოდის სახლ Hermes-შიც ხდება. რა შეიცვალა იქ ახალი კრეატიული დირექტორის მოსვლით და როგორ აისახა ეს ცვლილებები რეალიზაციაზე?

- ცვლილებები მართლაც მოხდა. წელს, გაზაფხულზე, პირველად Hermes-ის სახლის ისტორიაში შეიქმნა Resort-კოლექცია. Hermes-ის ნაწარმი ყოველთვის იყო ყველა მოდური ქალის ოცნების საგანი - მათი ძალიან ძვირი ჩანთები Kelly-ი და Birkin-ი, ისევე როგორც აბრეშუმის შარფები, გამოჩენისთანავე გახდნენ საკულტო საგნები. ისინი მათი მატარებლის შეძლებულობისა და განსაკუთრებული ელეგანტურობის სინონიმებად აღიქმებიან. ახალი კრეატიული დირექტორი, პარიზელი Nadege Vanhee Cybulski, Resort-კოლექციის იდეის ავტორი, ხსნის მის აუცილებლობას როგორც შესაძლებლობას, მიიღოს მეტი თავისუფლება, სადაც შემოქმედება შესაძლოა ერწყმოდეს პრაქტიკულობას. მაგრამ სრულიად ნათელია, რომ მისი მთავარი მიზანია, Hermes-ის პროდუქცია ხელმისაწვდომი გახადოს უფრო ფართო წრის მომხმარებლისთვის. ყველასთვის ცნობილია, რომ Resort-კოლექციების ნაწარმის ფასები მნიშვნელოვნად დაბალია მთავარ სეზონურ კოლექციების ნაწარმთან შედარებით.


მეტიც, Nadege Vanhee Cybulski ერთ-ერთ ინტერვიუში ამბობს: "ჩემში აღფრთოვანებას იწვევს, როცა ქალი Hermes-ის რომელიმე ნაწარმს იცვამს უბრალო თეთრ T-shirt-თან ან ჯინსებთან... ეს მოდისა და პიროვნების იდეალური სიმბიოზია".

რჩევა უდავოდ მომწონს: დიდი ხანია, ვატარებ უცნობი ახალგაზრდა დიზაინერის ბლუზას ძალიან ცნობილი ბრენდის ჩანთებთან და ა.შ. სხვა საქმეა, რომ Hermes-ის სახლის პოლიტიკა აქამდე არ ითვალისწინებდა ასეთ შეუნიღბავ აპელირებას ახალგაზრდა მომხმარებლის სეგმენტთან.

- ამ ტენდენციასთან დაკავშირებით, ვფიქრობ, არ შეიძლება არ გაგვახსენდეს Maria Grazia Chiuri, რომელიც სათავეში ჩაუდგა Dior-ის სახლს შარშან შემოდგომაზე. არავის ეეჭვებოდა, რომ მისი პირველი კოლექცია იქნებოდა ხაზგასმით რომანტიკული, მით უმეტეს, რომ იცობდნენ, ის დიდი ხანია, Valentino-ს სახლში ამ ხაზით მუშაობდა. მაგრამ ყველას დიდი სიურპრიზი ელოდა!

- სრულიად მართალი ხარ! Christian Dior Spring 2017 Ready-toWear  გახსნა გოგონამ სპორტული ფეხსაცმლით, ნაწილობრივ გადახოტრილი თავით, მოფარიკავის სამოსში. Dior-ის სახლის ერთგული თაყვანისმცემლებისთვის ეს იყო გამაოგნებელი, რადგან ფრანგების ცნობიერებაში და არა მარტო, Dior-ის სახლი ქალურობის სიმბოლოა, "feminite"-ს ბოლო ბასტიონი.

"მაგრამ რა არის ქალურობა თანამედროვე სამყაროში?" - კითხულობს Maria Grazia Chiuri და თავისივე ჩვენებით პასუხობს, რომ ეს არის სინატიფე და სპორტულობაც, გაპრანჭულობა და პრაქტიკულობაც. კოლექციის ჩვენებაზე მოფარიკავეების სამოსის გარდა, იყო მომხიბვლელი მაქმანებიანი ბლუზები და მშვენიერი ტიულის კაბები მოქარგული ყვავილებით, ფოთლებითა და პატარა ფუტკრებით. მთელი ეს ჯადოქრობა წარადგინეს გოგონებმა უმეტესად სპორტულ ფეხსაცმელში.

"ქალს დღეს არ შეიძლება ჰქონდეს ერთი და იგივე სახე", - ამბობს კრეატიული დირექტორი და ცდილობს, მიიზიდოს გოგონებისა და ახალგაზრდა ქალების დინამიკური თაობა, რომელთაც აქამდე არ სცმიათ Dior-ი.

- თუმცა, ამა წლის გაზაფხულზე ის აჩვენებს Fall 2017 Haute Couture კოლექციას, რომელიც სრულ შესაბამისობაშია მაესტრო Christian Dior-ის მთავარ ესთეტიკურ პრინციპებთან.

- დიახ, ეს მართლაც გასაკვირი კოლექციაა, ერთ-ერთი საუკეთესო იმ სეზონზე, ნამდვილი Haute Couture, ძალიან ელეგანტური, ძალიან დახვეწილი! მაგრამ ამის შემდეგ ის ქმნის Christian Dior Fall 2017 Ready-toWear კოლექციას, სადაც ბევრი ჯინსის ქსოვილია, კომბინეზონი, გაწელილი სვიტერები, უხეში ბუტები - ის უფრო მეტად, ვიდრე წინა Ready-toWear-ია, ორიენტირებულია ახალგაზრდებზე.

ამგვარად, Maria Grazia Chiuri ცდილობს, არ დაკარგოს ძველი მომხმარებლები და ამავდროულად, შეიძინოს ახალი: Haute Couture _ Dior--ის სახლის ტრადიციების თაყვანისმცემლებისთვის, Ready-toWear - ახალგაზრდული და, უფრო მეტიც, თინეიჯერული აუდიტორიისთვის.




- სრულიად ნათელი ხდება, რომ ლუქსსახლებს შორის ნამდვილი ბრძოლა მიმდინარეობს ახალგაზრდა მომხმარებლის სეგმენტის მოსაზიდად. როგორ ფიქრობ, რატომ გახდა ეს საკითხი ასე აქტუალური სწორედ ახლა?

- ტრადიციების ერთგულ თაყვანისმცემელთა რიგები შეთხელდა და არა მარტო მოდის სფეროში. როგორც თავში აღვნიშნეთ, ეს სხვადასხვა მიზეზით ხდება, ხანდახან ბუნებრივი მიზეზითაც - ადამიანები მოკვდავნი არიან. და სრულიად კანონზომიერია ბრძოლა შემდეგი თაობისთვის. ხომ ცნობილია, ვის მხარეზეცაა ახალგაზრდობა, მომავალიც მისია.



მანანა ანთელიძე
"ბომონდი" ოქტომბერი

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.